“Hulio 22–28. Dagiti Aramid 16–21: ‘Inawagannatayo ti Apo a Mangikasaba iti Ebanghelio’” Umaykayo, Sumurot Kaniak—Para iti Sunday School: Baro a Tulag 2019 (2019)
“Hulio 22–28. Dagiti Aramid 16–21,” Umaykayo, Sumurot Kaniak—Para iti Sunday School: 2019
Hulio 22–28
Dagiti Aramid 16–21
“Inawagannatayo ti Apo a Mangikasaba iti Ebanghelio”
Sakbay ti panangkitam iti daytoy a balabala, nainkararagan a basaem ti Dagiti Aramid 16–21 nga adda iti panunotmo dagiti miembro ti klase. Dagiti sumaganad a kapanunotan ti mabalin a mangsuplemento iti pammaregta nga awatem manipud iti Espiritu.
Isuratmo Dagiti Impresionmo
Yawis ti Panagbibinninglay
Ibilangmo ti panangawis kadagiti miembro ti klase a mangibinglay iti maysa a binatog manipud iti Dagiti Aramid 16–21 a mangipalagip kadakuada iti maysa a padasda iti panangibinglay iti ebanghelio.
Isuro ti Doktrina
Kas miembro ti Simbaan, paneknekantayo ni Jesucristo ken ibinglaytayo ti ebangheliona.
-
Gapu ta ti Dagiti Aramid 16–21 ket mangiladawan iti dua a panagdaliasat ni Pablo kas misionario, mabalin a kabaelan dagiti miembro ti klase ti agsursuro manipud kadagitoy a kapitulo no kasano a mangipaneknek ti maipapan ken ni Jesucristo ken sisasamay a mangibinglay iti ebangheliona. Tapno maparegta ti panaglilinnawag iti daytoy a topiko, nalabit a mabalinmo nga awisen ti sumagmamano a miembro nga umay iti klase a nakasagana a mangibinglay kadagiti nauneg a pannakaammo ken pannakaawat [insights] a nagun-odda manipud iti Dagiti Aramid 16–21 maipapan iti panangibinglay iti ebanghelio. Tapno mapapigsa ti panaglilinnawag, mabalin pay nga ibinglayda dagiti palawag manipud iti mensahe ti kallabes unay a sapasap a komperensia maipapan iti aramid ti misionario. Mabalinda a sapulen ti maysa iti bukodda, wenno mabalin a mangisingasingka iti maysa kadagiti mensahe iti “Dagiti Nainayon a Resources.”
-
Ti maysa a napateg a mensahe kadagitoy a kapitulo ket ti napateg nga akem ti Espiritu Santo iti panangibinglay iti ebanghelio. Kas pagarigan, mabalin a takuaten dagiti miembro ti klase no kasano a nakatulong ti Espiritu Santo kada Pablo ken Silas iti Dagiti Aramid 16:6–15. Mabalinda pay a basaen ti 2 Nephi 33:1 ken Doktrina ken Katulagan 42:14 ket mangibinglay kadagiti kinapudno a nasarakanda maipapan iti kinapateg ti kaadda ti Espiritu no ibingbinglay ti ebanghelio (kitaen met iti palawag ni Elder Dallin H. Oaks iti “Dagiti Nainayon a Resources”). Nalabit a makaibinglay dagiti miembro ti klase kadagiti padas idi tinarabay ida ti Espiritu Santo kadagiti panagkagumaanda a mangibinglay iti ebanghelio. Ania dagiti sumagmamano a padastayo iti panangibinglay iti ebanghelio iti maysa a tao nga insangbay ti Apo iti dalantayo? (kitaen met iti Preach My Gospel, 3–4).
-
Kasano a mausarmo dagiti padas ni Pablo a mangtulong kadagiti miembro ti klase a maaddaan iti tured no matignayda a mangibinglay kadagiti pammaneknekda? Ibilang ti aggigiddan a panangrebyu kadagiti pakaammuan iti nasantuan a kasuratan a mangiladawan iti panangipaneknek ni Pablo, a kas kadagiti padasna iti Macedonia (kitaen iti Dagiti Aramid 16:19–34), iti Atenas (kitaen iti Dagiti Aramid 17:16–34), ken iti Corinto (kitaen iti Dagiti Aramid 18:1–11). Ania a pakakitaan ti makitatayo iti kinatured ken kinabatad ni Pablo? Ania dagiti doktrina nga insuro (ken maawatan) ni Pablo a nangted kenkuana iti panagtalek iti mensahena? Apay a mabutengtayo no dadduma a mangibinglay iti ebanghelio, ken kasano a maparmektayo daytoy a buteng? Nalabit a mabalin dagiti full-time a misionario a sarungkaranda ti klasem ket mangibinglay kadagiti wagas a nakaawatanda iti tured a mamaneknek. Allukoyem dagiti miembro ti klase a mangpanunot iti maysa a wagas a mabalinda a sumurot iti pagwadan ni Pablo ket agbalinda anaturtured iti panangibinglay iti pammaneknekda maipapan ken ni Cristo.
Kaputotannatayo ti Dios.
-
Iti Turod ti Mars, insuro ni Pablo maipapan iti Nailangitan nga Ama iti maysa a grupo dagiti tao a bassit ti ammoda maipapan iti pudno a kinatao ti Dios. Tapno agsukisok kadagitoy a pannursuro, mabalin a basaen dagiti miembro ti Dagiti Aramid 17:24–31 ket isurat iti pisarra dagiti kinapudno a nasarakanda maipapan iti Nailangitan nga Ama, ti relasiontayo Kenkuana, ken dagiti relasiontayo iti tunggal maysa. Ania dagiti padas a mabalin nga ibinglay dagiti miembro ti klase a nakariknaanda iti kinapudno ti palawag ni Pablo a ti Dios “saan nga adayo iti tunggal maysa kadatayo”? (bersikulo 7).
-
Bayat ti sangkamaysa a panangamirismo kadagitoy a bersikulo, ibilangmo ti panangilawlawag iti kinapudno a naisuro iti bersikulo 29, “Kaputotannatayo ti Dios,” kayatna a sawen a ti Nailangitan nga Ama ti literal nga ama dagiti espiritutayo. Tapno maaramid daytoy, mabalinmo nga isurat iti pisarra ti Gapu ta annaknatayo ti Dios ken No saantayo nga ammo nga annaknatayo ti Dios. Mangawis kadagiti miembro ti klase a mangisingasing kadagiti wagas a mangileppas kadagitoy a binatog. Kas pagarigan, ania ti isurona kadatayo maipapan iti Dios ti kinapudno nga annaknatayo ti Dios? maipapan iti bagbagitayo? maipapan iti wagas a nasken a panangtratotayo iti tunggal maysa? Kasano a maiduma ti biagtayo no saantayo nga ammo maipapan iti pudno a pakainaigantayo iti Dios? Daytoy ti mabalin a mangiturong iti panaglilinnawag maipapan no kasano a matulongantayo dagiti dadduma pay a makaawat nga isuda dagiti annak ti Dios. Ti palawag ni Elder Dallin H. Oaks iti “Dagiti Nainayon a Resources” ket mabalin a mainayon iti daytoy a panaglilinnawag.
Nasken a sumaruno iti panagbuniag ti panangawat iti sagut ti Espiritu Santo.
-
Dagiti Aramid 19 ket nasayaat a lugar a mangyunay-unay no kasano ti kapateg ti makumpirmaan kalpasan ti panagbuniagtayo. Ibilangmo ti panangibinglay iti daytoy a palawag manipud ken ni Propeta Joseph Smith: “Ti panagbuniag babaen iti danum ket kagudua laeng ti panagbuniag, ken awan ti serbina no awan ti sabali pay a kaguduana—a dayta ti, panagbuniag ti Espiritu Santo” (Teachings of Presidents of the Church: Joseph Smith, 95). Kasano a mangipatalged dagiti pannursuro ni Pablo iti Dagiti Aramid 19:1–7 iti palawag ni Joseph Smith? Mabalin pay a mangted pagimbagan kadagiti miembro ti klase ti panangsukisok iti “Espiritu Santo, Panagbuniag ti” iti Pangiwanwan iti Nasantuan a Kasuratan tapno masursuro ti ad-adu pay maipapan kadagiti bendision ti panangawat iti sagut ti Espiritu Santo.
Yallukoy ti Panagsursuro iti Pagtaengan
Tapno maallukoy dagiti miembro ti klase a mangbasa iti Dagiti Aramid 22–28 kabayatan ti sumaruno a lawas, kiddawem kadakuada ti maysa a banag a kas iti, “No addaanka iti gundaway a mangibaga iti dadaulo ti pagiliantayo maipapan iti ebanghelio, ania koma ti isaom?” Ibagam kadakuada nga iti Dagiti Aramid 22–28, maammuandanto no ania ti insao ni Pablo iti sumagmamano kadagiti kabilgan a dadaulo ti panawenna.
Dagiti Nainayon a Resources
Dagiti mensahe maipapan iti aramid ti misionario.
Annaknatayo amin ti Dios.
“Ti Kaamaan: Maysa a Waragawag ti Lubong,” ket mangibinglay kadagiti agnanayon a kinapudno maipapan iti pakainaigantayo iti Dios: “Amin a tattao—lalaki ken babai—naparsua a kalanglanga ti Dios. Tunggal maysa ket maipatpateg nga espiritu nga anak a lalaki wenno babai dagiti nailangitan a nagannak, ket, iti kasta, tunggal maysa ket addaan iti nadiosan a kababalin ken pagtungpalan” (Ensign wenno Liahona, Nob. 2010, 129).
Insao ni Elder Dallin H. Oaks ti Korum dagiti Sangapulo-ket-dua nga Apostol maipapan iti kinapateg ti panangkita iti bagbagitayo nga umuna ken kangrunaan kas naespirituan nga annak ti Dios:
“Agannadkayo no kasano ti panangiladawanyo iti bagiyo. Saanyo nga iladawan wenno ilawlawag ti bagiyo babaen ti sumagmamano a saan nga agbayag a kababalin. Ti maysa laeng a kababalin a nasken a mangiladawan kadatayo ket datayo ti anak a lalaki wenno anak a babai ti Dios. Rimbawan dayta a kinapudno ti amin a dadduma pay a kababalin, agraman ti puli, trabaho, pisikal nga ugali, dayaw, wenno uray pay ti pakikappengan a relihion. …
“Adda kadatayo ti kinawayatayo nga agpili, ken mabalintayo a pilien ti ania man a kababalin a mangilawlawag ti maipapan kadatayo. Ngem masapul a maammuantayo a no pilientayo nga ilawlawag ti maipapan iti bagbagitayo wenno mangidatag iti bagbagitayo babaen ti sumagmamano a kababalin a temporario wenno awan pategna iti agnanayon a balikas, ditayo mayunay-unay no ania ti kapatgan maipapan kadatayo, ket masobraantayo a mangyunay-unay no ania ti saan a napateg. Daytoy ti makaiturong kadatayo iti biddut a dana ket mangtubeng iti agnanayon a panagdur-astayo” (“Be Wise” [Brigham Young University–Idaho devotional, Nob. 7, 2006], byui.edu).
Panangpadur-as iti Panangisurotayo
Awisem dagiti agtutubo nga agbalin a paset ti lessonmo. No mangisuroka kadagiti agtutubo, laglagipem a masansan a kabaelanda a maawatan dagiti banag a mapadpadasan dagiti kapatadada. No mangiburay iti pammaneknek wenno mangisuro iti doktrina iti maysa nga agtutubo, mabalin a masagid ti dadduma pay nga agtutubo iti wagas a dimo mabalin a sungbatan. Ikkam dagiti agtutubo kadagiti gundaway a mangisuro iti tunggal maysa. (Kitaen iti Panangisuro iti Wagas ti Mangisalakan, 28.)