Ni Cornelio a makisasao ken ni Pedro

Hulio 15–21

Dagiti Aramid 10–15

“Ti Sao ti Apo Nagtuloy a Rimmang-ay”

Ti nainkararagan a panangadal iti Dagiti Aramid 10–15 sakbay ti panangbasam itoy a balabala ket makatulongto kenka nga umawat kadagiti impresion manipud iti Apo. Dagiti kapanunotan iti baba ket singasing laeng.

Isuratmo Dagiti Impresionmo

icon iti panagbibinninglay

Yawis ti Panagbibinninglay

Awisem dagiti miembro ti klase a mangibinglay, iti maysa a tao a nakatugaw iti asideg, iti maysa a padas kas misionario manipud iti Dagiti Aramid 10–15 a nakaawisan iti riknada. Awisem ti sumagmamano a mangibinglay kadagiti nauneg a pannakaammo ken pannakaawatda [insights] iti sibubukel a klase.

icon iti panangisuro

Isuro ti Doktrina

Dagiti Aramid 10; 11:1–18; 15:1–25

Isuronatayo ti Nailangitan nga Ama iti tunggal binatog babaen ti paltiing.

• Mabalin nga adda panagduadua ti sumagmamano a miembro ti klase maipapan iti proseso ti panangawat iti paltiing. Mabalin a makatulong kadakuada a paglilinnawagan no kasano nga immay ken ni Pedro ti paltiing ken no kasano a nakapagtultuloyda, “saan nga agduadua” (Dagiti Aramid 10:20), no kasla saan a naan-anay wenno saan a nalawag ti paltiing. Ibilang ti panangdrowing iti maysa a linia iti pisarra ken panangsurat iti maysa nga ungto ti linia Nasken a maikasaba ti ebanghelio kadagiti Gentil. Kas maysa a klase, irebyu ti Dagiti Aramid 10 ken 11:1–18, ket kalpasanna mangnayon kadagiti puntos iti linia a mangipakita no kasano nga impalgak ti Apo ken ni Pedro nga in-inut a panawenen tapno ikasaba ti ebanghelio kadagiti Gentil. Kas pagarigan mabalinmo nga irugi iti maysa a puntos a nakasurat ti “Nakita ni Cornelio ti parmata” (Dagiti Aramid 10:1–6) wenno mangrugika iti bilin ti Mangisalakan kadagiti disipulona a “pagbalinen nga ad-adalan ti amin a nasion” iti Mateo 28:19. Ania ti masursurotayo maipapan iti paltiing manipud iti padas ni Pedro? Ania dagiti pannursuro ni Nephi maipapan iti paltiing iti 2 Nephi 28:30 ken dagiti pannursuro manipud kada Elder David A. Bednar ken Elder Dallin H. Oaks iti “Dagiti Nainayon a Resources” a mainayon iti panaglilinnawag?

• Kasano a matulongam dagiti miembro ti klase nga agpanunot iti naun-uneg maipapan iti no kasano nga umawatda iti paltiing? Mabalinmo nga adalen dagiti pagarigan iti nasantuan a kasuratan a nangisuruan ti Apo kadagiti tao iti tunggal binatog. Kas mainayon iti padas ni Pedro iti Dagiti Aramid 10, mabalin nga irebyu dagiti miembro ti klase dagiti padas ni Nephi (1 Nephi 18:1–3); Alma (Alma 7:8; 16:20); ken Mormon (3 Nephi 28:17, 36–40). Ania ti dadduma pay a pagwadan a mapanunot dagiti miembro ti klase a nakaawatan dagiti tao iti naespirituan a pannarabay “sangkabassit ditoy ken sangkabassit idiay”? (2 Nephi 28:30). Apay a no dadduma mabalin a pilien ti Apo nga ipalgak dagiti banag iti kastoy a wagas imbes nga itedna kadatayo dagiti sungbat iti maminpinsan? (kitaen iti DkK 50:40; 98:12). Mabalin a makatulong ti maysa nga analohia kas iti daytoy: Ipapan a maysa a tao ti nangisingasing a mangalaka iti klase iti calculus sakbay a nasursurom ti algebra wenno geometry. Kasano koma ti isusungbatmo? Kasano a mainaig daytoy iti pagtuladan ti Apo para iti panangipalgak iti kinapudno?

• No dadduma addaan dagiti miembro kadagiti saludsod ken pakaseknan maipapan kadagiti panagbalbaliw kadagiti annuroten ken programa iti Simbaan. Mabalin a makatulong kadakuada a paglilinnawagan no kasano a ti paltiing a nangirugi iti panangikasaba iti ebanghelio kadagiti Gentil (kitaen iti Dagiti Aramid 10) ket nangsukat kadagiti immuna a panangiturong ti Apo kadagiti disipulona (kitaen iti Mateo 10:1, 5–6). Kasano ti mabalin nga isusungbat dagiti miembro ti klase iti maysa a tao iti panawen ni Pedro a nangsuppiat iti panangiturong ni Pedro gapu ta maikontra daytoy kadagiti immuna a kannawidan? Kasano a makatulong kadatayo ti paltiing iti Dagiti Aramid 10 a dumngeg iti agtultuloy a paltiing babaen ti propetana?

• Mabalin a makaay-ayo nga irebyu ti panagiinnuman a naaramid kadagiti Apostol, kas nailadawan iti Dagiti Aramid 15:1–22, ken ti surat nga insuratda kadagiti Santo (kitaen iti dagiti bersikulo 23–29). Ania a saludsod ti adda kadagiti disipulo? Kasano a nagsapulda iti sungbat? Ti palawag ni Presidente Gordon B. Hinckley iti “Dagiti Nainayon Resources” ket mangilawlawag no kasano nga iturong ti Apo ti Simbaanna babaen iti paltiing kadagiti apostol ken propeta.

Dagiti Aramid 10:9–48

“Ti Dios saan a mangidumduma kadagiti tao.”

• Mangted pagimbagan kadi kadagiti miembro ti klasem manipud iti panaglilinnawag maipapan iti no ania ti kayat a sawen ti “saan a mangidumduma kadagiti tao”? Mabalinmo nga irugi babaen ti panangawis iti klase a mangbasa kadagiti nasantuan a kasuratan a mangisuro a ti Dios saan a mangidumduma kadagiti tao, kas iti Taga Roma 2:1–11; 1 Nephi 17:34–40; 2 Nephi 26:32–33; Alma 5:33; Moroni 8:12; ken Doktrina ken Katulagan 1:34–35. Paisurat kadagiti miembro ti klase dagiti mabalin a pannakailawlawag ti “saan a mangidumduma kadagiti tao,” a batay iti no ania ti nabasada, ket kalpasanna ibinglayda no ania ti insuratda. Mabalin a kasapulam a tulongan nga ipaawat kadagiti miembro ti klase a ti panagbalin a “saan a mangidumduma kadagiti tao,” saan a kayatna a sawen nga agpapada a bendisionan ti Dios ti tunggal maysa ania man dagiti tignaytayo. Kayatna nga umawat ti amin nga annakna iti ebanghelio, ngem ti pakabuklan dagiti bendision ti ebanghelio ket nailatang para kadagitay agaramid ken agtungpal kadagiti katulagan Kenkuana. Kasano nga ipakita dagiti pasamak ken pagbatayan iti Dagiti Aramid 10:34–48 a saan a mangidumduma ti Dios kadagiti tao? Kasano a “maawat” ken “maparaburan” ti Dios dagiti nalinteg uray no Isu ket saan a mangidumduma kadagiti tao? (kitaen iti Dagiti Aramid 10:34–35; 1 Nephi 17:35).

Dagiti Aramid 12:1–17

Dagiti kararag dagiti nalinteg ket makaisangbay iti adu a milagro.

• Ti pakaammuan maipapan iti pannakawayawaya ni Pedro manipud iti pagbaludan Dagiti Aramid 12:1–17 ket makatulong kadagiti miembro ti klase a mangpapigsa iti pammatida iti bileg ti kararag. Nalabit a mabalin nga umay ti maysa a miembro ti klase a nakasagana a mangibinglay kadagiti detalye daytoy nga estoria ken ti pammaneknekna maipapan iti kararag. Wenno mabalinmo nga awisen ti maysa wenno ad-adu pay a miembro ti ward wenno branch tapno mangibinglay kadagiti padas a nakariknaan wenno nakasaksianda iti bileg dagiti nagkaykaysa a kararag dagiti miembro. Mabalin a kayatyo pay ti agkanta kadagiti himno maipapan iti kararag (kas iti “Did You Think to Pray?” Hymns, num. 140) ket paglilinnawagan no ania ti isuro dagiti himno maipapan iti bileg ti kararag.

icon iti panagsursuro

Yallukoy ti Panagsursuro iti Pagtaengan

Awisem dagiti miembro ti klase a mangutob kadagiti gapu no apay a no dadduma mapaaytayo a mangibinglay iti ebanghelio kadagiti dadduma. Isingasing a ti panagadal iti Dagiti Aramid 16–21 ket makatulong kadakuada a mangparmek kadagiti tubeng a makalapped kadakuada manipud iti panangibinglay iti ebanghelio.

resources icon

Dagiti Nainayon a Resources

Dagiti Aramid 10–15

Panangawat iti paltiing iti tunggal binatog.

Inaramid ni Elder David A. Bednar dagiti sumaganad a pammaliiw maipapan iti pagtuladan ti Apo iti paltiing: “Adu kadatayo ti gagangay a mangipapan nga awatentayonto ti maysa a sungbat wenno maysa a parikna kadagiti napasnek a kararag ken pakaasitayo. Ket masansan a namnamaentayo pay a ti kasta a sungbat wenno parikna ket umayto a dagus ken iti maminpinsan. Iti kasta, ayotayo ti mamati nga itedto ti Apo kadatayo ti maysa a dakkel a sungbat a sidadaras ken iti maminpinsan. Nupay kasta, ti pagtuladan a naulit a nailadawan kadagiti nasantuan a kasuratan ket mangisingasing nga awatentayo iti ‘tunggal binatog, iti tunggal annuroten,’ wenno iti sabali a balikas, adu a babassit a sungbat iti maysa a panawen. Ti panangbigbig ken panangawat iti daytoy a pagtuladan ket maysa a napateg a wagas tapno makagun-od iti inspirasion ken tulong manipud iti Espiritu Santo” (“Line upon Line, Precept upon Precept,” New Era, Sept. 2010, 3–4).

balasitang nga agbasbasa kadagiti nasantuan a kasuratan

Masansan nga umay ti bukod a paltiing iti panaglabas ti panawen babaen ti agtultuloy a panagkagumaan.

Inted ni Elder Dallin H. Oaks daytoy a balakad: “Nasken nga adalentayo a nasayaat dagiti banag iti pampanunottayo, panangusar kadagiti panangikalintegan a bileg nga inkabil ti Namarsuatayo iti kaunggantayo. Kalpasanna nasken nga agkararagtayo para iti pannarabay ket agtignaytayo iti daytoy no maawattayo daytoy. No ditayo maawat ti pannarabay, nasken nga agtignaytayo iti kasayaatan a pangngeddengtayo” (“Our Strengths Can Become Our Downfall,” Ensign, Okt. 1994, 13–14).

Imburay ni Presidente Gordon B. Hinckley ti panniriganna iti panagserbi kadagiti mangimatmaton a council[presiding councils] iti Simbaan:

“Iti rugi iti panangibilang kadagiti banag, mabalin nga adda dagiti pagdudumaan ti opinion. Nasken a manamnama dagitoy. Naggapu dagitoy a tao iti agduduma a nagtaudan. Tattaoda nga agpanunot para iti bagbagida. …

“… Iti daytoy mismo a proseso nga agsasao dagiti tao iti panunotda ket immay ti naannad a panangamiris kadagiti topiko ken panangikkat kadagiti ideya ken konsepto nga awan kaes-eskanna. Ngem diak pay kaano man napaliiw ti nakaro a panagsisinnupiat wenno personal a panaggiginnura kadagiti Kakabsatko. Ngem ketdi, napaliiwko ti napintas ken nakaskasdaaw a banag—ti panagkaykaysa, iti babaen ti mangiturturong nga impluensia ti Nasantuan nga Espiritu ken babaen ti bileg ti paltiing, addaan iti agduduma a pannirigan agingga nga adda naan-anay a panagtutunos ken naan-anay a panagkikinnaawatan. Iti dayta laeng a maaramid ti pannakaipatungpal. Paneknekak a dayta ti mangibagi iti espiritu ti paltiing a mangipakaammo manen ken manen iti panangiturong iti daytoy nga aramid ti Apo” (“God Is at the Helm,” Ensign, Mayo 1994, 54, 59).

Panangpadur-as iti Panangisurotayo

Mangrugi kadagiti nasantuan a kasuratan. Sakbay ti panangusarmo kadagiti pangsuplemento a resources, sipapasnek nga adalem dagiti nagkauna ken kabaruanan a nasantuan a kasuratan. Ti nainkararagan a panangadal iti balikas ti Dios ket mangpalugodto iti Espiritu a mangtulong kenka a mangusar iti no ania ti naadalmon bayat ti panangisurom (kitaen iti Panangisuro iti Wagas ti Mangisalakan, 12).