Enero 21–27

Juan 1

Nasarakanmi ti Mesias

Sakbay a basaem ti ania man a nainayon pay a material, basaen ken utobem ti Juan 1, ket isuratmo dagiti impresion a maawatmo. Daytoyto ti mangyawis iti Espiritu iti panagsaganam. Umaykayo, Sumurot Kaniak—Para kadagiti Indibidual ken Pamilia ken makatulong dagiti sumaganad a kapanunotan a mangparegta kadagiti tao iti klasem tapno maawatan ken mayaplikarda ti doktrina iti daytoy a kapitulo.

Isuratmo Dagiti Impresionmo

Yawis ti Panagbibinninglay

Tapno matulongan dagiti miembro ti klase a mangibinglay no ania ti nasursuroda, mabalinmo a paisurat kadakuada dagiti saludsod, masao wenno pannakaawat manipud iti panagbasada kadagiti pedaso ti papel ken ikabil dagitoy iti maysa a pagikkan. Mangala dagiti pedaso ti papel manipud ti container a paglilinnawagan kas maysa a klase.

Isuro ti Doktrina

Juan 1:1–5

Kadua idin ni Jesucristo “ti Dios idi punganay.”

• Rinugian ni Juan ti pammaneknekna maipapan ken ni Cristo babaen ti panangipaneknek maipapan dagiti akem ti Mangisalakan sakbay ti pannakayanakna. Ania ti insuro ni Juan maipapan iti Cristo sakbay daytoy a biag? Apay a nasken a maammuan dagiti akem ni Cristo sakbay daytoy a biag? Mabalin a makatulong nga isurat dagitoy a saludsod iti pisarra ket pasapul kadagiti miembro ti klase dagiti sungbat iti Juan 1:1–5 (kitaen met iti Patarus ti Joseph Smith, Juan 1:1–5 [iti Bible appendix]) ken iti palawag ni Elder James E. Talmage iti “Dagiti Nainayon a Resources.” Ania dagiti dadduma pay a reperensia iti nasantuan a kasuratan a maibinglay dagiti miembro ti klase a mangisuro iti ad-adu pay maipapan iti Cristo sakbay daytoy a biag? (Para kadagiti pagarigan, kitaen iti “Jesus Christ, Antemortal Existence of” iti Topical Guide.) Kas maysa a klase, mabalinyo met a sublian nga adalen ti “The Living Christ: The Testimony of the Apostles” (Ensign wenno Liahona, Abr. 2000, 2).

• No kayatmo nga usaren dagitoy a bersikulo tapno pagsasaritaan maipapan dagiti pinarsua ti Apo, mabalinmo a basaen ti Juan 1:3 ket mangiparang kadagiti ladawan a mangipakita iti kinapintas ti daga. Mabalinmo nga ipabuya ti video nga “Our Home” (lds.org/topics/environmental-stewardship-and-conservation). Awisen dagiti miembro ti klase a mangibinglay no kasano a tinulongan ida dagiti pinarsua ti Mangisalakan a mangrikna iti ayatna.

Juan 1:1–14

Ni Jesucristo ti Silaw.

• Matulongannatayo ti pisikal a lawag tapno maawatan ti simbolismo ti naespirituan a lawag. Kasano a mailadawanmo daytoy a simbolismo iti klasem? Mabalinmo nga iddepen dagiti silaw iti siled ket pagsilawem ti flashlight tapno ipakita ti paggidiatan ti lawag ken sipnget. Kalpasanna saludsodem kadagiti miembro ti klase a mangsarak iti tunggal pagarigan iti balikas a silaw iti Juan 1:1–14, ket awisem ida a mangibinglay no kasano a mangted ti Mangisalakan ken ti ebangheliona iti naespirituan a lawag iti biagda. Kasano a napadasanen dagiti miembro ti klase ti lawagna? Kas paset daytoy a panaglilinnawag, mabalin a kayatmo a pabasa kadakuada ti ad-adu pay maipapan iti Silaw ni Cristo iti Doktrina ken Katulagan 84:45–46; 88:1–13, wenno mabalinmo nga itudo kadakuada ti “Silaw ni Cristo” iti Pangiwanwan iti Nasantuan a Kasuratan. Kasano a makapagbalintayo a silaw iti lubong?

  

  Mangted iti naespirituan a silaw ti Mangisalakan ken ti ebangheliona.

• Gapu ta naisurat ti Juan 1:1–14 iti naisimbolo a pagsasao, mabalin a narigat a maawatan daytoy. Maysa a wagas a mangtulong kadagiti miembro ti klase a makaawat iti pammaneknek ni Juan ket mabalin nga awisen ida nga agaramid iti listaan dagiti naulit a balikas ken ragup ti balikas kadagitoy a bersikulo ken mangibinglay no ania ti isuro ti tunggal maysa kadatayo maipapan iti Mangisalakan.

• Daytoy ti maysa a wagas a makapagpanunot dagiti miembro ti klase kadagitoy a bersikulo: Iparang ti sumagmamano a ladawan (agraman ti maysa manipud iti balabala itoy a lawas iti Umaykayo, Sumurot Kaniak—Para kadagiti Indibidual ken Pamilia) a mangiladawan kadagiti aspekto ti biag ken nadiosan a mision ni Jesucristo. Mangawis kadagiti miembro ti klase tapno mangsukisok iti Juan 1:1–14, a mangsapsapul kadagiti balikas wenno ragup dagiti balikas a mabalin nga agserbi kas paulo para kadagiti ladawan.

Juan 1:35–51

Magun-odtayo ti bukodtayo a saksi maipapan ti Mangisalakan ket kalpasanna mangawis iti dadduma pay nga “umay ken mangkita.”

• Iti Juan 1, ti awis nga “umay ken mangkita” ket agparang a mamindua (kitaen iti bersikulo 39, 46). Mabalin nga addaantayo iti gundaway a mangkita iti Mangisalakan iti wagas nga inaramid da Andres ken Natanael, ngem masungbatantayo ti isu met laeng nga awis. Mabalinmo a saludsoden kadagiti miembro ti klase no ania iti panagkunada ti kaipapanan ti “umay ken mangkita” iti panawentayo ken mangibinglay kadagiti bukodda a padas maipapan ti pananggun-od iti pammaneknek maipapan iti Mangisalakan.

• Tapno mayam-ammo ti panaglilinnawag maipapan kadagitoy a bersikulo, kiddawen kadagiti miembro ti klase a mangibinglay kadagiti estoria maipapan iti no kasano nga inyam-ammoda ti ebanghelio ni Jesucristo kadagiti dadduma. Asino ti inawisda nga “umay ken mangkita”? Ania ti masursurotayo manipud kada Andres ken Felipe maipapan iti panangibinglay kadagiti pammaneknektayo maipapan ken ni Cristo?

• No dadduma saan nga ibinglay dagiti tao ti ebanghelio gapu ta makitada a ti panangaramid iti daytoy ket pannakasinga wenno komplikado. Ipakita dagiti pakaammuan iti Juan 1:35–51 a mabalin a simple ken natural ti panangibinglay iti ebanghelio. Mabalinmo a saludsoden kadagiti miembro ti klase a mangbasa kadagitoy a bersikulo ket paglilinnawagan no kasano a mausarda ida tapno makatulong iti maysa a tao nga agnerbios maipapan iti panangibinglay iti ebanghelio. Mabalinda nga usaren ti inadaw ni Elder Neil L. Andersen iti “Dagiti Nainayon a Resources” para kadagiti kapanunotan. (Kitaen met iti video “Good Things to Share” iti LDS.org.)

Yallukoy ti Panagsursuro iti Pagtaengan

Tapno maparegta dagiti miembro ti klase a mangadal iti Mateo 3, Marcos 1, ken Lucas 3, mabalinmo a kiddawen kadakuada a mangpanunot iti maysa a tao a kayatda a tulongan a mayasideg ken ni Cristo. Ibagam kadakuada a kadagitoy a kapitulo mabasadanto ti maipapan iti maysa a propeta a ti misionna ket mangisagana kadagiti tao nga umawat iti Mangisalakan.

Dagiti Nainayon a Resources

Juan 1

Kadua idin ni Jesucristo ti Ama idi punganay.

Insuro ni Elder James E. Talmage: “A ni Jesucristo ti Verbo [Balikas], a kaduanan ti Ama idi punganay ken naaddaan Isu mismo kadagiti bileg ken ranggo ti Kinadios, nga immay Isuna ditoy lubong ket nakipagnaed kadagiti tao, ket awan duadua a masinunuo. Masuportaran dagitoy a palawag babaen ti paltiing a naited ken ni Moises, a nakapalugodanna a mangkita iti adu a pinarsua ti Dios, ken mangngegan ti timek ti Ama maipanggep kadagiti banag a naaramiden: ‘Ket babaen ti balikas ti bilegko, pinarsuak ida, nga isu ti Bugbugtong nga Anakko, a napno iti parabur ken kinapudno’ [Moises 1:32, 33]” (Jesus the Christ, 3rd ed. [1916], 10).

Mabalintayo nga awisen dagiti dadduma nga “umay ken mangkita.”

Insuro ni Elder Neil L. Andersen:

“Sinuruannatayo ti Mangisalakan no kasano nga ibinglay ti ebanghelio. Magustuak ti estoria maipapan ken ni Andres, a nagsaludsod, ‘Maestro, sadino kadi ti pagnaedam?’ [Juan 1:38]. Mabalin koma nga insungbat ni Jesus iti lugar a pagnaedanna. Ngem ketdi kinunana ken ni Andres, ‘Umayka ket kitaem’ [Juan 1:39]. Kayatko a panunoten a kunkuna ti Mangisalakan, ‘Umayka ket kitaem saan laeng ti lugar a pagnaedak no di ketdi pay no kasano ti panagbiagko. Umayka ket kitaem no asinoak. Umayka ket riknaem ti Espiritu.’ Saanmi nga ammo ti amin a banag maipapan iti dayta nga aldaw, ngem ammomi nga idi nasarakan ni Andres ti kabsatna a ni Simon, impakdaarna, ‘Nasarakanmi… ni Cristo’ [Juan 1:41].

“Kadagiti mangipakita iti essem iti pannakisarsaritatayo, mabalintayo a suroten ti pagwadan ti Mangisalakan babaen ti panangawis kadakuada nga ‘umay ken mangkita.’ Addanto dagiti umawat iti awistayo, ket addanto met dagiti saan nga umawat. Ammotayo amin ti maysa a tao a naawis iti namin-adu a gundaway sakbay ti panangawatna iti awis nga ‘umay ken mangkita.’ Panunotentayo koma pay dagiti naminsan a nakaduatayon ngem itan manmano a makitatayon, awisen ida nga agsubli ken kumita manen. …

“Kadagiti agus-usar iti Internet ken mobile phone, adda dagiti baro a wagas a pangawis kadagiti dadduma nga ‘umay ken mangkita.’ Aramidentayo koma nga online ti panangibinglay iti pammatitayo nga ad-adda pay a paset ti inaldaw a panagbiagtayo” (“It’s a Miracle,” Ensign wenno Liahona, Mayo 2013, 79).

Makaisuro ti musika kadatayo maipapan ken ni Cristo.

Ibilangmo ti panangusar iti himno a “For the Beauty of the Earth,” Hymns, no. 92, bayat ti panangilawlawagmo iti akem ti Mangisalakan kas Namarsua (kitaen iti Juan 1:3). Mabalinmo pay nga usaren ti video a “For the Beauty of the Earth,” iti mormontabernaclechoir.org.

Panangpadur-as iti Panangisurotayo

Tulongam dagiti agsursuro a mangyarig kadagiti nasantuan a kasuratan iti bagbagida. Ti isu met laeng nga awis nga inted ni Cristo kadagiti disipulona—nga umay ken mangkita—ket makatulong kadagiti sursuruam nga agtarigagay a mangsurot iti Mangisalakan. Allukoyem dagiti agsursuro a mangyaplikar kadagiti prinsipio a masarakan kadagiti nasantuan a kasuratan iti bukodda a biag ken mangawis iti dadduma pay a mangaramid iti kastoy. (Kitaen iti 1 Nephi 19:23; Panangisuro iti Wagas ti Mangisalakan, 21.)