Ecce Homo, ni Antonio Ciseri

Hunio 17–23

Mateo 27; Marcos 15; Lucas 23; Juan 19

“Natungpalen”

Rugiam ti panagsaganam a mangisuro babaen ti nainkararagan a panangbasam iti Mateo 27; Marcos 15; Lucas 23; ken Juan 19. Laglagipem a kabaelamto ti mangted iti nabileg a pammaneknek maipapan iti Mangisalakan ken ti Pannubbotna no agbiagka a maikari iti Espiritu.

Isuratmo Dagiti Impresionmo

Yawis ti Panagbibinninglay

Makatulong nga isurat iti pisarra ti sumagmamano a balikas wenno ragup ti balikas a mangipalagip kadagiti miembro ti klase kadagiti pasamak a nailadawan kadagiti kapitulo iti daytoy a lawas. Kiddawem kadagiti miembro ti klase a mangisurat iti pisarra ti sumagmamano a balikas a mangiladawan no ania ti nariknada idi binasada maipapan kadagitoy a pasamak. Apay a nariknada ti kastoy?

Isuro ti Doktrina

Mateo 27; Marcos 15; Lucas 23; Juan 19

Ti panagtallugod ni Jesucristo nga agsagaba ket mangipakita iti ayatna para iti Ama ken para iti amin kadatayo.

• Tapno matulongan a maawatan ti klasem no kasano a naipakita ti ayat ti Mangisalakan kadagiti pakaammuan maipapan iti ipapatayna, padasen ti maysa nga aktibidad kas iti daytoy: Ikkam ti tunggal miembro ti klase iti papel a sinanpuso, ken awisem ida a mangisurat kadagiti sinanpusoda iti maysa a ragup ti balikas manipud iti 1 Taga Corinto 13:4–7 a mangiladawan iti ayat iti pada a tao. Kalpasanna kiddawem kadakuada a mangsukisok iti Mateo 27; Marcos 15; Lucas 23; wenno Juan 19 ken mangisurat iti sabali pay a bangir dagiti sinanpusoda ti sumagmamano a bersikulo a mangipakita no kasano nga impakita ti Mangisalakan ti ayatna a nailadawan iti ragup ti balikas a pinilida. Paibinglay kadakuada no ania ti nasarakanda. Ania dagiti padas a nakatulong a maawatan dagiti miembro ti klase ti ayat ti Mangisalakan?

  

  Dagiti soldado ket “naglagada kadagiti sisiit nga imbalangatda kenkuana”Marcos 15:17).

• Ania ti maaramidmo a mangallukoy kadagiti miembro ti klase a mangibinglay kadagiti pammaneknekda maipanggep iti nasursuroda itoy a lawas? Ibilangmo ti panagawis kadagiti miembro ti klase a mangsarak iti maysa a himno a mangiladawan kadagiti pasamak a nabasada wenno ti panagriknada maipapan iti panagsagaba ken Pannakailansa iti krus ti Mangisalakan. Ibilang ti panangkanta iti maysa wenno dua kadagitoy kas maysa a klase. Kasano a maparegtanatayo nga agtalek ken sumurot Kenkuana ti panagadal maipapan kadagiti maudi nga oras ti Mangisalakan?

• Makatulong ti arte kadagiti miembro ti klase a mangiladawan iti panunotda ti sumagmamano a pasamak a nabasada itoy a lawas (kitaen iti “Dagiti Nainayon a Resources” para kadagiti naisingasing a ladawan). Nalabit a mabalinmo a bingayen ti klase kadagiti grupo ket ikkam iti maysa a ladawan ti tunggal grupo. Mabalin nga aggigiddan a basaen dagiti grupo dagiti bersikulo a mangiladawan no ania ti naiparang iti ladawanda. Mabalinda a paglilinnawagan ti kaipapanan dagiti bersikulo ket ibinglayda no kasano a makatulong kadakuada ti ladawan tapno nasaysayaat a maawatanda dagiti bersikulo. Mabalin nga ibinglay ti tunggal grupo dagiti kapanunotanda iti klase. Mabalinmo pay nga ibilang ti panangipabuya kadagiti video a “Jesus Is Condemned before Pilate” ken “Jesus Is Scourged and Crucified” (LDS.org).

• Diyo kabaelan a paglilinnawagan ti amin dagiti detalye maipapan kadagiti maudi nga oras ti panagbiag ti Mangisalakan kas maysa a klase, ngem adtoy ti maysa nga aktibidad a makatulong kenka a mangilawlawag kadagiti detalye a kangrunaan a napnuan kaipapanan kadagiti tao a sursuruam. Awisem ti tunggal miembro ti klase a pumili iti maysa a kapitulo manipud iti babasaen itoy a lawas ket mangbubos iti sumagmamano a minuto a mangamiris iti daytoy, a mangsapsapul iti maysa a balikas, maysa a ragup ti balikas [phrase], wenno maysa a detalye a mangisuro kadakuada iti maysa a banag a napnuan kaipapanan maipapan iti Mangisalakan ken ti misionna. Ikkam ida kadagiti gundaway a mangibinglay no ania ti nasarakanda ken mangilawlawag no apay a napnuan kaipapanan kadakuada daytoy.

Mateo 27:14–60

Nasirmata dagiti nagkauna a propeta ti panagsagaba ken Pannakailansa ti Mangisalakan iti krus.

• Mabalin a mangpapigsa daytoy iti pammati dagiti sursuruam a mangammo a nasirmata dagiti nagkauna a propeta ti adu a pasamak kadagiti maudi nga oras iti biag ti Mangisalakan. Maysa a wagas tapno matulongan a marebyu dagiti miembro ti klase dagitoy a padto ken makitada no kasano a naipatungpal dagitoy ket ti panangted iti tunggal tao iti maysa wenno ad-adu pay kadagiti nasantuan a kasuratan iti “Dagiti Nainayon a Resources” ket idawat kadakuada a mangsapul kadagiti bersikulo iti Mateo 27 a mangipakita no kasano a naipatungpal dagiti nasantuan a kasuratan. Mabalinmo ti agaramid iti tsart a mangipadis kadagiti padto kadagiti pannakaipatungpal dagitoy. Mabalinmo nga isingasing nga isurat dagiti miembro ti klase dagiti bersikulo a naglaon kadagiti padto iti margin dagiti nasantuan a kasuratanda iti Mateo 27. Ania ti masursurotayo manipud kadagitoy a padto? Kasano a a papigsaen dagitoy a padto ti pammatitayo ken ni Jesucristo?

Mateo 27:27–49; Marcos 15:16–32; Lucas 23:11, 35–39; Juan 19:1–5

Saan a mapasardeng ti oposison ti aramid ti Dios.

• Mabalin nga adda kadagiti miembro ti klasem ti naipasangon iti oposision—kas iti pannakakedngan wenno pannakalais—idi impeksada dagiti pammatida wenno inkarigatanda ti nagbiag a mayannurot iti pammatida. Ibilang ti panangirugi iti panaglilinnawagyo babaen ti panangidawat iti sumagmamano a miembro ti klase a mangibinglay kadagiti padasda idi napasamak daytoy. Kasano a simmungbatda? Awisem dagiti miembro ti klase a mangbasa kadagitoy a bersikulo manipud iti Mateo 27; Marcos 15; Lucas 23; ken Juan 19 a mangiladawan iti pammarparigat a nakaipasanguan ti Mangisalakan. Ania dagiti kita ti oposision a pakaipaspasanguan ti aramid ti Dios iti agdama? Ania ti masursurotayo manipud kadagiti sungbat ti Mangisalakan a makatulong kadatayo a mangsango iti oposision iti aldawtayo? Ti dadduma pay a nasantuan a kasuratan a makatulong kadatayo no maipasangotayo iti oposision ket mangiraman kadagiti Mateo 5:10; Taga Roma 12:14; 2 Timoteo 3:10–12; Alma 1:19–28; ken 3 Nephi 12:10–12. Ania ti masursurotayo manipud kadagitoy a bersikulo?

Lucas 23:34–43

Idiaya ti Mangisalakan kadatayo ti namnama ken pammakawan.

• Makatulong kadi kadagiti miembro ti klasem a mangbasa iti pakaammuan maipapan iti Mangisalakan a mangidawdawat iti Ama a mangpakawan kadagiti soldado ken mangidiaydiaya iti namnama iti mannanakaw iti krus? Ibilangmo ti panagbingay iti klase iti dua a grupo ken panangtuding iti maysa a grupo a mangbasa iti Lucas 23:34–38 (agraman ti bersikulo 34, footnote c, a mangted iti nalawag a pannakaammo ken pannakaawat [insight] manipud iti Patarus ni Joseph Smith) ken iti sabali pay a grupo a mangbasa iti Lucas 23:39–43. Mabalin a paglilinnawagan dagiti miembro ti tunggal grupo no ania ti nasursuroda maipapan iti Mangisalakan manipud kadagitoy a bersikulo ket kalpasanna ibinglayda dagiti kapanunotanda iti sibubukel a klase. Kasano a masurottayo ti pagwadan ti Mangisalakan?

• Tapno matulongan ti asino man iti klasem a mabalin a marigatan a mangpakawan iti dadduma kas iti inaramid ni Jesus, ibilang ti panangibinglay iti palawag ni Elder Jeffrey R. Holland iti “Dagiti Nainayon a Resources.”

Yallukoy ti Panagsursuro iti Pagtaengan

Tapno maallukoy dagiti miembro ti klase a mangbasa iti Mateo 28; Marcos 16; Lucas 24; ken Juan 20–21 kabayatan ti sumaruno a lawas, pagpanunoten ida maipapan iti no ania ti isaoda iti maysa a tao nga agkuna iti, “Nasken a makitak tapno patiek.” Ibagam kadakuada a ti babasaen iti sumaruno a lawas ket makatulongto kadakuada a mangrisut iti daytoy a pakaseknan.

Dagiti Nainayon a Resources

Mateo 27; Marcos 15; Lucas 23; Juan 19

Dagiti ladawan ti pammarparigat, panagsagaba, ken ipapatay ni Jesus.

• Pilate Washes His Hands (LDS.org; Mateo 27:11–25)

• }Christ with a Crown of Thorns (LDS.org; Mateo 27:26–31)

• }Jesus Carries His Cross (LDS.org; Juan 19:13–18)

• Ti Pannakailansa iti Krus (LDS.org ken Libro ti Arte iti Ebanghelio, num. 57; Lucas 23:33–46; Juan 19:23–37)

• Pannakaitanem ni Jesus (LDS.org ken Libro ti Arte iti Ebanghelio, num. 58; Juan 19:38–42)

Dagiti nagkauna a padto maipapan iti pannakausig ken ipapatay ni Jesucristo.

• Isaias 53:5, 7

• 1 Nephi 19:9

• Isaias 50:6

• Salmo 69:21

• Salmo 22:16

• 1 Nephi 19:10

• Salmo 22:18

• Isaias 53:9, 12

• Salmo 22:7–8

• Salmo 22:1

• Isaias 53:9

Ti pagwadan ni Jesus iti pammakawan.

Insuro ni Elder Jeffrey R. Holland:

“Ti asideg a mainaig iti bukodtayo nga obligasion nga agbabawi ket ti kinaayattayo a panangpalugod iti dadduma nga agaramid met iti kasta—nasken a mamakawantayo a kas iti pannakapakawan kadatayo. Iti daytoy makiramantayo iti mismo a kangrunaan a pagbatayan ti Pannubbot ni Jesucristo. Awan duadua a ti nakaskasdaaw unay a kanito iti dayta a naliday a Biernes, idi nagkintayeg ti nakaparsuaan ken napigis ti belo ti templo, ket ti saan a maisawang a naasi a kanito idi kinuna ni Cristo, ‘Ama, pakawanem ida, ta dida ammo ti ar-aramidenda.’Kas maysa a mangibabaettayo iti Ama, ar-aramidenna pay laeng dayta isu met la a pakaasi iti agdama—para kadakayo ken para kaniak.

“Ditoy, kas iti amin a banag, intuding ti Jesus ti pagrukodan a surotentayo. Ababa unay ti biag tapno mabubos iti panangituloytayo iti pannakisinnupanget iti tunggal maysa. … Ditayo tarigagayan a malagip ti Dios dagiti basbasoltayo, isu nga adda maysa a banag a kangrunaan a biddut iti awan sardayna a panangpadastayo a manglaglagip kadagiti basbasol dagiti dadduma” (“The Peaceable Things of the Kingdom,” Ensign, Nob. 1996, 83).

Panangpadur-as iti Panangisurotayo

Mangala iti pigsa manipud iti Mangisalakan. Kadagiti panagkagumaanmo nga agbiag ken mangisuro nga ad-adda a kas iti Mangisalakan, saanmonto a maliklikan nga agkurangka no dadduma. Saanka a mapukawan iti namnama, ketdi, bay-am a dagiti biddut ken pagkapsutam ti magyasideg kenka iti Nailangitan nga Ama ken iti Mangisalakan”(Panangisuro iti Wagas ti Mangisalakan, 14).