“Marso 11–17. Mateo 10–12; Marcos 2; Lucas 7; 11: ‘Dagitoy Sangapulo-ket-dua nga Imbaon ni Jesus’” Umaykayo, Sumurot Kaniak—Para iti Sunday School: Baro a Tulag 2019 (2019)
“Marso 11–17. Mateo 10–12; Marcos 2; Lucas 7; 11,” Umaykayo, Sumurot Kaniak—Para iti Sunday School: 2019
Marso 11–17.
Mateo 10–12; Marcos 2; Lucas 7; 11
“Dagitoy Sangapulo-ket-dua nga Imbaon ni Jesus”
Ti panangbasa iti Mateo 10–12; Marcos 2; ken Lucas 7; 11 kadagiti sursuruam ket makatulongto kenka nga umawat iti pammaregta manipud iti Espiritu Santo maipapan iti no ania ti kasapulanda. Isuratmo dagiti naespirituan nga impresion a maawatmo, ken agbasaka iti daytoy a balabala para kadagiti nayon a nalawag a pannakaammo ken pannakaawat ken dagiti kapanunotan iti panangisuro.
Isuratmo Dagiti Impresionmo
Yawis ti Panagbibinninglay
Awisem ti sumagmamano a miembro ti klase nga umay a nakasagana a mangibinglay kadagiti ania man a saludsodda maipapan iti Mateo 11:28–30. (Para iti sumagmamano a pagarigan ti saludsod, kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia.) Ania dagiti sungbat a nasarakanda?
Isuro ti Doktrina
Ikkan ti Apo dagiti katulonganna iti bileg a mangaramid iti trabahona.
-
Ti panangawag ti Mangisalakan kadagiti Apostolna ket makatulong kadatayo kadagiti bukodtayo a pagrebbengan. Mabalin nga addaan dagiti miembro ti klase kadagiti nalawag a pannakaammo ken pannakaawat [insights] iti daytoy a topiko babaen ti bukodda a panagadal; kas pagarigan, adda maysa nga aktibidad iti daytoy a topiko iti Umaykayo, Sumurot Kaniak—Para kadagiti Indibidual ken Pamilia. Awisem ida a mangibinglay no ania ti nasursuroda wenno agtrabaho iti babassit a grupo a mangileppas iti aktibidad iti klase. Awisem dagiti miembro ti klase a mangibinglay kadagiti padasda idi nariknada ti bileg ti Mangisalakan bayat ti panangipatungpalda kadagiti takemda.
-
Sabali pay a wagas a panangrebyu dagiti miembro ti klase iti Mateo 10 ket ti panangsukisok iti daytoy a kapitulo maipapan ti maysa a banag nga indawat ti Mangisalakan kadagiti Apostol nga aramidenda ken mangidrowing iti maysa a ladawan a mangibagi iti dayta a banag. Mabalinda nga ibinglay dagiti drowingda ken no ania ti nasursuroda maipapan ti komision wenno nakaawagan dagiti Sangapulo-ket-dua nga Apostol.
-
Kasano a makatulong kadagiti miembro ti klase ti panagadal iti panangawag ni Cristo kadagiti Apostolna iti Mateo 10 tapno maawatanda ti akem dagiti kabaruanan a propeta ken apostol? Mabalin a makatulong nga idilig ti komision ti Mangisalakan iti Sangapulo-ket-dua iti komision a naited iti umuna a Korum dagiti Sangapulo-ket-dua nga Apostol iti daytoy a dispensasion, a masarakan iti “Dagiti Nainayon a Resources.” Kasano a naimpluensiaan ti panagministro dagiti sibibiag nga Apostol dagiti miembro ti klase? Ibinglaymo ti pammaneknekmo maipapan iti nadiosan a takem [calling] dagiti sibibiag a propeta ken apostol, ken mangawis kadagiti miembro ti klase nga ibinglayda ti pammaneknekda?
-
Tapno mailadawan ti kinapudno a matunton ti tunggal priesthood holder ti turayna nga agsubli iti kanito nga inordenan ni Jesus dagiti Apostolna, awisem ti maysa a priesthood holder a mangibinglay iti linia ti turayna.
Aramiden dagiti Sangapulo-ket-dua nga Apostol ti aramid ti Apo ita.
No addatayo iti serbisio ti Apo, paregtaennatayonto kadagiti balikas nga isaotayo.
-
No dadduma agnerbios dagiti tao no mangisursuro wenno makisarsaritada kadagiti dadduma maipapan iti ebanghelio. Ngem inkari ti Apo kadagiti disipulona a tulonganna ida a mangammo no ania ti isaoda. Ania ti nasken nga aramidentayo tapno umawat iti inkari a tulong ti Apo para iti bagbagitayo? Mangawis kadagiti miembro ti klase a mangbasa iti Mateo 10:19–20; Doktrina ken Katulagan 84:85; ken Doktrina ken Katulagan 100:5–8 a mangsapsapul kadagiti sungbat daytoy a saludsod. Kaano a tinulongannaka ti Espiritu Santo a nangammo no ania ti isaom? Mabalinmo nga ibinglay dagiti padasmo ket awisem dagiti miembro ti klase a mangibinglay iti bukodda.
Ti Sabbath ti aldaw nga agaramid iti nasayaat.
-
Tapno matulongan a ngilinen ti Sabbath, nangipatungpal dagiti Fariseo kadagiti naiget a pagannurotan ken tradision nga inaramid ti tao, nga idi agangay nangpatikaw iti pannakaawatda iti pudno a panggep ti Sabbath. Magted kadi iti pagimbagan kadagiti sursuruanyo ti panaglilinnawag no apay nga inted ti Apo kadatayo iti aldaw ti Sabbath? Mabalinmo nga awisen dagiti miembro ti klase a mangrebyu kadagiti pakaammuan iti Mateo 12:1–13 ken Marcos 2:23–28 ken mangibinglay no ania ti insuro ti Mangisalakan maipapan iti aldaw ti Sabbath (kitaen met iti Patarus ni Joseph Smith, Marcos 2:26–27 [iti Pangiwanwan iti Nasantuan a Kasuratan]). Ania dagiti mainayon a nalawag a pannakaammo ken pannakaawat [insights] maipapan iti Sabbath a magun-odtayo manipud iti Exodo 31:16–17; Isaias 58:13–14; ken Doktrina ken Katulagan 59:9–13? Ania dagiti kannawidan wenno pagannurotan a mangsinga kadatayo manipud iti pudno a panggep ti Sabbath?
-
Indinto nga inyunay-unay dagiti Fariseo ti adu a detaliado a pagannurotan maipapan iti Sabbath, insuro ti Mangisalakan ti simple a prinsipio: “Nainkalintegan ti agaramid iti nasayaat iti sabbath” (Mateo 12:12). Dagiti agbibiag babaen daytoy a prinsipio ket masansan a di marigatan iti panangngilin iti aldaw ti Sabbath. Ania dagiti dadduma pay a prinsipio a makatulong kadagiti miembro ti klase a mangngilin iti Sabbath? Apay a nasamsamay dagiti prinsipio iti panangisuro ngem iti panangituding kadagiti annuroten iti panangpadur-as iti naespirituan a panagpannuray iti bagi? (kitaen iti palawag ni Propeta Joseph Smith iti “Dagiti Nainayon a Resources”). Adda kadi dadduma pay a prinsipio a mapanunottayo a makatulong kadatayo nga agtungpal kadagiti bilin ti Dios? Kas pagarigan, ania dagiti prinsipio a makatulong kadagiti nagannak a mangparegta kadagiti annakda nga agtungpal iti Word of Wisdom wenno agaramid iti family history research?
-
Ti mensahe ni Presidente Russell M. Nelson “The Sabbath Is a Delight” (Ensign wenno Liahona, Mayo 2015, 129–32) ken dagiti video ti balakad ni Elder Jeffrey R. Holland iti “Dagiti Nainayon a Resources” ket mabalin a mangnayon iti panaglilinnawag maipapan iti aldaw ti Sabbath.
-
Mabalin a makatulong nga irebyu dagiti miembro ti klase ti “Panagtungpal iti Aldaw ti Sabbath” iti Para it Pigsa dagiti Agtutubo. Mabalinda a yakem ti no kasano a mailawlawagda iti maysa a tao a saan a kapada ti pammatitayo no apay a ngilinenda a nasantuan ti aldaw ti Sabbath.
Kabayatan ti pannakapakawantayo kadagiti basbasoltayo, umun-uneg met ti ayattayo iti Mangisalakan.
-
Ania ti masursurotayo manipud iti pagwadan ti babai ken dagiti pannursuro ti Mangisalakan iti Lucas 7:36–50 bayat ti panagkiddawtayo iti pannakapakawan dagiti basbasoltayo? Kasano a patibkeren ti panagbabawi ti relasiontayo iti Dios? Kasano a mausartayo daytoy a pakaammuan a mangisuro iti maysa a tao no ania ti kaipapanan ti agkiddaw iti pammakawan?
Yallukoy ti Panagsursuro iti Pagtaengan
Mabalinmo a kariten dagiti miembro ti klase a mangbasa kadagiti pangngarig iti Mateo 13 ken Lucas 8; 13 ken agsagana a mangibinglay iti klase iti sumaruno a lawas iti pagbatayan ti ebanghelio a nagun-odda manipud iti maysa kadagiti pangngarig.
Dagiti Nainayon a Resources
Dagiti bendision ti panagtungpal iti aldaw ti Sabbath.
Iti maysa a serye dagiti tallo a video, isuro ni Elder Jeffrey R. Holland maipapan kadagiti bendision ti panagtungpal iti aldaw ti Sabbath: “Upon My Holy Day—Getting Closer to God,” “Upon My Holy Day—Honoring the Sabbath,” and “Upon My Holy Day—Rest and Renewal” (LDS.org).
Maysa a komision kadagiti Apostol iti ud-udina nga aldaw.
Idi naawagan ti sumagmamano kadagiti umuna a miembro ti Korum dagiti Sangapulo-ket-dua nga Apostol iti daytoy a dispensasion, inikkan ida ni Oliver Cowdery iti komision a maipada iti maysa nga inted ni Jesucristo iti Mateo 10. Kinunana:
“‘Nasken a paksiatenyo ti amin a dakes a panangipapan ti amin a pagilian. … Ngarud, ballaagankayo a mangpatanor iti nalaus a kinapakumbaba, ta ammok ti kinapasindayag iti puso ti tao. Agannadkayo, amangan ta itag-aynakayo dagiti mangpatpatiray-ok ti lubong. Agannadkayo amangan ta maguyugoy ti ayatyo kadagiti nailubongan a banag. Unaenyo koma ti panagministroyo. … [Daytoy] ti kasapulan tapno maawatmo ti pammaneknek manipud iti Langit para iti bagbagiyo, tapno makaibinglaykayo iti pammaneknek iti kinapudno. …
“‘… Nasken nga ibinglayyo daytoy a mensahe kadagitay mangibilang iti bagbagida a masirib. Ket iti kasta mabalin a mangidadanes kadakayo; tapno gandatenda a pukawen ti biagyo. Kanayon a ginandat ti kabusor ti biag dagiti katulongan ti Dios. Ngarud, agsaganakayo iti amin a panawen a mangaramid iti maysa a sakripisio ti biagyo, no idawat ti Dios a kasapulan kadakuada iti pannakaital-o ken panangbangon iti panggepna. …
“Kalpasanna saggaysa nga iniggamanna ida ket kinunana, ‘Naan-anay kadi ti panggep ti pusom a makiraman iti daytoy a panagministro, a mangipakdaar iti ebanghelio iti amin a kinapasnek kadagitoy kakabsatyo, a maibatay iti pudno a kaipapanan ken panggep ti pagrebbengan nga inawatmo?” Simmungbat iti wen ti tunggal maysa” (iti Joseph Smith Papers, Documents, Volume 4: Abril 1834–Septiembre 1835, ed. Matthew C. Godfrey ken dadduma pay[2016], 243–44, 247; spelling and punctuation standardized).
Panangisuro kadagiti umno a prinsipio.
Maysa a tao ti naminsan a nagsaludsod ken ni Propeta Joseph Smith no kasano a kabaelanna ti mangituray iti adu a tao iti Nauvoo a sisasamay. Inlawlawag ti Propeta, “isurok kadakuada dagiti umno a prinsipio, ken iturayanda dagiti bagbagida” (kitaen iti Teachings of the Presidents of the Church: Joseph Smith [2007], 284).
Panangpadur-as iti Panangisurotayo
Dagiti naikari a bendision. No mangidiayaka kadagiti awis nga agtignay, paneknekam kadagiti sursuruam nga umawatdanto kadagiti bendision nga inkari ti Dios no agtignayda nga addaan iti pammati kadagiti pannursurona. Saan koma a dagiti bendision ti kangrunaan a motibasion iti panagtungpal, ngem tarigagayan ti Nailangitan nga Ama ti mangbendision iti amin nga annakna. (Kitaen iti Panangisuro iti Wagas ti Mangisalakan, 35.)