“Abril 22–28. Mateo 18; Lucas 10: ‘Anianto ti Aramidek Tapno Matawidko ti Biag nga Agnanayon?’” Umaykayo, Sumurot Kaniak—Para iti Sunday School: Baro a Tulag 2019 (2019)
“Abril 22–28. Mateo 18; Lucas 10,” Umaykayo, Sumurot Kaniak—Para iti Sunday School: 2019
Ti Naimbag a Samaritano, ni Dan Burr
Abril 22–28
Mateo 18; Lucas 10
“Anianto ti Aramidek Tapno Matawidko ti Biag nga Agnanayon?”
Basaem ti Mateo 18 ken Lucas 10, ket isuratmo dagiti naespirituan nga impresionmo. Bayat ti panangawatmo kadagiti impresion, mabalin a saludsodem, kas insingasing ni Elder Richard G. Scott, “Adda kadi pay nasken a maammuak?” (“To Acquire Spiritual Guidance,” Ensign wenno Liahona, Nob. 2009, 8).
Isuratmo Dagiti Impresionmo
Yawis ti Panagbibinninglay
Naglaon dagitoy a kapitulo iti adu a pagarigan dagiti pannursuro ti ebanghelio a maigidiat iti no ania ti isuro ti lubong kadatayo. Ania dagiti kinapudno a nasarakan dagiti miembro ti klase kadagitoy a kapitulo a narigat nga awaten wenno tungpalen dagiti sumagmamano a tattao?
Isuro ti Doktrina
Nasken a pakawanentayo dagiti dadduma no nasken nga umawat iti pannakapakawan manipud iti Apo.
-
Iti maysa a panawen wenno sabali, nasken a pakawanentayo ti maysa a tao a nangpasakit kadatayo. Kasano a mausarmo iti pangngarig ti awan asina nga adipen a mangparegta kadagiti miembro ti klase nga agbalin nga ad-adu pay a managpakawan? Nalabit a mabalinmo nga isurat iti pisarra ti kas iti sumaganad a saludsod ket mangawis kadagiti miembro ti klase nga utobenda dagitoy bayat ti panangisalaysay ti maysa a tao ti pangngarig: Asino ti ibagi ti ari? Asino ti ibagi ti awan asina nga adipen? Ania ti ibagi ti utangna? Ania ti ibagi ti pada nga adipen? Ania ti ibagi ti utangna? Ti impormasion maipapan kadagiti talento ken denario iti “Dagiti Nainayon a Resources” ket makaited kadagiti miembro ti klase ti kapanunotan ti no kasano ti kadakkel ti pagdumaan ti dua nga utang iti pangngarig. Mangawis kadagiti miembro ti klase nga agutob maipanggep iti no ania dagiti mensahe ti pangngarig para kadakuada.
-
Mabalinmo nga awisen ti klase tapno agaramid iti panangibagay iti pangngarig maipapan ti awan asina nga adipen a mangisuro kadagiti isu met laeng nga adalen maipapan iti pammakawan nga us-usaren dagiti agdama a kasasaad ken detalye. (Ibilang ti panangitrabahoda iti daytoy iti sagsangagrupo.) Paglilinnawagan no kasano a sinungbatan ti pangngarig ti saludsod ni Pedro maipapan iti no mamin-ano ti nasken a panagpakawanna.
-
Ti video a “Forgive Every One Their Trespasses: The Parable of the Unmerciful Servant” (LDS.org) ket makatulong iti klasem a mangiladawan iti panunotda ti pangngarig. Kas mainayon iti Mateo 18:35, makatulong dagiti sumaganad a nasantuan a kasuratan tapno maawatan dagiti miembro ti klase no apay a kayat ti Apo a pakawanentayo ti amin a nagbasol kadatayo: Mateo 6:12–15; Taga Efeso 4:32; ken Doktrina ken Katulagan 64:7–11.
Tapno magun-od ti agnanayon a biag, nasken nga ayatentayo ti Dios ken ti padatayo a tattao.
-
Adtoy ti maysa a kapanunotan a mabalin a mangted kadagiti miembro ti klase iti baro a pannirigan ti pangngarig ti naimbag a Samaritano: Awisen ida nga agpammarang nga agpalpalutpotda iti maysa a kaso maipapan ti kellaat nga idadarup ken pannakatulisan iti kalsada iti nagbaetan ti Jerico ken Jerusalem. Kiddawem ti sumagmamano a miembro ti klase nga umay iti klase a nakasagana a mangibagi iti nadumaduma a tao iti pangngarig ket pagsasaritaanda ti pannakairamanda iti kaso. Kas pagarigan, apay a saan a nagsardeng ti padi ken Levita a mangtulong iti nadunor a lalaki? Apay a nagsardeng ti Samaritano? Ania dagiti kapanunotan a mainayon ti agay-aywan iti pagdagusan? Kasano ti narikna ti nadunor a lalaki maipapan iti tunggal maysa kadagiti dadduma? Siguraduem a mangparegta dagiti panaglilinnawag kadagiti miembro ti klase tapno agbalin a kas iti naimbag a Samaritano ken ti agay-aywan iti pagdagusan ken liklikan ti panagbalin a kas iti padi ken Levita. Kaano a narikna dagiti miembro ti klase kas iti “maysa a tao,” nga agkasapulan unay iti tulong? Kasano nga immay ti tulong? Kasanotayo kas miembro ti ward a sangkamaysa nga agtrabaho a mangtulong kadagiti dadduma, a kas iti inaramid ti naimbag a Samaritano ken ti agay-aywan iti pagdagusan?
-
Malaksid iti panangisuro maipapan iti no ania ti kaipapanan ti mangipateg iti padatayo a tao, ti pangngarig ti naimbag a Samaritano ket mabalin nga isimbolona pay ti bileg ni Jesucristo a mangisalakan kadatayo. (Dagiti detalye maipapan iti daytoy a kayulogan ket masarakan iti “Dagiti Nainayon a Resources.”) Mabalinmo nga awisen dagiti miembro ti klase a mangbasa iti pangngarig, a mangsapsapul iti daytoy ken ti dadduma pay a mabalin a simboliko dagiti kaipapananna. Ania ti masursurotayo maipapan ti Mangisalakan ken ti Pannubbotna no basaentayo ti pangngarig iti kastoy a wagas?
Pilientayo “dayta nasayaat a paset” babaen ti panagaramid kadagiti inaldaw a pili a mangiturong iti agnanayon a biag.
-
Napno ti biag iti napapateg a banag nga aramiden. Ti estoria da Maria ken Marta ket makatulong kadagiti miembro ti klase a mangibilang no kasano ti mangpili iti “dayta nasayaat a paset” (bersikulo 42; kitaen met iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia). Kalpasan ti aggigiddan a panangbasada iti Lucas 10:38–42 nalabit a mabalinmo a saludsoden kadagiti miembro ti klase no kasano koma ti reaksionda iti balakad ti Mangisalakan no isuda ti adda iti lugar ni Marta. Kasano a maapektuan daytoy a padas dagiti masakbayan a pilida? Kasano a maammuantayo no ania dagiti banag iti bukodtayo a biag a “kasapulan”? (Lucas 10:42). Kasano a makatulong kadagiti miembro ti klase ti mensahe ni Elder Dallin H. Oaks a “Good, Better, Best” (Ensign wenno Liahona, Nob. 2007, 104–8)?
Yallukoy ti Panagsursuro iti Pagtaengan
Ibagam iti klasem a bayat ti panagbasada kadagiti palawag ti Mangisalakan maipapan iti mismo a kinadiosanna iti Juan 7–10 para iti klase iti sumaruno a lawas, mabalin a nasiersierto a maammuandanto nga Isu ti Cristo.
Dagiti Nainayon a Resources
Dagiti talento ken denario.
Narigat a maammuan ti eksakto a pateg dagiti gatad ti kuarta a nadakamat iti pangngarig ti awan asina nga adipen (kitaen iti Mateo 18:23–35). Nupay kasta, adda dagiti pamugtuan wenno clue iti Baro a Tulag a makatulong kadatayo a makaawat iti adu a pagdumaan ti 100-denario nga utang ken ti 10,000-talento nga utang.
Nakautang ti pada nga adipen iti pangngarig iti babassit nga utang a 100 denario. Iti Mateo 20:2, ti maysa a sentimo (wenno denario) ket ti tangdan a naibayad iti maysa nga aldaw a panagtrabaho iti kaubasan. Ngarud, nasken nga agtrabaho ti pada nga adipen iti 100 nga aldaw tapno maullo ti 100 a denario a pangbayad iti utangna. Ngem bassit unay daytoy a dagup no idilig iti 10,000-a talento nga utang ti awan asina nga adipen. Iti Mateo 25: 14–15, ti naan-anay a kinabaknang ti maysa a tao—“dagiti sanikuana”—ket agpateg laeng iti walo a talento. Ngarud, no napagtitipon, dagiti naurnong a kinabaknang ti nasurok a 1,000 a tattao a kas iti daytoy a tao a pangbayad iti utang ti awan asina nga adipen.
Insarita ni Jesus maipapan ti kuarta ken utang a mangisuro maipapan iti pammakawan.
Ti kadakkelan nga utang a binayadan ni Jesucristo para iti tunggal maysa kadatayo.
Imbinglay ni Elder Jeffrey R. Holland no ania ti nasursurona maipapan iti pangngarig ti awan asina nga adipen bayat ti idadar-ayna iti klase ti institute:
Kinuna “[ti mannursuro] a ti 100-a denario a pammakawan, a ninamnamatayo amin nga ited iti tunggal maysa ken bigbigentayo a nawadwad a kadagupan ti kuarta, ket … napateg a bassit a panangdawat, no maidilig iti 10,000-talento, iti pammakawan nga inted kadatayo ni Cristo.
“Dayta naud-udi nga utang, ti utangtayo, ti kasta unay kadakkelna a bilang, impalagip [ti mannursuro] kadatayo, ti dandani saan a kabaelan a maawatan. Ngem dayta, kinunana, ket ti eksakto nga intudo ti Mangisalakan a banag iti daytoy a panangisuro, ti napateg a paset ti pangngarig. Insangrat ni Jesus a marikna dagiti dumdumngeg kenkuana ti bassit laeng nga agnanayon a kadakkel ken naindaklan a sagut ti asina, ti pammakawanna, ti Pannubbotna.
“… Iti umuna a gundaway iti biagko malagipko ti pannakariknak iti maysa a banag maipapan ti bileg ti sakripisio ni Cristo para kaniak—maysa a sagut nga uray ita nga aldaw ket diak talaga maawatan. Ngem ti sagut a namagbalin kaniak, iti umuna a gundaway, sipapasnek a nangibilang iti kasapulak a mangpakawan kadagiti dadduma a tao ken ti awan sardayna a panagparabur maipapan iti riknada ken kasapulanda ken dagiti kasasaadda” “Students Need Teachers to Guide Them” [Church Educational System satellite broadcast, Hunio 20, 1992]).
Ti kayulogan ti nagkauna a Kristiano iti pangngarig ti naimbag a Samaritano.
Kadagiti napalabas a siglo, nasarakan dagiti Kristiano dagiti simbolo iti pangngarig ti naimbag a Samaritano a mangisuro maipapan iti akem ni Jesucristo kas Mangisalakantayo. Kas pagarigan, ti lalaki a natulisan ket mangibagi kadatayo amin. Dagiti tulisan ket mangibagi iti basol ken ipapatay. Ti Samaritano ket mangibagi iti Mangisalakan. Ti pagdagusan ket mangibagi iti Simbaan, ket ti kari ti Samaritano nga agsubli ket mangibagi iti Maikadua a Yaay ti Mangisalakan. (Kitaen iti John W. Welch, “The Good Samaritan: Forgotten Symbols,” Ensign, Peb. 2007, 40–47.)
Panangpadur-as iti Panangisurotayo
Suroten ti pagwadan ti Mangisalakan. Bayat ti panangbasam kadagiti pakaammuan maipapan iti panangisuro ti Mangisalakan iti Baro a Tulag, sapulem dagiti adalen iti pagwadanna a makatulong kenka nga agbalin a nalalaing a mannursuro. Kas pagarigan, iti Lucas 10:25--37, ania ti inaramid ni Jesus a mangisuro iti agilinlinteg maipapan iti no kasano a magun-od ti agnanayon a biag?