Ti Maikadua a Yaay, ni Harry Anderson

Mayo 27–Hunio 2

Joseph Smith—Mateo 1; Mateo 25; Marcos 12–13; Lucas 21

“Umayto ti Anak ti Tao”

Laglagipem a rugiam iti panagsaganam a mangisuro babaen ti nainkararagan a panagbasam iti Joseph Smith—Mateo 1; Mateo 25; Marcos 12–13; ken Lucas 21. Agkalikagumka a manggun-od iti pammaregta iti bukodmo, ket kalpasanna a subliam nga adalen daytoy a balabala para kadagiti nayon pay a kapanunotan.

Isuratmo Dagiti Impresionmo

Yawis ti Panagbibinninglay

Ilistam iti pisarra dagiti pangngarig ti Mangisalakan a masarakan iti babasaen iti daytoy a lawas, kas iti kayo ti igos, ti nasayaat a tao ken dagiti mannanakaw, dagiti napudno ken dakes nga adipen, dagiti sangapulo a babbalasang, dagiti talento, ken ti karnero ken dagiti kalding. Paibinglay kadagiti miembro ti klase dagiti kinapudno a nasursuroda manipud kadagitoy a pangngarig a makatulong kadakuada nga agsagana para iti Maikadua a Yaay ti Apo. Ania ti ar-aramidenda a mangyaplikar kadagitoy a kinapudno iti biagda?

Isuro ti Doktrina

Joseph Smith—Mateo 1:21–37

Dagiti padto maipapan iti Maikadua a Yaay ti Mangisalakan ket makatulong kadatayo a mangsango iti masakbayan nga addaan pammati.

• Mabalin a narigat a maawatan ti sumagmamano a miembro ti klase dagiti pagilasinan ti Maikadua a Yaay ti Mangisalakan. Mabalin a makatulong daytoy kadakuada nga agtrabaho iti kada grupo ken mangilasin kadagiti pagilasinan a masarakanda iti Joseph Smith—Mateo 1:21–37. Mabalin pay a makatulong kadakuada a makaawat a nasaysayaat ti kinapateg dagitoy a pagilasinan no idiligda dagitoy kadagiti pagilasinan iti kalsada. Apay a napateg dagiti pagilasinan iti kalsada? Ania ti isingasing daytoy maipapan kadagiti pagilasinan ti Maikadua a Yaay? Mabalinmo pay nga ikkan ti tunggal grupo kadagiti piraso ti papel iti sukog dagiti pagilasinan iti kalsada ket awisem ida a mangisurat iti tunggal papel ti pagilasinan a kasakbayanto ti Maikadua a Yaay. Paibinglaymo kadakuada no ania ti nasarakanda, ket awisem ti klase a mangilawlawag iti pakakitaan dagitoy pagilasinan iti lubong iti agdama.

• Iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia, naawis dagiti miembro ti klase a mangsarak iti balakad kadagitoy a bersikulo maipapan iti no kasano a “ditay mariribukan” kabayatan dagiti pasamak a mangitunda iti Maikadua a Yaay (kitaen met iti palawag ni Presidente Thomas S. Monson iti “Dagiti Nainayon a Resources”). Idispley ti maysa a ladawan a mangiladawan iti Maikadua a Yaay (kitaen iti Ti Maikadua a Yaay, Libro ti Arte ti Ebanghelio, num. 66), ken mangawis kadagiti miembro ti klase a mangibinglay kadagiti bersikulo a nakitada iti bukodda a panagadal. Apay a maysa a bendision a maammuan maipapan dagiti pasamak a mangitunda iti Maikadua a Yaay ti Mangisalakan?

Joseph Smith—Mateo 1:26–27, 38–55; Mateo 25:1–13

Nasken a kanayon a nakasaganatayo para iti Maikadua a Yaay ti Mangisalakan.

• Nupay indawat ti Mangisalakan kadatayo a kanayon nga agsagana para iti Maikadua a Yaayna, nalaka ti agbalin a mairaman iti inaldaw a panagbiag ken saan a panunoten unay ti maipapan iti daytoy. Dagiti pangngarig iti Joseph Smith—Mateo 1:26–27, 38–55 ken Mateo 25:1–13 ket makatulong kadagiti miembro ti klase a mangbigbig iti kinapateg ti nakapagsagana para iti Maikadua a Yaay. Awisem dagiti miembro ti klase a mangsapul kadagitoy a pangngarig ken panangidasig ket ibinglayda no ania ti isuro dagitoy maipapan iti panagbalin a nakasagana para iti Maikadua a Yaay. Nalabit a makaumay ti maysa wenno dua a miembro ti klase a nakasagana nga addaan iti managpartuat a panangiladawan iti maysa kadagitoy a pangngarig.

• Ti pangngarig maipapan ti sangapulo a babbalasang ket makatulong kadagiti miembro ti klase a mangpanunot maipapan kadagiti naespirituan a panagsagana a sumabat iti Mangisalakan. Nangted ni Elder David A. Bednar iti maysa a kayulogan ti pangngarig a makatulong (kitaen iti “Dagiti Nainayon a Resources”). Mabalin a paglilinnawagan dagiti miembro ti klase no ania ti maaramidtayo iti inaldaw a panagbiagtayo tapno agbalin a naan-anay a napasurot iti ebanghelio. Apay a nasken a mapadasan ti tunggal maysa kadatayo ti pannakapasurot para iti bagbagitayo? Ania ti mainayon ti Doktrina ken Katulagan 45:56–57 iti pannakaawattayo iti daytoy a pangngarig?

• Mabalin nga aggigiddankayo a mangkanta kadagiti himno maipapan iti Maikadua a Yaay ket paglilinnawagan dagiti mensahe nga isuro dagitoy (kitaen iti “Dagiti Nainayon a Resources”).

Mateo 25:14–30

Iti Maudi a Panangukom, itedtayonto iti Apo ti pakaammuan maipapan ti biagtayo.

• Ti pangngarig dagiti talento ken ti pangngarig ti karnero ken dagiti kalding ket mabalin mangparegta kadatayo a mangpanunot maipapan iti pakaammuan ti biagtayo nga itedtayonto iti Apo iti Maudi a Panangukom. Mabalin nga aggigiddankayo a mangbasa kadagiti pangngarig ket awisem ti tunggal miembro ti klase a mangibinglay iti maysa a saludsod a mabalin a damagen ti Mangisalakan no mangtedtayo iti pakaammuan maipapan iti biagtayo. Mangted iti oras tapno agplano dagiti miembro ti klase kadagiti wagas a pakapagtignayandanto kadagiti impresion a naawatda kabayatan ti panaglilinnawag.

  

  Inusar ni Cristo ti karnero ken dagiti kalding tapno mangisuro maipapan iti Maudi a Panangukom (kitaen iti Mateo 25: 31–33).

• Mabalin a kayatmo a sublien nga adalen a kadua dagiti miembro ti klase ti kaipapanan ti Maudi a Panangukom a masarakan iti Pangiwanwan iti Nasantuan a Kasuratan, “Panangukom, Ti Maudi,” scriptures.lds.org. Kalpasanna mabalinmo nga idawat kadagiti miembro ti klase a mangadal iti sumagmamano a nasantuan a kasuratan maipapan iti no ania ti kayarigan ti Maudi a Panangukom, kas iti Alma 5:17–25. Ania ti pinaregta dagitoy a nasantuan a kasuratan nga aramidentayo tapno makapagsagana para iti dayta nga aldaw?

• Tapno makatulong kadagiti miembro ti klase a mangsapul iti personal a kaipapanan ti pangngarig dagiti talento (kitaen iti Mateo 25:14–30), ibinglay ti sumagmamano a kapanunotan wenno usarem iti maysa nga aktibidad manipud iti “The Parable of the Talents,” ni Elder Ronald A. Rasband (Ensign, Ago. 2003, 32–35).

• Tapno maparegta ti panaglilinnawag maipapan iti Mateo 25: 34–40, mabalinmo nga awisen dagiti miembro ti klase a mangibinglay kadagiti pagwadan dagiti tao a mangipakita iti panangngaasi a nailadawan kadagitoy a bersikulo. Mangted kadakuada iti oras nga agutob no asino ti mabalin nga agkasapulan iti serbisioda. Ania dagiti sumagmamano a maaramat a wagas tapno mapakantayo dagiti mabisin, makawesantayo dagiti lamulamo, ken masarungkarantayo dagiti masakit?

Yallukoy ti Panagsursuro iti Pagtaengan

Tapno maallukoy dagiti miembro ti klase a mangbasa iti Juan 13–17 kabayatan ti sumaruno a lawas, kiddawem kadakuada a mangpanunot maipapan iti no ania koma ti isaoda iti maysa nga anak a lalaki wenno babai sakbay a pumanaw nga agmision. Iti Juan 13–17, mabasatayonto dagiti maudi a pangiturong nga inted ti Mangisalakan kadagiti disipulona sakbay ti Pannakailansana iti Krus.

Dagiti Nainayon a Resources

Joseph Smith—Mateo 1; Mateo 25; Marcos 12–13; Lucas 21

Dagiti himno maipapan ti Maikadua a Yaay.

• “Now Let Us Rejoice,” Hymns, no. 3

• “Come, Ye Children of the Lord,” Hymns, no. 58

• “Come, O Thou King of Kings,” Hymns, no. 59

• “I Believe in Christ,” Hymns, no. 134

• “Joy to the World,” Hymns, no. 201

Ti lana ti pannakapasurot wenno kumbersion.

Insingasing ni Elder David A. Bednar daytoy mabalin a kayulogan ti pangngarig dagiti sangapulo a babbalasang:

“Ibilangyo ti lana a lana ti pannakapasurot [kitaen iti Mateo 25:4–9]. …

“Naimot kadi dagiti lima a manakem a babbalasang ken saan a nangibinglay, wenno husto kadi nga ipakpakitada a saan a mabalin a mabulod ti lana ti pannakapasurot wenno kumbersion? Maited kadi iti sabali a tao ti naespirituan a pigsa nga agbanag manipud iti agtultuloy a panagtungpal kadagiti bilin? Maited kadi iti maysa nga agkasapulan ti pannakaammo a nagun-od babaen ti napasnek a panagadal ken panagutob kadagiti nasantuan a kasuratan? Mayakar kadi iti tao a maipaspasango iti rigat wenno dakkel a karit ti talna ti ebanghelio a naisangbay iti maysa a napudno a Santo iti Ud-udina nga Aldaw? Ti nalawag a sungbat iti tunggal maysa kadagitoy a saludsod ket saan.

“Kas iti inyunay-unay a nasayaat dagiti manakem a babbalasang, tunggal maysa kadatayo ket nasken a ‘gumatangtayo para iti bagbagitayo.’ Saan nga iladladawan dagitoy naparegta a babbai a kasapulan ti bayadan; ketdi, yunay-unayda ti pagrebbengantayo a mangpatalinaed a nakasindi dagiti pagsilawantayo iti pammaneknek ken panggun-od iti abasto a kasapulan a lana ti pannakapasurot wenno kumbersion. Magun-od daytoy napateg a lana iti tunggal tedted—’tunggal binatog [ken] tunggal pammilin’ (2 Nephi 28:30), siaanus ken sipupursigi” (“Converted unto the Lord,” Ensign wenno Liahona, Nob. 2012, 109).

Dikay agbuteng.

Kinuna ni Presidente Thomas S. Monson:

“Uray no maummong dagiti ulep ti bagyo, uray maibuyat dagiti tudo kadatayo, ti pannakaammotayo iti ebanghelio ken ti ayattayo iti Nailangitan nga Ama ken ti Mangisalakantayo ti mangliwliwa ken mangtulongto kadatayo ken mangidanon iti rag-o kadagiti pusotayo no magnatayo a sililinteg ken agtungpal kadagiti bilin. …

“Patpatgenmi a kakabsat a lallaki ken babbai, dikay agbuteng. Agragsakkayo. Kas karaniag ti masakbayanyo ti pammatiyo” (“Be of Good Cheer,” Ensign wenno Liahona, Mayo 2009, 92).

Panangpadur-as iti Panangisurotayo

Siguraduem nga isursurom ti pudno a doktrina. “Agtultuloy a saludsodem iti bagim,‘Kasano a matulonganto ti isursurok dagiti miembro ti klasek a mangpatibker iti pammatida ken Cristo, agbabawi, agaramid ken agtungpal kadagiti katulagan iti Dios, ken umawat iti Espiritu Santo?’” (Panangisuro iti Wagas ti Mangisalakan, 20).