Abril 15–21

Pasko sa Pagkabanhaw

“O Kamatayon, Hain Na Ang Imong Pagkamadaugon?”

Samtang mangandam ka sa pagtudlo karong semanaha, ikonsiderar kon sa unsang paagi nga ang panaghisgutan sa imong klase bahin sa Dominggo sa Pasko sa Pagkabanhaw makaugmad og pagtuo kang Jesukristo ug sa Iyang Pag-ula.

Irekord ang Imong mga Impresyon

Awhaga ang Pagpaambit

Pangutan-a ang mga sakop sa klase kon unsaon nila pagtubag sa mga pangutana sama sa “Unsa man ang Pag-ula ni Jesukristo?” ug “Unsaon man nako aron makadawat sa mga panalangin sa Pag-ula ni Kristo?” Nakabasa ba sila og bisan unsa nga kasulatan karong semanaha nga makatabang sa pagtubag niining mga pangutana?

Itudlo ang Doktrina

Si Jesukristo nagluwas kanato gikan sa sala ug kamatayon, naglig-on kanato diha sa atong mga kahuyang, ug naghupay kanato diha sa atong mga pagsulay.

• Nakasabut ba ang mga sakop sa imong klase nga agig dugang sa pagbuntog sa sala ug kamatayon, si Jesukristo makahupay usab kanato diha sa atong mga pagsulay ug makapalig-on kanato diha sa atong mga kahuyang? Usa ka paagi aron matabangan sila nga makadiskubre niining mga baruganan mao ang pagsulat niining mga pulong diha sa pisara: Sala, Kamatayon, Mga Pagsulay, Mga Kahuyang. Hangyoa ang matag sakop sa klase sa pagbasa sa usa sa mga kasulatan nga nalista diha sa “Dugang nga mga Kapanguhaan” ug sa pagpamalandong kon giunsa kita pagtabang sa Manluluwas nga mabuntog o makalahutay niining mga butanga. Ang mga sakop sa klase mahimo nga mosulat kon unsay ilang nakat-unan gikan niining mga kasulatan ubos sa matag ulohan ug mopakigbahin sa ilang pagpamatuod bahin sa Manluluwas ug sa Iyang Pag-ula.

• Unsay gitudlo sa mga kasulatan mahitungod sa bugti nga gibayad ni Jesukristo alang sa atong kaluwasan? Alang sa ehemplo, tan-awa sa Lucas 22:39–44; Mosiah 3:7; ug Doktrina ug mga Pakigsaad 19:16–19. Unsa ang bugti nga gibayad sa Langitnong Amahan? (tan-awa sa Juan 3:16).

  

  Ang Paglansang kang Kristo diha sa Krus, ni Louise Parker

• Sa dili pa magklase, ikonsiderar ang pagdapit sa pipila ka sakop sa klase sa pagdala og kinutlo gikan sa usa ka mensahe sa komperensya nga naghulagway kon giunsa kita pagpanalangin sa Manluluwas pinaagi sa Iyang Pag-ula (alang sa pipila ka ehemplo, tan-awa sa “Dugang nga mga Kapanguhaan”). Sa unsang paagi nga ang mga pagtulun-an sa modernong mga propeta mipalambo sa atong panabut bahin sa mga panalangin sa Pag-ula sa Manluluwas? Sa unsang paagi kini nakapalig-on sa atong mga pagpamatuod bahin sa gahum sa Iyang Pag-ula?

• Tingali ang usa ka yano nga object lesson makatabang sa paghulagway sa kalainan tali sa pagkalimpyo gikan sa sala ug sa pagkahimong hingpit: Mahimo nimong isulat diha sa pisara ang unang pipila ka linya gikan sa Moroni 10:32, apan ilakip ang mga sayop sa spelling o grammar. Dapita dayon ang usa ka sakop sa klase sa pagpapas sa mga sayop. Nasulbad ba niini ang problema? Unsa nga mga leksyon ang atong makat-unan gikan niining kasulatan ug niining object lesson mahitungod sa epekto ngari kanato sa Pag-ula? Kining pamahayag gikan ni Presidente Dieter F. Uchtdorf mahimong makatabang usab: “Kon ang kaluwasan nagpasabut lamang og pagpapas sa atong mga sayop ug mga sala, niana ang kaluwasan—ingon sa kanindot niini—wala magtuman sa mga katuyoan sa Amahan alang kanato. Ang iyang tumong mas taas pa: Gusto Niya nga ang iyang mga anak mahimo nga sama Kaniya” (“Ang Gasa sa Grasya,” Liahona, Mayo 2015, 108).

• Ang mga istorya ug mga analohiya makatabang kanato aron masabtan ang Pag-ula ni Kristo. Sama pananglit, si Elder Jeffrey R. Holland mipakigbahin og usa ka istorya mahitungod sa duha ka managsuong lalaki nga mikatkat og tiptip nga pangpang diha sa iyang mensahe nga “Asa ang Hustisya, Gugma, ug Kalooy Mag-abut” (Liahona, Mayo 2015, 104–6).

Ang mga saksi sa Bag-ong Tugon mipamatuod nga si Jesukristo mibuntog sa kamatayon.

• Ikonsiderar ang pagribyu sa istorya sa kasulatan bahin sa unang Pasko sa Pagkabanhaw—ang Pagkabanhaw ni Jesukristo. Mahimo nimong dapiton ang usa ka sakop sa klase nga mosaysay pag-usab sa istorya diha sa iyang kaugalingong mga pulong (tan-awa sa Juan 20:1–17).

• Tingali ang imong klase makabaton og mas lawom nga panabut bahin sa kaimportante sa mga saksi sa Pagkabanhaw ni Jesukristo kon maghunahuna nga mga abogado sila o mga news reporter nga nag-imbestigar sa pangangkon nga si Kristo nabanhaw. Dapita sila sa pagpangita og mga tawo diha sa mga kasulatan kinsa mahimong moserbisyo isip mga saksi (tan-awa sa Mateo 28:1–10; Lucas 24:13–35; Juan 20:19–29; 1 Mga Taga-Corinto 15:3–8, 55–58). Mahimo pa gani silang mosulat og mubo nga summary kon unsa kaha ang isulti niining mga tawhana kon magpamatuod diha sa korte o kon interbyuhon alang sa usa ka balita.

• Usa ka paagi aron mapalambo ang atong pagdayeg alang sa Pagkabanhaw sa Manluluwas mao ang paghunahuna kon unsaon nato sa pagpasabut ang atong mga gituohan ngadto sa uban. Unsaon sa mga sakop sa klase sa pagpakigbahin sa ilang mga pagpamatuod bahin ni Jesukristo sa mosunod nga mga sitwasyon: usa ka sakop sa pamilya ang na-diagnose nga dunay grabe nga sakit; usa ka higala ang nawad-an og minahal sa kinabuhi; usa ka silingan ang nangutana nganong magsaulog kamo og Pasko sa Pagkabanhaw. Awhaga sila sa pag-refer ngadto sa mga kasulatan (sama niadtong anaa sa “Dugang nga mga Kapanguhaan”) samtang magplano sila sa ilang mga tubag. Dapita ang pipila ka sakop sa klase sa pagpakigbahin sa ilang mga hunahuna.

Si Jesukristo naghatag kanato og paglaum ug hingpit nga kalipay.

• Kitang tanan mahimong makabaton og paglaum ug magmaya tungod sa Manluluwas. Mahimo nimong basahon ang Juan 16:33 ug hisguti kon sa unsang paagi nga ang Pag-ula ni Jesukristo makatabang kanato nga magmalipayon bisan pa man sa atong mga pagsulay. Sa unsang paagi nga nakadawat kita og hingpit nga kalipay ug nasuportahan panahon sa atong mga pagsulay?

• Ang pagbasa sa pagpamatuod ni Pedro sa 1 Pedro 1:3–11 makahatag sa mga sakop sa klase og dugang nga paglaum diha sa Pag-ula ni Jesukristo. Hatagi sila og panahon sa pagpamalandong niining mga bersikulo ug magtrabaho nga magpares aron makita ang ubang mga kasulatan nga naghulagway usab kon unsaon pagbaton og paglaum diha ni Jesukristo (tan-awa sa Giya ngadto sa mga Kasulatan, “Paglaum”). Mahimo nilang gamiton ang mga kasulatan nga ilang makit-an sa paghimo og usa ka poster nga i-display diha sa ilang mga panimalay o sa internet (tan-awa sa mga ehemplo sa makapadasig nga hulagway nga dunay mga kinutlo diha sa LDS.org). Ang mga sakop sa klase mahimong mokonsiderar sa mga kahimtang sa mga sakop sa pamilya o mga higala kinsa nanginahanglan tingali nga mobati nga mas malaumon.

Awhaga ang Pagkat-on diha sa Panimalay

Unsa may makapadasig sa mga sakop sa klase aron mobasa sa Mateo 18 ug Lucas 10? Mahimo nimo silang sultihan nga kining mga kapitulo naglangkob og duha sa labing halandumon nga mga sambingay sa Manluluwas, nga parehong nagpahayag og importante nga mga leksyon kon unsaon nato pagtratar ang usag usa.

Dugang nga mga Kapanguhaan

Pasko sa Pagkabanhaw

Mga kasulatan mahitungod sa Pag-ula sa Manluluwas.

• Isaias 25:8

• Isaias 53

• Juan 20:1–17

• Mga Taga-Roma 8:31–39

• 2 Nephi 9:5–12

• Alma 7:10–14; 11:32–44

• 3 Nephi 11:1–17; 27:13–20

• Moroni 7:41

• Doktrina ug mga Pakigsaad 19:15–19

Mga mensahe mahitungod sa Pag-ula sa Manluluwas.

• Presidente Thomas S. Monson, “Siya Nabanhaw!” Liahona, Mayo 2010, 87–90

• Elder D. Todd Christofferson, “Ang Pagkabanhaw ni Jesukristo,” Liahona, Mayo 2014, 111–14

• Elder Dallin H. Oaks, “Nalig-on Pinaagi sa Pag-ula ni Jesukristo,” Liahona, Nob. 2015, 61–64

• Sister Carole M. Stephens, “Ang Gamhanan nga Tig-ayo,” Liahona, Nob. 2016, 9–12

Mga himno mahitungod sa Pag-ula sa Manluluwas.

Ang mga sakop sa klase mahimong malingaw sa pagkanta sa pipila niining mga himno ug sa pagbasa sa may kalabutan nga mga kasulatan nga gikutlo diha sa ubos sa pahina. Ang ubang mga sakop sa klase mahimong nakakat-on na sa pipila ka himno isip kabahin sa ilang pamilya nga pagtuon sa kasulatan karong semanaha; awhaga sila sa pagpakigbahin sa ilang mga kasinatian.

• “Unsa Kalig-on ang Tukuranan,” Mga Himno ug mga Awit sa mga Bata, nu. 6

• “Ako Nahingangha, Nahibulong,” Mga Himno ug mga Awit sa mga Bata, nu. 22

• “Siya Nabanhaw!” Mga Himno ug mga Awit sa mga Bata, nu. 55

Matag tuig ang Simbahan maghimo og mga mensahe sa Pasko sa Pagkabanhaw, nga anaa sa mormon.org/easter.

Si Jesukristo mihimo kanatong gawasnon.

Niadtong 1741, si George Frideric Handel mihimo og usa ka oratorio mahitungod ni Jesukristo nga giulohan og Messiah. Gitino ni Handel nga ang kita sa pasundayag sa Messiah idonar aron ibayad alang sa pagpagawas sa mga utangan gikan sa bilanggoan sa utangan. Sobra sa 140 ka tawo kinsa nabilanggo tungod kay wala sila makabayad sa ilang mga utang nahimong gawasnon isip resulta. Mikomentaryo bahin niining panghitabo, si Presidente Russell M. Nelson miingon, “Kon wala pa ang Pag-ula ni Jesukristo, kitang tanan utangan nga wala gayuy mahimo, sama gayud niadtong mga tawo nga anaa sa bilanggoan sa utangan. Ang atong Manunubos, si Ginoong Jesukristo, mianhi aron bayaran ang utang nga wala Niya utanga tungod kay nakautang kita nga dili nato mabayaran.”.

Pagpalambo sa Atong Pagtudlo

Pagmahimong usa ka instrumento sa Espiritu. Ang imong katuyoan isip usa ka magtutudlo dili ang paghimo og presentasyon apan ang pagtabang sa uban nga modawat sa impluwensya sa Espiritu Santo—ang tinuod nga magtutudlo. (Tan-awa sa Pagtudlo sumala sa Pamaagi sa Manluluwas, 10.)