Ni Jesus a Mangisursuro kadagiti Tao iti Igid ti Baybay, ni James Tissot

Pebrero 25–Marso 3

Mateo 6–7

“Insurona Ida kas Maysa nga Addaan iti Turay”

Bayat ti panagsaganam a mangisuro, rugiam babaen ti panangisaganam iti bagim. Adalem ti Mateo 6–7, ken isuratmo dagiti naespirituan nga impresionmo. Daytoy ti mangtulongto kenka nga umawat iti paltiing maipapan ti no kasano a kasayaatan a maipaay dagiti kasapulan ti klasem. Kalpasanna sukisoken daytoy a balabala para kadagiti kapanunotan iti panangisuro.

Isuratmo Dagiti Impresionmo

Yawis ti Panagbibinninglay

Mangawis kadagiti miembro ti klase a mangibinglay no ania kadagiti binatog iti Kaskasaba Iti Bantay ti mariknada a kasapulan unay ita nga agdama. Allukoyem dagiti miembro ti klase a mangnayon iti nalawag a pannakaammo men pannakaawat iti tunggal maysa.

Isuro ti Doktrina

Mateo 6–7

No dumngeg ken agtignaytayo babaen dagiti pannursuro ti Apo, mabangonto ti biagtayo iti maysa a natibker a pundasion.

• Ania dagiti nalawag a pannursuro manipud iti Mateo 6–7 ti agbalinto a kangrunaan a pagimbagan kadagiti sursuruanyo? Ibilangmo nga isurat iti pisarra ti sumagmamano a reperensia manipud iti Mateo 6–7 a naglaon kadagitoy a pannursuro. Mabalin dagiti miembro ti klase ti pumili iti maysa kadagiti reperensia nga adalenda a siuulimek ket kalpasanna isuratda iti pisarra dagiti ania man a naespirituan a kinapudno a masursuroda. Kasano nga inaringan dagitoy a pannursuro ti biagtayo?

• Inggibus ti Mangisalakan ti kaskasabana iti maysa a pangngarig a mabalin a makatulong iti klasem a makaawat a nasaysayaat iti kinapateg ti panagbiag babaen dagiti pannursuro ti Mangisalakan (kitaen iti Mateo 7:24–27; kitaen met iti Helaman 5:12). Tapno mailadawan iti panunot daytoy a pangngarig, mabalin nga agtitinnulong dagiti miembro ti klase a sangkamaysada a mangbukel iti napigsa a pundasion nga usarenda dagiti bloke, tasa, wenno dadduma pay a material ket kalpasanna subokenda ti pigsa dagiti pundasionda. Nalabit a mabalinda pay a markaan dagiti material a pangbukelda kadagiti banag a maaramidda a mangyaplikar kadagiti pannursuro ti Mangisalakan. Kasano a makatulong ti panagaramid kadagitoy a banag a mangsarked kadagiti bagyo ti biag?

Mateo 6:5–13

Sinuruannatayo ti Mangisalakan no kasano ti agkararag.

• Ti panagadal iti kararag ti Apo ti mabalin a makatulong kadagiti miembro ti klase a mangilasin no kasano a lumaingda iti bukodda a kararag babaen ti panangsurot iti pagwadan ti Apo. Mabalinmo nga awisen ida a mangisurat iti ragup ti balikas iti pisarra manipud iti Mateo 6:9–13 (wenno Lucas 11:1–4) a makitada. Bayat ti panangutobtayo kadagiti balikas ti Mangisalakan, ania ti masursurotayo maipapan kadagiti galad a nasken nga adda kadatayo bayat ti panagkararagtayo? Ania ti masursurotayo maipapan kadagiti kita ti bambanag a nasken nga ikararagantayo? Mabalin a makaisuro kadagiti miembro ti klase a baliwan ti sasao dagiti sumagmamano a sasao ti Mangisalakan a kas dagiti banag a mabalin nga isaoda iti bukodda a kararag. Kas pagarigan, “Itedmo kadakami ita ti taraonmi iti inaldaw” ket mabalin a baliwan ti sasao a kas iti “Tulongannak koma iti panangikarigatak a mangipaay iti kasapulan ti pamiliak.”

• Mabalin a mairanud dagiti sursuruam manipud iti panagadalda iti dadduma pay a pagarigan ti Mangisalakan nga agkarkararag iti Amana, a kas iti Mateo 26:36–42 ken Juan 17. Mabalinmo nga awisen dagiti miembro ti klase a mangadal iti sumagmamano kadagitoy a binatog, a mangsukisok kadagiti sungbat dagiti saludsod kas “Ania ti masursurotayo maipapan iti kararag manipud iti wagas a panagkararag ti Mangisalakan?” ken “Kasano a mapagbalintayo dagiti kararagtayo nga ad-adda pay a kas iti kararag ti Mangisalakan?” Para iti dadduma pay a pagarigan iti kararag, kitaen iti Enos 1:3–17; Alma 31:26–35; 33:3–11.

• Adda kadi dagiti pasasmo a mabalinmo nga ibinglay a mainaig iti kararag? Ti panangibinglay kadagiti padasmo ti makaallukoy kadagiti miembro ti klase a mangaramid met iti kastoy. Imbinglay ni Presidente Thomas S. Monson ti sumagmamano a bukod a padas a mainaig iti kararag iti mensahena a “Consider the Blessings” (Ensign wenno Liahona, Nob. 2012, 86–89). Mabalinmo nga ilawlawag dagiti pagbatayan manipud iti daytoy a mensahe ken manipud kadagiti adaw iti “Dagiti Nainayon a Resources.” Mabalin pay a makatulong ti serrek a “Kararag” iti Pangiwanwan iti Nasantuan a Kasuratan.

Mateo 7:7–11

Sungbatan ti Nailangitan nga Ama dagiti kararagtayo.

• Tapno makatulong kadagiti miembro ti klase a magpapigsa ti pammatida a denggen ken sungbatan ti Dios dagiti kararagda, mabalinmo nga isurat ti agdawatkayo, agsapulkayo, ken umawagkayo iti pisarra. Kalpasanna awisem dagiti miembro ti klase nga agsukisok kadagiti nasantuan a kasuratan kadagiti pagarigan dagiti tao a “nagdawat,” “nagsapul,” ken “immawag” (kas pagarigan, kitaen iti 1 Nephi 11:1; Ether 2:18–3:6; Joseph Smith—Pakasaritaan 1:11–17). Ania ti masursurotayo manipud kadagitoy a pagarigan maipapan iti pananggun-d iti sungbat dagiti kararagtayo?

• Masarakan ti sumagmamano a napapateg a konteksto para iti Mateo 7:7–11 iti Patarus ni Joseph Smith iti Mateo 7:12–17 (iti Pangiwanwan iti Nasantuan a Kasuratan). Kadagitoy a bersikulo, nimannama dagiti disipulo ni Jesus ti sumagmamano a rason a mabalin nga ited dagiti tao iti saanda a panagsapul iti kinapudno manipud iti Nailangitan nga Ama. Mabalinmo a kiddawen kadagiti miembro ti klase nga iladawanda iti panunotda nga adda maysa a gayyemda nga agkedked nga agsapul iti pannarabay wenno bendision manipud iti Apo. Ania ti mabalin nga isao dagiti miembro ti klase a mangallukoy iti daytoy a gayyem? Kasano a mausarda dagiti balikas ti Mangisalakan iti Mateo 7:7–11?

Mateo 7:15–20

Mailasintayo dagiti pudno ken palso a propeta babaen dagiti bungada.

• Mabalin a kasla naipasangon dagiti miembro ti klasem kadagiti palso a pilosopia ken dadduma pay a panangallilaw ti kabusor, iti man internet wenno manipud iti dadduma pay a pagtaudan. Mabalin pay a nangngegandan dagiti dadduma nga agdillaw kadagiti katulongan ti Apo. Kasano a matulongam a maawatanda no kasano ti mangilasin kadagiti palso a propeta ken pannursuro manipud kadagiti pudno a propeta ken pannursuro? Mabalinmo nga iparang ti sumagmamano a pedaso ti bunga ket saludsodem no ania ti mabalin nga ipagaruptayo maipapan kadagiti kayo a naggapuanda. Kasano a matulongannatayo daytoy nga ehersisio tapno maawatantayo ti Mateo 7:15–20? Mabalin pay nga aggigiddankayo a mangbasa iti sumagmamano kallabes a mensahe manipud kadagiti sibibiag a propeta. Ania a “bungbunga” wenno dagiti pagbanaganna ti panangsurot iti balakadda?

  

  Maammuantayo dagiti pudno a propeta babaen dagiti bungada.

• Ti Mateo 7:15–20 ket makatulong a mangpatibker iti pammati dagiti miembro ti klase iti nadiosan a mision ni Propeta Joseph Smith. Ania dagiti bunga ti aramid nga impatungpal ni Joseph Smith? Para iti sumagmamano a kapanunotan, kitaen iti mensahe ni Elder Neil L. Andersen “Joseph Smith” (Ensign wenno Liahona, Nob. 2014, 28–31). Kasano a mausartayo ti analohina ti Mangisalakan iti Mateo 7:15–20 tapno mangibinglay iti pammaneknek kadagiti gagayyem ken pamiliatayo maipapan ken ni Propeta Joseph Smith?

Yallukoy ti Panagsursuro iti Pagtaengan

Daytoy a lawas, bayat ti panagadal dagiti miembro ti klase ti adu kadagiti milagro nga inaramid ti Mangisalakan, awisem ida a mangutob kadagiti pagarigan dagiti milagro iti kabaruanan nga aldaw—dakkel man wenno bassit—a napadasanda wenno nangngeganda.

Dagiti Nainayon a Resources

Mateo 6–7

Dagiti kanta nga usaren iti siled a pagklasean.

• Ania dagiti prinsipio a mainaig iti kararag a masursuro dagiti miembro ti klase manipud iti balikas ti kanta a “Prayer Is the Soul’s Sincere Desire”? (Hymns, no. 145).

• Ti panangbasa, panangkanta, wenno panangdengngeg iti “Praise to the Man,” Hymns, no. 27, ket makatulong kadagiti miembro ti klase a mangpanunot iti sumagmamano kadagiti bunga a pakaammuantayo a ni Joseph Smith ti propeta ti Dios (kitaen met iti DkK 135: 3; “Joseph Smith” Gospel Topics, topics.lds.org).

Dagiti estoria maipapan iti kararag.

Imbaga ni Presidente Boyd K. Packer maipapan iti sangapamiliaan a panagkararag ti pamiliana sakbay a pimmanaw isuna iti maysa a panagbiahe iti California. Imbaga ti beterinario kadakuada a saanto nga agbiag ti bakada iti agmalem. “Insao ti bassit nga anakmi a lalaki ti kararagmi. Kalpasan nga indawatna iti Nailangitan ana Ama a ‘bendisionanna ti Tatang kadagiti biahena ken bendisionannakami amin’, inrugina kalpasanna ti napasnek a pakaasi. Kinunana, “Nailangitan nga Ama, bendisionam koma ni Bossy a baka tapno malainganen.’”

“Iti California, imbagak maipapan iti pasamak ket kinunak, ‘Nasken a maammuanna a saan a nalaka a masungbatan ti amin nga inkararaganmi.’

“Adda maysa nga adalen a masursuro, ngem siak ti nakasursuro iti daytoy, saan a ti anakko a lalaki. Idi nagsubliak iti rabii ti Domingo, ‘nalaingen ni Bossy’” (“Prayer and Promptings,” Ensign wenno Liahona, Nob. 2009, 45).

Kinuna ni Brother Mangal Dan Dipty, maysa a miembro ti Simbaan manipud iti India: “Idi ubingak masansan a dimmar-ayak iti German Lutheran church. Mapankami no kua kadagiti bantay tapno masansan nga agkararag a sangkamaysa. Maysa nga aldaw ti panagtutudo, nabasa ti amin a sangagrupo dagiti agkararag ken maysa kadagiti mangaskasaba ti nangidaton iti napasnek a kararag a nagpakaasi iti Apo a pagsardengenna ti tudo. Iti siddaawmi nagsardeng ti tudo. Dayta ti nangrugian ti pammatik iti Dios ken iti kararag” (“My Journey as a Pioneer from India,” Ensign, Hulio 2016, 67).

Para iti dadduma pay nga estoria maipapan iti kararag, kitaen iti Latter-day Saint Voices section ti Ensign wenno Liahona.

Panangpadur-as iti Panangisurotayo

Saan nga agbuteng iti panagulimek. “Agkasapulan iti oras dagiti napipintas a saludsod tapno masungbatan. Agkasapulan dagitoy iti panagutob, panagsukisok, ken inspirasion. Ti oras a bubosem iti panagur-uray kadagiti sungbat iti maysa a saludsod ket mabalin a maysa a sagrado nga oras ti panagutob. Liklikam ti sulisog a mangigibus iti daytoy nga oras a nasapa unay babaen ti panangsungbatmo iti bukodmo a saludsod wenno ipapanmo iti sabali pay a topiko” (Panangisuro iti Wagas ti Mangisalakan, 31).