15-21 nō ’ēperēra.

Pāta

« E hade ē, tei hea to ’oe rē ? »

’A fa’aineine ai ’outou i te ha’api’i atu i teie hepetoma, 'a feruri e nāhea ’outou i te tau’ara’a parau i roto i te piha ha’api’ira’a nō ni’a i te sābati pāta, e nehenehe ai e patu i te fa’aro’o ia Iesu Mesia ’e tāna tāra’ehara.

’A pāpa’i i to ’outou mana’o

Ani ’ia fa’a’ite mai

’A ani i te mau pīahi e nahea rātou e pāhono ai i te mau uira’a mai teie « e aha te tāra’ehara a Iesu Mesia ? » ’e « Nāhea e nehenehe ai iā’u e fāri’i i te mau ha’amaita’ira’a o te tāra’ehara a te Mesia ? » ’Ua tai’o ānei rātou i te mau pāpa’ira’a mo’a i teie hepetoma o te tauturu i te pāhono i teie mau uira’a ?

Ha’api’i i te ha’api’ira’a tumu

’Ua fa’aora Iesu Mesia ia tātou i te hara ’e te pohe, ’ua ha’apūai ia tātou i roto i tō tātou mau paruparu, ’e ’ua tāmahanahana ia tātou i roto i tō tātou mau tāmatara’a.

• ’Ua ’ite ānei tā ’outou mau pīahi ē ta’a ’ē noa atu i te ha’avīra’a i te hara ’e te pohe, e nehenehe ato’a Iesu Mesia e tāmahanahana ia tātou i roto i tō tātou mau tāmatara’a ’e e ha’apūai ia tātou i roto i tō tātou mau paruparu ? Hō’ē rāve’a nō te tauturu ia rātou ’ia ’ite i teie mau parau tumu o te pāpa’ira’a ïa i teie mau parau i ni’a i te tāpura : Hara, pohe, mau tāmatara’a, mau paruparu. ’A ani i te pīahi tāta’itahi ’ia tai’o i te hō’ē o te mau pāpa’ira’a mo’a tei tāpurahia i roto i « Te tahi atu mau rāve’a tauturu » ’e ’a feruri e nāhea te Fa’aora e tauturu ai ia tātou ’ia upo’oti’a ’aore rā ’ia fa’a’oroma’i i teie mau mea. E nehenehe te mau pīahi e pāpa’i i te mea tā rātou i ha’api’i nā roto mai i teie mau pāpa’ira’a mo’a i raro a’e i te upo’o parau tātai’itahi ’e ’ia fa’a’ite mai i tō rātou ’itera’a pāpū nō te Fa’aora ’e tāna tāra’ehara.

• E aha tā te mau pāpa’ira’a mo’a e ha’api’i nei nō ni’a i te ho’o tā Iesu Mesia i ’aufau nō tō tātou ora ? ’Ei hi’ora’a, ’a hi’o Luka 22:39–44 ; Mosia 3:7 ; ’e Te Parau Ha’api’ira’a ’e te Parau Fafau 19:16–19. E aha te ho’o tā to tātou Metua i te Ao ra i ’aufau ? (’a hi’o Ioane 3:16).

  

  Te fa’asātaurora’a o te Mesia, nā Louise Parker

• Hou te ha’api’ira’a, ’a feruri i te ani i te tahi mau pīahi ’ia ’āfa’i mai i te hō’ē fa’ahitira’a parau nō roto mai i te hō’ē a’ora’a nō te ’āmuira’a rahi o tā tātara mai e nāhea te Fa’aora e ha’amaita’i ai ia tātou nā roto i tāna tāra’ehara (nō te tahi atu mau hi’ora’a, a hi’o « Te tahi atu mau rāve’a tauturu »). Nāhea te mau ha’api’ira’a a te mau peropheta nō teie ’anotau e fa’arahi ai i tō tātou ’ite nō ni’a i te mau ha’amaita’ira’a o te tāra’ehara a te Fa’aora ? Nāhea te reira e ha’apūai ai i tō tātou ’itera’a pāpū nō ni’a i te mana o tāna tāra’ehara ?

• Penei a’e e nehenehe te hō’ē ha’api’ira’a ’ōhie nō tao’a e fa’ahōho’a i te huru-’ē-ra’a i roto ’ia tāmāhia i te hara ’e ’ia maita’i roa : E nehenehe ’outou e pāpa’i i ni’a i te tāpura ’ere’ere i te tahi mau reni mātāmua nō Moroni 10:32, ma te tu’u ato’a i te mau hape i te pae pi’ira’a ’aore rā i te pae tārame. ’A ani i muri iho i te hō’ē pīahi ’ia tūmā i te mau hape. ’Ua tātara ānei te reira i te fifi ? E aha te mau ha’api’ira’a tā tātou e ’apo mai nā roto mai i teie pāpa’ira’a mo’a ’e teie ha’api’ira’a nō te tao’a nō ni’a i te maita’i o te tāra’ehara i ni’a ia tātou  ? E nehenehe ato’a teie fa’ahitira’a parau a te peresideni Dieter F. Uchtdorf e tauturu : « Mai te peu ē, te aura’a o te fa’aorara’a, o te tumā-noa-ra’a i tā tātou mau hape ’e te mau hara, e’ita te fa’aorara’a―noa atu tōna nehenehe―e fa’atupu i te mau hina’aro o te Metua nō tātou. E mea teitei atu ā tāna tītaura : Tē hina’aro nei ’oia ’ia riro mai tāna mau tamaiti ’e tāna mau tamāhine mai iāna ra te huru » (« Te hōro’a o te aroha mau », Ensign ’aore rā Liahona, Me 2015, 108).

• E nehenehe te mau ’ā’amu ’e te mau fa’aaura’a e tauturu ia tātou ’ia ta’a maita’i i te tāra’ehara a te Mesia. Ei hi’ora’a, ’ua fa’ati’a mai o Elder Jeffrey R. Holland i te hō’ē ’ā’amu nō nā taea’e e piti e pa’i’uma ra i te hō’ē mato i roto i tāna pōro’i « I reira te parau-ti’a, te here ’e te aroha e farerei ai » (Ensign ’aore rā Liahona, Me 2015, 104–6 Tē vai ra ato’a te hō’ē video nō ni’a i taua upo’o parau ra LDS.org. ’Aore rā e nehenehe ’outou e māta’ita’i ’āmui « Te Mesia a Handel : Te fare ’āuri a te ta’ata tārahu » (LDS.org ; ’a hi’o i te fa’a’itera’a i roto i « Te tahi atu mau rāve’a tauturu ») ’e ’a tāuaparau e nāhea te tāra’ehara a Iesu Mesia e fa’ati’amā ai ia tātou nā roto mai i tō tātou mau fare tāpe’ara’a.

’Ua fa’a’ite pāpū mai te mau ’ite i roto i te Faufa’a ’Āpī ē ’ua ha’avī Iesu Mesia i te pohe.

• ’A feruri i te tai’o fa’ahou i te ’ā’amu i roto i te pāpa’ira’a mo’a nō ni’a i te pāta mātāmua—Te ti’afa’ahoura’a o Iesu Mesia. E nehenehe ’outou e ani i te hō’ē pīahi ’ia fa’ati’a fa’ahou mai i te ’ā’amu mai te au i tāna iho mau parau (’a hi’o Ioane 20:1–17). E nehenehe ato’a ’outou e fa’a’ite i te hō’ē video nō te Bibilia, mai te « ’Ua ti’afa’ahou mai ’oia » (LDS.org).

• Penei a’e e nehenehe e noa’a i tā ’outou mau pīahi te hō’ē māramarama hōhonu atu ā nō ni’a i te faufa’a o te mau ’ite nō te ti’afa’ahoura’a o Iesu Mesia mai te mea e mana’o rātou ē e mau ’auvaha ture ’aore rā e mau pāpa’i ve’a rātou e tītorotoro ra ē ’ua ti’afa’ahou te Mesia. ’A ani ia rātou ’ia ’imi i te mau ta’ata i roto i te mau pāpa’ira’a mo’a e nehenehe e riro ’ei mau ’ite (a hi’o Mataio 28:1–10 ; Luka 24:13–35 ; Ioane 20:19–29 ; 1 Korinetia 15:3–8, 55–58). E nehenehe ’outou e pāpa’i i te hō’ē ha’apotora’a nō te mau mea tā teie mau ta’ata e nehenehene e parau, ’a fa’a’ite pāpū ai rātou i mua i te tiripuna ’aore rā ’a uiuihia ai rātou nō te parau ’āpī.

• Hō’ē rāve’a nō te fa’ahōhonu i tō tātou māuruuru nō te ti’afa’ahoura’a o te Fa’aora o te ferurira’a ïa e nāhea tātou i te ha’amāramarama atu ia vetahi ’ē i tō tātou ti’aturira’a. Nāhea te mau pīahi i te fa’a’ite atu i tō rātou ’itera’a pāpū nō Iesu Mesia i roto i teie mau huru hi’ora’a : ’ua ’itehia e ma’i rahi tō te hō’ē melo o te ’utuāfare ; ’ua pohe te hō’ē ta’ata herehia o te hō’ē hoa ; ’ua ani mai te hō’ē ta’ata tupu nō te aha ’outou e fa’ahanahana ai i te pāta. ’A fa’aitoito ia rātou ’ia hi’o atu i te mau pāpa’ira’a mo’a (mai teie i roto i « Te tahi atu mau rāve’a tauturu ») ’a fa’aineine ai rātou i tā rātou mau pāhonora’a. ’A ani i te tahi mau pīahi ’ia fa’a’ite mai i tō rātou mana’o.

E hōro’a mai Iesu Mesia ia tātou te ti’aturira’a ’e te ’oa’oa.

• Maoti te Fa’aora, e nehenehe tātou pā’āto’a ’ia ti’aturi ’e ’ia ’oa’oa. Nehenehe ’outou e tai’o i te Ioane 16:33 ’e ’ia tāu’aparau e nāhea te tāra’ehara a Iesu Mesia e tauturu ia tātou ’ia ’oa’oa noa atu tō tātou mau tāmatara’a. Nāhea tātou e fāri’i ai i te ’oa’oa ’e ’ia pāturuhia i roto i tō tātou mau tāmatara’a ?

• E nehenehe te tai’ora’a i te ’itera’a pāpū o Petero i roto i te 1 Petero1:3–11 e hōro’a i te mau pīahi te hō’ē ti’aturira’a rahi atu ā i te tāra’ehara a Iesu Mesia. ’A hōro’a ia rātou te tahi taime nō te feruri i teie mau ’īrava ’e ’ia ’ohipa nā te pea nō te ’imi i te tahi atu mau pāpa’ira’a mo’a o te fa’a’ite ato’a mai e nēhea ’ia noa’a te ti’aturira’a ia Iesu Mesia. E nehenehe rātou e fa’a’ohipa i te mau pāpa’ira’a mo’a i ’itehia e rātou nō te hāmani i te hō’ē hōho’a rahi nō te fa’a’ite atu i tō rātou ’utuāfare ’aore rā i ni’a i te Itenati (’a hi’o i te mau hi’ora’a hōho’a nō te mau fa’ahitira’a parau fa’auruhia i ni’a i te LDS.org). E nehenehe te mau pīahi e feruri i te mau huru orara’a o te mau melo o te ’utuāfare ’aore rā o te mau hoa tei hina’aro rahi i te ti’aturira’a.

Fa’aitoito i te ha’api’ira’a mai i te fare

E aha te mea tei tura’i i te mau pīahi ’ia tai’o Mataio 18 ’e Luka 10 ? E nehenehe ’outou e parau atu ia rātou ē tē vai nei i roto i teie mau pene e piti o te mau parabole fa’ahiahia roa a’e a te Fa’aora, o te fa’a’ite mai i te mau ha’api’ira’a faufa’a roa nō ni’a i tō tātou huru i ni’a i te tahi ’e te tahi.

Te tahi atu mau rāve’a tauturu

Pāta

Mau pāpa’ira’a mo’a nō ni’a i te tāra’ehara a te Fa’aora.

• Isaia 25:8

• Isaia 53

• Ioane 20:1–17

• Roma 8:31–39

• 2 Nephi 9:5–12

• Alama 7:10–14 ; 11:32–44

• 3 Nephi 11:1–17; 27:13–20

• Moroni 7:41.

• Te Parau Ha’api’ira’a ’e Te Mau Parau Fafau 19:15–19

Mau pōro’i nō ni’a i te tāra’ehara a te Fa’aora.

• Peresideni Thomas S. Monson, « ’Ua ti’afa’ahou ’oia ! » Ensign ’aore rā Liahona, Me 2010, 87–90

• Elder D. Todd Christofferson, « Te ti’afa’ahoura’a o Iesu Mesia », Ensign ’aore rā Liahona, Me 2014, 111–14

• Elder Dallin H. Oaks, « Ha’apūaihia e te tāra’ehara a Iesu Mesia », Ensign ’aore rāLiahona, Novema 2015, 61–64

• Tuahine Carole M. Stephens, « Te Fatu Fa’aora », Ensign ’aore rā Liahona, Novema 2016, 9–12.

Mau hīmene nō ni’a i te tāra’ehara a te Fa’aora.

E nehenehe te mau pīahi e ’oa’oa ’ia hīmene i te tahi o teie mau hīmene ’e ’ia tai’o i te mau pāpa’ira’a mo’a e tū’ati, tei tu’uhia i raro i te ’api. ’Ua ha’api’i mai paha te tahi mau pīahi i te tahi mau hīmene ’ei tufa’a nō tā rātou tuatāpapara’a i te pāpa’ira’a mo’a i roto i te ’utuāfare nō teie hepetoma ; ’a fa’aitoito ia rātou ’ia fa’a’ite mai i tō rātou ’itera’a.

• « Auē te Pa’ari », Te Mau Hīmene, no. 41

• « I hea Vau e Fāri i ai te Hau ? » Te Mau Hīmene, no. 62

• « Te Maere nei Au », Te Mau Hīmene, no. 111

• « ’Ua Ti‘a mai te Fatu ! » Te Mau Hīmene, no. 116

Mau videos nō ni’a i te pāta.

I te mau matahiti ato’a, tē hāmani nei te ’Ēkālesia i te mau pōro’i nō te Pāta e roa’a te reira i ni’a mormon.org/easter.

’Ua fa’ati’amā Iesu Mesia ia tātou.

I te matahiti 1741, ’ua pāpa’i o George Frideric Handel i te hō’ē hīmene nō ni’a ia Iesu Mesia tei pi’ihia Te Mesia. ’Ua fa’aoti o Handel ē te moni e noa’a mai nā roto mai i te ha’utira’a o Te Mesia e hōro’ahia nō te ’aufau ’ia matara mai te feiā ’aitārahu nā roto mai i te fare ’āuri o te feiā tārahu. Hau atu i te 140 ta’ata tei tāpe’ahia i te fare ’āuri nō tō rātou ’orera’a e nehenehe e ’aufau i tā rātou mau tārahu ’e tei fa’ati’amāhia nā roto i teie ravera’a. Nō ni’a i teie ’ohipa tei tupu, ’ua parau te peresideni Russell M. Nelson, « ’āhani ’aita te tāra’ehara a Iesu Mesia, e ’aitārahu noa ïa tātou e tae noa atu i te hope’a, mai taua mau ta’ata ra i roto i te fare ’āuri nō te feiā tārahu. ’Ua haere mai tō tātou Fa’aora, te Fatu o Iesu Mesia, e ’aufau i te hō’ē tārahu e ’ere ho’i nāna te tārahu, e tārahu rā o te ’ore roa e noa’a ia tātou ’ia ’aufau ». Nō te fa’a’ite i te video nō teie ’ohipa i tupu, a hi’o « Te Mesia a Handel : Te fare ’āuri nō te feiā tārahu » i ni’a LDS.org.

Ha’amaita’ira’a i tā tātou ha’api’ira’a

’Ia riro ’ei mauiha’a nō te Vārua Tā ’outou fā ’ei ’orometua ha’api’i e ’ere te hōro’ara’a i te hō’ē ha’api’ira’a, nō te tauturu rā ia vetahi ’ē ’ia fāri’i i te fa’aurura’a a te Vārua Maita’i—te ’orometua ha’api’i mau. (’A hi’o Ha’api’ira’a mai tā te Fa’aora, 10.)