Ti Panagbalbaliw-Langa, ni Carl Heinrich Bloch

Abril 1–14

Mateo 16–17; Marcos 9; Lucas 9

“Sika ti Cristo”

Ania dagiti mensahe a nangngegan ken nabasayon manipud iti kaudian a sapasap a komperensia a mabalin a mangsuporta iti doktrina kadagitoy a kapitulo? Bayat ti panangadalmo, utobem ti kasapulan dagiti miembro ti klase ket isuratmo dagiti ania man nga impresion a maawatmo.

Isuratmo Dagiti Impresionmo

Yawis ti Panagbibinninglay

Maysa a wagas tapno maallukoymo dagiti miembro ti klase a personal nga agadal kadagiti nasantuan a kasuratan ken kaduada dagiti pamiliada ket awisem ida a mangibinglay iti tunggal lawas no kasano a pinaraburan ti biagda ti panagadalda kadagiti nasantuan a kasuratan. Kas pagarigan, kasano a naimpluensiaan ti panagadalda kadagitoy a kapitulo ti padasda iti sapasap a komperensia?

Isuro ti Doktrina

Mateo 16:13–17

Umay ti pammaneknek maipapan ken ni Jesucristo babaen ti paltiing.

• Adda kadi asino man kadagiti miembro ti klasem a nasken a mangilawlawag iti maysa a tao no kasano nga ammoda a pudno ti ebanghelio? Iti Mateo 16:13–17, ania ti insuro ti Mangisalakan maipapan ti no kasano nga awatentayo ti pammaneknek? Mabalinmo nga ibinglay maipapan ti no kasano a nagun-od ni Alma ti pammaneknekna (kitaen iti Alma 5:45–46) wenno no ania ti insuro ti Apo ken ni Oliver Cowdery maipapan iti paltiing (kitaen iti DkK 6:14–15, 22–23; 8:2–3). Ania iti panagkunayo a mabalin a kinuna ni Pedro wenno Alma wenno Oliver Cowdery no adda maysa nga agsaludsod kadakuada no kasano a naammuanda a pudno ti ebanghelio?

• Mabalin nga adda dagiti tao iti klasem a mangikarkararag iti personal a paltiing, ngem saanda nga ammo no kasano a mailasin daytoy no umay. Inusar ni Elder David A. Bednar ti dua a gagangay a padas iti lawag tapno mangisuro maipapan no kasano nga umawattatyo iti paltiing; mabalin a kayatmo nga ibinglay dagiti nalawag a pannakaammo ken pannakaawat kadagiti miembro ti klase (kitaen iti “The Spirit of Revelation,” Ensign wenno Liahona, Mayo 2011, 87–90; kitaen pay iti video “Patterns of Light: Spirit of Revelation” iti LDS.org). Ania dagiti dadduma pay a pannursuro iti nasantuan a kasuratan wenno pakaammuan a mapanunotyo a makatulong iti maysa a tao a mangilasin iti personal a paltiing? (Kas pagarigan, kitaen iti 1 Ar-ari 19:11–12; Taga Galacia 5:22–23; Enos 1:1–8; DkK 8:2–3.)

Mateo 16:13–19; 17:1–9

Kasapulan dagiti tulbek ti priesthood para iti pannakaisalakantayo.

• Tapno mairugi ti panaglilinnawag maipapan kadagiti tulbek ti priesthood, mabalinmo nga isurat dagiti saludsod kas iti sumaganad iti pisarra: Ania dagiti tulbek ti priesthood? Asino ti agiggem kadagiti tulbek? Kasano a maited dagiti tulbek ti priesthood? Mabalinmo met nga ibinglay ti sumagmamano a reperensia a makatulong a mangsungbat kadagitoy a saludsod, kas iti Mateo 16:19; Doktrina ken Katulagan 107:18–19; 128:8–11; 132:18–19, 59; ken Joseph Smith—Pakasaritaan 1:72. Masarakan dagiti miembro ti klase dagiti mainayon a tulong babaen ti panagibasarda iti Handbook 2: Administering the Church (2010), 2.1.1; Elder Neil L. Andersen’s message “Power in the Priesthood” (Ensign wenno Liahona, Nob. 2013, 92–95); wenno Napudno iti Pammati, 126–27. Mangilatangka iti oras a makapagsukisok dagiti miembro ti klase iti maysa a saludsod a pilida. Kalpasanna mabalinda nga isuro iti tunggal maysa no ania ti nasursuroda.

• Ti panaglilinnawag maipapan ken Pedro ken dagiti dadduma pay nga Apostol nga umaw-awat kadagiti tulbek ti priesthood iti Bantay ti Panagbalbaliw-langa ket makatulong kadagiti miembro ti klase a mangpapigsa kadagiti pammaneknekda maipapan iti pannakaisubli dagiti tulbek ti priesthood kadagiti ud-udina nga aldaw. Tapno maparegta ti kasta a panaglilinnawag, mabalinmo nga kiddawen iti kagudua ti klase a mangadal iti Mateo 17:1–9 (kitaen pay iti balabala iti daytoy a lawas iti Umayka, Surotennak—Para kadagiti Indibidual ken Pamilia) ken ti sabali pay a kagudua a mangadal iti Doktrina ken Katulagan 110. Kalpasanna mabalinda ti agbibinninglay iti tunggal maysa no ania ti nasursuroda ken isuratda dagiti pagpapadaan ti dua a pakaammuan. Makatulong pay ti video a “Priesthood Keys: The Restoration of Priesthood Keys” (LDS.org).

• Maawatan kadi dagiti miembro ti klasem no kasano a bendisionan dagiti tulbek ti priesthood ti biagda? Tapno matulongan ida, mabalinmo nga awisen ida a mangsukisok iti Handbook 2, 2.1.1, para iti listaan dagiti tao nga agiggem kadagiti tulbek. Asino dagitoy a tattao iti ward ken stakeyo? Nalabit a mabalinyo nga ilista dagiti naganda iti pisarra wenno awisem ti sumagmamano kadakuada nga agsarita iti klase. Kasano nga usarenda dagiti tulbek ti priesthood a naited kadakuada a mangiturong iti aramid ti priesthood iti uneg ti dagiti takemda? Kasano a mabendisionantayo babaen ti serbisio dagitoy a priesthood leader?

Dagiti tulbek ti priesthood ket ti turay a mangiturong iti pannakausar ti priesthood.

Marcos 9:14–30

No agsapsapultayo iti dakdakkel a pammati, nasken a patibkerentayo ti pammati nga addan kadatayo.

• Inusar ni Elder Jeffrey R. Holland ti pakaammo maipapan ti ama nga agkalkalikagum iti pannakapaimbag ti anakna tapno maisuro no kasano nga umasidegtayo iti Apo no mariknatayo a saan nga umdas ti pammatitayo (kitaen iti “Lord, I Believe,” Ensign wenno Liahona, Mayo 2013, 93–95). Mairaman iti tallo a kangrunaan a punto manipud iti bitlana iti “Dagiti Nainayon a Resources.” Nalabit a mabalinmo a bingayen ti klase iti uppat a grupo ket tudingam ti maysa a grupo a paglilinnawagan ti Marcos 9:14–30 ken ti tunggal maysa iti dadduma pay a grupo a paglilinnawagan ti maysa kadagiti tallo a pammaliiw ni Elder Holland. Mabalinda a sapulen dagiti mensahe iti daytoy a pakaammuan iti nasantuan a kasuratan a makatulong kadatayo a mangpapigsa iti pammatitayo. Mabalin nga ibingaly ti tunggal grupo ti sumagmamano a pannakaawatna a naggapu iti panaglilinnawagda.

Yallukoy ti Panagsursuro iti Pagtaengan

Tapno maallukoy dagiti miembro ti klase nga agadal iti pagtaengan iti daytoy a lawas, ibagam kadakuada a ti sumaruno a balabala iti Umaykayo, Sumurot Kaniak—Para kadagiti Indibidual ken Pamilia ket makatulong kadakuada ken ti pamiliada a maaddaan iti napnuan kaipapanan a Paskua iti Panagungar. Mainayon pay, mabalinmo nga isingasing a ti Domingo a Paskua ti Panagungar ket napintas a panawen tapno mangawisda kadagiti miembro a saan unay nga aktibo wenno gagayyem a sabali ti pammatina tapno umayda iti simbaan.

Dagiti Nainayon a Resources

Mateo 16–17; Marcos 9; Lucas 9

Umawat dagiti panguluen ti auxiliary iti naidutok a turay.

“Agipagna ti amin nga organisasion ti auxiliary iti ward ken stake babaen ti panangiturong ti bishop wenno stake president, nga agiggem kadagiti tulbek a mangidaulo. Saan nga umawat kadagiti tulbek dagiti presidente ti auxilliary ken dagiti mamagbagada. Awatenda dagiti naidutok a turay a mangitrabaho kadagiti takemda” (Handbook 2, 2.1.1).

Tallo a pammaliiw a makatulong kadatayo a mangun-od iti napigpigsa a pammati.

Kalpasan ti panangisalaysayna iti pakaammuan a masarakan iti Marcos 9:14–29, insuro ni Elder Jeffrey R. Holland:

“Umuna a pammaliiw maipanggep iti daytoy a pakaammuan ket no maipaspasango iti karit ti pammati, ipatalged nga umuna ti ama ti pigsana ket kalpasanna bigbigenna ti limitasionna. Awan duadua ken awan panagkedked ti umuna a panangibagana: ‘Apo, mamatiak.’ Masaok iti amin nga agtarigagay iti napigpigsa a pammati, laglagipem daytoy a tao! Kadagiti kanito ti panagbuteng wenno panagduadua wenno pannakariribuk, pagtalinaedenyo ti pammati a napadur-asyon, uray no adda pagpatinggaanna dayta a pammati. … Kumpet a naimbag iti no ania ti ammoyon ken agtalinaedkayo a natibker agingga nga umay ti nayon a pannakaammo agingga a dumteng ti nayon a pannakaammo. … Saan a nasken ti kadakkel ti pammatiyo wenno ti tukad ti pannakaammoyo—daytoy ti integridad nga inladawanyo maipapan ti pammati nga adda kadakayo ken ti kinapudno nga ammoyon.

“Ti maikadua a pammaliiw ket ti pagdumaan ti umuna. No dumteng dagiti problema ken adda dagiti saludsod, saanyo a rugian ti panagsapsapul iti pammati babaen ti panangisaoyo no kasano ti kadakkel ti awan kadakayo, a mangrugi iti ‘kinaawan pammatiyo.’… Diak idawdawat kadakayo nga agpampammarangkayo nga addaankayo iti pammati nga awan kadakayo. Idawatko kadakayo nga agbalinkayo a napudno iti pammati nga adda kadakayo. … Nasken koma a napudnokayo maipapan kadagiti saludsodyo; ti biag ket napno kadagitoy iti maysa a banag wenno sabali. Ngem no kayatyo ken ti pamiliayo ti maimbagan, saanyo nga ipalubos a dagita a duadua ti manglapped iti pammati iti panagaramidna iti milagrona. …

“Maudi a pammaliiw: No dumteng ti duadua wenno parikut, saanka nga agbuteng a dumawat iti tulong. No tarigagayantayo ti tulong a sipapakumbaba ken sipupudno kas iti inaramid daytoy nga ama, magun-odtayo daytoy. Dagiti ragup ti balikas iti nasantuan a kasuratan kas iti napasnek a tarigagay iti kaadda iti ‘pudno a panggep,’ a mangitultuloy nga addaan puso a napnuan tarigagay, nga awanan panaginkukuna ken awanan panangallilaw iti sango ti Dios’ [2 Nephi 31:13]. Paneknekak a kas sungbat iti dayta a kita ti madagdagullit a panagpakaasi, ipatulodto ti Dios ti tulong manipud iti agsumbangir a sikigan ti belo a mangpapigsa iti pammatitayo” (“Lord, I Believe,” Ensign wenno Liahona, Mayo 2013, 93–94).

Panangpadur-as iti Panangisurotayo

Agdamagka kadagiti saludsod a mangyawis iti pammaneknek. Ti panagdamag kadagiti saludsod a mangallukoy kadagiti miembro ti klase a mangiburay kadagiti pammaneknekda ket mabalin nga epektibo a wagas a mangawis iti Espiritu. Kas pagarigan, no paglilinnawagan ti Mateo 16:13–17, mabalinmo a saludsoden, “Ania ti nasursurom maipapan iti Mangisalakan a nangpapigsa iti pammaneknekmo maipapan Kenkuana a kas Mangisalakan?” (Kitaen iti Panangisuro iti Wagas ti Mangisalakan, 32.)