Aldaw ti Pentecostes, ni Sidney King

Hulio 1–7

Dagiti Aramid 1–5

“Dakayto ti Saksik”

No basaem ti Dagiti Aramid 1–5 ket kalikagumam a gun-oden ti pannarabay ti Espiritu, umawatkanto iti pammaregta maipapan no ania a kinapudno kadagiti kapitulo ti mangtulongto kadagiti miembro ti klasem ti nga agpannuray a naan-anay iti Espiritu Santo ken agbalinda a napudno a saksi ni Apo Jesucristo.

Isuratmo Dagiti Impresionmo

Yawis ti Panagbibinninglay

Adu dagiti napapateg a bersikulo ken pagbatayan iti Dagiti Aramid 1–5. Maysa a naindaklan a wagas tapno matakuatan no ania ti kapatgan ken adda pannakainaigna kadagiti miembro ti klasem ket paibagam kadakuada kenka no ania ti makaay-ayo kadakuada iti panagadalda. Kasano a mayawismo daytoy a kita ti panagbibinninglay? Mabalin a simple a kas iti panangted kadakuada iti sumagmamano a minuto nga agsapul ken mangibinglay iti maysa a bersikulo manipud iti Dagiti Aramid 1–5 a nakariknaanda iti timek ti Apo a makisasao kadakuada.

Isuro ti Doktrina

Dagiti Aramid 1:1–8; 2:37–39; 4:1–16, 31–33

Iturong ni Jesucristo ti Simbaanna babaen ti Espiritu Santo.

• Ti panangbasa maipapan iti padpadas dagiti Apostol ket makatulong kadagiti miembro ti klasem a mangkita no kasano a makaawatda iti bileg ken pannarabay manipud iti Espiritu Santo kadagiti takemda iti Simbaan. Maysa a wagas a mangrebyu kadagiti padas iti Dagiti Aramid 1–5 ket mangisurat iti pisarra Matulongannak ti Espiritu Santo iti takemko babaen ti : ket kalpasanna awisem dagiti miembro ti klase a mangsukisok iti Dagiti Aramid 1:1–8; 2:36–39; ken 4:1–16, 31–33, a mangsapsapul kadagiti wagas a mangileppas iti binatog. Apay a kinasapulan dagiti Apostol ti Espiritu Santo?

• Kas maysa a klase, makapagsukisokkayo met no kasano nga iturong ni Jesucristo ti Simbaanna iti aldawtayo babaen ti Espiritu Santo. Tapno maaramid daytoy mabalinmo a kontaken a nasapsapa ti sumagmamano a miembro ti klase ket iparebyu kadakuada dagiti pakaammuan iti Dagiti Aramid 1:1–8; 2:37–39; 4:1–16, 31–33 ket umay a nakasagana a mangibinglay kadagiti bukod a padas a kapadpada iti padpadas dagiti Apostol. Kas pagarigan, mabalinda nga ibinglay maipapan ti maysa a gundaway idi tinulongan ida ti Espiritu Santo tapno ipaneknek ti maysa a pagbatayan ti ebanghelio wenno sungbatan ti saludsod ti maysa a tao. Ania ti inaramidda tapno agkalikagum iti pannarabay ti Espiritu Santo?

Dagiti Aramid 10:15–26

Inawagan ti Dios dagiti Apostol ni Jesucristo babaen ti paltiing.

• Mabalin a makatulong daytoy iti klasem a mangdakamat a dagiti baro a miembro ti Korum dagiti Sangapulo-ket-dua nga Apostol iti nagkauna a Simbaan ket naawagan babaen ti paltiing, kas met iti pannakaawagda iti agdama. Ibilang ti panangawis kadagiti miembro ti klase tapno ilawlawagda no kasano ti mangipagna iti maysa a negosio maipapan iti panagpili iti pangsukat para iti posision nga ehekutibo, kas iti panangibilangiti educational background, padas, ken dadduma pay. Paidasigmo kadakuada daytoy iti no kasano a naawagan ni Apostol Matias iti Dagiti Aramid 1:15–26 (kitaen met iti 1 Samuel 16:1–13). Kasano a mabalin nga inayon ti inadaw ni Presidente Gordon B. Hinckley iti “Dagiti Nainayon a Resources” iti pannakaawat dagiti miembro ti klase? Kasano nga apektuan daytoy a pannakaammo ti pammatitayo kadagiti leader nga inawagan ti Apo? Kasano a nagun-odmo ti panagsaksim kadagiti kabaruanan nga apostol ken propeta?

Dagiti Aramid 2:22–47; 3:13–26; 4:5–12

Umawattayo kadagiti bendision ti Pannubbot no agtungpaltayo kadagiti umuna a pagbatayan ken ordinansa ti ebanghelio.

• Kasano a masarakan dagiti sursuruam ti bileg ken kaipapanan kadagiti simple a kinapudno nga insuro da Pedro ken Juan (pammati ken ni Jesucristo, panagbabawi, panagbuniag, ti sagut ti Espiritu Santo, ken panagibtur agingga iti panungpalan)? Maysa a mabalin a wagas ket mangsukisok iti pateg dagitoy a pagbatayan ken ordinansa, no dadduma maitudo kas ti doktrina ni Cristo (kitaen iti 2 Nephi 31). Mabalinmo ti mangitugot iti lima a poster iti klase ket suratan iti ngato ti tunggal poster iti maysa kadagiti aspekto ti doktrina ni Cristo: Pammati ken ni Jesucristo, Panagbabawi, Panagbuniag, Sagut ti Espiritu Santo, Agibtur agingga iti Panungpalan. Bingaybingayem ti klase iti lima a grupo, ket ikkam ti tunggal grupo iti maysa kadagiti poster. Awisem dagiti grupo a mangrebyu iti kayat a sawen ti topiko iti poster iti Pangiwanwan iti Nasantuan a Kasuratan wenno Preach My Gospel. Kalpasanna mabalinda nga irebyu dagiti pannursuro ni Pedro iti Dagiti Aramid 2:22–47; 3:13–26; ken 4:5–12 ket isurat iti posterda dagiti pagarigan ti naidutok a topikoda manipud kadagiti nasantuan a kasuratan. Kasano a matulongandatayo dagitoy a pagbatayan ken ordinansa ti ebanghelio tapno magun-odtayo dagiti bendision ti Pannubbot ti Mangisalakan? Ania dagiti papel nga ak-akmen dagitoy a pagbatayan ken ordinansa iti plano ti Nailangitan nga Ama iti pannakaisalakan?

• Mabalinmo nga idawat iti sumagmamano a full-time, kasubsubli, wenno misionario ti ward tapno mangala iti sumagmamano a minuto a mangilawlawag no kasano a nangisuroda iti dadduma maipapan iti doktrina ni Cristo nga usarenda ti adalen 3 iti Ikasaba ti Ebangheliok Apay a ti doktrina ni Cristo ti kangrunaan a mensahe dagiti misionariotayo? Kasano nga ituloyna ti mangyaplikar iti doktrina ni Cristo ti maysa a tao a nalpasen a nabuniagan ken nakaawaten iti sagut ti Espiritu Santo?

Dagiti Aramid 2:37–47

Paregtaennatayo ti Espiritu Santo nga agtignay iti no ania ti nasursurotayo.

• Bayat ti panangadal dagiti miembro ti klase iti nasantuan a kasuratan iti pagtaengan ken aggigiddan iti klase iti tunggal lawas, masansan a mariknada ti “napaladingitan ti pusoda” (Dagiti Aramid 2:37). Mabalin a mariknam ti pannakaparegta a mangtulong kadakuada a dumur-as babaen ti panangsaludsod iti,“Anianto ti aramidentayo?” (Dagiti Aramid 2:37). Aggigiddan a basaenyo ti Dagiti Aramid 2:37–47 nga aw-awisem dagiti miembro ti klase tapno agsukisok kadagiti banag nga inaramid daytoy a grupo ti 3,000 a tattao, kas bunga ti awis ni Pedro. Mabalinda pay nga ibinglay dagiti wagas a nakapagtignayanda iti pammaregta manipud iti panagadalda iti balikas ti Dios. Kalpasanna mabalinmo ti mangilatang iti oras iti gibus ti klase tapno saludsoden ti tunggal tao iti bagida ti “Anianto ti aramidek?” ket isuratda dagiti impresionda.

Iti baet ti pannakatiliw ken pannakamalmalona, situtured nga inkasaba ni Pedro ti ebanghelio.

Dagiti Aramid 3; 4:1–21; 5:12–42

No mapnotayo iti Espiritu Santo, maibinglaytayo ti ebanghelio nga addaan iti kinatured.

• Ti pakaammuan da Pedro ken Juan a situtured a mangipampaneknek maipapan ken Jesus ket makaparegta iti klasem a saan nga agbuteng no ania ti panunoten dagiti dadduma bayat ti panangibinglayda iti panagsaksida iti ebanghelio. Ania ti makaawis rikna kadagiti miembro ti klase maipapan iti kinatured da Pedro ken Juan iti Dagiti Aramid 3; 4:1–21; ken 5:12–42? Ania ti pagnaigan ti yaawat iti sagut ti Espiritu Santo ken ti kabaelantayo nga agpaneknek a situtured? Mabalin nga adda pay padpadas nga ibinglay dagiti miembro nga isuda, wenno maysa a tao nga am-ammoda, ket situtured a nangsalaknib wenno nangipaneknek maipapan ti ebanghelio.

Yallukoy ti Panagsursuro iti Pagtaengan

Idawat kadagiti miembro ti klase a mangpanunot maipapan no kasano koma ti reaksionda no ammoda a ti panagbiag iti ebanghelio ket mabalin nga agbunga iti pannakapukaw ti biagda. Ibagam kadakuada nga iti Dagiti Aramid 6–9 mabasadanto maipapan iti maysa a tao a nagtallugod a matay gapu iti pammatina.

Dagiti Nainayon a Resources

Dagiti Aramid 1–5

Ti pannakaawag ti maysa a miembro ti Sangapulo-ket-dua.

Imbinglay ni Gordon B. Hinckley dagiti sumaganad a nauneg a pannakaammo ken pannakaawat [insights] maipapan iti proseso ti panangawag iti maysa a baro nga Apostol: “Naidumduma ti procedure iti simbaan ti Apo. Awan ti panagkalikagum para iti saad, awan ti panagmanipula para iti posision, awan ti panagkampania tapno mangitandudo kadagiti nasayaat a kababalin ti asino man. Pagdiligen ti wagas ti Apo ken ti wagas ti lubong. Naulimek ti wagas ti Apo, daytoy ti wagas ti talna, awan ti adu nga atension wenno panaggastos iti kuarta. Awanan daytoy iti panagimbubukod wenno parammag wenno ambision. Iti babaen ti plano ti Apo, dagiti addaan pagrebbengan a mangpili kadagiti opisial ket maiwanwan babaen ti maysa a napateg a saludsod: ‘Asino ti kukua koma ti Apo?’ Adda naulimek ken napanunotan a deliberasion. Ket kasapulan ti adu a panagkararag tapno maawat ti pammatalged ti Espiritu Santo nga umisu ti pili” (“God Is at the Helm,” Ensign, Mayo 1994, 53).

Panangpadur-as iti Panangisurotayo

Agtalekka kadagiti lidermo. Kayatdaka a tulongan nga agballigi dagiti lidermo iti priesthood ken auxiliary. Dawatem ti balakadda kabayatan ti panangikarigatam nga agbalin a nalaing kas maysa a mannursuro ken kabayatan ti panangutobmo kadagiti kasapulan dagiti sursuruam” (Panangisuro iti Wagas ti Mangisalakan, 5).