“Pebrero 4–10. Mateo 4; Lucas 4–5: ‘Adda Kaniak ti Espiritu ti Apo’” Umaykayo, Surmurot Kaniak—Para iti Primary: Baro a Tulag 2019 (2019)
“Pebrero 4–10. Mateo 4; Lucas 4–5,” Umaykayo, Sumurot Kaniak—Para iti Primary: 2019
Agballigi ni Cristo ken ni Satanas, ni Robert T. Barrett
Pebrero 4–10
Mateo 4; Lucas 4–5
“Adda Kaniak ti Espiritu ti Apo”
Rugiam ti panagsaganam para iti daytoy nga adalen babaen ti panangbasa iti Mateo 4 ken Lucas 4–5 Umaykayo, Sumurot Kaniak—Para kadagiti Indibidual ken Pamilia ket makatulong kenka tapno maawatam dagitoy a kapitulo, ken daytoy a balabala ket makaited kenka kadagiti kapanunotan iti panangisuro.
Isuratmo Dagiti Impresionmo
Yawis ti Panagbibinninglay
Kiddawen kadagiti ubbing a mangipasa iti maysa a ladawan ni Jesus manipud iti maysa nga ubing agingga iti sumaruno. No maawat ti tunggal ubing ti ladawan, awisem isuna a mangibinglay iti maysa a banag nga inaramid ni Jesus idi adda Isuna iti daga.
Isuro ti Doktrina
Dagiti In-inaudi nga Ubbing
Kabaelak a pilien ti rumbeng kas ti inaramid ni Jesus.
”Saan a makapagbasol” dagiti babassit nga ubbing (DkK 29:47). Nupay kasta, ti pakaammo ni Jesus a lablabananna ti sulisog ni Satanas ket mabalin a mangparegta kadagiti ubbing a mangirugi ita a pilien ti rumbeng.
Dagiti Mabalin nga Aktibidad
-
Isalaysay ti estoria dagiti sulisog ni Jesus manipud iti Mateo 4:1–11. (Kitaen met iti “Kapitulo 11: Nasulisog ni Jesus,” Dagiti Estoria iti Baro a Tulag, 30–31, wenno ti maitutop a video iti LDS.org.) Kadagiti maitutop a punto iti estoria, saludsodem ti, “Ania ti panagkunam a nasken nga aramiden ni Jesus?”
-
Ipakitam iti maysa a ladawan ni Jesucristo, ken kalpasanna iladawam dagiti mabalin a pilien ti bassit nga ubing. Iti tunggal nasayaat a pili, kiddawen kadagiti ubbing nga umaddang iti maysa nga agturong iti ladawan. Iti tunggal dakes a pili, kiddawem kadakuada nga umaddang iti maysa nga umadayo manipud iti daytoy.
-
Tulongam dagiti ubbing a mangsursuro kadagiti balikas a “Choose the Right Way,”“ Children’s Songbook, 160–61, nga usarem dagiti ladawan, dagiti banag, wenno dadduma pay a visual aid a maitutop kadagiti balikas ti kanta.
Ni Jesucristo ti Mangisalakanko.
Lucas 4:18–19 ket mangilista kadagiti napapateg nga aspekto ti mision ni Jesus. Kasano a matulongam dagiti ubbing a mangbigbig iti pateg ti inaramidna para kadakuada?
Dagiti Mabalin nga Aktibidad
-
Basaem ti Lucas 4:18–19 kadagiti ubbing, ken ilawlawag no ania ti nakaibaonan ni Jesucristo nga aramidenna iti daga.(mangisuro, manglinglingay, ken mangagas kadagiti tao). Ibinglay no kasano a naaramidna daytoy kenka.
-
Awisem ti sumagmamano nga ubbing nga agpammarang a matiktikaw, naliday, wenno masakit. Kiddawen kadagiti dadduma nga ubbing a mangyakem iti mabalinda nga aramiden a makatulong kadakuada. Paneknekam nga immay ni Jesucristo tapno mangisuro, mangliwliwa, ken mangagas kadatayo, ken tapno nasken a surotentayo ti pagwadanna.
-
Mangipakita kadagiti ladawan ni Jesus a mangipatpatungpal kadagiti aspekto ti misionna (kitaen iti Libro ti Arte ti Ebanghelio), ket idawat kadagiti ubbing a mangiladawan no ania ti ar-aramiden ni Jesus. Mangipakita met kadagiti ladawan dagiti tao nga agkagkagumaan nga agbalin a kas ken ni Jesus (mabalin a makasarakka itisumagmamano iti magasin ti Simbaan.
-
Mangisuratka kadagiti pidaso ti papel iti ragup dagiti balikas a mangrugi iti “Gapu ken ni Jesucristo” (kas iti “Gapu ken ni Jesucristo, makapagdedenna ti pamiliak iti agnanayon”). Awisen ti tunggal ubing a pumidot iti maysa kadagiti pidaso ti papel, ken tulongam ida a mangbasa iti ragup dagiti balikas.
Aw-awisennatayo ni Jesucristo nga agbalin a “dumadakliskadagiti tao”
Ti awag ti Mangisalakan a, “Surotendak, ket pagpabalinenkayto a dumakdaklis kadagiti tao”(Mateo 4:19), ket mayaplikar iti tunggal maysa, agraman dagiti ubbing.
Dagiti Mabalin nga Aktibidad
-
Awisem ti dua nga ubbing nga agpammarang a kas kada Simon Pedro ken Andres bayat ti panangbasam iti Mateo 4:18–22. Tulongam dagiti ubbing a mangilasin no ania ti insuko dagitoy a tao tapno surotenda ni Jesus.
-
Pagsisinnublatem dagiti ubbing a mangisalaysay iti estoria manipud kadagitoy a bersikulo babaen iti panangusar iti ladawan iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia.
-
Aggigiddaan a mangkanta iti “I Will Follow God’s Plan,” Children’s Songbook, 164. Ania ti masursurotayo manipud iti daytoy a kanta maipanggep iti panangsurot ken ni Jesucristo?
-
Usarem ti panid ti aktibidad daytoy a lawas tapno ilawlawag kadagiti ubbing no kasano a makapagbalinda a “dumadaklis kadagiti tao” babaen ti panangsurot ken ni Jesus. Mabalin met nga agay-ayam iti paris-paris: mangguped ti dua a kopia ti tunggal ikan, ikabilda a nakapakleb, ken awisem dagiti ubbing a baliktadenda dagitoy a saggaysa ti maminsan tapno makaaramid iti paris paris
Aw-awagan ni Cristo dagiti Dua a Disipulo, ni Gary Ernest Smith
Isuro ti Doktrina
Dagiti In-inauna nga Ubbing
Impakita ni Jesus ti pagwadan kaniak babaen iti panangkedkedna iti sulisog.
Uray pay ni Jesucristo ket sinulisog ni Satanas, ngem saan a simmuko Isuna. Kasano a matulongam dagiti ubbing a sumurot iti pagwadanna?
Dagiti Mabalin nga Aktibidad
-
Agaramid iti tsart iti pisarra nga addaan ti nakasurat a Dagiti Sulisog ni Satanas ken Dagiti Sungbat ni Jesus. Tulongam dagiti ubbing a mangpunno iti tsart babaen ti panangusar iti Mateo 4:1–11 ken Lucas 4:1–13 Saludsodem dagiti ubbing no kasano a makasurotda iti pagwadan ni Jesus.
-
Isuratmo ti sumagmamano a senario a mabalin a pakasulisogan ti maysa nga ubing nga agaramid iti dakes a pili. Pagpiliem ti maysa nga ubing a basaen, ken ilawlawagna iti klase no kasano a pagkedkedanda ti sulisog iti dayta a situasion.
Makatulong ti panagayuno tapno mariknak nga asidegak iti Nailangitan nga Ama.
Sakbay nga inrugina ti panagministrona, nagayuno ken “nakisarita ti Dios” ni Jesus (Patarus ni Joseph Smith, Mateo 4:2 [iti Mateo 4:2, footnote c]). Tulongam dagiti ubbing a makitada no kasano a makaited kadakuada iti naespirituan a kinapigsa ken makatulong kadakuada a mariknada nga asidegda iti Nailangitan nga Ama.
Dagiti Mabalin nga Aktibidad
-
Awisem ti maysa nga ubing a mangbasa iti napigsa iti Mateo 4:1–2 nga us-usaren ti nabalbaliwan a Patarus ti Joseph Smith a masarakan kadagiti footnote. Ania ti inaramid ni Jesus tapno “makitipon iti Dios” Ibinglay no kasano a nakatulong kenka ti panagayuno tapno mariknam nga as-asidegka iti Nailangitan nga Ama.
-
Awisem dagiti ubbing a nakapagayuno idin tapno mangibinglay kadagiti padasda. Kasano nga ilawlawagda ti panagayuno iti maysa a tao a saan pay pulos a nagayuno idi?
-
Isurat dagiti saludsod maipapan iti panagayuno (kas iti apay, kaano, wenno kasano ti pangayunotayo) kadagiti pidaso ti papel, ken ikabil dagitoy iti maysa a malukong. Awisem dagiti ubbing a mangala ti saludsod ken padasenna a sungbatan daytoy. Ania dagiti padas a mabalinmo ken dagiti ubbing nga ibinglay maipapan iti panagayuno?
Ni Jesucristo ti Mangisalakanko.
Panunotem no kasano a nabendisionan ti Mangisalakan ti biagmo. Kasano a matulongam dagiti ubbing a nasaysayaat a mangbigbig iti pateg ti impluensiana iti biagda?
Dagiti Mabalin nga Aktibidad
-
Awisem dagiti ubbing nga umay iti klase a nakasagana a manggupgop iti Lucas 4:16–30. Makatulong nga usaren ti “Kapitulo 17: Dagiti Makagura a Tao ti Nazaret,” Dagiti Estoria ti Baro a Tulag, 42–43; ti maitutop a video (LDS.org); wenno ti video a “Jesus Declares He Is the Messiah” (LDS.org).
-
Basaen ti Lucas 4:18 iti idinto a sumursurot dagiti ubbing. Kiddawen kadakuada nga agaramidda ti listaan dagiti banag a kinuna ti Mangisalakan nga immayanna nga aramiden. Kiddawen kadagiti ubbing a mangibinglay kadagiti a pagwadan kadagiti panawen nga inaramid ni Cristo dagitoy, iti man nasantuan a kasuratan wenno iti biagda.
Awisennatayo ni Jesucristo a sumurot Kenkuana ken agabalintayo a “dumadaklis kadagiti tao.”
Adu ti wagas a mabalin a suroten dagiti ubbing ti Mangisalakan ket agbalinda a “dumadaklis kadagiti tao”(Mateo4:19). Kasano a matulongam dagiti ubbing a makitada a makapagbalinda a nasayaat nga impluensia iti dadduma?
Dagiti Mabalin nga Aktibidad
-
Awisem dagiti ubbing a mangbasa iti Mateo 4:18–22 ken Lucas 5:1–11. Kasano a simmungbat dagiti disipulo ni Jesus ti awagna a sumurot Kenkuana? Ania ti maaramidtayo tapno masurot ti pagwadanda?
-
Ipakita kadagiti ubbing ti sumagmamano a ramit a pagkalap iti ikan wenno ladawan ti maysa a mangngalap wenno agdakdaklis. Ania ti kayat a sawen ti agbalin a “dumadakllis kadagiti tao”? Ania dagiti ramit nga adda kadatayo a makatulong tapno agbalintayo a dumadaklis kadagiti tao?
Yallukoy ti Panagsursuro iti Pagtaengan
Awisem dagiti ubbing a mangibinglay kadagiti pamiliada iti nasursuroda maipapan iti panagbalin a dumadaklis kadagiti tao.
Panangpadur-as iti Panangisurotayo
Mabigbig dagiti ubbing ti impluensia ti Espiritu. Isuro kadagiti ubbing a dagiti mariknada a talna, ayat, ken nabara a puso no agsarita wenno agkantada maipapan ken ni Jesucristo ken ti ebangheliona ket naggapu iti Espiritu Santo. Dagitoy a rikna ti mangpatibker kadagiti pammaneknekda.