Ni Jesus a makisasao ken ni Pedro

Pakanem dagiti Karnerok, ni Kamille Corry

Hunio 24–30

Mateo 28; Marcos 16; Lucas 24; Juan 20–21

“Nagungaren”

Sakbay ti panangsukisok kadagiti kapanunotan iti panangisuro iti daytoy a balabala, basaem ti Mateo 28; Marcos 16; Lucas 24; ken Juan 20–21, ket utobem no kasano a mausar dagitoy a kapitulo a pangpapigsa iti pammati dagiti sursuruam.

Isuratmo Dagiti Impresionmo

icon iti panagbibinninglay

Yawis ti Panagbibinninglay

Tapno matulongan dagiti miembro ti klase a mangibinglay iti no ania ti nasursuroda iti bukod ken sangapamiliaan a panagadalda, paisurat kadakuada ti maysa a kinapudno manipud iti naituding a basaen iti daytoy a lawas a mariknada a nasken a maibinglay iti “isu amin a lubong” (kitaen iti Marcos 16:15). Iti gibus ti klase, saludsodem kadakuada no nasarakanda dagiti ania man a mainayon a kinapudno a kayatda nga ibinglay.

icon iti panangisuro

Isuro ti Doktrina

Mateo 28; Marcos 16; Lucas 24; Juan 20

Gapu ta nagungar ni Jesus, agungartayonto met.

• Tapno maikkan ti adu a tattao agingga a mabalin iti gundaway a mangibinglay no ania ti nasursuroda maipapan iti Panagungar, mabalinmo nga ikkan dagiti miembro ti klase iti sumagmamano a minuto a mangrebyu iti naituding a basaen iti daytoy a lawas ken ti “Panangungar” iti Pangiwanwan iti Nasantuan a Kasuratan ken mangisurat kadagiti kinapudno a nasursuroda maipapan iti Panagungar. Paibinglay kadakuada no ania ti insuratda, ket allukoyem dagiti miembro ti klase a mangingato kadagiti imada no mangngeganda ti maysa a tao a mangibinglay iti kinapudno a kapada ti insuratda. Apay a napateg kadatayo dagitoy a kinapudno? Kasano a ti panangammotayo nga agungartayonto ket apektuannanto dagiti riknatayo maipapan iti Nailangitan nga Ama ken ni Jesucristo? Ti panangipabuya iti music video a “He Is Risen” (LDS.org) ket makatulong a mangawis iti Espiritu iti daytoy a panaglilinnawag.

Lucas 24:13–35

Maawistayo ti Mangisalakan nga “agtalinaed kadatayo.”

• Tapno matulongan dagiti miembro ti klase a mangkita kadagiti koneksion iti nabaetan dagiti padasda ken ti padas dagiti disipulo iti kalsada nga agturong iti Emmaus, mangidrowing iti maysa a kalsada iti pisarra, ket awisem dagiti miembro ti klase a mangisurat kadagiti detalye manipud iti pakaammuan iti Lucas 24:13–35 iti maysa pay a bangir ti kalsada. Kalpasanna, iti sabali a bangir ti kalsada, mabalinda nga isurat dagiti agpapada a makitada iti bukodda a padpadas kas pasurot ni Jesucristo. Kas pagarigan, mabalinda nga isurat ti Dagiti matada nakullaapanda (Lucas 24:16) iti maysa a bangir ti kalsada ken No dadduma ditayo mailasin ti impluensia ti Apo iti biagtayo iti sabali a bangir.

• Adda dua a himno a naibasar iti Lucas 24:13–35: “Abide with Me; ’Tis Eventide” ken “Abide with Me!” Hymns, nos. 165, 166. Kasano a mausarmo dagitoy a himno a makatulong kadagiti miembro ti klase a mangsarak iti naun-uneg a kaipapanan iti pakaammuan iti nasantuan a kasuratan?

Mateo 28:16–20; Marcos 16:14–20; Lucas 24:44–53

Nabilintayo a mangikasaba iti ebanghelio iti amin a lubong.

• Ti bilin nga inted ti nagungar a Mangisalakan kadagiti disipulona a mangikasaba iti ebangheliona ket mayaplikar met kadatayo ita. Kasano a matulongam dagiti miembro ti klasem a mangkita iti akemda iti panangikasaba iti ebanghelio? Nalabit a maawismo ida a mangipapan a mangmangtedda iti sumagmamano a balakad iti maysa a miembro ti pamilia wenno gayyem a dumanin pumanaw tapno agserbi iti full-time a mision. Ania ti maibinglaytayo manipud kadagiti balikas ti Mangisalakan kadagiti Apostolna? Kasano a mayaplikartayo dagitoy isu met la a balikas kadagiti panagkagumaantayo a mangibinglay iti ebanghelio kadagiti dadduma?

Juan 20:19–28

“Nagasat dagiti saan pay a nakakita, ngem namatida.”

• Mabalin nga addaanka kadagiti miembro ti klase a nakipagrikna ken ni Tomas, a nagtarigagay a makita ti nagungar nga Apo sakbay a namati isuna. Ti klasem iti Sunday School ket mabalin a maysa a lugar para kadagiti miembro ti klase tapno agpipinnapigsa iti pammati ti tunggal maysa kadagiti banag a saanda a makita. Nalabit a mairugim babaen ti panangidawatmo iti maysa a tao a manggupgop iti padas ni Tomas iti Juan 20:19–28 Mabalinmo pay nga ipabuya ti video “Blessed Are They That Have Not Seen, and Yet Have Believed” (LDS.org). Mabalin nga ilista dagiti miembro ti klase iti pisarra ti sumagmamano a banag nga indawat ti Dios a patientayo a saan a makitkita. Kalpasanna mabalin nga idawatmo kadakuada a mangibinglay kadagiti padas a nangpapigsa kadagiti pammaneknekda maipapan kadagitoy a banag. Ania dagiti bendision a dimteng kadagiti miembro ti klase bayat ti panangaramatda iti pammati?

Ni Cristo iti panagparangna kadagiti Apostolna

Insuro ni Jesus ken ni Tomas, “Saanka a di mamati, no di ket mamatika” (Juan 20:27).

Juan 21:3–17

Awisennatayo ti Mangisalakan a mangpakan kadagiti karnerona.

• Ania ti mabalin a makatulong kadagiti miembro ti klase nga umawat iti awis ti Mangisalakan a “mangpakan iti karnero[na]”? Mabalinmo nga irugi babaen ti panangawis kadakuada a mangbasa iti Juan 21:15–17 a siuulimek, a mangsukat iti nagan ni Simon iti bukodda a nagan ken “dagiti korderok” ken “dagiti karnerok” iti nagnagan dagiti tao a mariknanda a kayat ti Apo a pagserbianda—kas pagarigan, dagiti tao a suruanda iti pagtaengan wenno sarungkaranda a suruan, dagiti kaarruba, wenno tattao nga am-ammoda iti trabaho wenno eskuela. Kalpasan ti sumagmamano a minuto, mabalin nga ibinglay dagiti miembro ti klase dagiti impresion nga adda kadakuada. Ania ti kayat a sawen ti pakanen dagiti kordero ken karnero ti Mangisalakan? Ti palawag da Presidente Russel M. Nelson ken Elder Marvin J. Ashton iti “Dagiti Nainayon a Resources” ket makatulong a mangsungbat iti daytoy a saludsod.

icon iti panangsursuro

Yallukoy ti Panagsursuro iti Pagtaengan

Tapno maparegta dagiti miembro ti klase a mangbasa iti Dagiti Aramid 1–5 iti daytoy a lawas, idawat kadakuada a mangikaso iti no kasano a nagbalin a nabileg a leader ti Simbaan ni Cristo ti maysa nga awan adalna nga agdakdaklis kas iti pannakaipadamagna iti intero a lubong. Bayat ti panagadalda kadagitoy a kapitulo, makitadanto no kasano a naaramid daytoy a panagbalbaliw.

resources icon

Dagiti Nainayon a Resources

Mateo 28; Marcos 16; Lucas 24; Juan 20–21

Ania ti kayat a sawen ti pakanen dagiti karnero ti Mangisalakan?

Imbinglay ni Presidente Russell M. Nelson dagitoy a nalawag a pannakaammo ken pannakaawat [insights] manipud iti nagkauna a teksto a Griego ti Juan 21:

“Iti [Juan 21:15], ti balikas a pakanen ket naggapu iti balikas a Griego a bosko, a kayatna a sawen ti ‘taraonan wenno paaraben.’ Ti balikas a kordero ket naggapu iti bassit usit a balikas nga arnion, a kayatna a sawen ti ‘bassit a kordero.’ …

“Iti [Juan 21:16], ti balikas a pakanen ket naggapu iti sabali a balikas, poimaino, a kayatna a sawen ti ‘agpastor, agasikaso, wenno agaywan.’ Ti balikas a karnero ket naggapu iti balikas a probaton, a kayatna a sawen ti ‘nataengan a karnero.’ …

“Iti [Juan 21:17], ti balikas a pakanen ket aggapu manen iti Griego a bosko, a kaipapananna ti pannakataraon. Ti balikas a karnero ket naipatarus manen manipud iti balikas a Griego a probaton, a kaipapananna ti nataengan a karnero.

“Dagitoy tallo a bersikulo, a kasla kapada unay ti pagsasao nga Ingles, ket pudno a naglaon iti tallo a naisalsalumina a mensahe iti Griego:

• Nasken a mataraonan dagiti babassit a kordero tapno dumakkelda;

• Nasken a maaywanan dagiti karnero;

• Nasken a mataraonan dagiti karnero” (“Shepherds, Lambs, and Home Teachers,” Ensign, Ago. 1994, 16).

Kasano a mabalintayo a “pakanen dagiti karnero[na]?

Inlawlawag ni Elder Marvin J. Ashton no kasano a matungpaltayo ti bilin ti Apo a mangpakan kadagiti karnerona:

“Kinuna ni Jesus, ‘Pakanenyo dagiti karnerok.’ (Juan 21:16.) Saanmo a mapakan ida no saanmo nga ammo no sadino ti yanda. Saanmo a mapakan ida no ikkam ida iti rason a pagkedkedandaka. Saanmo a mapakan ida no awananka iti taraon. Saanmo a mapakan ida no awananka iti panangngaasi. Saanmo a mapakan ida no saanka a natallugod nga agtrabaho ken mangibinglay. …

“Umay dagiti agkasapulan iti tulong iti amin nga agduduma iti edad. Adda kadagiti karnerona ti ubbing, naliday, ken napukaw. Adda dagiti nabannog, masakit, ken baket wenno lakayen. Adda dagiti aggapu iti bukodtayo a pamilia, iti bukodtayo a sangakaarrubaan, wenno kadagiti adayo a suli ti lubong a pakatulongantayo kadagiti datontayo iti panagayuno. Adda dagiti mabisbisinan iti makan. Adda dagiti mabisbisinan iti ayat ken pannakaseknan.

“No ikkantayo dagiti karnero kadagiti rason a pagkedkedandatayo, agbalin a narigat ti proseso ti panagpakan, no saan nga imposible. Awan ti asino man a makaisuro wenno makatulong nga addaan iti panaguyaw wenno panangumsi. Ti panagidiktar wenno ‘Hustoak ket madi kenka’ ket sumupiat iti amin a panagkagumaan a mangpakan iti nayaw-awan a karnero. Mabangonto ti pader ti panagkedked, ket awanto ti asino man a mairanud. …

“Babaen ti tignaytayo ipakitatayo ti ayattayo. Awan ti kaipapanan dagiti panangyebkas iti pammategtayo no maisupadi dagiti tingnaytayo. Kasapulan ti amin a karnerona ti apros ti maysa a pastor a mangipateg” (“Give with Wisdom That They May Receive with Dignity,” Ensign, Nob. 1981, 91).

Panangpadur-as iti Panangisurotayo

Mangilatang iti oras a makaibinglay dagiti agad-adal. “No ibinglay dagiti agad-adal no ania ti nasursuroda, saanda laeng a marikna ti Espiritu ken mapapigsa dagiti bukodda a pammaneknek, no di ketdi maallukoyda pay dagiti miembro ti klase a mangtakuat kadagiti kinapudno para iti bagbagida. … Mangilatang iti oras a pakaibinglayan ti estudiante iti tunggal adalen—iti sumagmamano a gundaway, matakuatam a dagitoy a pananglilinnawag ket ti adalen” (Panangisuro iti Wagas ti Mangisalakan, 30).