“Enero 21–27. Juan 1: Nasarakanmi ti Mesias,” Umaykayo, Sumurot Kaniak—Para kadagiti Indibidual ken Pamilia: Baro a Tulag 2019 (2019)
“Enero 21–27. Juan 1,” Umaykayo, Sumurot Kanirak—Para kadagiti Indibidual ken Pamilia: Baro a Tulag 2019
Enero 21–27
Juan 1
Nasarakanmi ti Mesias
Bayat ti panagbasam ken panagutobmo iti Juan 1, isuratmo dagiti impresion a naawatmo. Ania dagiti mensahe a mabirukam nga isunto ti kapapatgan kenka ken ti pamiliam? Ania ti mabalinmo nga ibinglay kadagiti klasem iti Simbaan?
Suratmo Dagiti Impresionmo
Napanunotmo kadin no nailasinmo koma ni Jesus ti Nazaret kas Anak ti Dios no sibibiagka idin kabayatan tipanagministrona iti daytoy a biag? Iti adu a tawen a naguray ken nagkararag dagiti napudno nga Israelita, a pakairamanan da Andres, Pedro, Felipe ken Natanael, iti yaay ti naikari a Mesias. Idi nakitada Isuna, kasano ti pannakaammoda nga Isu ti Maysa a birbirokenda? Kas met iti panangammotayo amin iti Mangisalakan—babaen ti panangawat ti awisna nga “umaykayo ket kitaenyo “para iti bagbagitayo (Juan 1:39). Mabasatayo ti maipanggep Kenkuana kadagiti nasantuan a kasuratan. Mangngegantayo ti doktrinana. Mapaliiwtayo ti wagasna iti panagbiag. Mariknatayo ti Espirituna. Iti dalan, matakuatantayo, kas iti inaramid ni Natanael, nga am-amonatayo ti Mangisalakan ken ay-ayatennatayo ken kayatna nga isagananatayo nga umawat kadagiti “nain-indaklan a bambanag” (Juan 1:50).
Dagiti Kapanunotan para iti Bukod a Panagadal iti Nasantuan a Kasuratan
Ti Ebanghelio ni Juan
Asino ni Juan?
Ni Juan ti maysa a disipulo ni Juan Bautista ken idi agangay nagbalin a maysa kadagiti umuna a pasurot ni Jesucristo ken maysa kadagiti Sangapulo-ket-Dua nga Apostolna. Insuratna ti Ebanghelio ni Juan, ti sumagmamano a surat, ken ti libro ti Paltiing. Iti Ebangheliona, intudona ti bagina a kas disipulo a “dinungdunggo ni Jesus” ken ti “sabali a disipulo” (Juan 13:23; 20:3). Nalaus unay ti kinapasnek ni Juan iti pannakaikasaba ti ebanghelio ta indawatna pay ti agnaed ditoy daga agingga iti Maikadua a Yaay ti Mangisalakan tapno mayegna pay ti adu a kararua ken Cristo (kitaen iti DkK 7:1–6).
Kitaen met iti Pangiwanwan iti Nasantuan a Kasuratan, “Juan” ken “Juan, ti Ebanghelio ni.”
Addan ni Jesuscristo “idi punganay iti Dios.”
Rinugian ni Juan ti Ebangheliona babaen ti panangiladawanna iti aramid nga impatungpal ni Cristo sakbay ti Pannakayanakna: “Idi punganay … ti Balikas [Jesucristo] adda iti Dios.” Ania ti masursurom manipud kadagiti bersikulo 1–5 maipanggep iti Mangisalakan ken ti aramidna? Masarakam dagiti makatulong a panangilawlawag iti Patarus ti Joseph Smith, Juan 1:1–5 (Kitaen met iti Patarus ni Joseph Smith, Juan 1:1–19 iti Pangiwanwan iti Nasantuan a Kasuratan). Bayat ti panangirugim nga agadal maipapan iti biag ti Mangisalakan, apay a napateg nga ammuen ti maipapan Iti aramidna iti biag sakbay daytoy a biag?
Kitaen met iti “Jesus Christ Chosen as Savior,” Gospel Topics, topics.lds.org.
Agpaneknek dagiti disipulo ni Jesucristo ti maipapan Kenkuana.
Naparegta ni Juan a mangsapul iti Mangisalakan gapu iti pammaneknek ni Juan Bautista, a nangipakdaar nga “immay tapno mapaneknekanna ti … ti pudno a Silaw” (Juan 1:8–9, 15–18). Nangted uray ni Juan mismo iti nabileg a pammaneknek maipapan iti biag ken mision ti Mangisalakan.
Mabalin a makaay-ayo ti agaramid iti listaan dagiti kinapudno nga inraman ni Juan iti pangrugi a pammaneknekna maipapan ken Cristo (dagiti bersikulo 1–18; kitaen met iti Patarus ti Joseph Smith, Juan 1:1–19 [iti Pangiwanwan iti Nasantuan a Kasuratan). Apay iti panagkunam nga inrugi ni Juan ti Ebangheliona kadagitoy a kinapudno? Ibilangmo nga isurat ti pammaneknekmo maipapan ken ni Jesucristo—ania ti kayatmo nga ibinglay? Ania dagiti padas a nakatulong kenka a mangam-ammo ken sumurot iti Mangisalakan? Asino ti mabendisionan iti panangdengngeg iti pammaneknekmo?
Ania ti kaipapanan ti “agbalin nga annak ti Dios”?
Nupay espiritutayo amin nga annak a lallaki ken babbai ti Dios, no agbasoltayo agbalintayo a ganggannaet wenno naisina manipud Kenkuana. Idiayaannatayo ni Jesucristo iti maysa a dalan nga agsubli. Babaen ti pangsubbot a sakripisio ken ti panagtulnogtayo kadagiti katulagan ti ebanghelio, Isu ti “[mangted kadatayo] iti bileg nga agbalin manen nga annak a lallaki [ken babbai] ti Dios”. Mayanaktayo manen ket agbalin a makitunos iti Amatayo, maikari iti agnanayon a tawidna ken agtawid iti amin nga adda Kenkuana (kitaen iti Taga Roma 8:14–18; Jacob 4:11).
Adda kadin nakakita iti Dios?
Nairekord iti Daan a Tulag dagiti pagarigan dagiti tao a nakakita iti Dios (kitaen iti Genesis 32:30; Exodo 33:11; Isaias 6:5). Ngem apay a kuna ni Juan Bautista nga “awan ti tao a nakakita iti Dios uray kaano”? Ti Patarus ni Joseph Smith daytoy a bersikulo (kitaen iti Juan 1:18, footnote c) ket mangilawlawag nga agparang ti Dios Ama kadagiti tao, ken no aramidenna, paneknekanna ti maipapan iti Anakna. Kas pagarigan, idi nagparang Isuna ken ni Joseph Smith iti Sagrado a Kakaywan, kinunana ken ni Joseph, “Daytoy ti Ay-Ayatek nga Anakko. Dumngegka Kenkuana!” (Joseph Smith—Pakasaritaan 1:17; kitaen met iti DkK 76:23). Adda dagiti sumagmamano a dadduma pay a nairekord apagarigan a nakakitaan dagiti tattao iti Dios Ama iti parmata (kitaen iti Dagiti Aramid 7:55–56; Apocalipsis 4:2; 1 Nephi 1:8; DkK 137:1–3) wenno nakangngeg Iti timekna a mangipampaneknek maipapan iti Anak (kitaen iti Mateo 3:17; 17:5; 3 Nephi 11:6–7).
Asino ni Elias, ken asino “dayta a propeta”?
Nasdaaw dagiti dadaulo a Judio no ipatpatungpal ni Juan Bautista ti nagkauna a padto maipapan kadagiti propeta nga umayto iti masungad nga aldaw kadagiti tao. Sinaludsodda kenkuana no isu ni Elias, a maysa a porma ti Griego ti Elias, ti nagan ti propeta a nangipadto a mangisubli kadagiti amin a banag (kitaen iti Malakias 4:5–6). Dinamagna pay no isu “dayta a propeta,” a mabalin a mangitudo iti “propeta” a nadakamat iti Deuteronomio 18:15. Inlawlawag ni Juan nga awan kadagitoy ngem isu ti propeta nga imbaga ni Isaias a mangisagana iti dalan iti yaay ti Apo (kitaen iti Isaias 40:3).
Kitaen met iti Pangiwanwan iti Nasantuan a Kasuratan, “Elias.”
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasam kadagiti nasantuan a kasuratan a kaduam ti pamiliam, makatulong ti Espiritu kenka a mangammo no ania dagiti pagbatayan a yunay-unay ken ilawlawag tapno maipaay dagiti kasapulan ti pamiliam. Dagitoy dagiti sumagmamano a singasing:
Bayat ti panagadaltayo kadagiti nasantuan a kasuratan, umawattayo iti inspirasion para iti biagtayo.
Kasano a matulongam ti pamiliam a mangiladawan iti panunotda iti no ania ti nabasada maipanggep iti silaw kadagitoy a bersikulo? Mabalin a pagsisinnublatem dagiti miembro ti pamilia a manglawag iti silaw iti nasipnget a siled ken mangibinglayda ti no kasano nga agbalin ti Mangisalakan a Silaw iti biagda. Kalpasanna, bayat ti panangbasam iti Juan 1:4–10, mabalin nga adda inayon dagiti miembro ti pamilia a nalawag a pannakaammo ken pannakaawat [insight] iti pammaneknek ni Juan maipapan ken ni Jesucristo, ti Silaw ti Lubong.
Kitaen ti pammaneknek ni Juan Bautista iti bersikulo 36. Ania dagiti bunga ti pammaneknekna? (kitaen dagiti bersikulo 35–46). Ania ti nasursuro ti pamiliam manipud kadagiti tao a nailadawan kadagitoy a bersikulo maipapan iti no kasano nga ibinglay ti ebanghelio?
Ania ti inaramid ni Natanael a nakatulong kenkuana a nakagun-od iti pammaneknek maipapan iti Mangisalakan? Kasano a nagun-odtayo dagiti pammaneknektayo?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Panangisurotayo
Ibinglay dagiti adalen a banag [object lesson]. Awisem dagiti miembro ti pamilia a mangbirok kadagiti banag a mabalinda nga usaren a makatulong kadakuada a makaawat kadagiti pagbatayan nga masarakan kadagiti nasantuan a kasuratan a basbasaenyo kas maysa a pamilia. Kas pagarigan, mabalinda nga usaren ti kandela a mangibagi iti Silaw ni Cristo (kitaen iti Juan1:4).
Parsuaen ni Jehova ti Lubong ni Walter Rane