Mayo 13–19

Mateo 19–20; Marcos 10; Lucas 18

“Ania Pay ti Pagkurangak?”

Bayat ti panagadalmo iti Mateo 19–20; Marcos 10; ken Lucas 18, sikakararag nga utobem no ania kadagiti miembro ti klase ti mabalin a nakasursuro wenno nakarikna iti bukodda a panagadal.

Isuratmo Dagiti Impresionmo

Yawis ti Panagbibinninglay

Mabalin a makatulong a sagpaminsan a paglilinnawagan dagiti padas dagiti miembro ti klase a mainaig iti napadur-as a panangyunay-unay iti panangsursuro iti ebanghelio a naisentro iti pagtaengan itoy a tawen. Ania dagiti naballigian a padas a maibinglayda? Ania a tubeng wenno pannubok ti pakaipaspasanguanda? Ania a balakad ti maitedda iti tunggal maysa?

Isuro ti Doktrina

Mateo 19:3–9

Inordenan ti Dios ti kallaysa iti nagbaetan ti lalaki ken ti babai.

• Nangnangruna pay, maigiddiat dagiti pannirigan ti lubong iti agnanayon a kinapudno. Tapno matulongan ti klasem a masursuruan maipapan kadagiti pannirigan ti Dios iti kallaysa, mabalinmo nga awisen ida a mangbasa iti Mateo 19:3–9 ket ilistam iti pisarra dagiti kinapudno a masarakanda maipanggep iti kallaysa. Mabalinda pay nga ilista dagiti mainayon a kinapudno a masarakanda iti sumaganad: Genesis 1:27–28; 1 Taga Corinto 11:11; Doktrina ken Katulagan 42:22; 49:15–17; 131:1–4; 132:19; ken Moises 3:18, 21–24. Kasano a mapatibker dagitoy a kinapudno iti “Ti Kaamaan: Maysa a Waragawag iti Lubong”? (Ensign wenno Liahona, Nob. 2010, 129).

• Kasano a matulongam dagiti miembro ti klase a makarikna a nasaysayaat a nakasagana tapno mangilawlawag wenno mangsalaknib kadagiti pannursuro ti Apo maipapan iti kallaysa? Mabalinmo nga awisen ida a mangilista iti pisarra ti sumagmamano a saludsod a nangngegda maipapan kadagiti pannursuro ti Simbaan maipanggep iti panagasawa. Kalpasanna mabalinda nga isingasing dagiti sungbat kadagitoy a saludsod nga us-usaren no ania ti ammoda maipapan iti plano ti pannakaisalakan ken dagiti palawag manipud iti “Ti Kaamaan: Maysa a Waragawag iti Lubong,” Mateo 19:3–9, ken dagiti pannursuro iti “Dagiti Nainayon a Resources.” Ibilangmo ti panangawis kadagiti miembro ti klase a mangyakem no kasano a mailawlawagdo dagiti pammatitayo maipapan iti kallaysa iti maysa a tao a sabali ti pammatina.

• Ibilangmo ti panangyam-ammo iti topiko maipapan ti kallaysa iti sumaganad nga adaw manipud ken ni Elder Robert D. Hales: “Awan kadatayo ti mangikallaysa iti tao a perpekto; ikallaysatayo ti tao nga addaan iti potensial” (“Meeting the Challenges of Today’s World,” Ensign wenno Liahona, Nob. 2015, 46). Mangawis kadagiti miembro ti klase iti nagkallaysa nga agassawa a daydayawenda. Ania dagiti kababalin nga adda iti daytoy nga agassawa? Ania dagiti kababalin a kayat dagiti miembro ti klase iti maysa nga asawa, ken ania dagiti kababalin a kayatda a mapadur-as tapno agbalin a nasayaat nga asawa? Kasta met nga ibilangmo no ania dagiti palawag a mausarmo manipud iti mensahe ni Presidente Russell M. Nelson “Celestial Marriage” (Ensign wenno Liahona, Nob. 2008, 92–95) tapno makatulong a mangparegta kadagiti miembro ti klase nga agkalikagum a manggun-od iti celestial a kallaysa.

Paset ti plano ti Dios ti agnanayon a kallaysa.

Mateo 20:1–16

Sidadaan a magun-od ti amin ti agnanayon a biag—kasano man ti kasapa wenno kaladaw nga awatentayo ti ebanghelio.

• Ania ti makatulong kadagiti miembro ti klase a mangyaplikar kadagiti pagbatayan iti pangngarig ti mangmangged iti kaubasan? Mabalinmo nga awisen ti sumagmamano a miembro ti klase a mangisagana iti panangyakem iti pangngarig a maipabuya iti klase. Kalpasan ti pabuya, mabalin nga ibinglay dagiti tao nga agak-akem a mangmangged no kasano ti nariknada maipapan ti tangdan nga inawatda ken no apay. Ania ti isingasing daytoy a pangngarig maipapan ti pagarian ti langit? Ania dagiti mainayon a nalawag a pannakaammo ken pannakaawat a magun-od dagiti miembro ti klase maipapan iti daytoy a pangngarig manipud iti mensahe ni Elder Jeffrey R. Holland ti “The Laborers in the Vineyard”? (Ensign wenno Liahona, Mayo 2012, 31–33).

Mateo 19:16–22; Marcos 10:17–27

Ti Mangisalakan ti mangtarabay kadatayo nga umasideg Kenkuana no agkiddawtayo iti tulongna.

• Kasano a matulonganyo dagiti miembro ti klase a mangilasin ken mangyaplikar kadagiti pagbatayan iti estoria ti nabaknang nga agtutubo a lalaki? Mabalin a kiddawem kadakuada a mangbasa iti Marcos 10:17–27 ken panunoten no nariknada ti kas ti nabaknang nga agtutubo a lalaki. Ania ti nakatulong kadakuada a mangsurot iti balakad ti Mangisalakan uray no narigat? Mabalin kadi ti asino man iti klase ti mangibinglay iti maysa a padas a nagsaludsodanna iti “Ania pay ti pagkurangak?” (Mateo 19:20) ken nakaawat iti bukod a parikna a dumur-as? Ania ti pakaidumaan a naaramid iti biagna?

Lucas 18:9–14

Nasken a pagtalkantayo iti asi ti Dios, saan nga iti bukodtayo a kinalinteg.

• Ti pangngarig ti Mangisalakan a mangidasig ti kararag ti maysa a Fariseo iti kararag ti maysa a publikano ket makatulong kenka a mang-highlight iti galad nga idawat ti Apo kadagiti agkalikagum a sumurot Kenkuana. Tapno matulongan dagiti miembro ti klase a mangyaplikar iti daytoy a pangngarig iti aldawtayo, mabalinmo nga awisen ida a mangulit a mangisurat iti kararag ti Fariseo iti wagas a mausar dagiti kabaruanan a detalye ngem mangipeksa kadagiti isu met la a galad. Mabalinda nga aramiden ti kasta met laeng iti kararag ti publikano ket kalpasanna ibinglayda no ania ti insuratda. Kasano a mainaig dagiti bersikulo 15–17 ken 18–24 iti no ania ti insuro ti Mangisalakan iti daytoy a pangngarig?

• Kasano a mangparegta kadagiti suruanyo nga agtalinaed a napakumbaba, a kas iti publikano kadagitoy a bersikulo? Nalabit a makatulong ti sumaganad a palawag ni Elder Dale G. Renlund maipapan kadagitoy a bersikulo: “Nalawag ti mensahe para kadatayo: mayasideg iti Dios ti agbabbabawi a managbasol ngem iti aginsisingpet a tao a mangkondena iti dayta a managbasol” (“Our Good Shepherd,” Ensign wenno Liahona, Mayo 2017, 31).

Yallukoy ti Panagsursuro iti Pagtaengan

Tapno maallukoy ti klasem a mangadal iti Mateo 21–23; Marcos 11–12; Lucas 19–20; ken Juan 12, ibilang ti panangsaludsod kadakuada iti “Ania ti aramidenyo no addaankayo iti maysa laengen a lawas nga agbiag?” Ibagam kadakuada nga ipalgak dagitoy a kapitulo no ania ti inaramid ti Mangisalakan iti maudi a lawas ti biagna.

Dagiti Nainayon a Resources

Mateo 19–20; Marcos 10; Lucas 18

Ti kallaysa ti sentro iti plano ti Dios.

Nangted ti Umuna a Panguluen ken ti Korum dagiti Sangapulo-ket-dua nga Apostol iti daytoy a palawag maipanggep iti kallaysa ti agpada iti katataona:

“Allukoyenmi ti amin a manglaglagip kadagiti panggep ti Nailangitan nga Ama iti panangparsuana iti daga ken panangtedna iti mortal nga ipapasngay ken padastayo ditoy kas annakna [kitaen iti Genesis 1:2–28; 2:24]. … Impasdek ti Dios ti kallaysa iti nagbaetan ti lalaki ken babai ken kangrunaan iti planona para kadagiti annakna ken para iti pagimbagan ti kagimongan. …

“… Namnamaen ti Dios nga itandudo ken tungpalentayo dagiti bilinna ania man dagiti agduduma nga opinion wenno ayo iti kagimongan. Nalawag ti lintegna ti kinadalus ti dayaw: umno laeng dagiti seksual a relasion iti nagbaetan ti maysa a lalaki ken maysa a babai a legal ken mayannurot iti linteg a nagkallaysa kas agassawa” (“LDS Church Instructs Leaders Regarding Same-Sex Marriage,” Ene. 10, 2014, mormonnewsroom.org).

Dagiti mainayon a nalawag a pannakaammo ken pannakaawat [insights] maipapan iti kallaysa.

“Ti Kaamaan: Maysa a Waragawag ti Lubong” ket mabalin a makatulong iti panangilawlawag no apay a mangballaag dagiti propeta ti Apo iti ania man banag a maisuppiat iti kallaysa iti nagbaetan ti maysa a lalaki ken maysa a babai. Mabalin pay a makatulong dagiti sumaganad a punto:

• Ti pamilia ket agnanayon a konsepto. Pasetnatayo amin ti pamilia ti Dios, ken ti planona ket mapagkallaysa ken mapaglantip dagiti lallaki ken babbai tapno makapagbiag kas pamilia para iti kinaagnanayon (kitaen iti Genesis 2:18, 21–24; 1 Taga Corinto 11:11).

• Kas paset ti plano ti Dios, nabilin dagiti agasssawa nga agpaadu ken mangpunno iti daga (kitaen iti Genesis 1:28) ken mangpadakkel kadagiti annakda iti kinalinteg.

• Ti kangrunaan a panggep ti plano ti Dios ket pannakaitan-ok, wenno agnanayon a biag, iti sidong ti Dios, a mabalin a pagaddaan iti agnanayon a panagpaadu ken agnanayon a rag-o dagiti napudno nga agassawa (kitaen iti DKK 132:19–21). Ti plano ti Dios ket ti kakaisuna a wagas a pakagun-odan iti pannakaitan-ok (kitaen iti DkK 131:1–4).

• Namnamaennatayo ti Apo a mangipakita iti ayat ken panangngaasi kadagiti mangitandudo wenno makiraman iti maysa a banag malaksid iti plano ti Dios para iti kallaysa, kas panagdenna a di nagkallaysa wenno panagkallaysa ti agpada iti katataona (kitaen iti mormonandgay.lds.org). Iraman ti pudno a panangngaasi ti mangaramid iti amin a kabaelantayo a siaayat ket siaanus a mangawis kadakuada a mangsurot iti plano ti Dios, a daytoy ti kakaisuna a plano ti pudno a kinaragsak. Ti umawat wenno umanamong kadagiti alternatibo iti plano ti Dios ket ad-adda a makadangran ngem iti makatulong.

Panangpadur-as iti Panangisurotayo

Kasapulan ti Dios dagiti naidumduma a talento ken kabaelan. “Maparaburam dagiti annak ti Dios babaen ti panangipaaymo iti ayatmo kadagiti dadduma, dagiti sagut nga inted ti Dios kenka, ken dagiti padpadasmo iti biag. No agserbika a sipupudno ken agkalikagum iti tulong ti Dios, patibkerennakanto, ket dumur-askanto iti kabaelam a mangisuro iti ebanghelio iti wagas ti Mangisalakan” (Panangisuro iti Wagas ti Mangisalakan, 5).