“Marso 4–10. Mateo 8–9; Marcos 2–5: ‘Pinaimbagnaka ti Pammatim’” Umaykayo, Sumurot Kaniak—Para iti Sunday School: Baro a Tulag 2019 (2019)
“Marso 4–10. Mateo 8–9; Marcos 2–5,” Umaykayo, Sumurot Kaniak—Para iti Sunday School: 2019
Pannakapaimbag kadagiti Payakna, ni Jon McNaughton
Marso 4–10
Mateo 8–9; Marcos 2–5
“Pinaimbagnaka ti Pammatim”
Mangrugi ti panagsaganam a mangisuro bayat ti nainkararagan a panagadalmo iti Mateo 8–9 ken Marcos 2–5. Ti Umaykayo, Sumurot Kaniak—Para kadagiti Indibidual ken Pamilia ti mangpadur-as iti panagadalmo ken mangiparikna kadagiti kapanunotan iti panangisuro kas nayon kadagiti naidatag ditoy.
Isuratmo Dagiti Impresionmo
Yawis ti Panagbibinninglay
Mabalinmo ti mangitugot iti sumagmamano a ladawan wenno banag a mangiladawan kadagiti pasamak manipud iti Mateo 8–9 ken Marcos 2–5 (kitaen iti Libro ti Arte ti Ebanghelio, num. 40, 41, wenno LDS.org) wenno ilistam dagitoy a pasamak iti iti pisarra. Paibinglay kadagiti miembro no ania ti ammoda maipapan iti tunggal milagro. Ania dagiti mensahe a masarakanda kadagitoy a milagro?
Isuro ti Doktrina
Mapasamak dagiti milagro a mayannurot iti pagayatan ti Dios ken iti pammatitayo ken ni Jesucristo.
-
Mabalin a nasarakan dagiti miembro ti klasem dagiti nabileg a pannakaammo ken pannakaawat [insights] bayat ti bukodda a panagadal kadagiti milagro kadagitoy a kapitulo (kitaen iti listaan dagiti panangagas iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia). Ibilang ti panangawis kadagiti miembro ti klase tapno mangibinglay kadagiti nalawag a pannakaammo ken pannakaawatda [insights] iti maysa a kapareha wenno iti sibubukel a klase.
-
Tapno matulongan dagiti miembro ti klase a makaawat iti pagnaigan ti pammati ken dagiti milagro, mabalinyo a basaen dagiti sumagmamano a namilagruan a panagagas manipud iti Mateo 8–9 ken Marcos 2; 5, a mangsapsapul iti pammati ti tao a naagasan wenno pammati dagiti dadduma. (No awananka iti oras a mangilawlawag iti amin kadagiti milagro, saludsodem kadagiti miembro ti klase no ania kadagitoy ti kapatgan kadakuada.) Sumagmamano kadagitoy a nasantuan a kasuratan ti mabalin a mangpapintas iti panaglilinnawagyo: Mormon 9:15–21; Ether 12:12–16; Moroni 7:27–37; ken Doktrina ken Katulagan 35:8. Ania ti isuro dagiti panagagas ti Mangisalakan ken dagiti nasantuan a kasuratan maipapan iti pammati ken dagiti milagro? Kitaen met iti Pangiwanwan iti Nasantuan a Kasuratan, “Dagiti Milagro.”
-
Mabalin nga adda dagiti tao iti klasem nga addaan iti pammati ken agsapsapul iti maysa a milagro, ngem saan a napasamak ti milagro iti wagas a tarigagayanda. Ania ti isuro dagiti nasantuan a kasuratan ken dagiti leadertayo iti Simbaan a maipapan iti daytoy? Iti maysa nga artikulo a napauluan iti “Accepting the Lord’s Will and Timing,” imbaga ni Elder David A. Bednar maipapan ti no kasano a binalakadanna ti agassawa iti daytoy a kasasaad (Ensign, Ago. 2016, 31–35; kitaen met iti 2 Taga Corinto 12:7–10; DkK 42:43–52). Nakita kadi dagiti miembro ti klase dagiti bendision a sumangbay iti biagda, wenno iti biag dagiti dadduma no saan a napasamak dagiti tinarigagayan a milagro?
-
No agbasbasa maipapan dagiti milagro iti Mateo 8–9 ken Marcos 2; 5, mabalin a masdaaw ti sumagmamano a tao no posible dagita a banag ita. Inladawan ni Moroni ti aldawtayo a kas maysa a panawen a “maibaganto a napukawen dagiti milagro,” ngem inkarina pay a ti Dios laeng ti Dios dagiti milagro, ta ti Dios ket “saan a mabalbaliwan a Nabiag” (Mormon 8:26; 9:18–21; kitaen met iti Moroni 7:27–29). Kasano a matulongam dagiti miembro ti klase a mangpapigsa iti pammatida iti bileg ti Dios a mangbendision iti biagda? Mabalinmo a kiddawen kadakuada a mangibinglay kadagiti pagarigan dagiti milagro a nasaksianda. Mabalin pay nga ibilangmo ti panangibinglay iti pakaammuan dagiti milagro manipud iti pakasaritaan ti Simbaan (kitaen iti “Dagiti Nainayon a Resources).
Agtalek iti Apo, ni Liz Lemon Swindle
Addaan iti bileg ni Jesucristo a mangisangbay iti kappia iti baet dagiti bagyo ti biag.
-
Mabalin nga ammom ti sumagmamano a karit a pakaipaspasanguan dagiti miembro ti klasem. Gapu ta addaantayo amin iti pannubok iti sumagmamano a panawen iti panagbiagtayo, ti panangsubli a panangadal iti pakaammuan iti Marcos 4:35–41 ket mangpatibker iti pammati dagiti miembro ti klase a makaisangbay ti Mangisalakan iti talna kadakuada. Ikkam ti tunggal tao iti piraso ti papel, ket kiddawem kadakuada a mangisurat iti maysa a bangir ti maysa a pannubok a napadasanda. Iti sabali a bangir, kiddawem kadakuada a mangisurat iti maysa a banag manipud iti Marcos 4:35–41 a mangparegta kadakuada nga umasideg iti Mangisalakan kabayatan dagiti pannubokda. Allukoyem dagiti miembro ti klase nga ibinglayda no ania ti insuratda, no mariknada a komportableda nga aramiden daytoy.
-
Ti himno a “Master, the Tempest Is Raging,” Hymns, no. 105, ket naibasar iti estoria iti Mateo 8:23–27 ken Marcos 4:35–41. Nalabit a mabalin a saraken dagiti miembro ti klase dagiti liriko iti himno a mainaig iti ragup dagiti balikas kadagiti nasantuan a kasuratan. Mabalinmo pay ti mangipakita iti maysa a ladawan a mangiparang iti buya (kitaen iti Libro ti Arte ti Ebanghelio, no. ) ken paglilinnawagan no ania a kanito ti panangiladawan ti pintor. Ania dagiti dadduma pay a wagas a mabalinyo a maitulong kadagiti miembro ti klase tapno maawatan ti kaipapanan ken ti bileg daytoy a milagro?
Ti panangispal kadagitay napukawen ket agkasapulan iti nakaykaysa a panagkagumaantayo.
-
Isuro ti pakaammuan maipapan daytoy a milagro ti pateg ti panangkaykaysa iti panagtrabaho a mangtulong iti Mangisalakan iti panangispal kadagiti addaan iti naespirituan wenno pisikal a panagkasapulan. Ti mensahe ni Elder Chi Hong (Sam) Wong “Rescue in Unity” (Ensign wenno Liahona, Nob. 2014, 14–16) ket mabalin a mangnayon iti panaglilinnawag maipapan daytoy a kinapudno. Ibilangyo ti panangawis iti maysa a miembro ti klase nga umay a nakasagana tapno mangrebyu kadagiti pakaammuan manipud kadagiti nasantuan a kasuratan ket kalpasanna ibiglayna no ania ti insuro ni Elder Wong. Ania ti masursurotayo manipud iti Marcos 2:1–12 maipapan iti pateg ti panagtrabaho a sangkamaysa a mangispal kadagiti agkasapulan? (Kitaen met iti Marcos 3:24–25).
Yallukoy ti Panagsursuro iti Pagtaengan
Allukoyem dagiti miembro ti klase a mangbasa iti Mateo 10–12; Marcos 2; ken Lucas 7; 11 kabayatan ti umay a lawas, ibagam kadakuada a masarakandanto kadagitoy a kapitulo dagiti sumagmamano a balakad a makatulong kadakuada a mangipatungpal kadagiti takemda [calling] ken pagrebbenganda iti Simbaan.
Dagiti Nainayon a Resources
Inagasan ni Propeta Joseph Smith dagiti masaksakit.
Idi Hulio 1839, dakkel a bilang dagiti Santo a napapanaw manipud iti Missouri ti nagindeg kadagiti karison, kadagiti tolda, ken iti daga iti asideg ti Commerce, Illinois. Adu dagiti masaksakit unay, ket nabannogen da Joseph ken Emma Smith a tumultulong kadakuada. Inladawan ni Wilford Woodruff no ania ti napasamak idi Hulio 22: “Daytoy ti maysa nga aldaw ti bileg ti Dios. Adu dagiti masaksakit kadagiti Santo iti agsumbangir ti Karayan [Mississippi], ket napan ni Joseph iti tengngada, ket iniggamananna ida ket iti napigsa a timek binilinna ida iti nagan ni Jesucristo a bumangon manipud iti pagiddaanda ket malainganda, ket bimmabada iti pagiddaanda ket nalainganda babaen ti bileg ti Dios. … Daytoy ti pudno a panawen ti panagrag-o” (Wilford Woodruff, Journal, Hulio 22, 1839, Church History Library).
Pinagtalna ni Elder Franklin D. Richards ti maysa a bagyo.
Insalaysay ni Elder LeGrand Richards, maysa a miembro ti Korum dagiti Sangapulo-ket-dua nga Apostol, ti maysa a padas iti biag ti lelongna, ni Elder Franklin D. Richards, nga idi 1848 isu ti leader ti maysa a grupo dagiti Santo iti British a bumalballasiw iti Atlantic Ocean iti Estados Unidos: “Naisagmak iti nakaro ti bilog a nagluganan ni [Elder Richards] [manipud narungsot a bagyo], isu nga immasideg ti kapitan ti bilog kenkuana ket nagpakaasi kenkuana nga agkararag iti Apo para iti bilog ken kadagiti pasahero; ket ni Lelong, iti pananglagip a naikarian isuna a nasken nga adda bilegna kadagiti elemento, napan iti rabaw ti bilog ket intag-ayna dagiti imana a nakaturong iti nangato a langit ket binabalawna ti baybay, ken dagiti dalluyon, ket dagus a naglinakda” (iti Conference Report Abr. 1941, 84).
Panangpadur-as iti Panangisurotayo
Masansan a mangtedka iti pammaneknek. Ti simple, naimpusuan a pammaneknekmo maipapan dagiti naespirituan a kinapudno ket nabileg a makaimpluensia kadagiti sursuruam. Saan a nasken a nalaing wenno atiddog ti pammaneknekmo. Kas pagarigan, mabalin a simple a pammaneknek daytoy maipapan ti milagro ti kaadda ti ebanghelio iti biagmo.