Ket Rabii Idin, ni Benjamin McPherson

Hunio 10–16

Mateo 26; Marcos 14; Lucas 22; Juan 18

“Saan a ti Pagayatak, no di ket ti Pagayatam’”

Basaem ti Mateo 26; Marcos 14; Lucas 22; ket Juan 18, ket utobem dagiti kapanunotan ken impresion nga umay iti panunotmo. Ania dagiti mensahe a kasapulan a masursuro dagiti miembro ti klasem?

Isuratmo Dagiti Impresionmo

Yawis ti Panagbibinninglay

Awisem dagiti miembro ti klase nga ibinglayda ti maysa a banag a nasursuroda itoy a lawas a nakatulong kadakuada a mangsapul iti ad-adu pay a kaipapanan iti sakramento. Ania ti inaramidda ken kasano a nakaapekto daytoy iti padasda iti pannakiranud iti sakramento?

Isuro ti Doktrina

Mateo 26:26–29; Lucas 22:19–20

Ti sakramento ket maysa a gundaway a kanayon a panglaglagip ti Mangisalakan.

• Apay nga impasdek ti Mangisalakan ti sakramento? Apay a makiranudtayo ti sakramento iti linawas? Ania dagiti mabalin a sungbat a masarakan dagiti miembro ti klase iti Mateo 26: 26–29; Lucas 22:7–20; Doktrina ken Katulagan 20:75–79; ken ti Napudno iti Pammati, 147–49? Kas pagarigan, isuro ti Napudno iti Pammati a ti sakramento ti mangipalagip iti sakripisio ni Cristo, a nangipatungpal iti linteg ni Moises. Kasta met a mabalin a kayatyo pay a basaen dagiti kararag ti sakramento kas maysa a klase ket idawat kadagiti miembro ti klase a mangilasin kadagiti katulagan nga aramidentayo kas paset ti ordinansa. Kasano a matulongantayo a maawatan ti maysa a tao no ania ti kayat a sawen dagitoy a panagkumit? Kasano a makaapekto ti pannakiramantayo iti sakramento dagiti pili nga aramidentayo iti unos ti makalawas?

  

  No makiranudtayo iti sakramento, pabaruentayo dagiti katulagantayo.

• Nalabit a mangted pagimbagan kadagiti miembro ti klase manipud iti panangdengngeg kadagiti kapanunotan ti tunggal maysa maipapan iti no kasano a manglaglagip iti Mangisalakan kabayatan ti sakramento ken iti unos ti makalawas (kitaen iti DkK 6:36–37). Nalabit a mabalinmo nga awisen ida a mangibinglay no ania ti makatulong kadakuada ken dagiti pamiliada a manglaglagip iti Mangisalakan ken mangtungpal kadagiti katulaganda. Ania dagiti bersikulo manipud iti babasaen iti daytoy a lawas a mangpauneg iti panagraemtayo iti sakramento? Para iti dadduma pay a kapanunotan maipapan iti no kasano a manglaglagip iti Mangisalakan, kitaen iti Gerrit W. Gong, “Always Remember Him,” Ensign wenno Liahona, Mayo 2016, 108–11.

• Mabalin a nasayaat a gundaway daytoy a panaglilinnawag tapno makipagsukisok kadagiti miembro ti klase iti simbolismo ti sakramento. Kasano a matulongannatayo dagitoy a simbolo a mangipamaysa iti Mangisalakan kabayatan ti ordinansa? Ania ti isuro dagitoy a simbolo maipapan Kenkuana ken ti pannakainaigtayo Kenkuana?

• Iti gibus ti panaglilinnawag maipapan iti sakramento, mabalinmo nga ikkan dagiti miembro ti klase iti sumagmamano a kanito a mangutob ken mangisurat no ania ti mariknada a makaparegta nga aramiden tapno makapagsagana para iti sakramento iti sumaruno a lawas. Tapno mangnayon iti espiritu daytoy a padas, ibilangmo ti panangtokar iti maysa a himno iti sakramento bayat ti panagutob dagiti miembro ti klase.

Mateo 26:36–46

Agbalintayo nga ad-adda a kas ken ni Cristo no pilientayo nga itulok ti pagayatayo iti pagayatan ti Ama.

• Ti pagwadan ti Mangisalakan iti panagtulok iti pagayatan ti Ama ket makatulong kadagiti miembro ti klase no kasapulanda ti agaramid iti isu met laeng. Tapno mairugi ti panaglilinnawag, mabalinmo nga awisen ti tunggal miembro ti klase a mangibinglay iti maysa a a panawen idi intulokda ti bagbagida nga agaramid iti maysa a banag nga ammoda a kayat ti Dios nga aramidenda. Ania ti nangguyugoy kadakuada a mangaramid kadagita a banag? Awisem ti klase a mangbasa iti Mateo 26:36–42 ken mangutob no apay a natallugod nga intulok ti Mangisalakan ti pagayatanna iti pagayatan ti Amana. Kasano a kangrunaan a mabendisionannatayo ti panangitulok iti pagayatantayo iti Dios?

• Tapno masukisok ti pagbatayan iti panagtulok iti Dios,mabalinmo a kiddawen iti kagudua ti klase a mangbasa iti Mosiah 3:19 ken iti sabali pay a kagudua ti klase a mangbasa iti 3 Nephi 9:20. Ania ti isuro dagitoy a bersikulo maipapan ti no ania ti kayat a sawen ti panagbalin a managtulok iti Dios? Kasano ti panagtuloktayo? Mabalin nga agutob dagiti miembro ti klase no kasano a maitulokda dagiti pagayatanda iti Dios iti umay a lawas. Ti palawag manipud ken ni Elder Neal A. Maxwell iti “Dagiti Nainayon a Resources” ket mabalin nga inayon iti panaglilinnawagyo.

Mateo 26:20–22, 31–35

Nasken nga amirisentayo ti bukodtayo a biag tapno maikeddeng no kasano a mayaplikar kadatayo dagiti balikas ti Apo.

• Mangngegtayo ti adu nga adalen iti ebanghelio iti biagtayo, ngem no dadduma makasulisog nga ipagaruptayo a mayaplikar ti kaaduan kadagita nga adalen iti dadduma a tao. Ti panaglilinnawag maipapan iti Mateo 26 ket makatulong kadatayo a mangparmek iti daytoy nga ayo. Tapno mairugi daytoy a pagsasaritaan, mabalinmo a bingayen ti klase iti sagsangaparis ket kiddawem iti maysa a tao iti tunggal paris a mangbasa iti Mateo 26: 20–22 idinto a basaen met ti sabali pay dagiti bersikulo 31–35. Awisem ida a mangidasig dagiti sungbat dagiti disipulo kadagitoy dua a pakaammuan. Ania dagiti adalen a masursurotayo manipud iti no kasano nga inyaplikar dagiti disipulo dagiti balikas ti Mangisalakan iti bagbagida? Tapno masursuro ti ad-adu pay, kitaen iti pagibasaran ni Presidente Dieter F. Uchtdorf iti Mateo 26: 21–22 iti mensahena a “Lord, Is It I?” (Ensign wenno Liahona, Nob. 2014, 56–59).

Mateo 26:36–46

Inaramid ni Jesucristo ti awan patinggana a Pannubbot para kadatayo.

• Ibilangmo ti panangawis kadagiti miembro ti klase a mangibinglay kadagiti nalawag a pannakaammo ken pannakaawat [insights] a masarakanda maipapan iti Pannubbot ni Jesucristo iti bukod ken sangapamiliaan a panagadalda.

• Ti Mateo 26 ket mangiladawan no ania ti napasamak iti Getsemani, ngem maawatan kadi dagiti miembro ti klasem ti kinapateg daytoy iti biagda? Tapno matulongan ida, nalabit a mabalinmo nga isurat iti pisarra dagiti saludsod kas iti Ania ti napasamak iti Getsemani? ken Apay a napateg daytoy kaniak? Mabalin nga agtrabaho dagiti miembro ti klase a saggaysa wenno iti babassit a grupo tapno mangsapul kadagiti sungbat iti Mateo 26:36–46; Alma 7:11–13; ken Doktrina ken Katulagan 19:16–19. Kasta met a makitada ti sungbat iti mensahe ni Elder C. Scott Grow “The Miracle of the Atonement” (Ensign wenno Liahona, Mayo 2011, 108–10).

• Iti Libro ni Mormon, awagan ni Jacob ti Pannubbot ni Jesucristo iti “agnanayon a pannakasubbot” (2 Nephi 9:7). Tapno matulongan a maawatan dagiti miembro ti klase no ania ti kaipapanan daytoy, mabalinmo nga ibinglay dagiti pannursuro ni Presidente Russell M. Nelson iti “Dagiti Nainayon a Resources” ket idawat kadagiti miembro ti klase a mangilista kadagiti wagas a ti impluensia ti sakripisio ti Mangisalakan ket mabalin a maibilang nga awan patinggana. Mabalin pay a basaenda dagiti sumaganad a nasantuan a kasuratan ket inayon kadagiti listaanda: Hebreo 10:10; Alma 34:10–14; Doktrina ken Katulagan 76:24; ken Moises 1:33. Kasano a maipakitatayo ti panagdayaw iti inaramid ti Mangisalakan para kadatayo?

Yallukoy ti Panagsursuro iti Pagtaengan

Tapno maparegta dagiti miembro ti klase a mangituloy iti panagbasa, mabalinmo a saludsoden kadakuada no ammoda no ania dagiti pito a banag a kinuna ni Jesus bayat ti kaaddana iti krus. Ibagam kadakuada a maammuandanto no ania ti kinuna ti Mangisalakan babaen ti panangbasa iti Mateo 27; Marcos 15; Lucas 23; ken Juan 19.

Dagiti Nainayon a Resources

Mateo 26; Marcos 14; Lucas 22; Juan 18

Dagiti video iti Biblia (LDS.org).

“The Last Supper,” “The Savior Suffers in Gethsemane”

Panangitulok iti pagayatantayo iti Ama.

Insuro ni Elder Neal A. Maxwell: “No itulokyo ti pagayatanyo iti Dios, it-itedyo Kenkuana ti kakaisuna a banag a mabalinyo a pudno a maited Kenkuana a talaga a bukbukodyo nga ited. Saankayo nga aguray iti nabayag unay a mangsarak iti altar wenno mangrugi a mangikabil iti sagut dagiti pagayatanyo iti daytoy a lugar!” (“Remember How Merciful the Lord Hath Been,” Ensign wenno Liahona, Mayo 2004, 46).

Ti awan patinggana a Pannubbot.

Insuro ni Presidente Russell M. Nelson:

“Awan patinggana ti Pannubbot ni [Jesucristo]—awan ti paggibusanna. Daytoy pay ti awan patinggana no maipanggep iti dayta a maisalakan ti amin a sangkataw-an manipud iti awan-paggibusanna nga ipapatay. Awan patinggana daytoy iti baet ti nakaro a panagsagabana. Awan patinggana iti panawen, a namaggibus iti kannawidan a panangisakripisio iti ayup a naaramid agingga iti dayta a kanito. Awan patinggana iti kaatiddog—isu a maaramid iti namimpinsan para iti amin. Ken ti asi ti Pannubbot ket mangsakup saan laeng iti awan patinggana a bilang dagiti tao, no di ketdi pay iti awan patinggana a bilang dagiti lubong a pinarsuana. Awan patinggana iti labes ti ania man a timbangan ti rukod ti tao wenno mortal a pannakaawat.

“Ni Jesus laeng ti agmaymaysa a makaidiaya iti kasta nga awan inggana a pannubbot, gapu ta nayanak Isuna iti mortal nga ina ken imortal nga Ama. Gapu iti dayta naidumduma kinainauna, awan patinggana a Nabiag ni Jesus” (“The Atonement,” Ensign, Nob. 1996, 35).

Insuro ni Presidente Heber J. Grant: “Saan laeng nga immay ni Jesus kas sapasap a sagut, immay Isuna a kas maysa a daton. … Para iti tunggal maysa kadatayo Isu ket natay iti Kalbario ket adda kondisionna nga isalakannnatayonto ti darana. Saan a kas pagilian, komunidad wenno grupo, ngem ketdi kas tunggal tao” (“A Marvelous Growth,” Juvenile Instructor, Dis. 1929, 697).

Panangpadur-as iti Panangisurotayo

Matmatam dagiti mata ti Dios. Ikarigatam ti kumita kadagiti miembro ti klasem a kas iti panangkita ti Dios kadakuada, ket ipakitanto kenka ti Espiritu dagiti nadiosan a pateg ken potensialda. No aramidem daytoy, matarabaykanto kadagiti panagkagumaanmo a makatulong kadakuada (kitaen iti Panangisuro iti Wagas ti Mangisalakan, 6).