Pakalaglagipan Kaniak, ni Walter Rane

Hunio 3–9

Juan 13–17

“Agtultuloykayo iti Ayatko”

Bayat ti sikakararag a panangadalmo iti Juan 13–17, utobem no kasano ti kasayaatan a maipakitam ti ayat kadagiti sursuruam. Ti Espiritu Santo ti mangisangbayto kadagiti kapanunotan iti panunotmo bayat ti panangadalmo kadagiti nasantuan a kasuratan, Umaykayo, Sumurot Kaniak—Para kadagiti Indibidual ken Pamilia, ken daytoy a balabala.

Isuratmo Dagiti Impresionmo

Yawis ti Panagbibinninglay

Isuratmo dagiti numero 13 agingga iti 17 iti pisarra, a mangibagi kadagiti kapitulo iti Juan a basaen dagiti miembro ti klase iti daytoy a lawas. Awisem ti sumagmamano a miembro ti klase a mangisurat, iti abay ti tunggal numero ti kapitulo, ti pagibasaran iti maysa a bersikulo a masarakanda a napateg ken kayatda a paglilinnawagan kas maysa a klase.

Isuro ti Doktrina

Juan 13:1–17

Ti Mangisalakan ti pagwadantayo iti napakumbaba a panagserbi iti dadduma.

• Tapno matulongan dagiti miembro ti klase a mangutob iti kinapateg ti panangbuggo ni Jesus kadagiti saka dagiti disipulona, mabalinmo nga awisen a nasapsapa ti maysa a miembro ti klase nga agakem iti papel ni Pedro iti daytoy a pakasaritaan ken makauman dagiti dadduma pay iti klase. Allukoyem dagiti miembro ti klase a mangsukisok iti Juan 13:1–17 ken mangpanunot kadagiti napnuan kaipapanan a saludsod a damagenda ken ni Pedro. Ania ti masursurotayo manipud iti daytoy a pakasaritaan a mabalin a mangapekto no kasano nga agserbitayo iti dadduma?

Juan 13:34–35

Ti ayat ti nalawag a kababalin dagiti disipulo ni Jesucristo.

• Ania ti mabalin a nangallukoy kadagiti miembro ti klase nga agbalin nga ad-adda pay a managayat? Nalabit a mabalinmo a saludsoden kadakuada no kasano a maibagada a pasurot ni Cristo ti maysa a tao a naam-ammoda. Ania dagiti kababalin a madlawda maipapan ti tao? Mabalinmo nga awisen ida a mangsukisok iti Juan 13:34–35 tapno masursuruan no kasano ti mangilasin kadagiti pudno a disipulo ti Mangisalakan. Ania ti maaramidtayo tapno mapagbalintayo a ti ayat ti nalawag a kababalin ti kinadisipulotayo? Kasano a makaimpluensia daytoy a pannursuro iti wagas a panangtrato iti dadduma, agraman iti social media?

• Kas maysa a klase, nasursuroyo ti adu maipapan iti biag ti Mangisalakan iti daytoy a tawen, a pakairamanan ti adu a pagarigan ti no kasano nga impakitana ti ayatna para kadagiti dadduma. Maysa a wagas tapno matulongan dagiti miembro ti klase nga agutob maipanggep iti bilin iti Juan 13:34 ket isurat ti Kas iti Panagayatko Kadakayo iti pisarra ket kiddawem kadagiti miembro ti klase a mangilista kadagiti pagarigan manipud iti Baro a Tulag a magiladawan iti ayat ni Jesus. Kalpasanna mabalinmo nga isurat ti Aggiinnayatkayo iti pisarra ket kiddawem kadagiti miembro ti klase a mangilista kadagiti wagas a pakasurotantayo iti pagwadanna iti ayat. Ti panagkanta wenno panagdengngeg iti himno nga “Aggiinnayatkayo,” Hymns, no. 308, wenno panagbuya iti maysa a video iti “Dagiti Nainayon a Resources” ket maysa a nasayaat a pangnayon iti daytoy nga aktibidad.

• No saantayo a makarikna nangnangruna iti panagayat iti dadduma, ania ti maaramidtayo tapno magun-odtayo ti sagut ti ayat? Ania ti mainayon ti balakad Moroni 7:48; 8:26 iti pannakaawattayo iti daytoy a sagut? Asino ti ammotayo nga agkasapulan a makarikna iti ayattayo?

Ti ayat ti nalawag a kababalin dagiti disipulo ni Jesucristo.

Juan 14:16–27; 15:26; 16:7–15

Ti Espiritu Santo ti mangted kabaelan kadatayo a mangipatungpal iti panggeptayo kas disipulo ni Jesucristo.

• Tapno matulongan dagiti miembro ti klase a makasursuro maipapan kadagiti agduduma nga akem ti Espiritu Santo, ibilangmo ti panangbinglay kadakuada kadagiti grupo ken panangtedmo iti tunggal grupo iti maysa kadagiti sumaganad a binatog: Juan 14:16–27; 15:26; ken 16:7–15. Awisem ti tunggal grupo a mangisurat iti pisarra no ania ti masursuroda maipapan iti Espiritu Santo manipud kadagitoy a binatog. Makainayon dagiti miembro ti klase iti dadduma pay a nalawag a pannakaammo ken pannakaawat a masarakanda bayat ti panagsukisokda kadagiti nasantuan a kasuratan a nakalista iti “Dagiti Nainayon a Resources.” Kaano a nariknatayo ti impluensia ti Espiritu Santo? Ania dagiti banag wenno visual aid a maitugotmo iti klase a makatulong kadagiti miembro ti klase tapno maawatanda dagiti akem ti Espiritu Santo?

• Ibilangmo ti panangawis iti sumagmamano a miembro ti klase a nasapsapa nga adalenda ti maysa kadagiti mensahe ti sapasap a komperensia a naisingasing iti “Dagiti Nainayon a Resources” (wenno dadduma pay a mensahe ti komperensia nga ammoda) maipapan iti Espiritu Santo. Paibinglay biit kadakuada iti klase no ania ti nasursuroda. Ania ti mainayon dagitoy a mensahe iti no ania ti nasursuroda maipapan iti Espiritu Santo manipud iti Juan 14–16?

Juan 15:1–12

No agtalinaedtayo iti Mangisalakan, agbungatayo ken maaddaantayonto iti rag-o.

• Ania ti nasursuro dagiti miembro ti klase iti daytoy a lawas manipud iti pangngarig ti Mangisalakan maipapan iti ubas ken sangsanga? Ibilangmo ti panangitugot iti klase iti bassit a mula ken panangusar iti daytoy a mangtulong kadagiti miembro ti klase a mangiladawan iti panunotda iti pangngarig ti Mangisalakan. Kalpasan ti panangbasayo iti Juan 15:1–12 kas maysa a klase, mabalinmo nga ilawlawag no ania ti kaipapanan ti “agtalinaed ken ni [Cristo]” (Juan 15:4). Mabalinmo nga awisen ti sumagmamano a miembro ti klase a mangibinglay iti no kasano a naammuanda ti Juan 15:5 a pudno. (Kitaen met ti palawag manipud ken ni Elder Jeffrey R. Holland iti “Dagiti Nainayon a Resources.”) Mabalin pay a makatulong ti video a “The Will of God” (LDS.org) iti daytoy a panaglilinnawag.

Juan 17

Naan-anay a nagkaykaysa ti Nailangitan nga Ama ken ni Jesucristo, ken kayatda nga agkaykaysatayo met.

• Nalabit a saanmo a maisuro ti amin a napapateg a kinapudno a masarakan iti Juan 17 iti maysa a panaglilinnawag iti klase, ngem daytoy ti maysa a wagas a makatulong iti klase nga agsukisok iti sumagmamano kadakuada. Ilistam iti pisarra dagiti konsepto manipud iti Juan 17, kas kadagitoy.

  • Ti pakainaigantayo ken ni Jesucristo

  • Ti pakainaigan ni Jesucristo iti Amana

  • Ti pakainaigantayo iti dadduma pay iti lubong

  • Ti pakainaigantayo iti tunggal maysa a kas disipulona

  Awisen ti tunggal a miembro ti klase a pumili iti maysa kadagitoy a konsepto ken basaen ti Juan 17, a mangsukisok kadagiti bersikuloa mainaig iti daytoy. Paibinglay iti sumagmamano a miembro ti klase no ania ti nasursuroda.

Yallukoy ti Panagsursuro iti Pagtaengan

Tapno maallukoy dagiti miembro ti klase a mangbasa iti Mateo 26; Marcos 14; Lucas 22; ken Juan 18 kabayatan ti umay a lawas, mabalinmo nga isarita kadakuada a kadagitoy a kapitulo mabasadanto maipapan iti maysa kadagiti napateg a kanito iti naindaklan a plano ti pannakaisalakan.

Dagiti Nainayon a Resources

Juan 13–17

Dagiti video iti LDS.org maipapan iti ayat.

• “Love One Another”

• “Families Sacrifice, Give, and Love”

• “Preparation of Thomas S. Monson: He Learned Compassion in His Youth”

Ti Espiritu Santo

• Dagiti Aramid 2:37–38; Taga Galacia 5:22–23; 1 Nephi 10:17–19; 2 Nephi 32:3–5; Mosiah 3:19; 3 Nephi 27: 20; Moroni 8:26; 10:4–5; Doktrina ken Katulagan 8:2–3; 42:17

• Robert D. Hales, “The Holy Ghost,” Ensign wenno Liahona, Mayo 2016, 105–7

• Henry B. Eyring, “The Holy Ghost as Your Companion,” Ensign wenno Liahona, Nob. 2015, 104–7

• David A. Bednar , “Receive the Holy Ghost” Ensign wenno Liahona, Nob. 2010, 94–97

Panagtalinaed ken ni Cristo.

Makita a ti balikas nga agnaed ket addaan kadagiti kaipapanan ti kinamanayon ken panagkumit, insuro ni Elder Jeffrey R. Holland:

“Ngarud ti kayat a sawen daytoy a [balikas] ket ‘agtalinaed—ngem agtalinaed iti agnanayon.’ Dayta ti awag ti mensahe ti ebanghelio. … Umaykayo, ngem umaykayo nga agtalinaed. Umaykayo nga addaan iti natibker a pammati ken kinaandur. …

“Kinuna ni Jesus, ‘No awanak awan ti mabalinyo nga aramiden’ iJuan 15:5]. Paneknekak a dayta ti kinapudno ti Dios. Ni Cristo ti amin a banag kadatayo ken datayo ti ‘agnaed’ Kenkuana a simamanayon, saan a sumuko, ngem sititibker, iti agnanayon. Tapno agbukar ti bunga ti ebanghelio ken mangbendision iti biagtayo, nasken a sititibker a maireppengtayo Kenkuana, ti Mangisalakan kadatayo amin, ken iti Simbaan, nga agikut iti nasantuan a naganna. Isu ti ubas a pudno a pagtaudan ti pigsa ken ti kakaisuna a pagtaudan ti biag nga agnanayon. Kenkuana saantayo laeng nga agibtur ngem met agtalinaed ken agballigi iti daytoy nasantuan a panggep a dinto kaano man mangpaay kadatayo” (“Abide in Me” Ensign wenno Liahona, Mayo 2004, 32).

Panangpadur-as iti Panangisurotayo

Awisen ti Espiritu. “Awan ti mortal a mannursuro, kasano man ti kinalaing wenno kaadu ti padasna, a mabalin a mangsukat iti Espiritu. Ngem makapagbalintayo a ramit kadagiti ima ti Dios tapno matulongan dagiti annakna a makasursuro babaen ti Espiritu. Tapno maaramid daytoy, awisentayo ti impluensia ti Espiritu iti biagtayo ken allukoyentayo dagiti sursuruantayo a mangaramid met iti kastoy. Ti sagrado a musika, dagiti balikas dagiti propeta iti ud-udina nga aldaw, panangipeksa iti ayat ken pammaneknek, ken dagiti kanito ti naulimek a panagutob ket makaawis amin iti kaadda ti Espiritu” (Panangisuro iti Wagas ti Mangisalakan, 10).