“Mayo 20–26. Mateo 21–23; Marcos 11; Lucas 19–20; Juan 12: ‘Adtoy Umayen ti Ariyo’” Umaykayo, Sumurot Kaniak—Para iti Sunday School: Baro a Tulag 2019 (2019)
“Mayo 20–26. Mateo 21–23; Marcos 11; Lucas 19–20; Juan 12,” Umaykayo, Sumurot Kaniak—Para iti Sunday School: 2019
Ni Zaqueo iti Kayo ti Sikamoro, ni James Tissot
Mayo 20–26
Mateo 21–23; Marcos 11; Lucas 19–20; Juan 12
“Adtoy, Umayen ti Ariyo”
Bayat ti panangbasam iti Mateo 21–23; Marcos 11; Lucas 19–20; ken Juan 12, panunotem dagiti saludsod a mabalinmo a damagen a makatulong a mangipaay iti kasapulan dagiti miembro ti klasem. Paregtaennakanto ti Espiritu Santo a maammuan no ania dagiti saludsod ken pagbatayan, agraman dagiti nadakamat iti daytoy a balabala, ti kasayaatan a mangipaay kadagita a kasapulan.
Isuratmo Dagiti Impresionmo
Yawis ti Panagbibinninglay
Kabayatan ti lawas sakbay ti klase, awisem ti sumagmamano a miembro ti klase nga agsagana a mangibinglay iti maysa a padas nga adda kadakuada iti panagadal kadagiti naituding a kapitulo iti daytoy a lawas. Ania dagiti bendision a maawatda bayat ti panagadalda kadagiti nasantuan a kasuratan kabayatan ti lawas?
Isuro ti Doktrina
Personal nga am-ammonatayo ti Mangisalakan.
-
Nalabit a narikna dagiti miembro ti klasem a naliwayanen wenno nalipatanen ida iti panawen iti biagda. Makatulong kadakuada ti pakaammuan maipapan ken ni Zaqueo tapno maawatanda nga am-ammo ida ti Nailangitan nga Ama ken Jesucristo ken ipatpategda ida. Tapno matulongan dagiti miembro ti klase a mangaramat itoy a pakaammuan iti biagda, awisem ida a mangipapan iti bagbagida a kas ni Zaqueo. Ania iti panagkunayo a nasursurona maipapan ti Mangisalakan manipud iti padasna? Ania ti masursurotayo manipud kadagiti panagkagumaan ni Zaqueo maipapan iti panagsapsapulna iti Mangisalakan?
-
Mabalin met a makatulong a kiddawem kadagiti miembro ti klase a mangpanunot kadagiti dadduma pay a pagarigan kadagiti nasantuan a kasuratan a nangawagan ti Apo kadagiti tao iti naganda. (Sumagmamano a pagarigan ti naited iti “Dagiti Nainayon a Resources.”) Mabalinmo pay nga awisen dagiti miembro ti klase a mangibinglay kadagiti padas a naipatalged kadakuada a personal nga am-ammo ida ti Apo.
Mateo 21:1–11; Marcoa 11:1–11; Lucas 19:29–44; Juan 12:12–16
Ni Jesucristo ti Aritayo.
-
Iti simple nga aktibidad ti mangyam-ammo iti panaglilinnawag maipapan iti naballigian nga iseserrek ti Mangisalakan iti Jerusalem: mabalin nga idrowing ti sumagmamano a miembro ti klase dagiti banag iti pisarra nga adda pakainaiganna iti ari, a kas iti korona wenno trono, idinto a pugtuan dagiti dadduma pay dagiti idrowdrowingda. Kalpasanna mabalin dagiti sabali pay a miembro ti klase ti mangidrowing iti urbon ken sangsanga ti kayo. Ania ti pakainaigan dagitoy a banag iti ari? Kalpasanna mabalinmo nga iparang ti ladawan ti naballigian nga iseserrek ti Mangisalakan iti Jerusalem iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia ket awisem dagiti miembro ti klase a mangbasa iti Marcos 11:1– 1. Kasano a nabigbig dagitoy a tao ni Jesus kas Arida? Kasano nga agdaydayawtayo ken ni Jesucristo kas Aritayo babaen kadagiti balikas ken tignaytayo?
-
Tapno makatulong a maawatan dagiti miembro ti klase a ni Jesucristo ti Artayo, mabalin nga idawat kadakuada a mangsubli a mangadal iti himno “Come, O Thou King of Kings,” Hymns, no. 59, wenno sabali pay a himno maipapan ken Jesus kas Aritayo. Ania dagiti balikas iti himno a mangipalagip kadatayo maipapan kadagiti kinapudno iti Mateo 21:1–11; Marcos 11:1–11; Lucas 19:29–44; ken Juan 12:12–16?
Dagiti dua a naindaklan a bilin ket ayaten ti Dios ken ayaten dagiti dadduma kas iti bagbagitayo.
-
Insuro ni Presidente Dieter F. Uchtdorf a ti panangaramid kadagiti banag malaksid iti dua a naindaklan a bilin a kangrunaan iti biagtayo ket kasla iti panangpana iti blangko a pader ken panangpaluspos kadagiti target iti lawlaw dagiti sikkubeng dagiti pana (kitaen iti “Aiming at the Center,” Ensign wenno Liahona, Ene. 2017, 4–5). Makatulong kadi kadagiti miembro ti klase ti panangilawlawag iti daytoy nga analohia tapno maawatanda ti Mateo 22:34–40? Maysa a wagas iti panangaramid iti daytoy ket mangiyaplag iti dakkel a papel iti suelo ket pagsisinnublaten dagiti miembro ti klase a mangitinnag iti pen wenno lapis ditoy. Kalpasanna mabalinda nga indrowing dagiti target a nagdissuan dagiti pen wenno lapisda iti papel ket suratanda ti tunggal target iti maysa a bilin. Kalpasan ti aggigiddan a panangbasa iti Mateo 22:34–40, mabalinmo ti mangidrowing iti baro a target a manglikmut iti amin a dadduma pay a target ket suratam daytoy iti “Ayatenyo ti Dios ken Ayatenyo dagiti Kaarrubayo.” Kasano a makatulong kadatayo ti panangipamaysa iti dua a naindaklan a bilin nga agtungpal kadagiti dadduma pay a bilin ti Dios? Kasano a masiguradotayo nga ipamaysatayo ti panagtungpaltayo kadagitoy dua a bilin?
Masalaknibantayonto no liklikantayo ti panangsurot kadagiti manangidalan a bulsek.
-
Mangted kadi iti pagimbagan kadagiti miembro ti klase ti panangilawlawag iti termino a “manangidalan a bulsek,” nga inusar ti Mangisalakan a pangiladawan kadagiti naespirituan a bulsek a Fariseo ken escriba? (Mateo 23:16). Mabalinmo a panunoten ti maysa a wagas a mangipakita no ania koma ti maipada para iti maysa a tao a sumurot iti tao a saan a makakita. Wenno mabalin nga ilista ti klase iti pisarra dagiti kababalin ti manangidalan a bulsek, kas nailadawan iti Mateo 23:13–33. Mainayon iti listaan, ibilangmo ti panangsapul kadagiti mainayon a nasantuan a kasuratan a mangisuro maipapan iti naespirituan a kinabulsek, kas kadagiti 2 Taga Corinto 4:3–4; 2 Nephi 9:28–32; ken Jacob 4:14. Kasano a mailasin ken maliklikantayo dagiti manangidalan a bulsek?
-
Mabalin a kayatmo a tulongan dagiti miembro ti klase tapno maawatanda nga ad-adda a nakatalimudok ti imatang dagiti escriba ken Fariseo iti balitok ken ti sagut iti templo ngem iti pudno a kaipapanan ti templo (kitaen iti Mateo 23:16–22). Tapno maaramid daytoy, ibilangmo ti panangibinglay iti pangngarig ni Presidente Boyd K. Packer maipapan iti perlas ken kahon iti “Dagiti Nainayon a Resources.” Ania ti mabalin a makasinga kadatayo iti panangsagrap kadagiti pudno a bendision ti templo? ti miting ti sakramento?
Ti Agbabbabawi a Publikano ken ti Managinsisingpet a Fariseo iti Templo, ni Frank Adams
Mabalin a manglapped ti pakaidayawan ti tattao kadatayo manipud iti panagbalin a natured a disipulo ni Jesucristo.
-
Mabalin a saan nga agtallugod a mangitakder iti ebangheliona ti sumagmamano a tao a mamati ken ni Jesucristo, nangnangruna kadagiti kagimongan a saan a mangibilang wenno manglalais kadagiti pammati iti relihion. Ania dagiti adda kadagiti adalen iti Juan 12:42–43 a para kadatayo iti agdama? Mabalinmo nga awisen ti klase a mangsapul kadagiti sumaganad a nasantuan a kasuratan ket mangilasin kadagiti tao nga agtarigagay a mangparagsak kadagiti tao ken dagiti tao nga agtarigagay a mangparagsak iti Dios: Exodo 32:1–8; 1 Samuel 15:18–25; Mateo 14:1–10; 1 Nephi 6:1– 6; Mosiah 17:1–12; ken Moroni 8:16. Ania ti masursurotayo manipud kadagitoy a pagarigan? Para iti ad-adu pay maipapan ti pagrebbengantayo a mangipeksa iti pammatitayo, kitaen iti Elder Robert D. Hales, “Preserving Agency, Protecting Religious Freedom,” Ensign wenno Liahona, Mayo 2015, 111–13.
Yallukoy ti Panagsursuro iti Pagtaengan
Impadto ti Mangisalakan a kadagiti maudi nga aldaw maallilawto uray dagiti mismo a napili (kitaen iti Joseph Smith—Mateo 1:22). Tapno maparegta dagiti miembro ti klase a mangbasa Joseph Smith—Mateo 1; Mateo 25; Marcos 12–13; ken Lucas 21 iti sumaruno a lawas, mabalinmo nga isarita kadakuada a masarakandanto kadagitoy a kapitulo ti tulbek iti panangliklik iti panangallilaw kadagiti ud-udina nga aldaw.
Dagiti Nainayon a Resources
Saggaysa nga am-ammonakayo ti Nailangitan nga Ama.
Impakdaar ni Elder Neal a. Maxwell: “Paneknekak kadakayo a saggaysa a naam-ammonakayo ti Dios … iti nabayag unay a panawen (kitaen iti DkK 93:23). Inayatnakayo iti nabayag unay a panawen. Saan laeng nga ammona ti nagnagan dagiti amin a bituen (kitaen iti Salmo 147:4; Isaias 40:26); Ammona ti nagnagan ken ti amin a paglidayanyo ken pagragsakanyo!” (“Remember How Merciful the Lord Hath Been,” Ensign wenno Liahona, Mayo 2004, 46).
Dagiti pagarigan a nangawagan ti Apo kadagiti tao iti naganda.
Ti pangngarig maipapan iti perlas ken ti kahon.
Insalaysay ni Presidente Boyd K. Packer daytoy a pangngarig: “Maysa nga agtagtagilako a lalaki nga agsapsapul kadagiti napateg nga alahas a nakasarak iti naan-anay a perlas iti kamaudiananna. Panaikitikitna iti kalalaingan nga agkitkitikit ti maysa a nakapimpintas a kahon a pagyanan ti alahas ken naabbongan iti asul a velvet ti uneg daytoy. Indispleyna ti kapatgan a perlasna tapno makita dagiti dadduma ti kinabaknangda. Binuyana dagiti tao nga immay kumita iti daytoy. Saan a nabayag pimmanaw isuna a sileleddaang. Ti kahon ti dinaydayawda, saan a ti perlas” (“The Cloven Tongues of Fire,” Ensign, Mayo 2000, 7).
Panangpadur-as iti Panangisurotayo
Saan a nasken nga isurom ti amin a banag. “Adu ti paglilinnawagan iti tunggal adalen, ngem saan a nasken nga isuro ti amin a banag iti maysa a class period tapno masagid ti puso ti maysa a tao—masansan nga umdasen ti maysa wenno dua a kangrunaan a punto. Kabayatan ti panangutobmo iti kasapulan dagiti agad-adal, tulongannakanto ti Espiritu a mangilasin no ania kadagiti prinsipio, estoria, wenno nasantuan a kasuratan ti nagnangruna a napnuan kaipapanan kadakuada” (Panangisuro iti Wagas ti Mangisalakan, 7).