“3–9 Sune. Sione 13–17: ‘Mou Nofo Maʻu ʻi Heʻeku ʻOfá’” Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: Fuakava Foʻou 2019 (2019)
“3–9 Sune. Sione 13–17,” Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: 2019
Ko e Fakamanatu Kiate Au,tā ʻe Walter Rane
3–9 Sune.
Sione 13–17
“Mou Nofo Maʻu ʻi Heʻeku ʻOfá”
ʻI hoʻo lau ʻa e ngaahi akonaki ʻa e Fakamoʻuí ʻi he Sione 13–17, ʻe tokoniʻi koe ʻe he Laumālie Māʻoniʻoní ke ke ʻiloʻi ʻa e ngaahi pōpoakí. Hiki e ngaahi ongo ʻokú ke maʻú.
Lekooti e Ngaahi Ongo ʻOkú ke Maʻú
ʻOku tau ui ia ʻi he ʻahó ni ko e “ʻOhomohe Fakaʻosí”, ka ʻoku ʻikai ke tau ʻiloʻi pe naʻe ʻiloʻi moʻoni ʻe he kau ākonga ʻa Sīsuú, ʻi heʻenau fakataha mai ki he kātoanga Laka Atú, ko ʻenau maʻu meʻatokoni fakaʻosi pē ʻeni mo honau ʻEikí kimuʻa peá Ne pekiá. Ka naʻe ʻafioʻi ʻe Sīsū “kuo hoko hono ʻahó” (Sione 13:1). ʻE vave ʻEne aʻusia ʻa e mamahi ʻi Ketisemaní, ʻa hono lavakiʻi mo fakafisingaʻi Ia ʻe Hono ngaahi kaungāmeʻa ofi tahá, mo e pekia fakamamahi ʻi he kolosí. Neongo ʻa e ngaahi meʻa kotoa ko ʻeni naʻe hanganaki mai kiate Iá, ka naʻe ʻikai tokanga ʻa Sīsū ia kiate Ia ka ke malanga ki Heʻene kau ākongá. Naʻá Ne fufulu ʻi he loto fakatōkilalo honau vaʻé. Naʻá Ne akoʻi kiate kinautolu ʻa e ʻofá. Pea naʻá Ne toe fakapapauʻi ange, he ʻikai ʻaupito ke Ne liʻaki kinautolu pea ʻoku ʻikai fie maʻu ke nau teitei liʻaki Ia. ʻOku maʻu ʻe he kau ākonga ʻi he kuonga muʻá mo e kuongá ni ʻa e nongá ʻi Heʻene ngaahi talaʻofá: “ʻE ʻikai te u tuku ke tuenoa ʻa kimoutolu” (Sione 14:18). “Kapau ʻoku mou fai ʻeku ngaahi fekaú, te mou nofo ʻi heʻeku ʻofá” (Sione 15:10).
Ngaahi Fakakaukau ki hono Ako Fakataautaha ʻo e Folofolá
ʻOku ou fakahaaʻi ʻeku ʻofa kia Sīsū Kalaisí ʻaki hono tauhi ʻEne fekau ke ʻofá.
Naʻe ʻosi akoʻi mai ʻe Sīsū ko e ongo fekau lalahi tahá ʻoku fekauʻaki ia mo e ʻofá (vakai, Mātiu 22:34–40). ʻI hono fakamamafaʻi ʻení, naʻe hoko ʻa e ʻofá ko ha kaveinga mahuʻinga ia ʻo ʻEne ngaahi fakahinohino fakaʻosi ki Heʻene kau ʻAposetoló. ʻI hoʻo lau ʻa e Sione 13–15, te ke lava ʻo fakaʻilongaʻi ʻa e taimi kotoa pē ʻoku ʻasi ai ʻa e foʻi ko e ʻofa.
Mahalo te ke fakatokangaʻi ʻoku toutou fakaʻaongaʻi fakataha ʻa e foʻi lea ngaahi fekau mo e foʻi lea {23}ʻofá, ʻi he ngaahi vahe ko ʻení. Ko e hā te ke lava ʻo ako mei he ngaahi akonaki ʻa e Fakamoʻuí ki he fekauʻaki ʻa e ʻofá mo e ngaahi fekaú? Ko e hā ha toe ngaahi lea kehe ʻokú ke ʻiloʻi ʻoku toutou fakaʻaongaʻi fakataha mo e foʻi lea ko e ʻofa ʻi he ngaahi vahe ko ʻení? Fakatatau ki he meʻa ʻokú ke akó, fakakaukau ke ke hiki ha fakamatala nounou ki he ngaahi akonaki ʻa e Fakamoʻuí ki he ʻofá.
Vakai foki D. Todd Christofferson, “Nofomaʻu ʻi Heʻeku ʻOfá,” Ensign pe Liahona, Nōvema 2016, 48–51.
‘Oku tokoniʻi au ʻe he Laumālie Māʻoniʻoní ke u fakahoko ʻeku taumuʻá ko ha ākonga ʻa Sīsū Kalaisi.
Naʻe ʻafioʻi ʻe Sīsū Kalaisi ʻe vave ʻEne mavahe mei Heʻene kau ākongá, pea naʻá Ne ʻafioʻi te nau fie maʻu ha tokoni fakalāumalie ʻi he taimi te Ne mavahe aí. Ke tokoni ke mahino kiate kinautolu e founga te nau maʻu ai e tokoni ko ʻení, naʻá Ne akoʻi kiate kinautolu fekauʻaki mo e Laumālie Māʻoniʻoní. Ko e hā ʻokú ke ako fekauʻaki mo e ngaahi fatongia ʻo e Laumālie Māʻoniʻoní mei he folofola ʻa e Fakamoʻuí ʻi he ngaahi veesi ko ʻení?
Ko e hā naʻe fie maʻu ai ʻe he kau ākongá ʻa e faʻahinga tokoni ko ʻení mei he Laumālie Māʻoniʻoní? Kuo fakahoko fēfē ʻe he Laumālie Māʻoniʻoní ʻa e ngaahi fatongia ko ʻení ʻi hoʻo moʻuí? ʻI hoʻo hokohoko atu ke ako ʻa e Fuakava Foʻoú, fekumi ki he ngaahi founga naʻe tāpuekina ai ʻe he Laumālie Māʻoniʻoní ʻa e kau ākonga ʻa Sīsuú. ʻE founga fēfē ha makehe hoʻo moʻuí kapau naʻá ke fakaafeʻi e Laumālie Māʻoniʻoní ke Ne tākiekina lelei ange koe?
Vakai foki, Mōsaia 3:19; 5:1–3; 3 Nīfai 27:20; Molonai 8:25–26; 10:5; Tokāteline mo e Ngaahi Fuakava 11:12–14; Mōsese 6:61 .
ʻI he taimi te u nofo ai kia Kalaisí, te u ʻomi ha ngaahi fua lelei.
ʻOku ʻuhinga nai ki he hā ke “nofo [ʻia Kalaisi]”? (Sione 15:4). Ko e “fua” fē ʻokú ne fakahaaʻi ʻokú ke pipiki ki he vainé, ʻa ia ʻokú ne fakafofongaʻi ʻa Sīsū Kalaisí?
ʻOku hūfia ʻe Sīsū Kalaisi ʻEne kau ākongá.
ʻOku ʻiloa ʻa e folofola ʻa Sīsū ʻi he Sione 17 ko e Lotu Hūfekiná. ʻI he lotu ko ʻení, naʻe lotu ai ʻa Sīsū maʻa ʻEne kau ʻAposetoló mo “kinautolu foki ʻe tui kiate [Ia] ʻi heʻenau leá” (Sione 17:20). Ko hono ʻuhingá naʻá Ne lotu maʻau. Ko e hā naʻe kole ʻe Sīsū mei Heʻene Tamaí maʻau mo e kakai kehe ʻoku nau tuí?
ʻOku toe akoʻi foki ʻe he lotu ko ʻení ʻa e ngaahi moʻoni mahuʻinga mo taʻengatá. Ko e hā ha ngaahi moʻoni ʻokú ke ʻiloʻi ʻi hoʻo lau iá?
ʻOku fēfē nai e faaitaha ʻa Sīsū Kalaisi mo e Tamai Hēvaní?
ʻI Heʻene lotu ʻi he Sione 17, naʻe fakamamafaʻi ai ʻe Sīsū ʻEne taha mo e Tamaí, ka ʻoku ʻikai ʻuhinga ʻeni ʻokú Na sino pē taha mo e Tamaí. ʻI he taimi naʻe lotu ai ʻa e Fakamoʻuí ke taha ʻEne kau ākongá “ʻo hangē foki”—pe ʻi he founga tatau—ko ʻEne taha mo e Tamaí (Sione 17:22), naʻe ʻikai ko ʻEne kolé ke hoko ʻa e kau ākongá ʻo sino pē taha. Ka, ko Hono finangaló ke nau fiefia ʻi he uouangataha tatau ʻokú Ne maʻu mo e Tamaí—ʻa e uouangataha haohaoa ʻi he taumuʻa, loto, mo e fakakaukau.
Ngaahi Fakakaukau ki he Ako Fakafāmili e Folofolá mo e Efiafi Fakafāmili ʻi ʻApí
ʻI hoʻo lau mo ho fāmilí e folofolá, ʻe lava ke tokoniʻi koe ʻe he Laumālié ke ke ʻiloʻi ʻa e ngaahi tefitoʻi moʻoni ke fakamamafaʻi mo aleaʻí kae lava ke feau e ngaahi fie maʻu ho fāmilí. Ko ha ngaahi fokotuʻu fakakaukau ʻeni:
Ko e hā ʻoku ako ʻe hotau fāmilí mei he sīpinga ʻa e Fakamoʻuí ʻi he ngaahi veesi ko ʻení? Ko e hā ha ngaahi founga te tau lava ai ʻo muimui ki Heʻene tā sīpingá?
ʻI he taimi te mou aleaʻi ai ʻa e ngaahi akonaki ʻa e Fakamoʻuí fekauʻaki mo e ʻofá, fakakaukau foki ki he ngaahi lea ko ʻeni meia Palesiteni Thomas S. Monson: “ʻI he kuongá ni, ʻoku ʻikai mo ha toe feituʻu ʻe fie maʻu lahi ange ai e fakavaʻe pau ko ia ʻo e ʻofá ka ko ʻapi. Pea ʻoku ʻikai totonu ke ʻilo ʻe māmani ha sīpinga lelei ange ʻo e fakavaʻe ko iá ka ʻi he ʻapi ʻo e Kāingalotu ʻo e Ngaahi ʻAho Kimui Ní ʻa ia kuo hoko e ʻofá ko e uho ʻo e moʻui honau fāmilí. … Ko e ʻofá ko e ʻelito moʻoni ia ʻo e ongoongoleleí, ko e ʻulungaanga fakaʻeiʻeiki taha ia ʻo e laumālie ʻo e tangatá” (“ʻO Hangē ko ʻEku ʻOfa Kiate Kimoutolú,” Ensign pe Liahona, Fep. 2017, 4–5).
ʻE lava ke fiefia ho fāmilí ʻi hono tā ha ngaahi fakatātā pe tohi ʻi ha laʻipepa haati ʻa e meʻa ʻoku nau saiʻia ai fekauʻaki mo ha mēmipa kehe ʻi he fāmilí. Te nau lava ʻo tuku takai holo e ʻū laʻipepa haati ko ʻení ʻi he lotofalé ko ha fakamanatu ke fakahaaʻi e ʻofa ki he niʻihi kehé.
Mahalo ʻe fakafiefia ke lau ʻa e ngaahi veesi ko ʻení ʻi tuʻa ʻi ha veʻe fuʻu vaine, fuʻu ʻakau, pe ko ha ʻakau ʻe taha. ʻOku tokoni fēfē ʻa e ʻekitivitī ko ʻení ke mahino lelei ange ki ho fāmilí ʻa e ngaahi akonaki ʻa e Fakamoʻuí?
Naʻe akonaki ʻa Sīsū, “Ko au ko e vainé ko e ngaahi vaʻá ʻa kimoutolu” (Sione 15:5).
ʻOkú ke pehē ko e hā naʻe fakatokanga ai ʻa Sīsū Kalaisi ki Heʻene kau ākongá kau ki he fakatangá? ʻOku fakatangaʻi fēfē ʻa e kau ākonga ʻa Kalaisí ʻi he kuongá ni? ʻE tokoniʻi fēfeeʻi kitautolu ʻe he faleʻi ʻa e Fakamoʻuí ʻi he ngaahi veesi ko ʻení ʻi he taimi te tau fehangahangai ai mo e fakatangá?
Kuo ikunaʻi fēfē ʻe Kalaisi ʻa e māmaní? Kuo ʻomi fēfē ʻe Heʻene Fakaleleí ʻa e nongá mo e fiefiá? (vakai foki T&F 68:6).
ʻE founga fēfē ha toe uouangataha ange hotau fāmilí ʻo hangē ko Sīsū Kalaisi mo e Tamai Hēvaní? Ko e hā ʻoku finangalo ai ʻa e ʻEikí ke tau uouangatahá? (vakai foki, T&F 38:27).
Ki ha ngaahi fakakaukau lahi ange ki hono ako’i ‘o e fānaú, vakai ki he lesoni ʻo e uike ko ‘eni ʻi he Haʻu, ‘o Muimui ʻIate Au— Ki he Palaimeli.
Fakatupulaki ʻEtau Founga Akoʻí
Ngāueʻaki e ngaahi naunau hiki ki he fanongó. ʻI hoʻo akoʻi ki ho fāmilí ʻa e folofolá, ʻe ala tokoni haʻamou fanongo ki he folofola kuo hiki pea lau maí ʻa ia ʻoku maʻu ʻi he. LDS.org pe Gospel Library app. ʻE ongo mālohi ange ha fanongo ki heni tautautefito ki he Sione 13–17 he ʻoku ʻi he ngaahi vahe ko ʻení ha konga lahi ʻo e ngaahi folofola ʻa e Fakamoʻuí.
Tamaioʻeiki Pulé, tā ʻe Del Parson