Pakanen Ida, ni Jorge Cocco

Marso 25–31.

Mateo 14–15; Marcos 6–7; Juan 5–6

“Dikayo Agbuteng”

Bayat ti panangisaganayo a mangisuro manipud iti Mateo 14–15; Marcos 6–7; ken Juan 5--6, sapulem dagiti mensahe nga adda pakainaiganna iti klasem. No aramidem daytoy, ibilangmo no kasano a mairaman dagiti miembro ti klase iti napnuan kaipapanan a padas kadagiti nasantuan a kasuratan.

Isuratmo Dagiti Impresionmo

Yawis ti Panagbibinninglay

Maysa a wagas a pangirugi iti panaglilinnawag kadagitoy a kapitulo ket ti panangawis iti sumagmamano a miembro ti klase a saggaysa a mangpilida iti maysa a kapitulo manipud iti panangbasa ken umay a nakasagana a mangibinglay iti mensahe manipud iti dayta a kapitulo a napnuan kaipapanan kadakuada. Bayat ti panangibinglayda, mabalin nga agdamag iti saludsod dagiti miembro ti klase wenno mangnayon kadagiti nalawag a pannakaammo ken pannakaawat [insights].

Isuro ti Doktrina

Juan 5:16–47

Ni Jesurcristo ti Ay-ayaten nga Anak ti Nailangitan nga Ama.

• Iti Juan 5, nangted ni Jesus iti sumagmamano a nalawag a pannakaammo ken pannakaawat maipapan iti Bagina, ti Amana, ken ti pakainaiganna iti Ama. Tapno matulongan dagiti klase a mangtakuat kadagitoy a nalawag a pannakaammo ken pannakaawat [insights], padasem a bingayen ida kadagiti grupo ken ikkan ida iti sumagmamano a minuto a mangilista iti adu a kinapudno agingga a masarakanda kadagiti bersikulo 16–47 maipapan ti kinatao ti Dios, ni Jesucristo, ken ti relasionda. Awisem dagiti grupo nga agsisinnublat nga agbasa kadagiti kinapudno manipud kadagiti listaanda agingga a naibinglayen ti tunggal kinapudno iti tunggal listaan. Kasano a matulongannatayo dagitoy a kinapudno a makaawat a nasaysayaat iti Nailangitan nga Amatayo ken ti Anakna? Kasano a masurottayo ti pagwadan ni Jesucristo iti panagtungpal iti Ama?

• Ti aktibidad iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia ket mangawis kadagiti agad-adal a tandaanan iti tunggal gundaway nga inusar ni Jesus ti balikas nga Ama iti Juan 5. Awisem ti sumagmamano a miembro ti klase a mangibinglay no ania ti nasursuroda bayat ti panangkumpletoda iti aktibidad. Ania dagiti nalawag a pannakaammo ken pannakaawat a magun-odda maipapan iti Nailangitan nga Ama ken ti Ay-ayatenna nga Anak? Ania ti isuro ti naisubli nga ebanghelio a makatulong kadatayo a nasaysayaat a makaawat no asino ti Amatayo ken no apay nga agdaydayawtayo Kenkuana? Masarakan ti sumagmamano a kapanunotan iti serrek ti Pangiwanwan iti Nasantuan a Kasuratan para iti “Dios” ken iti serrek a “Dios Ama” iti Napudno iti Pammati, 74–76. Kas paset daytoy a panaglilinnawag, mabalinyo a kantaen, denggen, wenno basaen ti “O My Father,” Hymns, no. 292, kas maysa a klase.

Mateo 14:16–21; Marcos 6:33–44; Juan 6:5–14

Mabalin a padakkelen ti Mangisalakan ti datontayo a mangipatungpal kadagiti panggepna.

• Ania ti makatulong kadagiti miembro ti klase a mangsapul iti personal a kaipapanan iti milagro ni Jesus a panangpakan ti lima a ribu? Mabalin a saludsodem no kasano a mangpatibker ti panagbasa maipapan ti milagro iti pammatida iti kabaelan ti Mangisalakan a personal a mangbendision kadakuada? Nariknada kadin a saan nga umdas dagiti pamuspusan wenno kabaelan a mangipatungpal iti maysa a panggep a tun-oyen wenno bilin manipud iti Dios? Nariknada kadin a pinadakkel wenno pinaadu ti Mangisalakan dagiti panagkagumaanda a tulongan ida a mangipatungpal iti maysa a banag a kasla imposible?

  

  Namilagruan a pinakan ni Jesus ti 5,000 a tattao ti lima a tinapay ken dua nga ikan.

• Ti video a “The Feeding of the 5,000” (LDS.org) ket mabalin a makatulong kadagiti miembro ti klase a mangutob iti milagro a nailadawan kadagitoy a binatog. Ania dagiti detalye a masarakantayo iti daytoy a pakaammo a mangpatibker iti pammatitayo iti Mangisalakan? Kadagiti ania a wagas a naespirituan a pakanennatayo ti Mangisalakan? Kaano a pinakan ken tinulongannatayo ni Jesucristo? Para iti maysa a pagarigan ti maysa a milagro iti aldawtayo a maipada iti milagro iti tinapay ken ikan, kitaen iti video a “Pure and Simple Faith” (LDS.org) wenno Paul VanDenBerghe, “Power in Prayer,” New Era, Hulio 2012, 34–36.

Mateo 14:22–33

Awisennatayo ni Jesucristo a mangiwaksi kadagiti buteng ken panagduaduatayo tapno ad-adda a naan-anay a makaasidegtayo Kenkuana.

• Ti pakaammuan iti Mateo 14:22–33 ket makatulong kadagiti miembro ti klase a mangpapigsa iti pammatida iti Mangisalakan ken ti tarigagayda a mangsurot Kenkuana. Mangawis kadagiti miembro ti klase a mangbasa iti daytoy a pakaammuan, a nangnangrua a mangiturong iti atension kadagiti balikas nga insao ni Cristo, ni Pedro, ken ti dadduma pay nga Apostol. Kasano a nakatulong dagiti balikas ni Jesus ken ni Pedro a maaddaan iti pammati a panawanna ti bilog ket magna iti rabaw ti danum? Kasano a mayaplikar kadatayo dagiti patigmaan ni Jesus nga “agtalgedkayo” ken “dikay agbuteng” (bersikulo 27) ita nga agdama? Ania ti masursurotayo manipud ken ni Pedro maipapan ti kaipapanan ti panagbalin a disipulo ni Cristo ken panagtalek Kenkuana?

• Naglaon ti Mateo 14:22–33 kadagiti balikas ken ragup dagiti balikas a mabalin a mangparegta kadagiti miembro ti klase a mangaramat iti dakdakkel a pammati iti Mangisalakan. Kiddawem kadakuada nga agsukisok kadagiti makaparegta a balikas ken ragup dagiti balikas, ket isurat dagitoy iti pisarra, ket paglilinnawagan no ania ti insuratda. Mabalin kadi a makainaig dagiti miembro ti klase iti padas ni Pedro? Mabalinmo nga allukoyen ida a mangpanunot ken mangibinglay kadagiti padas a, kas ken Pedro, nakatignayanda a mangsurot iti Mangisalakan, uray no mapagduaduaan ti ibungana. Ania ti masursuroda manipud iti padas? Kasano nga immarayat ni Jesucristo kadagiti kanito a nagbuteng wenno nagduaduada?

Jiuan 6:22–71

Kas disipulo ni Cristo, nasken a natallugodtayo a mamati ken umawat iti kinapudno no narigat nga aramiden daytoy.

• Dagiti pasamak iti Juan 6 ket mangted iti makatulong a pannirigan no agduadua ti tao iti doktrina, pakasaritaan, wenno dagiti pagannurotan ti Simbaan ni Cristo. Iti daytoy a kapitulo, sumagmamano kadagiti pasurot ni Jesus ti nagkedked nga umawat kadagiti pannursurona nga Isu ti Sibibiag a Tinapay ken maisalakanda laeng babaen ti sakripisio ti lasag ken dara. Tapno makatulong kadagiti miembro ti klasem a mangyaplikar iti daytoy a pakaammuan iti biagda, mabalinmo nga isurat iti pisarra dagiti saludsod kas iti sumaganad ket kiddawem kadagiti miembro ti klase a mangsapul kadagiti sungbat kadagiti bersikulo 22–71: Ania ti namnamaen dagiti tao? (kitaen iti bersikulo 26). Ania ti indaton ketdi ni Cristo? (kitaen iti bersikulo 51). Ania ti saan a naawatan dagiti tao? (kitaen kadagiti bersikulo 41–42, 52). Ania dagiti sumagmamano a wagas a mabalintayo a pilien tapno makipagnatayo ken Cristo uray no addaantayo kadagiti saludsod? Awisem ida a mangutob iti saludsod ti Mangisalakan ken sungbat ni Pedro kadagiti bersikulo 67–69. Ania dagiti sumagmamano a doktrina, ordinansa, wenno dadduma pay a “balikas ti agnanayon a biag” a masarakan laeng iti naisubli a Simbaan ni Cristo? Awisem dagiti miembro ti klase a mangibinglay no kasano a nabendisionan ida ken dagiti pamiliada babaen kadagitoy a doktrina ken ordinansa. Para kadagiti nalawag a pannakaammo ken pannakaawat manipud iti maysa nga Apostol iti kabaruanan nga aldaw, awisem ti maysa a miembro ti klase a mangbasa iti palawag ni Elder M. Russell Ballarda iti “Dagiti Nainayon a Resources.”

Yallukoy ti Panagsursuro iti Pagtaengan

Mabalin a marikna a naparegta dagiti miembro ti klase a mangbasa kadagiti binatog para iti klase iti sumaruno a lawas ti klase no ilawlawagmo a dagiti pasamak a nabasada ket mangpabaknang iti padasda iti panagdengngeg iti sapasap a komperensia. Allukoyem ida nga umay iti sumaruno a klase a nakasagana a mangibinglay kadagiti nalawag a pannakaammo ken pannakaawatda.

Dagiti Nainayon a Resources

Mateo 14–15; Marcos 6–7; Juan 5–6

“Dakayo pumanawkayo met aya?”

Kalpasan ti panangadawna iti Juan 6:68–69, insuro ni Elder M. Russell Ballard:

“Para iti dadduma, agtultuloy a narigat ti awis ni Cristo a mamati ken agtalinaed—wenno narigat nga awaten. Marigatan ti sumagmamano a disipulo a makaawat iti nalawag a pagannurotan wenno pannursuro iti Simbaan. Adda dagiti pakaseknan dagiti dadduma iti pakasaritaantayo wenno kadagiti pagkurangan ti sumagmamano a miembro ken leader, iti napalabas ken iti agdama. Marigatan pay laeng dagiti dadduma nga agbiag iti relihionda nga agkiddaw iti adu unay a kasapulan. Kamaudiananna, adda dagiti ‘nabannog nga agaramid iti nasayaat’ [DkK 64:33]. Para kadagitoy ken dadduma pay a gapu, sumagmamano a miembro ti Simbaan ti agduadua iti pammatida, a masmasdaaw no nalabit a nasken a surotenda dagiti ‘nagsubli ken saannen a nakipagna’ ken ni Jesus.

“No asino man kadakayo ti kumapkapuyen iti pammatiyo, saludsodek kadakayo ti isu met la a saludsod a dinamag ni Pedro: ‘Asinonto ti papanan[yo]’ …

“… Sakbay nga aramidenyo ti napeggad a pili a pumanaw iti adda pakainaiganna iti kinaespirituan, allukoyenkayo nga isardeng ken panunotenyo a nasayaat sakbay ti isusuko iti ania man a nangisangbay kadakayo iti pammaneknekyo maipapan iti naisubli nga ebanghelio ni Jesucristo iti umuna a gundaway. Agsardeng ket panunotenyo no ania ti nariknayo ditoy ken apay a nariknayo daytoy. Panunotenyo maipapan kadagiti panawen a nagpaneknek kadakayo ti Espiritu Santo maipapan ti agnanayon a kinapudno” (“To Whom Shall We Go?” Ensign wenno Liahona, Nob. 2016, 90–91).

Panangpadur-as iti Panangisurotayo

Dumngeg. “Maysa nga aramid ti ayat ti panagdengngeg. … Dawatem iti Nailangitan nga Ama a tulongannaka tapno maawatam no ania ti masao dagiti miembro ti klasem. Kabayatan ti panagikasom a nasayaat kadagiti nayebkas ken saan a nayebkas a mensaheda, ad-adda a maawatamto dagiti kasapulanda, pakaseknanda, ken tarigagayda.” (Panangisuro iti Wagas ti Mangisalakan, 34).