Ko e Fakamanatu Kiate Au, tā ʻe Walter Rane

3–9 Sune

Sione 13–17

“Mou Nofo Maʻu ʻi Heʻeku ʻOfá”

ʻI hoʻomou ako ʻi he faʻa lotu ʻa e Sione 13–17, fakalaulauloto ki he founga te ke lava ʻo fakahaaʻi lelei ange ai hoʻo ʻofa ki he niʻihi ʻokú ke akoʻí. ʻE fakahā atu ʻe he Laumālie Māʻoniʻoní ha ngaahi fakakaukau ʻi hoʻo ako e folofolá, Haʻu, ʻo Muimui ʻIate Au-Maʻá e Fakafoʻituituí mo e Ngaahi Fāmilí, pea mo e fokotuʻutuʻu ko ʻení.

Lekooti e Ngaahi Ongo ʻOkú ke Maʻú

Fakaafeʻi e Feʻinasiʻakí

Hiki e mataʻifika 13 ki he 17 ʻi he palakipoé, ke ne fakafofongaʻi e ngaahi vahe ʻi he tohi ʻa Sioné ʻa ia ʻoku lau ʻe he kau mēmipa ʻo e kalasí ʻi he uike ní. Fakaafeʻi ha kau mēmipa ʻe niʻihi ʻo e kalasí ke nau tohi ʻi he tafaʻaki e mataʻifika ʻo e vahé, ʻa e fakamoʻoni ki ha veesi ne nau maʻu ʻoku ʻuhingamālie pea ʻoku nau loto ke aleaʻi mo e kalasí.

Akoʻi e Tokāteliné

Sione 13:1–17

Ko e Fakamoʻuí ʻa hotau faʻifaʻitakiʻanga ʻo e ngāue taʻesiokita maʻá e niʻihi kehé.

• Ke tokoni ke fakalaulauloto e kau mēmipa ʻo hoʻo kalasí ki he mahuʻinga ʻo hono fufulu ʻe Sīsū e vaʻe ʻo ʻEne kau ākongá, te ke lava ʻo tomuʻa fakaafeʻi ha mēmipa ʻo e kalasí ke ne fakafaivaʻi ʻa Pita ʻi he talanoa ko ʻení pea ke fakaʻekeʻeke ʻe he toenga ʻo e kalasí. Poupouʻi e kau mēmipa ʻo e kalasí ke nau fekumi ʻi he Sione 13:1–17 pea fakakaukau ki ha ngaahi fehuʻi ʻuhingamālie te nau lava ʻo ʻeke kia Pita. Ko e hā ʻoku tau ako mei he talanoa ko ʻení te ne liliu e founga ʻo ʻetau tokoni ki he niʻihi kehé?

Sione 13:34–35

Ko e ʻofá ʻa e tōʻonga moʻui ʻo ha ākonga ʻa Sīsū Kalaisi.

• Ko e hā te ne poupouʻi e kau mēmipa ʻo e kalasí ke nau toe ʻofa angé? Te ke lava ʻo ʻeke ange pe te nau ʻilo fēfē ha taha ʻoku nau maheni ko ha ākonga ʻa Sīsū Kalaisi. Ko e hā e ngaahi ʻulungaanga ʻoku nau fakatokangaʻi ʻi he tokotaha ko iá? Te ke lava ʻo fakaafeʻi kinautolu ke nau fekumi ʻi he Sione 13:34–35, ke ako e founga ʻe lava ke tau ʻilo ai e kau ākonga moʻoni ʻa e Fakamoʻuí. Ko e hā te tau lava ʻo fai ke ʻai e ʻofá ko e ʻulungaanga ʻo e moʻui fakaākongá? ʻOku tākiekina fēfē ʻe he akonaki ko ʻení e founga ʻetau feohi mo e niʻihi kehé, kau ai ʻa e mītia fakasōsialé?

• Kuo mou ako ha meʻa lahi ʻi he kalasí he taʻú ni fekauʻaki mo e moʻui ʻa e Fakamoʻuí, kau ai ha ngaahi sīpinga lahi ʻo e founga naʻá Ne fakahaaʻi ai ʻEne ʻofa ki he niʻihi kehé. Ko e founga ʻe taha ke tokoni ke fakalaulauloto ai e kau mēmipa ʻo e kalasí ki he fekau ʻi he Sione 13:34 ko hono hiki ʻi he palakipoé Hangē Ko ʻEku ʻOfa Kiate Kimoutolú, pea kole ki he kau mēmipa ʻo e kalasí ke nau lisi e ngaahi sīpinga ʻoku nau manatuʻi mei he Fuakava Foʻoú ʻokú ne fakatātaaʻi e ʻofa ʻa Sīsuú. Te ke lava leva ʻo hiki ʻi he palakipoé ʻa e Feʻofaʻaki pea kole ki he kau mēmipa ʻo e kalasí ke nau lisi e ngaahi founga te tau lava ai ʻo muimui ʻi Heʻene sīpinga ʻo e ʻofá. ʻE lava ke hoko hono hivaʻi pe fanongo ki he himi “Ke Mou Feʻofaʻaki,” Ngaahi Himi, fika 200, pe sio ʻi ha taha ʻo e ngaahi vitiō ʻi he “Ngaahi Maʻuʻanga Tokoni Kehé” ko ha tānaki lelei ki he ʻekitivitī ko ʻení.

• Kapau ʻoku ʻikai ke tau ongoʻi ʻofa ki he niʻihi kehé, ko e hā te tau lava ʻo fai ke tau maʻu e meʻafoaki ʻo e ʻofá? Ko e hā ʻoku tānaki atu ʻe he faleʻi ʻi he Molonai 7:48; 8:26 ki he mahino ʻoku tau maʻu fekauʻaki mo e meʻafoaki ko ʻení? Ko hai ʻoku tau ʻilo ʻoku fie maʻu ke ne ongoʻi ʻetau ʻofá?

Ko e ʻofá ʻa e tefitoʻi tōʻonga moʻui ʻo e ākonga ʻa Kalaisí.

Sione 14:16–27; 15:26; 16:7–15

ʻOku fakangofua kitautolu ʻe he Laumālie Māʻoniʻoní ke tau fakakakato ʻetau taumuʻa ko e kau ākonga ʻa Sīsū Kalaisí.

• Ke tokoni ke ako e kau mēmipa ʻo e kalasí fekauʻaki mo e ngaahi fatongia kehekehe ʻo e Laumālie Māʻoniʻoní, ʻe lava ke ke vahevahe kinautolu ki ha ngaahi kulupu pea vahe ki he kulupu takitaha ha taha ʻo e ngaahi potufolofola ko ʻení: Sione14:16–27; 15:26; mo e 16:7–15. Fakaafeʻi e kulupu takitaha ke nau tohi ʻi he palakipoé e meʻa ʻoku nau ako fekauʻaki mo e Laumālie Māʻoniʻoní mei he ngaahi potufolofola ko ʻení. ʻE lava ke tānaki ʻe he kau mēmipa ʻo e kalasí ha ngaahi fakakaukau kehe ʻoku nau maʻu ʻi heʻenau fekumi ʻi he ngaahi veesi folofola ʻoku lisi ʻi he “Ngaahi Maʻuʻanga Tokoni Kehé.” Ko e fē ha taimi kuo tau ongoʻi ai e ivi tākiekina ʻo e Laumālie Māʻoniʻoní? Ko e hā ha ngaahi meʻa pe nāunau tokoni ki he sió te ke lava ʻo ʻomi ki he kalasí, ʻe lava ʻo tokoni ke mahino ki he kau mēmipa ʻo e kalasí e ngaahi fatongia ʻo e Laumālie Māʻoniʻoní?

• ʻE lava ke ke tomuʻa fakaafeʻi ha kau mēmipa ʻe niʻihi ʻo e kalasí ke nau ako ha taha ʻo e ngaahi lea ʻi he konifelenisi lahí ʻoku fokotuʻu mai ʻi he “Ngaahi Maʻuʻanga Tokoni Kehé,” (pe ko ha ngaahi lea kehe ʻi he konifelenisí ʻoku nau ʻilo) fekauʻaki mo e Laumālie Māʻoniʻoní. Tuku ke nau vahevahe nounou mo e kalasí e meʻa ne nau akó. Ko e hā ʻoku tānaki mai ʻe he ngaahi pōpoaki ko ʻení ki he meʻa kuo tau ako fekauʻaki mo e Laumālie Māʻoniʻoní mei he Sione 14–16?

Sione 15:1–12

ʻI heʻetau nofo maʻu ʻi he Fakamoʻuí, te tau tupu ʻo fua lahi mo fiefia.

• Ko e hā naʻe ako ʻe he kau mēmipa ʻo e kalasí ʻi he uiké ni mei he talanoa fakatātā ʻa e Fakamoʻuí ki he vainé mo e ngaahi vaʻá? ʻE lava ke ke ʻomi ha fanga kiʻi ʻakau iiki ki he kalasí pea fakaʻaongaʻi ia ke tokoni ki he kau mēmipa ʻo e kalasí ke nau sioloto ki he talanoa fakatātā ʻa e Fakamoʻuí. Hili hoʻomou lau fakakalasi e Sione 15:1–12, ʻe lava ke mou aleaʻi e ʻuhinga ʻo e “nofo maʻu ʻia [Kalaisí]” (Sione 15:4). Te ke lava ʻo fakaafeʻi ha kau mēmipa ʻe niʻihi ʻo e kalasí ke nau vahevahe e founga kuo nau ʻilo ai e moʻoni ʻa e Sione 15:5. (Vakai foki ki he lea ʻa ʻEletā Sefilī R. Hōlani ʻi he “Ngaahi Maʻuʻanga Tokoni Kehé.”) ʻE ala ʻaonga foki ʻa e foʻi vitiō “The Will of God” (LDS.org) ʻi he fealēleaʻaki ko ʻení.

Sione 17

ʻOku haohaoa ʻa e uouangataha ʻa e Tamai Hēvaní mo Sīsū Kalaisí, pea ʻokú Na finangalo ke tau uouangataha mo kitautolu.

• Mahalo he ʻikai te ke lava ʻo akoʻi kotoa e ngaahi moʻoni mahuʻinga ʻi he Sione 17 ʻi ha fealēleaʻaki fakakalasi ʻe taha, ka ko ha founga ʻeni ke tokoni ke maʻu ai ʻe he kau akó ha ngaahi moʻoni lahi ange. Lisi ʻi he palakipoé e ngaahi fakakaukau mei he Sione 17, hangē ko ʻení:

  • Ko hotau vā fetuʻutaki mo Sīsū Kalaisí

  • Ko e vā fetuʻutaki ʻo Sīsū Kalaisi mo ʻEne Tamaí

  • Ko hotau vā fetuʻutaki mo e toenga ʻo e māmaní

  • Ko hotau vā fetuʻutaki ʻi heʻetau hoko ko ʻEne kau ākongá

  Fakaafeʻi e mēmipa takitaha ʻo e kalasí ke nau fili ha taha ʻo e ngaahi fakakaukau ko ʻení pea lau ʻa e Sione 17, ʻo kumi e ngaahi veesi ʻoku felāveʻi mo iá. Kole ki ha kau mēmipa ʻo e kalasí ke vahevahe e meʻa ne nau akó.

Poupouʻi ʻa e Ako ʻi ʻApí

Ke poupouʻi e kau akó ke nau lau e Mātiu 26; Maʻake 14; Luke 22; mo e Sione 18 ʻi he uike ka hoko maí, te ke lava ʻo talaange te nau lau ʻi he ngaahi veesi ko ʻení fekauʻaki mo ha taha ʻo e ngaahi momeniti mahuʻinga ʻi he palani maʻongoʻonga ʻa e ʻOtuá ki he fakamoʻuí.

Ngaahi Maʻuʻanga Tokoni Kehé

Sione 13–17

Ngaahi vitiō fekauʻaki mo e ʻofá ʻi he LDS.org.

• “Ke Mou Feʻofaʻaki”

• “Ko e Feilaulau, Foaki, mo e ʻOfa ʻa e Ngaahi Fāmilí”

• “Teuteuʻi ʻo Tōmasi  S. Monisoní: Na‘á ne ako ʻa e Manavaʻofá ʻi Heʻene Kei Talavoú”

Ko e Laumālie Māʻoniʻoní.

• Ngāue 2:37–38; Kalētia 5:22–23; 1 Nīfai 10:17–19; 2 Nīfai 32:3–5; Mōsaia 3:19; 3 Nīfai 27:20; Molonai 8:26; 10:4–5; Tokāteline mo e Ngaahi Fuakava 8:2–3; 42:17

• Robert D. Hales, “Ko e Laumālie Māʻoniʻoní,” Ensign pe Liahona, Mē 2016, 105–7

• Henry B. Eyring, “Ko e Hoko ʻa e Laumālie Māʻoniʻoní ko Ho Takauá,” Ensign pe Liahona, Nōvema 2015, 104–7

• David A. Bednar, “Maʻu ʻa e Laumālie Māʻoniʻoní,” Ensign pe Liahona, Nōvema 2010, 94–97

Nofo Maʻu ʻia Kalaisi.

ʻI hono ʻiloʻi ʻoku ʻi ai e ngaahi ʻuhinga tuʻuloa mo e tukupā ʻo e foʻi lea nofo maʻú naʻe akonaki ʻa ʻEletā Jeffrey R. Holland ʻo pehē:

Ko e ongo ʻoku ʻomi ʻe he foʻi [lea] ko ʻení ʻoku ʻikai ko e ‘nofo pē—ka ko e nofo ʻo taʻengata.’ Ko e fakaafe ia e pōpoaki ʻo e ongoongoleleí. … Haʻu, kae haʻu ke nofo. Haʻu mo ha loto fakapapau mo faʻa kātaki. …

“Naʻe pehē ʻe Sīsū, ‘Ka [mou] māvae mo au, ʻe ʻikai te mou faʻa fai ha meʻa’ [Sione 15:5]. ʻOku ou fakamoʻoni ko e moʻoni ia ʻa e ʻOtuá. Ko Kalaisi e meʻa kotoa kiate kitautolu pea ʻoku totonu ke tau nofo maʻu ʻiate Ia, ʻo tuʻu mālohi mo tuʻu maʻu ʻo taʻengata. Kuo pau ke tau pikitai kiate Ia, ko hotau Fakamoʻuí pea ki Hono Siasí, ʻa ia kuo fakahuafa ʻaki ʻa Hono huafa toputapú, kae lava ke fua mo matala ʻa e ongoongoleleí ʻo faitāpuekina ʻetau moʻuí. Ko e vainé Ia, ko e maʻuʻanga moʻoni ia ʻo hotau mālohí pea mo e maʻuʻanga pē ʻe taha ʻo e moʻui taʻengatá. ʻIate ia, he ʻikai ngata pē ʻi heʻetau kātakí ka te tau ikuna foki ʻi he meʻa toputapú ni, ʻa ia he ʻikai te ne teitei liʻaki kitautolú” (“Abide in Me,” Ensign pe Liahona, May 2004, 32).

Fakatupulaki ʻEtau Founga Akoʻí

Fakaafeʻi ʻa e Laumālié “He ʻikai ha faiako he moʻui fakamatelié, neongo ʻene mohu pōtoʻi ngāue pe taukeí, te ne lava ʻo fetongi e Laumālié. Ka te tau lava ʻo hoko ko ha ngaahi meʻangāue ʻi he toʻukupu ʻo e ʻOtuá ke tokoni ki Heʻene fānaú ke nau faiako ʻaki e Laumālié. Ke fai ʻení, ʻoku tau fakaafeʻi e tākiekina ʻa e Laumālié ki heʻetau moʻuí pea tau poupouʻi e niʻihi ʻoku tau akoʻí ke nau fai e meʻa tatau pē. … ʻE lava ke fakaafeʻi mai e Laumālié ʻe he ngaahi hiva toputapú, folofolá, lea e kau palōfita ʻo e ngaahi ʻaho kimui ní, fakahaaʻi ʻo e ʻofá mo e fakamoʻoní pea mo e ngaahi momeniti fakalaulaulotó” (Faiako ʻi he Founga ‘a e Fakamoʻuí, 10).