ti pamilia a kumitkita iti photo album

Disiembre 31–Enero 6

Responsabletayo para iti Bukodtayo a Panagsursuro

Ti panggep ti Umaykayo, Sumurot Kaniak—Para kadagiti Indibidual ken Pamilia ket tapno tulongannaka nga umasideg ken Cristo ken agbalin a naun-uneg ti pannakapasurotmo iti ebangheliona. Daytoy a resource ket makatulong kenka a mangawat kadagiti nasantuan a kasuratan ken mabirokam kadagitoy ti naespirituan a pigsa a kasapulam ken ti pamiliam. Kalpasanna, iti klasem iti Simbaan, maisaganakanto a mangibinglay kadagiti nalawag a pannakaammo ken pannakaawat (insights) ken mangparegta kadagiti padam a Sasanto kadagiti panagkagumaanda a sumurot ken ni Cristo.

Suratmo Dagiti Impresionmo

“Ania ti sapulenyo?“ Sinaludsod ni Jesus kadagiti disipulona (Juan 1:38). Mabalin a damagenyo iti bagiyo ti isu met la a saludsod—ta no ania ti naammuanyo iti Baro a Tulag daytoy a tawen ket agpannurayto no ania ti birokenyo. “Agsapulkayo, ket makasarakkayto” ti kari ti Mangisalakan (Mateo 7:7). Kasta met a damagem dagiti saludsod nga umay iti panunotmo bayat ti panagadalmo, ken kalpasanna ikalikagummo a sireregta ti agbirok kadagiti sungbat. Iti Baro a Tulag mabasamto ti maipapan kadagiti nabileg a naespirituan a padas dagiti disipulo ni Jesucristo. Kas napudno a disipulo ti Mangisalakan, mabalin a maaddaanka kadagiti bukodmo a nabileg a naespirituan a padas bayat ti panangawatmo iti awis ti Mangisalakan, a masarakan iti daytoy sagrado a pagbasaan, “Umayka, surotennak” (Lucas 18:22).

icon iti bukod a panagadal

Dagiti Kapanunotan para iti Bukod a Panagadal iti Nasantuan a Kasuratan

Tapno napudpudno ti panagsursuro manipud iti Mangisalakan, nasken nga awatek ti awisna nga, “Umayka, surotennak.”

Ti awis ti Mangisalakan, “Umayka, surotennak,” ket mayaplikar iti amin—no nabiit tay pay nga adda iti dalan ti kinadisipulo wenno nagnatayon iti daytoy iti unos ti panagbiagtayo. Daytoy ti awisna iti nabaknang nga agtutubo a lalaki a mangikarkarigatan nga agtungpal kadagiti bilin (kitaen iti Mateo 19:6–22). No ania ti nasursurona—ken ania ti nasken a sursuruentayo amin—isu ti kaipapanan ti panagbalin a disipulo ket ti panangted iti sibubukel a kararuatayo iti Nailangitan nga Ama ken ni Jesucristo. Agprogresotayo iti kinadisipulotayo no no ti ammuentayo no ania dagiti pagkurangan, balbaliwan, ken kalikagumantayo nga ad-adda a sumurot Kadakuada.

Mangrugi ti panagsursurotayo manipud iti Mangisalakan no ikarigatantayo a maawatan no ania ti insurona. Kas pagarigan, kasano a mapauneg ti pannakaawatmo maipapan iti pammakawan bayat ti panagsukisokmo kadagiti sumaganad?

Dagiti pannursuro ti Mangisalakan (kitaen iti Mateo6:14–15; 18:21–35)

Maysa a pagwadan manipud iti biagna (kitaen iti Lucas 23:33–34)

Nupay kasta, ti panagsursuro ket saan a naan-anay agingga a surotentayo ti Mangisalakan babaen ti panagbiag iti no ania ti insurona. Kasano nga agbalinka nga ad-adda a managpakawan?

No kayatmo a sursuruen ti ad-adu pay, padasem daytoy nga aktibidad iti sabali pay a pagbatayan ti ebanghelio, kas iti ayat wenno kinapakumbaba.

Responsableak para iti bukodko a panagsursuro.

Insuro ni Elder David A. Bednar: “Kas agsursuro, nasken nga agtignaykayo ken agtignayak ken agbalin nga agipatpatungpal kadagiti balikas ken saan a gagangay a dumdumngeg laeng ken agpatignay. Datayo kadi dagiti agsungbat nga agtignay ken agkalikagum iti panagsursuro babaen ti pammati, wenno agur-uraytayo kadi a masuruan ken agpatignay? … Ti maysa nga agsursuro a mangus-usar iti kinawaya nga agpili babaen iti panagtignayna a maitunos kadagiti umno a pagbatayan ket manglukat iti pusona iti Espiritu Santo ken mangawis iti pangisuro, pangpaneknek a bilegna, ken pangpatalged a saksi. Ti panagsursuro babaen ti pammati ket agkasapulan iti naespirituan, napanunotan, ken pisikal a panagkagumaan ken saan a basta dumngeg laeng”(“Seek Learning by Faith,” Ensign, Sept. 2007, 64).

Ania ti kaipapanan ti umawat iti pagrebbengan para it bukodmo a panagsursuro? Sapulem dagiti mabalin a sungbat iti palawag ni Elder Bednar ken iti sumaganad a nasantuan a kasuratan: Juan 7:17; 1 Taga Tesalonica 5:21; Santiago 1:5–6, 22; 2:17; 1 Nephi 10:17–19; 2 Nephi 4:15; Alma 32:27; ken Doktrina ken Katulagan 18:18; 58:26–28; 88:118. Ania ti mariknam a makaparegta nga aramiden tapno agbalin nga ad-adda nga aktibo iti panangsursuro iti ebanghelio?

Nasken a maammuak ti kinapudno para iti bagik.

Nalabit nga adda dagiti am-ammom a tattao a kasla saan a pulos mapukaw ti pammatida, uray no ania ti mapasamak iti biagda. Mabalin nga ipalagipda kadakayo ti lima a manakem a babbalasang iti pangngarig ti Mangisalakan (kitaen iti Mateo 25:1–13). Mabalin a saanyo a makita dagiti napasnek a panagkagumaanda a mangpapigsa kadagiti pammaneknekda maipapan iti kinapudno. Nasken a naregtatayo amin nga agkalikagum a mangpapigsa kadagiti pammaneknektayo gapu ta, kas nasursuro dagiti maag a babbalasang, saantayo a mabulod ti pannakabalbaliw [conversion] manipud iti asino man.

Kasano a magun-od ken mataraonantayo dagiti bukodtayo a pammaneknek? Isuratmo dagiti kapanunotam bayat ti panangutobmo kadagiti sumaganad a nasantuan a kasuratan: Lucas 11:9–13; Juan 5:39; Juan 7:14–17; Dagiti Aramid 17:10–12; 1 Taga Corinto 2:9–11; ken Alma 5:45–46. (Kitaen met iti “Testimony,” Dagiti Topiko ti Ebanghelio, topics.lds.org.)

agtutubo a babai iti dalan

Nasken a manggun-od ti tunggal maysa kadatayo iti pammaneknek para iti bagbagitayo.

Ania ti nasken nga aramidek no addaannak kadagiti saludsod?

Bayat ti panagbirokmo iti naespirituan a pannakaammo, sumangbayto dagiti saludsod iti panunotmo. Makatulong kenka dagiti sumaganad a pagbatayan a mangsungbat kadagiti saludsod kadagiti wagas a mangpabileg iti pammati ken pammaneknek:

1. Biruken ti pannakaawat babaen ti nadiosan a naituding a pagadawan. Ti Dios ti pagtaudan ti amin a kinapudno, ket ipalgakna ti kinapudno babaen ti Espiritu Santo, dagiti nasantuan a kasuratan, ken dagiti propeta ken apostolna

2. Agtignay iti pammati. No saan a dagus nga umay dagiti sungbat, agtalekka nga ipalgakto ti Apo dagiti sungbat iti umisu a panawen. Iti kabayatanna, pagtalinaedem ti panagbiagmo babaen ti kinapudno nga ammomon.

3. Agtungpal iti agnanayon a perspektibo. Padasem a kitaen dagiti banag a kas iti panangkita ti Apo kadakuada, saan a kas iti panangkita ti lubong. Kitaem dagiti saludsodmo iti konteksto ti plano ti pannakaisalakan ti Nailangitan nga Amatayo.

icon iti sangapamiliaan a panagadal

Dagiti Kapanunotan para iti Sangapamiliaan a Panagadal iti Nasantuan a Kasuratan

Bayat ti panagbasam kadagiti nasantuan a kasuratan a kaduam ti pamiliam, makatulong ti Espiritu kenka a mangammo no ania dagiti pagbatayan a yunay-unay ken ilawlawag tapno maipaay dagiti kasapulan ti pamiliam. Dagitoy ti sumagmamano a singasing:

Mateo 13:1–23

Maysa a naindaklan a wagas a makatulong iti pamiliam tapno agsagana a masursuruan manipud iti Baro a Tulag iti daytoy a tawen ket subliem nga adalen ti pangngarig ti agmulmula. Mabalin a maay-ayo ti pamiliam a mangbuybuya kadagiti nadumaduma a kita ti daga iti asideg ti pagtaenganyo tapno iladawan iti panunotda dagiti klase ti daga a nailadawan iti pangngarig. Ania ti maaramidtayo a mangsukay iti “nasayaat a daga” iti pagtaengantayo? (Mateo 13:8).

Taga-Galacia 5:22–23; Taga-Filipos 4:8

“Bagbagaantayo dagiti nagannak ken annak a mangted iti kangatuan a panangipangpangruna iti panagkararag ti pamilia, family home evening, panagadal iti ebanghelio ken panangiwanwan, ken dagiti makaay-ayo nga aktibidad ti pamilia. Kasano man iti kapategna wenno maikanatad dagiti sabsabali pay a pagkasapulan wenno aktibidad, saanda nasken a mapalubosan a mangsukat kadagiti nadiosan a naituding a pagrebbengan a dagiti laeng a nagannak ken pamilia ti umdas a makaaramid “ (“Letter from the First Presidency,” Liahona, Dis. 1999, 1).

Iti rugi ti baro a tawen ti napintas a panawen a mangangay iti family council maipanggep iti panangpabalinyo iti pagtaenganyo nga ad-adda a pangipamaysaan iti ebanghelio. Ania dagiti kapanunotan nga umay iti panunotmo bayat ti panangbasam kadagiti bendision ken pammagbaga iti taga Galacia 5:22–23 ken Taga-Filipos 4:8? Nalabit a mangaramidka kadagiti posters iti lawlaw ti pagtaengan a mangpalagip kadagiti bagbagiyo kadagiti inkay tun-oyen.

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Panangpadur-as iti Bukod a Panagadal

Sapulen ti doktrina. Ti doktrina ket agnanayon, saan nga agbalbaliw a kinapudno. Impakdaar ni Presidente Boyd K. Packer a ti “pudno a doktrina, no maawatan, ket mangbalbaliw kadagiti galad ken tignay” (“Babassit nga Ubbing,” Ensign, Nob. 1986, 17). Bayat ti panagadalmo ken panagadal ti pamiliam kadagiti nasantuan a kasuratan, sarakenyo dagiti kinapudno a makatulong kadakayo nga agbiag nga ad-adda a kas iti Mangisalakan.

Jesucristo

Silaw iti Lubong, ni Brent Borup

Ni Cristo a pumampanaw iti tanem

Nagungaren, ni Del Parson