Ti Nayaw-awan nga Anak, ni Liz Lemon Swindle

Mayo 6–12

Lucas 12–17; Juan 11

“Makipagrag-okayo Kaniak; gapu ta Nabirokak ti Napukaw a Karnerok”

Rugiam ti panagsaganam babaen ti nainkararagan a panagadalmo iti Lucas 12–17 ken Juan 11. Ania ti “napukaw a karnero” iti klasem ti umay iti panunotmo? Usarem ti Umaykayo, Sumurot Kaniak—Para kadagiti Indibidual ken Pamilia ken daytoy a balabala bayat ti panagkalikagummo a manggun-d iti pannarabay ti Apo maipapan iti no kasano ti kasayaatan a maipaay dagiti kasapulan dagiti miembro ti klase, uray no saanda a dumardar-ay iti klase.

Isuratmo Dagiti Impresionmo

Yawis ti Panagbibinninglay

Ti panangyaplikar ket napateg a paset ti panagsursuro, isu nga awisem dagiti miembro ti klase a mangibinglay iti no kasano a pinilida nga agbiag iti maysa a banag a nasursuroda manipud kadagiti nasantuan a kasuratan iti daytoy a lawas.

Isuro ti Doktrina

Lucas 14:15–24

Awan ti umdas a panagpambar iti saan a panangawat iti ebanghelio.

• Tapno matulongan dagiti miembro ti klase nga agadal iti pangngarig maipapan iti dakkel a pangrabii, ipapanmo nga adda pasken a pangawisam kadakuada a sikanto ti agsangaili. Paibinglay kadakuada ti sumagmamano a rason no apay a makadar-ayda wenno saanda a makadar-ay. Basaenyo ti Lucas 14:15–24 nga aggigiddan, ket paglilinnawagan dagiti pambar dagiti tao iti pangngarig idi naawisda iti maysa a fiesta a nangibagi kadagiti bendision ti ebanghelio. No ania dagiti panagpambar dagiti tao ita iti saanda a panangawat kadagiti awis ti Mangisalakan nga umawat kadagiti bendision ti Nailangitan nga Ama? Nalabit a mabalin nga ibinglay dagiti miembro ti klase dagiti bendision a naawatda idi nagaramidda kadagiti sakripisio a kasapulan tapno agtungpal kadagiti pagbatayan ti ebanghelio.

Lucas 15

Mabalintayo a sapulen dagiti napukaw ket makipagrag-otayo iti Ama intono agsublida.

• Kasano a maparegtam dagiti sursuruam a mangsapul kadagiti tao a “napukaw” gapu ta awananda kadagiti bendision ti ebanghelio ket awisem ida nga agsubli? Mabalinmo nga awisen dagiti miembro ti klase nga agpanunot iti apagkanito maipapan iti “napukaw a karnero” nga am-ammoda ket kalpasanna basaen ti Lucas 15:1–7 a pampanunoten dayta a tao. Ania ti nariknada a makaparegta nga aramiden a mangtulong iti dayta a tao nga addaan panagrikna ken ayat? Ti estoria ni Presidente Thomas S. Monson iti “Dagiti Nainayon a Resources” wenno ti bitla ni Elder Mervyn B. Arnold “To the Rescue: We Can Do It” (Ensign wenno Liahona, Mayo 2016, 53–55) ket mabalin a makatulong iti daytoy a panaglilinnawag.

• Makatulong kadi kadagiti miembro ti klase a makaawat kadagiti wagas a pakapukawan ti maysa a tao? Ibilangmo ti panangtuding kadagiti grupo dagiti miembro ti klase tapno mangadal iti maysa kadagiti tallo a pangngarig iti Lucas 15 . Ania ti isingasing dagiti pangngarig maipapan iti no kasano nga ikarigatantayo a mangsarak kadagiti napukaw? Ania kadagiti balikas iti Lucas 15 ti mangipalgak no kasano ti marikna ti Nailangitan nga Ama maipapan kadagiti napukaw? Ti aggigiddan a panagkanta iti “Dear to the Heart of the Shepherd,” Hymns, no. 221, ket mabalin a napnuan kaipapanan a pangnayon kadagiti panangisuro kadagitoy a pangngarig.

• Mabalin a pagimbagan dagiti miembro ti klase iti panangipamaysada kadagiti balikas ken tignay ti in-inauna nga anak a lalaki iti pangngarig ti nayaw-awan nga anak a lalaki. Nalabit a mabalinda nga isurat ti kasukat a panangigibus iti pangngarig a maiduma ti ugali ti in-inauna nga anak a lalaki iti kabsatna. Ania ti isuro kadatayo ti balakad ti ama iti pangngarig maipapan iti no kasano ti nasken a mariknatayo maipapan kadagiti napukaw ken dagiti agsubli iti ebanghelio? (Kitaen met iti palawag ni Elder Jeffrey R. Holland iti “Dagiti Nainayon a Resources.”) Wenno mabalinmo nga idawat kadagiti miembro ti klase a mangipapan nga isuda ti ama iti daytoy a pangngarig. Ania dagiti mainayon a balakad nga itedna ti in-inauna nga anak a lalaki a makatulong kenkuana nga agrag-o iti panagdur-as wenno balligi dagiti dadduma?

Juan 11:1–46

Ni Jesucristo ti Panangungar ken ti Biag.

• Bayat ti panagbasada maipapan ti panagungar ni Lazaro itoy a lawas, adda kadi ania man a banag a nasarakan dagiti miembro ti klase a nangpapigsa iti pammatida a ni Jesucristo ti Anak ti Dios ken ti naikari a Mesias? Awisen ida a mangibinglay no ania ti nasarakanda. Ania dagiti dadduma pay a padas a nagpatibker iti pammatida ken ni Jesucristo? Mabalin a kayatmo nga ilawlawag nga iti panawen daytoy a milagro, saan a nagungar ni Lazaro ngem naisubli iti mortal a biag.

  

  Nagsangit ni Jesus, ni James Tissot

• Maysa a wagas tapno maamiris ti Juan 11:1–46 ket idawat kadagiti miembro ti klase nga agsisinnublat nga agbasa kadagiti bersikulo ket awisen ida nga agsardeng no masarakanda ti pakakitaan ti pammati ken ni Apo Jesucristo. Idawat kadakuada a mangilawlawag no ania ti nasarakanda. Kasano a makapapigsa iti pammatitayo Kenkuana dagiti pannubok ken pagkurangan?

• Sabali pay a wagas a panangbasa iti daytoy a pakaammun ket mangtuding iti sumagmamano a miembro ti klase a mangibilang kadagiti pannirigan dagiti tao a mairaman—kas iti Mangisalakan, dagiti Apostol, ni Marta, ni Maria, ken ni Lazaro. Ania ti masursurotayo manipud iti tunggal maysa kadakuada? Ania ti masursurotayo maipapan ti Mangisalakan manipud iti Juan 11:33–35? Apay a napateg a maammuan dagitoy a banag maipapan Kenkuana?

Yallukoy ti Panagsursuro iti Pagtaengan

Tapno maallukoy dagiti miembro ti klase a mangbasa iti Mateo 19–20; Marcos 10; ken Lucas 18, mabalinmo a saludsoden ti “Kasano ti riknayo no nagtrabahokayo nga agmalmalem ket nabayadankayo iti kapada ti bayad iti maysa a tao a nagtrabaho iti maysa laeng nga oras?” Ibagam kadakuada nga adda maysa a pangngarig iti panagbasa iti sumaruno a lawas a mangisingasing no kasano a maibilang a nainkalintegan daytoy.

Dagiti Nainayon a Resources

Lucas 12–17; Juan 11

“Nasarakannak.”

Insalaysay ni PresidenteThomas S. Monson ti sumaganad a padasna kabayatan ti panagserbina kas maysa a bishop: “Nadlawko iti maysa a bigat ti Domingo a ni Richard, maysa kadagiti priest a manmano a dumar-ay, ket awan iti priesthood meeting. Pinanawak ti korum iti panangaywan ti mamagbaga ket bimmisitaak iti pagtaengan ni Richard. Kinuna ni nanangna nga agtartrabaho ni Richard iti talier a pagpatpatarimaanan ti lugan iti lugarda. Nagmanehoak a nagturong iti talier tapno sapulek ni Richard ket sinarakko ti amin nga aglawlaw ngem diak nasarakan isuna. Kellaat a naaddaanak iti pammaregta a kumita iti baba iti daanen a nagrasa a pagsalingdan a makita iti abay ti pasdek. Manipud iti kasipngetan makitak ti dua nga agrimrimat a mata. Nangngegko a kinuna ni Richard, “Nasarakannak, Bishop! Umuliak.” Bayat ti panagsinnarakmi ken ni Richard, imbagak kenkuana no kasano ti iliwmi kenkuana ken panagkasapulanmi kenkuana. Naalak ti panagkumitna a dumar-ay kadagiti mitingna. … [Idi agangay], kinuna ni Richard a ti panagbalbaliw iti biagna ket idi nasarakan isuna ti bishopna iti panaglemmengna iti nagrasa nga abut ket timmulong kenkuana nagsubli iti panagaktibo” (“Sugar Beets and the Worth of a Soul,” Ensign, Hulio 2009, 6–7).

Panagsursuro manipud iti sabali a napukaw.

Inaramid ni Jeffrey R. Holland daytoy a pammaliiw maipapan iti in-inauna a kabsat ti napukaw nga anak a lalaki:

“Saan a makagura unay daytoy nga anak a nagawiden ti kabsatna no di ketdi makagura gapu ta naragsak unay dagiti nagannak kenkuana iti daytoy. Iti pannakariknana a saan a nabigbig ti pategna ken nalabit a maasian iti bagina, daytoy managtulnog nga anak a lalaki—ket isu ket naipangpangruna ti kinamanagtulnogna—nalipatanna iti apagkanito a dina kaano man napadasan ti narugit wenno panagliday, buteng wenno maisuppiat iti bagi. Nalipatanna iti apagkanito a kukuanan ti amin a baka iti rantso kasta met ti amin a pagan-anay iti aparador ken ti amin a singsing iti pagidulinan. Nalipatanna iti apagkanito nga agtultuloy a magunggonaan ken kanayonto a magunggonaan ti kinapudnona.

“Saan, isu nga addaan iti dumani amin a banag, ken nagun-odna daytoy gapu iti kinagagetna, iti nasayaat a wagas, agkurang iti maysa a banag a mabalin a mamagbalin kenkuana a dumani naan-anay a tao ti Apo. Nasken a padur-asenna pay ti pannakipagrikna ken panangngaasi, ti kasapulan a pannirigan tapno makita a saan a panagkaribal ti panagsubli. Isu ti kabsatna. Bayat ti panagpakaasi ti amana kenkuana tapno kumita, isu ket maysa idin a natay, ken itan sibibiag. Isu ti maysa a napukaw ken itan nasarakan” (“The Other Prodigal,” Ensign, Mayo 2002, 63).

Panangpadur-as iti Panangisurotayo

Tulongam ti maysa a tao. Kas iti pastor iti pangngarig ti Mangisalakan (kitaen iti Lucas 15:4), “matulongam dagiti awan iti klasem. Dagiti gundawaymo a mangisuro ken mangpapigsa kadagiti miembro ti klase ken mangtulong kadakuada nga umasideg ken ni Cristo ket agtultuloy iti labes ti siled ti klase ken iti labes dagiti dumardar-ay kadagiti pormal nga adalenyo” (Panangisuro iti Wagas ti Mangisalakan, 8).