Mabalin Ngarud nga Agbiagtayo, ni Sam Lawlor

Hulio 8–14

Dagiti Aramid 6–9

“Ania ti Rebbeng nga Ipaaramidmo Kaniak?”

Adalem ti Dagiti Aramid 6–9 ken isuratmo dagiti impresionmo. Daytoyto ti mangtulong kenka nga umawat iti paltiing maipapan iti no kasano a matulongan nga umasideg nga ad-adda dagiti miembro ti klase ken ni Jesucristo babaen ti panangadalda kadagitoy a kapitulo.

Isuratmo Dagiti Impresionmo

Yawis ti Panagbibinninglay

Iti pisarra, isuratmo ti nagnagan ti sumagmamano a tao a nadakamat iti Dagiti Aramid 6–9, kas kada Esteban, Saulo, Felipe, Ananias, Pedro, ken Tabita wenno Dorcas. Awisen ken paibinglay iti sumagmamano a miembro ti klase no ania ti nasursuroda manipud iti maysa kadagitoy a tao iti panagadalda itoy a lawas.

Isuro ti Doktrina

Dagiti Aramid 7

Ti panangkedked iti Espiritu Santo ket makaiturong iti panangumsi iti Mangisalakan ken kadagiti propetana.

• Ania dagiti kinapudno ti nasursuro dagiti miembro ti klase manipud iti panangbasada iti pakaammuan ni Esteban itoy a lawas? Ibilang ti panangawis kadagiti miembro ti klase a mangadal kadagiti pannursuro ni Esteban iti Dagiti Aramid 7:37–53, a mangsapsapul no kasano a maipada dagiti lider a Judio kadagiti nagkauna nga Israelita a nangumsi kadagiti propeta. Mabalinmo ti mangipamaysa iti palawag ni Esteban maipapan kadagitoy a lider iti Dagiti Aramid 7:51. Kasano a makatulong ti 2 Nephi 28:3–6; 33:1–2; Mosiah 2:36–37; Alma 10:5–6; ken Alma 34:37–38 a mangipaawat kadagiti miembro ti klase daytoy a palawag? Apay a mabalin a “supringentayo ti Espiritu Santo”? Ania ti maaramidtayo tapno mailasintayo a nasaysayaat ken masurottayo dagiti parikna ti Espiritu Santo?

Dagiti Aramid 8:9–24

Nasken nga agbalin dagiti puspusotayo a “nalinteg iti imatang ti Dios.”

• Ti panangadal iti pakaammuan ni Simon ket makatulong kadagiti miembro ti klase a mangamiris kadagiti gapu no apay a nagbiagda iti ebanghelio. Tapno maadal daytoy a pakaammuan kas maysa a klase, mabalinmo nga isurat iti pisarra dagiti saludsod nga Asino ni Simon? Ania ti kinayatna? ken Kasano ti panangikarigatanna a nangala iti daytoy? Mangdutok iti tunggal miembro a mangbasa iti Dagiti Aramid 8:9–24, a mangsapsapul kadagiti sungbat kadagitoy a saludsod. Ania ti masursurotayo manipud iti padas ni Simon?

• Tapno matulongan a maipaawat kadagiti miembro ti klasem no ania ti kayat a sawen ti pagbalinen ti puspusoda a “nalinteg iti imatang ti Dios” (Dagiti Aramid 8:21), mabalinmo nga awisen ida a mangadal iti Doktrina ken Katulagan 121:41–46, a mangsuksukisok kadagiti balikas wenno ragup ti balikas [phrases] a mangiladawan no ania ti nasken a pagbalinan ti puspusotayo bayat ti panangikarigatantayo nga agserbi iti Dios ken umawat kadagiti sagutna. Mabalin nga idilig dagiti miembro ti klase dagitoy a nauneg a pannakaammo ken pannakaawat [insights] iti pakaammuan ni Simon, a masarakan iti Dagiti Aramid 8:9–24. Ania a kinapudno ti saan pay a naawatan ni Simon? Kasano a maaramidtayo dagiti puspusotayo a “nalinteg iti imatang ti Dios”?

• Napagdinnasig kadi dagiti miembro ti klase da Esteban ken Felipe ken ni Simon kabayatan ti bukod a panagadalda, kas naisingasing iti balabala iti daytoy a lawas iti Umaykayo Sumurot Kaniak—para kadagiti Indibidual ken Pamilia? No kasta, ania ti nasursuroda? Mabalin nga awisem ida a mangsapul iti pakakitaan kadagitoy a kapitulo a ti puspuso ti dadduma a tattao ket nalinteg—tao kas ken ni Felipe ken ti tao manipud iti Etiopia (Dagiti Aramid 8:26–40) ken ni Saulo (Dagiti Aramid 9:1–22).

Dagiti Aramid 8:26–39

Tulongannatayonto ti Espiritu Santo a mangiwanwan kadagiti dadduma ken ni Jesucristo.

• Tapno matulongan a mangipaawat kadagiti miembro ti klase no kasano a maiwanwanda dagiti dadduma ken ni Jesucristo (kitaen iti Dagiti Aramid 8:31), mabalinmo nga awisen ti dua a miembro ti klase nga agsinnangoda nga agtugaw ket basaenda ti dayalogo ni Pedro ken ti tao manipud iti Etiopia iti Dagiti Aramid 8:26–39. Mabalin a basaen ti maikatlo a miembro ti klase dagiti paset nga awan iti dayalogo. Ania ti masursurotayo manipud iti pagwadan ni Felipe maipapan iti panangisuro iti ebanghelio kadagiti dadduma?

• Tapno masukisok dagiti kabaruanan a pagarigan iti daytoy a pakaammuan iti Dagiti Aramid 8:26–39, mabalin nga ibinglay dagiti miembro ti klase dagiti padpadasda iti panangibinglay iti ebanghelio wenno iti panagkamengda iti Simbaan. Kasano a tinulongan ida ti Espiritu Santo? Kasano a nagtignay ti maysa a tao a kas mangiwanwan kadakuada? Awisem dagiti miembro ti klase a mangutob no asino ti mabalin nga iwanwanda iti ebanghelio.

Dagiti Aramid 9

No agtulnogtayo iti pagayatan ti Apo, makapagbalintayo a ramit kadagiti imana.

• Masursuro dagiti miembro ti klase dagiti nabileg a kinapudno maipapan iti bukodda a kumbersion babaen ti panangadal iti padas ni Saulo, agraman ti kinapudno a makapagbabawi ken makapagbalbaliw ti tunggal maysa no agtallugodda. Mabalinmo a paidasig kadagiti miembro ti klase ti padas ni Saulo kadagiti padas ni Alma (kitaen iti Mosiah 17:1–4; 18; 26:15–21) ken kada Laman ken Lemuel (kitaen iti 1 Nephi 3:28–31). Ania dagiti kababalin da Saulo ken Alma a nakatulong iti panagbabawi ken panagbalbaliwda? Ania dagiti kababalin da Laman ken Lemuel a nanglapped kadakuada iti panagbalbaliw? Ania nga impluensia ti adda kada Saulo ken Alma kalpasan ti panagbalbaliwda? Ania a mensahe ti masarakantayo para iti bukodtayo a biag manipud kadagitoy a pakaammuan?

• Tapno maparegta dagiti miembro ti klase a mangsurot iti pagwadan ni Saulo ken agsaludsod iti Apo, “Ania ti rebbeng a paaramidmo kaniak?” ibilangmo ti panangilawlawag iti padas ni Presidente Thomas S. Monson a masarakan iti “Dagiti Nainayon a Resources.” Nalabit a mabalin nga ibinglay dagiti miembro ti klase dagiti padasda iti panagkalikagum ken panangsurot iti pagayatan ti Dios.

Yallukoy ti Panagsursuro iti Pagtaengan

Tapno maallukoy dagiti miembro ti klase a mangbasa iti Dagiti Aramid 10–15 kabayatan ti umay a lawas, mabalinmo nga ibinglay ti sumagmamano a makasagid rikna a pasamak kadagitoy a kapitulo—namilagruan a pannakadadael ti pagbaludan, dagiti misionario a napagbiddutan a dios ti Romano, ken maysa nga Apostol a binato ken binaybay-an a natay—kalpasanna nagbiag.

Dagiti Nainayon a Resources

Dagiti Aramid 6–9

“Ania ti Rebbeng nga Ipaaramidmo Kaniak?”

Bayat ti idadar-ay ni Presidente Thomas S. Monson iti maysa a komperensia ti stake, indawat kenkuana ti stake president no masarungkaranna ti maysa nga ubing a babai a 10 ti tawenna nga agnagan iti Christal Methvin, nga agngangabiten iti sakit a kanser. Nagnaed ti pamilia ti ubing a babai iti 80 milia manipud iti lokasion ti komperensia. Imbinglay ni Presidente Monson ti sumaganad:

“Inamirisko ti iskediul dagiti miting. … Sadiay awan ti sidadaan nga oras. Napanunotko ti maysa nga alternatibo a singasing. Ditay kadi malagip ti bassit nga ubing kadagiti pampubliko a kararagtayo iti komperensia? …

“… [Kabayatan ti maysa kadagiti miting] ur-urnosek dagiti insuratko, nga agsagsagana nga umaddang a mapan iti pulpito, idi mangngegak ti maysa a timek a makisasao iti espirituk. Ababa ti mensahe, pamilar dagiti balikas: ‘Bay-anyo dagiti babassit nga ubbing nga umayda kaniak, ket dikay pawilan ida: ta dagitoy isuda dagiti agtagikua ti pagarian ti Dios.” (Marcos 10:14.) Nagbalin a nalidem dagiti insuratko. Naiturong ti panunotko iti bassit nga ubing nga agkasapulan iti pammendision. Naaramid ti pangngeddeng. Nabalbaliwan ti iskediul ti miting. …

“… [Iti pagtaengan dagiti Methvin,] minatmatak ti maysa nga ubing a masaksakit unay tapno bumangon—dumani nakapsut unayen tapno agsao. Ti sakitna ti namangbalin kenkuana a bulsek. Napigsa unay ti espiritu a nariknak ta nagparintumengak, iniggamak ti nakapuyen nga imana, ket kinunak a gagangay, ‘Christal, addaak ditoy.’ Inungapna dagiti bibigna ket inyarasaasna, ‘Brother Monson, ammok laeng nga umayka’” (“The Faith of a Child,” Ensign, Nob. 1975, 20–22).

Kalpasan dagiti tawen, imbinglay ni Presidente Dieter F. Uchtdorf daytoy nga estoria, a mangaw-awis kadatayo a “mangikarigatan nga agbalin a maibilang kadagiti mabalin a pagpannurayan ti Apo a manggegan dagiti arasaas ken sungbatna, kas iti inaramid ni Saulo iti dalan na nga agturong iti Damasco, ‘Apo, ania ti rebbeng a paaramidmo kaniak?’” (“Waiting on the Road to Damascus,” Ensign wenno Liahona, Mayo 2011, 75).

Panangpadur-as iti Panangisurotayo

Iwanwanmo dagiti sursuruam. Kas maysa a mannursuro, maiwanwanmo dagiti sursuruam babaen dagiti nasantuan a kasuratan, kas met laeng iti panangiwanwan ni Felipe iti tao a taga Etiopia babaen ti panangisurona kenkuana manipud ken ni Isaias (kitaen iti Dagiti Aramid 8:26–37). Tapno maaramid daytoy, nasken nga “ikarigatam a gun-oden ti sursuro uraybabaen ti panagadal ken kasta met iti pammati” (DkK 109:7). Ti pannakaammo a gun-odem ket mabalin a nabileg a puersa iti panangtulong kadagiti miembro ti klase nga agtarigagay a mangtakuat iti kinapudno para iti bagbagida ket agbiagda iti daytoy.