Abril 15–21

Paskua ti Panagungar

“Adino ti Yanna, O Patay ti Panagballigim?”

Bayat ti panagsaganam a mangisuro iti daytoy a lawas, ibilangmo no kasano mangpadur-as iti pammati ken ni Jesucristo ken ti Pannubbotna ti panaglilinnawag iti klase iti Domingo ti Paskua ti Panagungar.

Isuratmo Dagiti Impresionmo

Yawis ti Panagbibinninglay

Saludsodem kadagiti miembro ti klase no kasano ti isusungbatda kadagiti saludsod a kas iti “Ania ti Pannubbot ni Jesucristo?” ken “Kasano a makaawatak iti bendision ti Pannubbot ni Cristo?” Nakapagbasada kadi iti ania man a nasantuan a kasuratan itoy a lawas a makatulong a mangsungbat kadagitoy a saludsod?

Isuro ti Doktrina

Isalakannatayo ni Jesucristo manipud iti basol ken ipapatay, a mangpapigsa kadatayo kadagiti pagkapsutantayo, ken mangliwliwa kadatayo kadagiti pannuboktayo.

• Maawatan kadi dagiti miembro ti klasem a kas nayon iti panangparmek iti basol ken patay, maliwliwanatayo pay ni Jesucristo kadagiti pannuboktayo ken mapapigsanatayo kadagiti pagkapsutantayo? Maysa a wagas a makatulong kadakuada a mangtakuat kadagitoy a prinsipio ket mabalin nga isurat dagitoy a balikas iti pisarra: Basol, Ipapatay, Pannubok, Dagiti Pagkapsutan. Idawat iti tunggal miembro ti klase a mangbasa iti maysa kadagiti nasantuan a kasuratan a nakalista iti “Dagiti Nainayon a Resources” ket mangutob no kasano a makatulong ti Mangisalakan kadatayo a mangparmek wenno mangibtur kadagitoy a banag. Mabalin nga isurat dagiti miembro ti klase no ania ti nasursuroda manipud kadagitoy a nasantuan a kasuratan iti baba ti tunggal paulo ken ibinglayda ti pammaneknekda maipapan ti Mangisalakan ken ti Pannubbotna.

• Ania ti isuro dagiti nasantuan a kasuratan maipapan iti gatad a binayadan ni Jesucristo para iti pannakaisalakantayo? Kas pagarigan, kitaen iti Lucas 22:39–44; Mosiah 3:7; ken Doktrina ken Katulagan 19:16–19. Ania ti gatad a binayadan ti Nailangitan nga Amatayo? (Kitaaen iti Juan 3:16).

  

  Ti Pannakailansa iti krus ni Cristo, ni Louise Parker

• Sakbay ti klase, ibilangmo ti panangawis iti sumagmamano a miembro ti klase a mangitugot iti inadaw manipud iti mensahe iti komperensia a mangiladawan no kasano a bendisionannatayo ti Mangisalakan babaen ti Pannubbotna (para iti sumagmamano a pagarigan, kitaen iti “Dagiti Nainayon a Resources”). Kasano a padakkelen ti pannakaawattayo dagiti pannursuro dagiti propeta iti kabaruanan nga aldaw maipapan kadagiti bendision ti Pannubbot ti Mangisalakan? Kasano a patibkeren dagitoy dagiti pammaneknektayo maipapan iti bileg ti Pannubbotna?

• Nalabit a makatulong ti simple nga adalen a banag [object lesson] tapno mangiladawan iti paggidiatan ti panagbalin a nadalus manipud iti basol ken panagbalin a naan-anay: Mabalinmo nga isurat iti pisarra dagiti umuna a sumagmamano a linia manipud iti Moroni 10:32, ngem iraman dagiti biddut iti ispeling ken grammar. Kalpasanna awisem ti maysa a miembro ti klase a mangpugas kadagiti biddut. Mangrisut kadi daytoy iti problema? Ania dagiti adalen a masursurotayo manipud iti daytoy nasantuan a kasuratan ket iti daytoy adalen a banag maipapan ti epekto ti Pannubbot kadatayo? Mabalin pay a makatulong ti palawag ni Presidente Dieter F. Uchtdorf: “No ti kaipapanan ti pannakaisalakan ket panangpugas laeng kadagiti biddut ken basoltayo, ngarud ti pannakaisalakan—nakakaskasdaaw—ket saan a mangipatungpal kadagiti paggep ti Ama kadatayo. Nangatngato nga amang ti panggepna: Kayatna nga agbalin a kas Kenkuana dagiti annakna” (“The Gift of Grace,” Ensign wenno Liahona, Mayo 2015, 108).

• Makatulong kadatayo dagiti estoria ken analohia tapno maawatantayo ti Pannubbot ni Cristo. Kas pagarigan, imbinglay ni Elder Jeffrey R. Holland ti estoria maipapan ti dua a lallaki nga umul-uli iti bakud a kanyon iti mensahena “Where Justice, Love, and Mercy Meet” (Ensign wenno Liahona, Mayo 2015, 104–6). Adda pay maysa a video ti isu met la a paulo iti LDS.org. Wenno aggigiddankayo a mangbuya iti “Handel’s Mesiah: Debtor’s Prison” (LDS.org; kitaen iti panangiladawan iti “Dagiti Nainayon a Resources”) ket paglilinnawagan no kasano a wayawayaannatayo ti Pannubbot ni Jesucristo manipud kadagiti nakaibaludantayo.

Imburay dagiti saksi iti Baro a Tulag iti pammaneknek a pinarmek ni Jesucristo ti patay.

• Ibilang ti panangsubli a panangadal iti pakaammuan iti nasantuan a kasuratan maipapan iti umuna a Paskua iti Panagungar—ti Panagungar ni Jesucristo. Mabalinmo nga awisen ti maysa a miembro ti klase a mangisalaysay iti estoria kadagiti bukodna a balikas (kitaen iti Juan 20:1–17). Mabalinmo pay nga ipakita ti Biblie video, a kas iti “He Is Risen” (LDS.org).

• Nalabit a makagun-od ti klasem iti naun-uneg a pannakaawat maipapan iti kinapateg dagiti saksi ti Panagungar ni Jesucristo no ipapanda nga isuda dagiti abogado wenno agipadpadamag a mangus-usig iti naibaga a nagungar ni Cristo. Awisen ida a mangsapul kadagiti tao iti nasantuan a kasuratan a mabalin nga agserbi a kas saksi (kitaen iti Mateo 28:1–10; Lucas 24:13–35; Juan 20:19–29; 1 Taga Corinto 15:3–8, 56–58). Mabalinda pay nga isurat iti ababa a pakagupgopan ti no ania ti mabalin nga isao dagitoy a tao no agtestigoda iti korte wenno no kauman ida para iti maysa a report ti damag.

• Maysa a wagas tapno mapauneg ti panangbigbigtayo iti pateg ti panagungar ti Mangisalakan ket ti mangpanunot no kasano a mailawlawagtayo ti pammatitayo kadagiti dadduma. Kasano nga ibinglay dagiti miembro ti klase dagiti pammaneknekda maipapan ken ni Jesucristo kadagiti sumaganad a kasasaad: naamiris ti maysa a miembro ti pamilia iti nakaro a sakit; napukawan ti maysa a gayyem ti maysa nga ipatpateg; agsaludsod ti maysa a kaarruba no apay a rambakanyo ti Paskua ti Panagungar. Allukoyem ida nga agibasar kadagiti nasantuan a kasuratan (kas kadagiti adda iti Dagiti Nainayon a Resources”) bayat ti panagplanoda kadagiti sungbatda. Awisem ti sumagmamano a miembro ti klase a mangibinglay kadagiti kapanunotanda.

Mangted kadatayo ni Jesucristo iti namnama ken rag-o.

• Maaddaantayo amin iti namnama ken agbalin a naragsak gapu iti Mangisalakan. Mabalinmo a basaen ti Juan 16:33 ket paglilinnawagan no kasano a makatulong kadatayo ti Pannubbot ni Jesucristo nga agbalin a naragsak iti baet dagiti pannuboktayo. Kasano nga inawattayo ti rag-o ken natulongan kabayatan dagiti pannuboktayo?

• Ti panagbasa iti pammaneknek ni Pedro iti 1 Pedro 1:3–11 ket makaited kadagiti miembro ti klase iti namnama iti Pannubbot ni Jesucristo. Ikkam ida iti panawen a mangutob kadagitoy a bersikulo ken agtrabaho iti sagsangaparis tapno mangsarak iti dadduma pay a nasantuan a kasuratan a mangiladawam pay no kasano a magun-od iti namnama ken ni Jesucristo (kitaen iti Pangiwanwan iti Nasantuan a Kasuratan, “Namnama”). Mabalin nga usarenda dagiti nasantuan a kasuratan a nasarakanda tapno agaramid iti maysa a poster nga i-display iti pagtaenganda wenno iti online (kitaen dagiti pagarigan dagiti makaparegta a naadaw a ladawan iti LDS.org). Mabalin nga ibilang dagiti miembro ti klase dagiti kasasaad dagiti miembro ti pamilia wenno gagayyem a mabalin nga agkasapulan a makarikna iti dakdakkel a namnama.

Yallukoy ti Panagsursuro iti Pagtaengan

Ania ti mangparegta kadagiti miembro ti klase a mangbasa iti Mateo 18 ken Lucas 10? Mabalinmo nga ibaga kadakuada a naglaon dagitoy a kapitulo ti dua kadagiti kangrunaan a nakallalagip a pangngarig ti Mangisalakan, nga agpadpada a mangipaawat iti kaipapanan dagiti napapateg nga adalen maipapan iti no kasano ti nasken a panangtratotayo iti tunggal maysa.

Dagiti Nainayon a Resources

Paskua ti Panagungar

Dagiti Nasantuan a kasuratan maipapan iti Pannubbot ti Mangisalakan.

• Isaias 25:8

• Isaias 53

• Juan 20:1–17

• Taga Roma 8:31–39

• 2 Nephi 9:5–12

• Alma 7:10–14; 11:32–44

• 3 Nephi 11:1–17; 27:13–20

• Moroni 7:41

• Doktrina ken Katulagan 19:15–19

Dagiti mensahe maipapan iti Pannubbot ti Mangisalakan.

• President Thomas S. Monson, “He Is Risen!” Ensign wenno Liahona, Mayo 2010, 87–90

• Elder D. Todd Christofferson, “The Resurrection of Jesus Christ,” Ensign wenno Liahona, Mayo 2014, 111–14

• Elder Dallin H. Oaks, “Strengthened by the Atonement of Jesus Christ,” Ensign wenno Liahona, Nob. 2015, 61–64

• Sister Carole M. Stephens, “The Master Healer,” Ensign wenno Liahona, Nob. 2016, 9–12

Dagiti himno maipapan iti Pannubbot ti Mangisalakan.

Mabalin a magustuan dagiti miembro ti klase ti panagkanta kadagitoy a himno ken panagbasa kadagiti mainaig a nasantuan a kasuratan a nadakamat iti baba ti panid. Mabalin a nasursuro dagiti miembro ti klase ti sumagmamano a himno kas paset ti panagadal iti nasantuan a kasuratan iti daytoy a lawas; allukoyen ida a mangibinglay kadagiti padasda.

• “Anian a Tibker ti Puon” (Pagbatayan iti Ebanghelio, no. 85.

• “Where Can I Turn for Peace?” Hymns, no. 129

• “Anian a Ragsakko,” Pagbatayan ti Ebanghelio, no. 193.

• “Nagungaren” Pagbatayan ti Ebanghelio, no. 199

Dagiti video maipapan iti Paskua ti Panagungar.

Tunggal tawen agparnuay ti Simbaan kadagiti mensahe iti Paskua ti Panagungar, a sidadaan a magun-od iti mormon.org/easter.

Wayawayaannatayo ni Jesucristo.

Idi 1741, nagputar ni George Frideric Handel iti maysa nga oratorio maipapan ken ni Jesucristo a napauluan iti Mesias. Inkeddeng ni Handel a maidonar dagiti napastrekan ti pabuya iti Mesias tapno pangbayad iti pannakawayawaya dagiti nakautang manipud iti pagbaludan dagiti nakautang. Nawayawayaan ti nasurok a 140 a tattao a naibalud gapu ta saanda a nakabayad kadagiti utangda kas banagna. Iti panagsaona maipapan iti daytoy a pasamak, kinuna ni Presidente Russell M. Nelson, “No awan ti Pannubbot ni Jesucristo, siuutangtayo koma amin, kas met la kadagiti tao iti pagbaludan dagiti nakautang. Immay ti Mannubbottayo, ti Apo a ni Jesucristo, tapno bayadanna ti utang a saanna nga inutang gapu ta immutangtayo a ditayo kabaelan a bayadan.” Para iti video a mangiladawan iti daytoy a pasamak, kitaen iti “Handel’s Messiah: Debtor’s Prison” iti LDS.org.

Panangpadur-as iti Panangisurotayo

Agbalinka a maysa a ramit ti Espiritu. Ti panggepmo kas maysa a mannursuro ket saan a mangaramid iti maysa a napintas a panangidatag iti adalen ngem ketdi tapno makatulong iti dadduma nga umawat iti impluensia ti Espiritu Santo—ti pudno a mannursuro. (Kitaen iti Panangisuro iti Wagas ti Mangisalakan, 10.)