Marso 18–24

Mateo 13; Lucas 8; 13

“Ti Adda Lapayagna a Dumngeg, Dumngeg Koma”

Bayat ti panangbasam, panunotem dagiti saludsod a mabalin nga adda kadagiti miembro ti klasem bayat ti panangpadasda nga umawat kadagiti mensahe dagiti pangngarig. Ania koma ti narigat a maawatan? Kasano a maisagananaka ti panagadalmo a mangsungbat kadagiti saludsodda?

Isuratmo Dagiti Impresionmo

Yawis ti Panagbibinninglay

Sublien nga adalen a kadua ti klase ti “Dagiti Kapanunotan tapno Mapadur-as ti Bukodmo a Panagadal iti Nasantuan a Kasuratan” iti Umaykayo, Sumurot Kaniak—Para kadagiti Indibidual ken Pamilia. Awisem dagiti miembro ti klase a mangibinglay kadagiti pamay-an nga inusarda iti panagadal iti Mateo 13 ken Lucas 8; 13.

Isuro ti Doktrina

Mateo 13:1–23

Nasken a maisagana ti puspusotayo a mangawat iti balikas ti Dios.

• Tapno matulongan dagiti sursuruam a mangiladawan iti panunotda dagiti mensahe ti pangngarig ti agmulmula, mabalinmo ti mangitugot iti klase ti sumagmamano a bukbukel, sangagarapon a daga, sangagarapon a babassit a bato. Kiddawem iti maysa a miembro ti klase a mangimula iti maysa a bukel iti daga ket mangimula iti maysa kadagiti bato. Ania a a bukel ti dumakkelto a nasaysayaat, ken apay? Kasano a mainaig daytoy nga banag a pakasursuruan iti pangngarig iti Mateo 13:1–23? Kasano a maisagantayo ti puspusotayo nga umawat iti balikas ti Dios?

• Kasano a mausaryo ti pangngarig ti agmulmula a mangparegta kadagiti miembro ti klase a mangisagana iti puspusoda nga umawat iti balikas ti Dios? Mabalinyo nga isurat ti Dagiti disipulo ken Dadduma iti pisarra. Awisem dagiti miembro ti klase a mangbasa iti Mateo 13:10–17 ket saraken no kasano nga inladawan ti Mangisalakan dagiti paggidiatan dagiti disipulona ken dagiti dadduma pay a nakangngeg kadagiti pangngarigna. Kalpasanna kiddawem kadagiti miembro ti klase a mangsukisok kadagiti bersikulo 18–23, a mangsapsapul no ania ti mabalin a makaigapu iti lapayag nga agbalin a “narigat a makangngeg” wenno mangpakidem kadagiti matatayo kadagiti naespirituan a banag. Ania a pangiturong ti aw-awatentayo iti aldawtayo manipud iti Dios ken dagiti katulonganna? Kadagiti ania a wagas a patpatanorentayo ti “nasayaat a daga”? (bersikulo 23).

• Mabalinmo nga awisen ti sumagmamano a miembro ti klase nga umay a saggaysa a nakasagana a mangisuro iti maysa a benneg manipud iti mensahe ni Elder Dallin H. Oaks “The Parable of the Sower” (Ensign wenno Liahona, Mayo 2015, 32–35). Ania ti inayon ti mensahena iti pannakaawattayo iti pangngarig?

Mateo 13:24–35, 44–53

Makatulong dagiti pangngarig ni Jesus a mangipaawat kadatayo iti panagdur-as, pagtungpalan, ken pateg ti Simbaanna.

• Kasano a matulonganyo dagiti miembro ti klase a mangipaawat kadagiti kinapudno maipapan iti Simbaan a naisuro kadagiti pangngarig ni Jesus iti Mateo 13? Mabalinmo nga ilista ti sumagmamano kadagiti pangngarig iti pisarra (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia ken Teachings of Presidents of the Church: Joseph Smith, 293–303). Kiddawem iti babassit a grupo dagiti miembro ti klase nga agadal iti tunggal pangngarig ket sapulenda no ania ti masursuroda maipapan iti panagdur-as ken pagtungpalan ti Simbaan. Ti maysa a wagas tapno mapagtitipon ti amin dagiti kapanunotan manipud iti tunggal grupo ket mangidrowing iti maysa a dakkel a sirkulo iti pisarra ket ikkam iti marka daytoy iti ti Simbaan ni Cristo (“ti pagarian ti langit”). Bayat ti panangibinglay ti tunggal grupo, mabalinda ti agsurat iti maysa a banag iti sirkulo a nasursuroda maipapan ti panagdur-as ken pagtungpalan ti Simbaan.

  

  Maipada ti pagarian ti langit iti maysa nga iket ti mangngalap.

• Ania ti masursurotayo maipapan ti pateg ti pannakaibilang iti Simbaan manipud kadagiti pangngarig maipapan ti gameng a nailemmeng iti talon ken ti napateg unay a perlas, a masarakan iti Mateo 13:44–46? Mabalin a ti sumagmamano a miembro ti klasem (wenno tattao nga am-ammoda) ti nakaaramiden kadagiti sakripisio—dakkel man wenno bassit— tapno agbalin a miembro ti Simbaan. Mangawis kadagiti miembro ti klase a mangibinglay kadagiti sakripisio nga inaramid wenno nakitadan nga inaramid dagiti dadduma tapno maibilangda iti Simbaan. Ania dagiti bendision a simmangbay kas bungana? Ibilangmo ti panangibinglay iti estoria ni Presidente Gordon B. Hinckley maipapan iti opisial iti navy iti “Dagiti Nainayon a Resources.” Mangawis kadagiti miembro ti klase nga agutob maipanggep iti no ania ti naiparikna kadakuada a sakripisio para iti Simbaan.

Mateo 13:24–30, 37–43

Iti gibus ti lubong, ummongento ti Apo dagiti nalinteg ket dadaelenna dagiti nadangkes.

• Kasano a matulongam ti klasem a makagun-od kadagiti adalen manipud iti pangngarig ti trigo ken ruruot a makatulongto kadakuada nga agtalinaed a napudno a Sasanto iti Ud-udina nga Aldaw? Rugian babaen ti panangawis iti maysa a miembro ti klase tapno manggupgop iti pangngarig ken ti pakaibuksilanna. Mabalin met a makatulong nga iparang ti ladawan ti trigo ken ruruot manipud balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia. Ania dagiti sumagmamano nga adalen iti daytoy a pangngarig iti aldawtayo? Apay a napateg a maammuan nga ipalubos ti Apo dagiti Santona nga “aggigiddan a dumakkel” (Mateo 13:30) kadagiti nadangkes agingga iti panawen ti panagapit? Kasano a mapagtalinaedtayo a napigsa ti pammatitayo iti daytoy nga aglawlaw, no kinadangkes ti amin iti aglawlawtayo? Doktrina ken Katulagan 86 ket mangted iti nayon a nalawag a pannakaammo ken pannakaawat [insights] iti ud-udina nga aldaw a panangyaplikar iti daytoy a pangngarig.

• Ti palawag ni Elder L. Tom Perry iti “Dagiti Nainayon a Resources” mangisingasing a dagiti ruruot ket mabalin a mangibagi iti “nadangkes ket nailubongan a wagas” a mangmulit ti biagtayo. Tapno matulongan dagiti miembro ti klase a mangutob no kasano a maammuanda daytoy a kita ti naespirituan a ruot, isuratmo kadagiti pedaso ti papel ti sumagmamano a kinapudno ti ebanghelio ket sumagmamano a palso, nainlubongan a kapanunotan wenno kannawidan. Ikabil dagiti pedaso a sangsangkamaysa iti maysa a container. Kalpasanna saludsodem kadagiti miembro ti klase a pumili iti sumagmamano ken paglilinnawagan no ania dagiti kinapudno ken no ania dagiti kinaulbod. (Adu kadagitoy a kinapudno ken kinaulbod ti nabigbig kadagiti mensahe iti sapasap a komperensia; mabalinmo ti mangsapul idiay para kadagiti kapanunotan.) Kasano a masurottayo ti balakad ni Elder Perry a “mangtaraon iti dayta a nasayaat” iti biagtayo?

Yallukoy ti Panagsursuro iti Pagtaengan

Mabalinmo a dakamaten a ti babasaen iti umay a lawas ket mangisalaysay maipapan dagiti tao a nangsurot ken ni Jesus ngem kalpasanna “saanda a nakikuyogen kenkuana” (Juan 6:66). Ibagam kadagiti miembro ti klase a makasarakda kadagiti nalawag a pannakaammo ken pannakaawat a makatulong kadakuada ken dagiti dadduma pay nga agtalinaed a napudno iti Mangisalakan.

Dagiti Nainayon a Resources

Mateo 13; Lucas 8; 13

“Pudno daytoy, saan kadi?”

Insalaysay ni Presidente Gordon B. Hinckley ti maysa a padasna iti maysa nga opisial ti navy manipud iti Asia a nagkameng itay nabiit iti Simbaan:

“Nayam-ammo kaniak sakbay a nasken nga agsubli ti nakayanakanna a daga. Nagsaritaanmi ti maipapan kadagiti [kinapudno ti ebanghelio], ket kalpasanna kinunak: “Saan a Kristiano dagiti taom. Anianto ti mapasamak no agawidka a Kristiano iti pagtaenganyo, ken, nangnangruna pay, no Mormon a Kristiano?’

“Nagliday ti rupana, ket insungbatna, ‘Maupayto la ketdi ti pamiliak. Mabalin a pagtalawendak ket ibilangdak a natayen. No para iti masakbayan ken karerak, mabalin a naserraanen ti amin a gundaway a maibusor kaniak.’

“Sinaludsodko, ‘Situtulokka kadi nga agbayad iti dakkel a gatad para iti ebanghelio?’

“Ti nangisit a matana, a binasa dagiti luana, ket nagrimat … bayat ti panangsungbatna iti, ‘Pudno daytoy, saan kadi?’

“Nabainan iti panagsaludsodna, insungbatko, ‘Wen, pudno daytoy.’

“A nangsungbatanna, ‘Ngarud, ania ti problema?’” (“It’s True, Isn’t It?” Ensign, Hulio 1993, 2).

Nasken a taraonantayo ti nasayaat.

Insuro ni Elder L. Tom Perry : “Nasarakan dayta nabayagen a kabusor ti amin a sangkataw-an ti kas kaadu a pamuspusan a mabalinna a mapanunot bayat ti panangiwarasna kadagiti ruot iti adayo ken sapasap. Nasarakanna dagiti wagas a pakaisaknapan dagitoy uray pay iti kinasagrado ti bukodtayo a pagtaengan. Nalaus ti pannakaisaknap dagiti nadangkes ken nailubongan a wagas a kasla awanen ti pudno a wagas a mangikkat kadagitoy. Umay dagitoy babaen ti kable ken babaen dagiti mismo nga alikamen a naipaugalin kadatayo a mangadal ken mangparagsak kadatayo. Naggiddan a dimmakkel dagiti trigo ken ruot. Ti agay-aywan a mangimatmaton iti talon, nga iti amin a kabaelanna, taraonanna dayta nasayaat ken pagbalinenna daytoy a nakapigpigsa ken nakapimpintas tapno awanton ti pakaay-aywan dagiti ruot iti mata wenno iti lapayag” (“Finding Lasting Peace and Building Eternal Families,” Ensign wenno Liahona, Nob. 2014, 44).

Panangpadur-as iti Panangisurotayo

Ipamaysam ti panangisurom iti doktrina. Siguraduem a maipamaysa dagiti panaglilinnawag iti klasem iti doktrina nga adda pakainaiganna iti pundasion iti nasantuan a kasuratan. Mabalinmo nga aramiden daytoy babaen ti panangidawat kadagiti estudiante a basaenda ti nasantuan a kasuratan a nasapsapa, ken idawat kadagiti miembro ti klase a mangibinglay kadagiti pammaneknekda maipapan iti pudno a doktrina. (Kitaen iti Panangisuro iti Wagas ti Mangisalakan, 20–21.)