“Abril 29–Mayo 5. Juan 7–10: ‘Siak ti Naimbag a Pastor’” Umaykayo, Sumurot Kaniak—Para iti Sunday School: Baro a Tulag 2019 (2019)
“Abril 29–Mayo 5. Juan 7–10,” Umaykayo, Sumurot Kaniak—Para iti Sunday School: 2019
Isu nga Awanan iti Basol ni Liz Lemon Swindle
Abril 29–Mayo 5
Juan 7–10
“Siak ti Naimbag a Pastor”
Makagun-odkanto ken dagiti miembro ti klasem kadagiti nalawag a pannakammo ken pannakaawat [insights] bayat ti panangbasam iti Juan 7–10 itoy a lawas. Laglagipem a nasken a mangsuplemento dagiti kapanunotan iti daytoy a balabala imbes a mangsukat iti inspirasion a maawatmo babaen ti panagadal kadagiti nasantuan a kasuratan.
Isuratmo Dagiti Impresionmo
Yawis ti Panagbibinninglay
Ipalagip kadagiti miembro ti klase maipapan iti kinapateg ti panangaramid kadagiti pagtaenganda a sentro a pagsursuruan iti ebanghelio. Ania dagiti binatog manipud iti Juan 7–10 nga inlawlawag dagiti miembro ti klase iti pamiliada kabayatan ti lawas? Ania dagiti mensahe a kangrunaan a makatulong kadakuada?
Isuro ti Doktrina
Ni Jesucristo ti Mangisalakan ti lubong.
-
Iti intero a Juan 7–10, inaramid ti Mangisalakan iti sumagmamano a waragawag a makatulong kadagiti miembro ti klase a nasaysayaat a maawatanda ti misionna ken mayasidegtayo nga ad-adda Kenkuana. Ibilangmo ti panangawis kadagiti miembro ti klase a mangbasa kadagiti sumaganad a binatog ti nasantuan a kasuratan ket ibinglay no ania ti isuro dagitoy maipapan iti nadiosan a mision ti Mangisalakan. Kasano nga ipatungpal ni Cristo dagitoy nga akem iti biagtayo?
-
Juan 7:37–39: “No adda mawaw, umay kaniak, ket uminum”
-
Juan 8:58: “Idi kasanguanan ti pannakayanak ni Abraham, Addaakon” (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia para kadagiti nalawag a pannakaammo ken pannakaawat maipapan iti daytoy a bersikulo)
-
Juan 9:8–10, 35–38: “Ti Anak ti Dios”
-
Juan 10:7–9: “Ti ruangan”
-
Juan 10:11–14: “Ti naimbag a pastor”
-
Silaw ti Lubong, ni Howard Lyon
No agbiagtayo kadagiti pannursuro ni Jesucristo, maammuantayonto a pudno dagitoy.
-
Nasaysayaat a maawatan dagiti miembro ti klase no kasano a mangpatibker iti pammaneknek ti panagtungpal iti bilin no idiligda daytoy a pagtuladan ti wagas iti panagsursuro iti maysa a paglaingan babaen ti bukod a padas. Kas pagarigan, mabalinmo nga awisen dagiti miembro ti klase a makaammo nga agtokar iti maysa nga instrumento iti musika tapno mangilawlawag no kasano a napadur-asda dagitoy a paglaingan. Kasano nga ad-adda a nakaisuro kadakuada ti panagpraktis iti bukodda ngem iti panangbuya lattan iti maysa a tao nga agtoktokar iti instumento? Kas maysa a klase, paglilinnawaganyo no kasano a maidasig ti panagkagumaan a mainaig iti panagsursuro iti maysa a paglaingan iti naespirituan a pagtuladan ti Mangisalakan a nailadawan iti Juan 7:14–17. Ania dagiti padas a maibinglay dagiti miembro ti klase maipapan iti panangsurot iti daytoy a pagtuladan a manggun-od iti naespirituan a pannakaammo?
-
Kasano a mailadawanyo dagiti kinapudno a naisuro iti Juan 7:14–17? Ti maysa a kapanunotan isu ti panangibinglay kadagiti miembro ti klase dagiti padas a nakagun-odanda iti pammaneknek maipapan ti kinapudno ti ebanghelio babaen ti panagbiag iti daytoy. Ti pakaammuan nga insalaysay ni Sister Bonnie L. Oscarson iti “Dagiti Nainayon a Resources” ti maysa pay a nasayaat a pagarigan. Mangted iti oras kadagiti miembro ti klase a mangpanunot iti maysa a pagbatayan ti ebanghelio a kayatda a pakagun-odan iti napigpigsa a pammaneknek, ket kalpasanna allukoyen ida a mangituding kadagiti nalawag a panggep a tun-oyen nga agbiag a naan-anay iti dayta a pagbatayan.
No maam-ammotayo ni Jesucristo, maam-ammotayo ti Ama.
-
Napaliiw ni Elder Jeffrey R. Holland: “Sumagmamano iti lubong iti agdama ti agsagsaba iti makaburibor a di panagkikinnaawatan maipapan iti [Dios nga Ama]. … Kuna dagiti tao nga agbibiag iti agdama a panawen a mariknada ti gin-awa kadagiti takiag ni Jesus, ngem saanda a makaidna iti panangpampanunot iti naiget a pannakisango iti Dios” (“The Grandeur of God,” Ensign wenno Liahona, Nob. 2003, 71). Ania ti isuro dagiti balikas ti Mangisalakan iti Juan 8:18–19, 26–29 maipapan iti pakainaiganna iti Amana? Kalpasan iti panangbasa ken panangilawlawag kadagitoy a bersikulo, mabalin nga ilista dagiti miembro ti klase iti pisarra ti sumagmamano a banag nga inaramid, insao, wenno insuro ni Jesus. Ania ti masursurotayo manipud kadagitoy a pagarigan?
Maited ti asi ti Mangisalakan iti amin nga agbabawi.
-
Kadagiti makarikna a nakondena gapu iti basbasolda, ti estoria maipapan iti Mangisalakan a mangidiaydiaya iti asi ken panagbabawi iti babai a nagbasol iti pannakikamalala ket mabalin a pagtaudan ti pammaregta. Wenno, no marikna a masulisog dagiti miembro ti klase a mangkondena kadagiti dadduma gapu kadagiti basolda, mabalin nga agserbi ti estoria kas maysa a pammallaag. Mabalinmo nga awisen ida a mangbasa iti Juan 8:1–11, nga agsapsapul kadagiti sungbat dagiti saludsod kas iti sumaganad: Ania ti isuro daytoy nga estoria maipapan iti asi ti Mangisalakan? Kasano a makatulong kadatayo ti panangawat iti asina no agbasoltayo no mariknatayo a masulisog a mangkedngan kadagiti dadduma? (Kitaen iti Alma 29:9–10). Mabalinmo nga ipakita ti video “Go and Sin No More” (LDS.org).
-
Tapno matulongan dagiti miembro ti klase a mangsapul iti personal a pakainaigan iti Juan 8:1–11, ibilang ti panangbingay iti klase iti tallo a grupo—maysa ti mangipokus kadagiti balikas ken tignay dagiti Fariseo, maysa ti mangipokus kadagiti balikas ken tignay ti Mangisalakan, ken maysa ti mangipokus kadagiti balikas ken tignay ti babai. Awisen ti tunggal grupo nga agaramid iti listaan dagiti naespirituan a kinapudno a masursuroda manipud iti panagbasa iti tunggal paset ti pakaammuan.
-
No dadduma saantayo nga ammo dagiti wagas a pangkedngantayo kadagiti dadduma. Adtoy ti maysa nga aktibidad a mangtulong kadagiti miembro ti klase a mangparmek iti daytoy nga ayotayo: Agpatulongka iti klase a mangaramid iti listaan dagiti wagas a pangkedngantayo kadagiti tao (iti langada, ugalida, nagtaudanda, ken dadduma pay). Ikkam dagiti miembro ti klase kadagiti pidaso ti papel a nagetteng iti sukog ti bato, ket idawatmo kadakuada a pumili iti maysa a wagas a pangkedngan kadagiti dadduma a mariknada a nagbasolda ket isurat daytoy iti papel a bato. Ania ti masursurotayo manipud kadagiti balikas ti Mangisalakan kadagiti Fariseo iti John 8:1–11? Awisem ti klase a mangisurat iti sabali a bangir ti papelda a bato ti maysa a banag a mangipalagip kadakuada a saan a mangkedngan (nalabit a maysa a ragup ti balikas manipud iti Juan 8).
Yallukoy ti Panagsursuro iti Pagtaengan
Kiddawem kadagiti miembro ti klase a mangpanunot iti maysa a kanito idi napukawda ti maysa a banag a napateg kadakuada. Kadagiti nasantuan a kasuratan para iti adalen iti sumaruno a lawas, masursurodanto no kasano ti rikna ti Nailangitan Nga Ama ken ni Jesucristo maipapan kadagiti napukaw.
Dagiti Nainayon a Resources
Ti panagbiag iti maysa a pagbatayan ket makatulong kadatayo a makagun-od iti pammaneknek maipapan iti daytoy.
Kinuna ni Sister Bonnie L. Oscarson:
“Insuro ti Mangisalakan, ‘Ti siasino man a mayat nga agaramid iti pagayatanna, maam-ammonanto ti maipapan iti isursurok, no agtaud iti Dios, wenno no agsaoak iti bukodko’ [Juan 7:17]. No dadduma padasentayo nga aramiden daytoy nga agpangngadua. Kas pagarigan, mabalintayo nga aramiden daytoy a pamay-an: Agbalinakto a naragsak nga agtungpal iti linteg ti apagkapullo, ngem umuna a kasapulak a maammuan a pudno daytoy. Nalabit nga agkararagtayo tapno magun-od ti pammaneknek maipapan iti linteg ti apagkapullo ket namnamaentayo a bendisionannatayto iti Apo iti dayta a pammaneknek sakbay a suratantayo ti tithing slip. Saan a kasta ti agballigi. Namnamaen ti Apo nga aramatentayo ti pammati. Nasken a kanayon a bayadantayo ti naan-anay ken napudno nga apagkapullo tapno magun-od ti pammaneknek maipapan iti apagkapullo. …
“Kayatko nga ibinglay ti maysa a pagarigan maipapan ti no kasano a makatulong kadatayo ti panagbiag iti maysa a pagbatayan tapno agbalin a napasurot iti dayta a pagbatayan. … Naipasagepsep iti panunotko dagiti nagannak kaniak ken mannursurok iti simbaan ti kinapateg ti nadayaw a panangtratok iti bagik, panangpatalinaed iti nalawag panunot, ken kangrunaan ti amin, panangsursuro nga agtalek kadagiti bilin ti Apo. Inkeddengkon a mangliklik kadagiti situasion nga ammok nga adda maiserbi nga arak ken yadayok ti bagik iti tabako ken druga. Masansan a kaipapanan daytoy ti saanko nga idadar-ay kadagiti pasken, ken manmano a nakisinnarakak. Nagbalinen nga ad-adda a gagangay ti panagusar iti druga kadagiti agtutubo ken saan nga ammo dagiti pagpeggadan idi a kas iti kalatakna ita nga agdama. Adu kadagiti kapatadak ti nagsagaba iti permanente a pannakadadael a gapuanan dagiti druga a mangbalbaliw iti panunot wenno nairubo iti pannakairuam iti druga wenno arak. Agyamanak a nasursuruan nga agtungpal iti Word of Wisdom iti pagtaengak, ken nakagun-odak iti nauneg a pammaneknek maipapan iti dayta a pagbatayan ti ebanghelio kabayatan ti panangaramatko iti pammati ken panagbiag iti daytoy. Ti nasayaat a rikna nga immapay kaniak gapu iti panagtungpal iti pudno a pagbatayan ti ebanghelio ket pudno ti Espiritu ti Espiritu Santo a mangipatpatalged iti dayta a pagbatayan” (“Be Ye Converted,” Ensign wenno Liahona, Nob. 2013, 77).
Panangpadur-as iti Panangisurotayo
Agbiag a maikari iti pannarabay ti Espiritu. No agbiagka a mayannurot iti ebanghelio, maikarika ti panangkadkadua ti Espiritu, nga isu ti kalaingan a mannursuro. No kalikagumam a gun-oden ti pannarabayna, ikkannakanto ti Espiritu Santo kadagiti kapanunotan ken impresion maipapan ti no kasano a maipaaymo ti kasapulan dagiti sursuruam (kitaen iti Panangisuro iti Wagas ti Mangisalakan, 5).