Da Maria ken Elisabet

Enero 7–13

Mateo 1; Lucas 1

“Maaramid koma Kaniak kas iti Saom”

Sakbay a basaem ti ania man a nayon a material iti panagadal, basaen ken utobem ti Mateo 1 ken Lucas 1, ket isuratmo dagiti naespirituan nga impresionmo. Bay-an a tarabayennaka ti Espiritu iti panagsaganam. Kalpasanna agsukisok kadagiti kapanunotan iti daytoy a balabala ken iti Umaykayo, Sumurot Kaniak—Para kadagiti Indibidual ken Pamilia.

Isuratmo Dagiti Impresionmo

icon iti panagbibinninglay

Yawis ti Panagbibinninglay

Ikkan dagiti miembro ti klase iti sumagmamano a minuto a mangsubli a mangadal iti Mateo 1 wenno Lucas 1, ket awisen ida a mangibinglay iti paggugustoda a bersikulo ken mangilawlawag no ania dagiti kinapudno a mainaig iti doktrina a nasursuroda. Mabalin a makatulong no umuna a sublien nga adalen biit dagiti pasamak kadagitoy a kapitulo tapno mangted iti sumagmamano a konteksto kadagiti bersikulo nga imbinglayda.

icon iti panangisuro

Isuro ti Doktrina

Mateo 1:18–25; Lucas 1:5–80

Agtrabaho ti Nailangitan nga Ama babaen dagiti napudno nga annakna tapno maipatungpal dagiti panggepna.

• Ad-adda a maaddaan dagiti miembro ti klase kadagiti napateg a padas bayat ti panagadalda iti Baro a Tulag iti daytoy a tawen no makaalada kadagiti adalen manipud kadagiti padas dagiti tao a nabasada. Tapno matulongan ida a mangaramid iti daytoy, mabalinmo nga isurat ti nagnagan dagiti tao iti Mateo 1 ken Lucas 1 iti pisarra, kasta met dagiti reperensia iti nasantuan a kasuratan maipapan kadagitoy a tao, kas iti sumaganad:

  • Maria (Lucas 1:26–56)

  • Jose (Mateo 1:18–25)

  • Elisabet (Lucas 1:5–7, 24–25, 40–45, 57–60)

  • Zacarias (Lucas 1:5–23, 59–64)

  Mangawis kadagiti miembro ti klase a mangpili iti maysa a tao a kayatda a masursuro ti ad-adu pay maipapan kenkuana, mangbasa kadagiti nailista a bersikulo, ken mangibinglay iti maysa a tao iti klase no ania ti masursuroda manipud iti padas dayta a tao. Ania ti maaramidtayo tapno masurot ti napudno a pagwadan dayta a tao?

  Ti panagparang ni Gabriel ken ni Maria

  Ti Panangiwaragawag, ni John Scott

• Tapno makatulong kadagiti miembro ti klase a magpanunot iti naun-uneg pay maipapan iti kinatao ken akem ni Maria iti plano ti Ama, mabalinmo ti mangipabuya kadagiti video “An Angel Foretells Christ’s Birth to Mary” ken ti “Mary and Elisabeth Rejoice Together” (LDS.org) (LDS.org) wenno aggigiddan a basaen ti Lucas 1:26–38, 46–56, nga agsapsapul kadagiti banag a kinuna ni Maria a mangipakita iti maysa a banag maipapan iti kinataona. Ania ti masursurotayo maipapan ken ni Maria? Ania ti maisurona kadatayo maipapan iti panangawat iti pagayatan ti Dios?

Lucas 1:5–25

Umay ti bendision ti Dios iti bukodna a panawen.

• Adda dagiti tao iti klasem a, kas kada Elisabet ken ni Zacarias, agbibiag a sililinteg ngem saanda pay a nakaawat iti bendision a ninamnama. Kasano a matulongam ida a makasursuro manipud kadagiti pagwadan da Elizabet ken ni Zacarias? Mabalinmo nga irugi babaen ti panangkiddaw kadagiti miembro ti klase a mangisurat kadagiti bendision a namnamaenda. Kalpasanna mabalinda a sukisoken ti Lucas 1:5–25, a mangsapsapul kadagiti adalen a masursuroda manipud kada Elisabet ken ni Zacarias maipapan iti panagur-uray iti Apo. Mabalinda pay a basaen ken utoben dagiti adaw iti “Dagiti Nainayon a Resources.” Allukoyem ida a mangisurat no ania ti masursuroda iti abay ti bendision a ninamnama ken, no maitutop, mangibinglay kadagiti kapanunotanda.

• Ania ti dadduma pay a pagarigan ti panagur-uray iti panawen ti Apo a mabalin nga ibinglay dagiti miembro ti klase manipud kadagiti bukodda a biag wenno manipud kadagiti pakaammuan iti nasantuan a kasuratan? Ania ti masursurotayo manipud kadagitoy a pagarigan?

Lucas 1:26–38

“Iti Dios awanto ti imposible.”

• No dadduma mabalin a masdaaw dagiti miembro ti klase tapno—kas iti inaramid ni Maria—no kasano a maipatungpal ti plano ti Dios para kadakuada wenno mabalin a maipatungpal dagiti kari kadakuada. Tapno matulongan a maawatan dagiti miembro ti klase a babaen ti bileg ti Dios posible ti amin a banag, mabalinmo nga ipakita ti ladawan Ti Pannakaiwaragawag: Agparang ni Anghel Gabriel ken ni Maria (Libro ti Arte ti Ebanghelio, num. 28) ket awisen ida nga aggigiddan a mangbasa iti Lucas 1:26–38. Ania ti masursurotayo maipapan ti panangparmek iti kasla imposible babaen ti panangadal kadagiti balikas ken tignay ni Maria? Kiddawem kadagiti miembro ti klase a mangibinglay kadagiti padas a natulongan ida ti Dios a mangipatungpal iti maysa a banag nga impagarupda nga imposible. Para iti kabaruanan a pagarigan dagiti Santo a babaen ti tulong ti Dios nakaipatungpalda iti maysa a banag a kasla imposible, buyaen ti video a “Sealed Together: The Manaus Temple Caravan” (LDS.org).

• Inladawan ti biag ti Mangisalakan ti kinapudno nga impakdaar ni Gabriel: “Iti Dios awanto ti imposible” (Lucas 1:37). Tapno mailadawan daytoy a prinsipio, mabalinmo a kiddawen kadagiti miembro ti klase a mangpanunot kadagiti panawen idi impatungpal ti Mangisalakan dagiti kasla imposible a banag no ar-aramidenna ti pagayatan ti Amana (kitaen, kas pagarigan, iti Juan 9:1–7). Tapno matulongan no kasano a kitaen dagiti miembro ti klase a maipakat daytoy a prinsipio iti biagda, mabalinmo nga awisen ida a mangutob kadagiti saludsod kas iti sumaganad: Ania ti maaramid a pakaidumaan daytoy iti biagyo tapno maammuan nga awan ti imposible iti Dios? Kasano a mangbaliw daytoy iti wagas a panagserbiyo iti Simbaan? ti wagas a pannakipulapolyo iti pamiliayo? Mabalin a makatulong pay nga idilig ti Lucas 1:37 kadagiti balikas ti Mangisalakan iti Marcos 14:36.

Mateo 1:18–25; Lucas 1:26–55

Ni Jesucristo ti Anak ti Dios.

• Ti kangrunaan a panggep da Mateo, Lucas, ken dagiti dadduma pay a mannurat iti Ebanghelio ket mangipaneknek a ni Jesucristo ti Anak ti Dios. Kasano a matulonganyo dagiti miembro ti klase a mangilasin iti daytoy a panggep kadagiti umuna a kapitulo a mabasada iti Baro a Tulag ? Ditoy ti maysa a kapanunotan: Bingayem ti klase kadagiti grupo wenno paris, ket ikkam ti tunggal grupo iti sumagmamano a bersikulo manipud iti Mateo 1 wenno Lucas 1. Awisem ida a mangsapul kadagiti pasamak wenno balikas a mangpapigsa iti pammatida iti nadiosan a mision ni Jesucristo kas Anak ti Dios ken mangibinglay iti klase no ania ti makitada. Ti sumagmamano a binatog a mabalinmo nga isingasing agraman iti Mateo 1:18–25 ken Lucas 1:26–38, 39–45, 46–55. Mangisingasing iti klase a bayat ti panagadalda iti Baro a Tulag iti daytoy a tawen, mabalin a mangidulinda iti listaan dagiti binatog a mangipaneknek a ni Jesucristo ti Anak ti Dios. Mabalinmo nga idulin daytoy a listaan kas maysa a klase.

icon iti panangsursuro

Yallukoy ti Panagsursuro iti Pagtaengan

Tapno maallukoy dagiti miembro ti klase a mangbasa iti Mateo 2 ken Lucas 2 para iti sumaruno a lawas ti klase, mabalinmo nga isingasing a no nainkararagan a basaenda ti pakaammuan maipapan iti pannakayanak ti Mangisalakan, makagun-oddanto kadagiti baro a nalawag a pannakaammo ken pannakaawat, uray pay no namin-adu a binasadan daytoy kasakbayanna.

resources icon

Dagiti Nainayon a Resources

Mateo 1; Lucas 1

Panangur-uray iti Apo.

Insuro ni Elder Neal A. Maxwell, “Ti pammati … iramanna ti panagtalek iti panawen ti Dios, gapu ta kinunana, ‘Nasken a mapasamak ti amin a banag iti panawenda.’ (DkK 64:32.)” (“Lest Ye Be Wearied and Faint in Your Minds,” Ensign, Mayo 1991, 90).

Insuro ni Presidente Dieter F. Uchtdorf:

“Naawagan ti tunggal maysa kadatayo nga aguray iti bukodtayo a wagas. Aguraytayo iti sungbat dagiti kararagtayo. Aguraytayo kadagiti banag nga iti panawen a mabalin a kasla umno unay ken nasayaat unay kadatayo tapno ditayo kabaelan a panunoten no apay nga itantan ti Nailangitan nga Ama ti sungbat.

“Malagipko idi agsagsaganaak a masanay kas maysa a fighter pilot. Binubosmi ti adu nga oras iti umuna a military trainingmi iti panagwatwat iti bagi. … Nagtaraykami ken nagtaraykami ken nagtaraykami iti sumagmamano pay.

“Bayat ti panagtarayko nangrugi a nadlawko ti maysa a banag a, sipaprangka, nangriribuk kaniak. Kanayon a malabasandak dagiti lallaki nga agsigsigarilio, agin-inum iti arak, ken agar-aramid iti amin a kita ti banag a maisuppiat iti ebanghelio ken nangnangruna pay, iti Word of Wisdom.

“Malagipko a nagpampanunot iti, ‘Agurayka iti maysa a minuto! Diak kadi koma impapan a kabaelak ti agtaray ket saan a mabannog?’ Ngem siak ket nabannog, ket lablabsandak dagiti tao a saan pulos a sumursurot iti Word of Wisdom. Ipudnok, daytoy ti nangriribuk kaniak iti dayta a panawen. Sinaludsodko iti bagik, pudno kadi wenno saan ti kari?

“Saan nga immay dagus ti sungbat. Ngem idi agangay naammuak a saan a kanayon a matungpal a dagus ti kari ti Dios wenno iti wagas a manamnamatayo; umay dagitoy a mayannurot iti panawenna ken kadagiti wagasna. Kalpasan dagiti sumagmamano a tawen makitak ti nalawag a pakakitaan dagiti temporal a bendision a sumangbay kadagiti agtungpal iti Word of Wisdom—kas mainayon kadagiti naespirituan a bendision a sumangbay a dagus manipud iti panagtungpal iti ania man kadagiti linteg ti Dios” ((“Continue in Patience,” Ensign wenno Liahona, Mayo 2010, 58).

Panangpadur-as iti Panangisurotayo

Allukoyem dagiti miembro ti klase nga agadal kadagiti nasantuan a kasuratan iti pagtaengan. Maysa a wagas a mayallukoymo ti panagadal iti pagtaengan ket mangted iti panawen kadagiti miembro ti klase a mangibinglay kadagiti takuat ken dagiti nalawag a pannakaammo ken pannakaawat manipud iti bukod ken sangapamiliaan a panagadalda. (Kitaen iti Panangisuro iti Wagas ti Mangisalakan, 29.)