“Agosto 12–18. Taga Roma 7–16: ‘Abakem ti Dakes gapu iti Naimbag’” Umaykayo, Sumurot Kaniak—Para iti Sunday School: Baro a Tulag 2019 (2019)
“Agosto 12–18. Taga Roma 7–16,” Umaykayo, Sumurot Kaniak—Para iti Sunday School: 2019
Agosto 12–18
Taga Roma 7–16
“Abakem ti Dakes gapu iti Naimbag”
Basaem ti Taga Roma 7–16, ken isuratmo dagiti impresion a maawatmo maipapan no kasano a makatulong kadagiti miembro ti klasem a makasursuro manipud kadagiti nasantuan a kasuratan. Iti damo dagiti impresionmo ket mabalin a kasla simple a kapanunotan, ngem bayat ti panangutobmo kadagitoy, makapagbalinda a napapateg nga aktibidad iti panagsursuro.
Isuratmo Dagiti Impresionmo
Yawis ti Panagbibinninglay
Nasken a marikna dagiti miembro ti klase a nawayada a mangibinglay iti ania man a nangparegta kadakuada iti bukod wenno sangapamiliaan a panagadalda, ngem no dadduma makatulong nga agkiddaw iti kapanunotan maipapan iti maysa a masinunuo a banag. Kas pagarigan, mabalinmo a basaen ti Taga Roma 10:17 ken 15:4 ket idawatmo kadakuada a mangibinglay kadagiti nasantuan a kasuratan a mangpapigsa iti pammatida, wenno ikkam ida iti namnama.
Isuro ti Doktrina
Babaen ken ni Jesucristo, mabalintayo ti agtawid iti amin nga adda iti Nailangitan nga Ama.
-
Kas dagiti Santo iti Ud-udina nga Aldaw, mamatikami a dagiti ragup dagiti balikas a kas “agtawid ti Dios” ken “makipagtawid ken ni Cristo” kayatna a sawen nga iti tulong ni Jesucristo, makapagbalintayo a kas iti Nailangitan nga Ama ken umawat iti amin nga adda Kenkuana (Taga Roma 8:17; kitaen met iti DkK 132:19–20). Tapno matulongan dagiti miembro ti klase a mangkita no kasano a naisuro daytoy a doktrina iti intero a nasantuan a kasuratan, mabalinmo nga awisen ti kagudua iti klase tapno mangadal iti sumagmamano a bersikulo iti Biblia a nakalista iti “Dagiti Nainayon a Resources” ken ti sabali pay a kagudua tapno mangadal kadagiti bersikulo manipud iti nasantuan a kasuratan iti ud-udina nga aldaw, iti pay “Dagiti Nainayon a Resources.” Kalpasanna mabalin dagiti miembro ti klase ti mangisuro iti tunggal maysa no ania ti nasursuroda. Mangted kadakuada iti oras a mangilawlawag no apay napateg unay daytoy a doktrina. Kas pagarigan, ania ti pakaidumaan a maaramid daytoy iti panagbiagtayo a mangammo a makapagbalintayo nga “agtawid iti Dios, ken makipagtawid ken Cristo”? (Taga Roma 8:17).
-
Ti pananglaglagip nga agnanayon a bendision ti agur-uray kadagiti napudno ket makatulong kadatayo no maipasangotayo iti sulisog wenno pannubok (kitaen iti Taga Roma 8:18). Ti maysa a simple a wagas tapno mailadawan daytoy a pagbatayan ket mangidrowing iti maysa a pagtimbangan iti pisarra; kiddawem kadagiti miembro ti klase a mangilista iti maysa a bangir ti sumagmamano a pannubok a mabalin a pakaipasanguan dagiti tattao. Kalpasanna mabalinda a sukisoken ti sumagmamano kadagiti nasantuan a kasuratan iti “Dagiti Nainayon a Resources” ket ilistada iti sabali a bangir ti pagtimbangan dagiti pangiladawan dagiti agnanayon a bendision a sumangbay kadagiti maipasango iti pannubok a sipupudno. Kasano a maipada dagiti pannubok kadagiti naikari a bendision? Ania koma ti sawentayo iti maysa a tao nga agsaludsod kadatayo no napateg kadi ti agbalin a napudno kadagiti bilin ti Apo?
-
Ti analohia nga inted ni Elder Dallin H. Oaks iti “Dagiti Nainayon a Resources” ket makatulong kadagiti miembro ti klase a paglilinnawaganda no kasano a makapagsaganatayo tapno agbalin nga “agtawid iti Dios” (Taga Roma 8:17). Ania dagiti sumagmamano kadagiti “paglintegan ken pagbatayan” a dinakamat ni Elder Oaks?
“Siasino ti mangisinanto kadatayo iti ayat ni Cristo?”
-
Ti sangsangkamaysa a panaglilinnawag iti Taga Roma 8 ket mabalin a mangted iti gundaway a mangtulong kadagiti miembro ti klase a mangrikna iti ayat ti Mangisalakan. Ibilang ti panangi-display iti sibubukel a panid ti ladawan iti balabala itoy a lawas iti Umaykayo, Sumurot Kaniak—Para kadagiti Indibidual ken Pamilia wenno sabali pay a ladawan ni Jesucristo bayat ti panangbasayo iti Taga Roma 8:18, 28, 31–39 kas maysa a klase. Ania dagiti kapanunotan wenno rikna nga adda kadagiti miembro ti klase iti kalpasan ti panangbasam kadagitoy a bersikulo? Mabalinmo nga awisen ti sumagmamano a miembro ti klase tapno mangibinglay iti no kasano a nakagun-odda iti pammaneknek maipapan kadagiti kinapudno a nasarakanda kadagitoy a bersikulo. Mabalin pay nga agkantakayo iti maysa a himno kas maysa a klase (wenno kiddawem iti maysa a tao nga agtokar iti maysa a bilang ti musika) maipapan iti ayat ti Dios ken ni Jesucristo, kas iti “Anian a Ragsakko” (Dagiti Himno ken Kanta dagiti Ubbing, 33438 864). Ania a balikas wenno ragup dagiti balikas manipud kadagitoy a kanta ti makatulong kadagiti miembro ti klase a mangrikna iti ayat ti Nailangitan nga Ama ken ni Jesucristo?
Naipatungpal amin a bilin ti Dios iti bilin nga agayat.
-
Tapno makatulong kadagiti miembro ti klase a mangkita no kasano nga amin a bilin ket “ababa a naipaawat iti” bilin nga ayatem ti kaarrubam (Taga Roma 13:9), awisem ida a mangilista iti pisarra ti amin a bilin a mapanunotda. Aggigiddankayo a mangbasa iti Taga Roma 13:8–10 ken Mateo 22:36–40, ket paglilinnawaganyo a kas maysa a klase ti pagnaigan ti panagayat iti Dios ken iti padatayo a tao ken ti panagtungpal iti tunggal maysa kadagiti bilin a nailista iti pisarra. Kasano a balbaliwan daytoy a kinapudno ti wagas a panagpanunottayo maipapan kadagiti bilin ken panagtungpal?
Nasken a liklikantayo ti pananghusga kadagiti pili ti dadduma ken ti panagbalintayo a naespirituan a lapped kadakuada.
-
Tapno mangted iti sumagmamano a konteksto iti Taga Roma 14, mabalinmo a dakamaten a nagsisinnupiat ti sumagmamano a Santo iti Roma maipapan iti nadumaduma nga ugali iti pannangan, panangrambak kadagiti piesta opisial, ken dadduma pay a kaugalian a mainaig iti kultura. Ania dagiti maipada a situasion a pakaipasanguantayo iti agdama? Nalabit a mabalin a basaen dagiti miembro ti klase ti Taga Roma 14 ket mangted iti maysa a binatog a pakagupgopan ti balakad ni Pablo. Ania a balakad ti maibinglaytayo iti tunggal maysa maipapan iti no kasano a liklikan ti panagbalin a managhusga? Makatulong ti palawag ni Presidente Dieter F. Uchtdorf iti “Dagiti Nainayon a Resources.”
Yallukoy ti Panagsursuro iti Pagtaengan
Tapno maparegta dagiti miembro ti klase a mangbasa iti 1 Taga Corinto 1–7, mabalinmo nga isarita kadakuada a naglaon daytoy iti balakad ni Pablo kadagiti miembro nga agnanaed iti maaw-awagan a kas maysa kadagiti kadadadaksan ken managrukbab iti didiosen a siudad iti nagkauna a lubong.
Dagiti Nainayon a Resources
Panangawat iti “amin nga adda [iti] Ama” (DkK 84:38).
Manipud iti Biblia
Manipud iti nasantuan a kasuratan iti ud-udina nga aldaw
Insalaysay ni Elder Dallin H. Oaks ti sumaganad a pangngarig:
“Ammo ti nabaknang nga ama a no nasken a mangipaay isuna iti kinabaknang iti maysa nga anak a saan pay a nakapatan-ay iti kasapulan a kinasirib ken kinamanakem, nalabit a madadael ti tawid. Kinuna ti ama iti anakna:
“‘Amin nga adda kaniak tarigagayak nga ited kenka—saan laeng ti kinabaknangko, no di ketdi pay ti posision ken saadko kadagiti tao. Ta ti adda kaniak maitedko a silalaka kenka, ngem dayta kas iti siak nasken a gun-odem para iti bagim. Maikarikanto iti tawidmo babaen ti panangsursurom iti nasursurok ken babaen ti panagbiagmo kas iti panagbiagko. Itdekto kenka dagiti paglintegan ken pagbatayan a nakagun-odak iti kinasirib ken kinamanakem. Surotem ti pagwadak, a mangparparmek kas iti panangparmekko, ket agbalinkanto a kas kaniak, ket kukuamto ti amin nga adda kaniak’” (“The Challenge to Become,” Ensign, Nob. 2000, 32).
“Makipagtawid ken Cristo.
“Ibilang dagiti Santo iti Ud-udina nga Aldaw ti amin a tao kas annak ti Dios iti naan-anay ken kumpleto a kaipapanan; ibilangda ti tunggal tao a nadiosan iti nagtaudan, nakaparsuaan, ken potensial. … Kas met la iti maysa nga ubing a mangpadur-as kadagiti kababalin dagiti nagannak kenkuana iti panaglabas ti panawen, ti nadiosan a kinatao a tawiden dagiti tao ket mabalin a mapadur-as tapno agbalin a kas iti nadiosan a kinatao ti Nailangitan nga Ama. … Addaan dagiti lallaki ken babbai iti potensial a maitan-ok iti kasasaad ti kinadios” (“Becoming Like God,” Gospel Topics, topics.lds.org).
Pananghusga kadagiti dadduma.
Insuro ni Presidente Dieter F. Uchtdorf:
“Daytoy a topiko maipapan iti pananghusga kadagiti dadduma ket pudno a maisuro iti sermon iti dua a balikas. No maipapan daytoy iti pananggura, panagsaosao, saan a panangikankano, panangumsi, panangimet iti gura, wenno panagtarigagay a mangigapu iti pannakadangran, surotem koma ti sumaganad:
“Isardeng daytoy!
“Kasta ti kasimplena. Gagangay a nasken nga isardengtayo ti pananghusga kadagiti dadduma ket sukatantayo dagiti managhusga a pampanunot ken panagrikna iti puso a napnuan iti ayat para iti Dios ken dagiti annakna. Amatayo ti Dios. Datayo dagiti annakna. Agkakabsattayo amin. … Ti bumper sticker a nakitak itay kallabes … ket naikapet iti likud ti maysa a kotse a ti drayber daytoy ket kasla aglanglanga a bastos, ngem dagiti balikas a nakasurat iti sticker ket mangisuro iti maysa nga adal a nalawag a maawatan. Mabasa daytoy, ‘Dinak husgaan gapu ta maiduma ti panagbasolko iti panagbasolmo,’” (“The Merciful Obtain Mercy,” Ensign wenno Liahona, Mayo 2012, 75).
Panangpadur-as iti Panangisurotayo
Agsapul kadagiti resources a mangsuporta kadagiti pagbatayan. Mainayon kadagiti kapanunotan iti panangisuro iti daytoy a balabala, mabalinmo a balbaliwan dagiti aktibidad manipud iti balabala itoy a lawas iti Umaykayo, Sumurot Kaniak—Para kadagiti Indibidual ken Pamilia tapno usaren iti klasem. (Kitaen met iti Panangisuro iti Wagas ti Mangisalakan, 17–18.)