Corinto

Corinto, Southern Greece, ti Forum ken Civic Center, impinta ni Balage Balogh

Agosto 19–25

1 Taga Corinto 1–7

“Naan-anay Koma ti Panagtitimpuyogyo”

Insuro ni Elder Jeffrey R. Holland a kaaduanna a tao ti “umay [iti simbaan] nga agkalkalikagum a manggun-od iti naespirituan a padas” (“A Teacher Come from God,” Ensign, Mayo 1998, 26). Bayat ti panangbasam iti 1 Taga Corinto 1–7, sikakararag nga utobem no ania ti maaramidmo tapno makatulong a mangparnuay iti naespirituan a padas iti klasem.

Isuratmo Dagiti Impresionmo

icon iti panagbibinninglay

Yawis ti Panagbibinninglay

Ibilangmo ti panangawis kadagiti miembro ti klase a mangisurat no kasano nga inyakemda no ania ti nasursuroda manipud kadagiti nasantuan a kasuratan. Idawat kadagiti sumagmamano a miembro ti klase nga ibinglayda ti no ania ti insuratda.

icon iti panangisuro

Isuro ti Doktrina

1 Taga Corinto 1:10–17; 3

Nasken nga agkaykaysa dagiti miembro ti simbaan ni Cristo.

• Ti panangilawlawag iti umuna a sumagmamano a kapitulo ti 1 Taga Corinto ket mabalin a maysa a gundaway a mangipasdek iti dakdakkel a panagkaykaysa kadagiti miembro ti ward. Mabalinmo nga irugi babaen ti panangidawat kadagiti miembro ti klase a mangisarita maipapan iti maysa a club, grupo wenno team a nakaibilanganda nga addaan iti dakkel a panagkaykaysa. Apay a narikna daytoy a grupo ti panagkaykaysada unay? Kalpasanna mabalinmo ti agsukisok iti sumagmamano a pannursuro ni Pablo maipapan iti panagkaykaysa iti 1 Taga Corinto 1:10–13; 3:1–11. Ania ti isuro dagitoy a bersikulo, a karagpin dagiti padastayo, maipapan iti no ania ti makatulong a mangparnuay iti panagkaykaysa ken no ania ti mangpapeggad iti daytoy? Ania dagiti bendision nga umay kadagiti nagkaykaysa? Ti estoria nga imbinglay ni Presidente Henry B. Eyring iti “Dagiti Nainayon a Resources” ket mabalin pay a makatulong iti daytoy a panaglilinnawag.

• Aramaten ni Pablo ti ladawan ti maysa a pasdek a mangyallukoy iti panagkaykaysa iti 1 Taga Corinto 3:9–17. Kasano a makatulong daytoy nga analohia iti klasem a makaawat a nasaysayaat iti panagkaykaysa? Kas pagarigan, kalpasan ti aggigiddan a panangbasada kadagitoy a bersikulo, saggaysaem nga ikkan dagiti miembro ti klase iti bloke ket agtitinnulongda a mangbukel iti maysa a banag. Iti ania a kaipapanan a datayo ti “bukbuklen ti Dios”? (1 Taga Corinto 3:9). Kasano a buklennatayo a saggaysa ti Dios? Ania dagiti bukbuklentayo a sangsangkamaysa kas pada a Sasanto? Ania ti mabalintayo nga aramiden kas nagkaykaysa a ward a ditayo kabaelan nga aramiden kas indibidual?

1 Taga Corinto 1:17–31; 2; 3:18–20

Tapno maipatungpal ti aramid ti Dios, kasapulantayo ti sirib ti Dios.

• Marikna ti sumagmamano a tao a saanda a kualipikado nga agserbi iti Simbaan gapu ta kurangda iti adal wenno propesional a training. Marikna dagiti dadduma a kualipikadoda gapu ta addaanda iti adal wenno propesional a training. Ti agpada a pannirigan ket mangipakita iti saan a panagkikinnaawatan iti no ania ti pudno mangpakualipikado kadatayo para iti aramid ti Dios. Daytoy ti maysa a kapanunotan a makatulong iti klasem nga agpannuray iti Dios: Bingayem dagiti miembro ti klase kadagiti grupo ket kiddawem kadakuada a mangbasa iti 1 Taga Corinto 1:17–31; 2; wenno 3:18–20 a mangsuksukisok kadagiti balikas kas sirib ken maag. Kalpasanna mabalin nga ibinglayda kadagiti grupoda no ania ti isuro dagitoy a bersikulo maipapan iti panagbalin a masirib iti aramid ti Apo. Ania dagiti banag maipapan iti ebanghelio a mabalin a kasla minamaag iti sumagmamano a tao? Kasano nga ipakita dagitoy a banag ti sirib ti Dios? Nalabit a mabalin pay nga ibinglay dagiti miembro ti klase dagiti padas a nakapagtalkanda iti sirib ti Dios, imbes nga iti bukodda, tapno ipatungpal ti aramidna.

1 Taga Corinto 6:9–20

Sagrado dagiti pisikal a bagitayo.

• Tapno mangirugi iti panaglilinnawag maipapan kadagitoy a bersikulo, mabalinmo nga isurat iti pisarra dagiti saludsod a kas iti sumaganad: Kasano ti panangibilang ti Apo kadagiti bagitayo? Kasano a maigiddiat daytoy iti wagas a kayat ni Satanas a panangipagaruptayo kadagiti bagitayo? Ania ti kayatna a sawen a dagiti bagitayo ti templo ti Espiritu Santo? Awisem dagiti miembro ti klase a mangsarak kadagiti sungbat kadagitoy a saludsod iti 1 Taga Corinto 6:9–20 (kitaen met iti DkK 88:15; Moises 6:8–9).

• Mairaman iti panaglilinnawag maipapan iti kinasagrado dagiti bagitayo iti pagsasaritaan maipapan iti linteg ti kinadalus ti dayaw. Mabalin a makatulong daytoy gapu ta kas Sasanto iti Ud-udina nga Aldaw, masansan nga addaantayo kadagiti gundaway a mangilawlawag kadagiti pammatitayo maipapan iti kinadalus ti dayaw kadagiti mabalin a saan maipada ti pammatina. Nalabit a mabalinmo a saludsoden kadagiti miembro ti klase no ania ti masursuroda manipud ken ni Pablo—kasta met iti dadduma pay a resources ti Simbaan—a makatulong kadakuada a mangilawlawag kadagiti dadduma no apay a napateg ti kinadalus ti dayaw. Sumagmamano kadagitoy a resources ti mangiraman iti nakalista iti “Dagiti Nainayon a Resources.”

icon iti panagsursuro

Yallukoy ti Panagsursuro iti Pagtaengan

Ibagam kadagiti miembro ti klase a no kayatda dagiti nayon pay a kapanunotan maipapan iti no kasano ti agbalin nga ad-adda a nakaykaysada iti asawa, pamilia, wenno ward, agtultuloy ti tema ti panagkaykaysa iti 1 Taga Corinto 8–11.

resources icon

Dagiti Nainayon a Resources

1 Taga Corinto 1–7

Dagiti pagarigan ti panagkaykaysa.

Insuro ni Presidente Henry B. Eyring:

“Naawisak a makipagkararag iti oras ti pannaturog iti maysa a pamilia idi maysaak a sangaili iti pagtaenganda. Ti kabassitan nga ubing ti nakiddaw a mangisao iti kararag. Nagkararag a kas maysa a patriarka para iti tunggal tao iti pamilia, babaen iti nagan. Immulagatko dagiti matak iti apagdarikmat tapno makitak ti rupa dagiti dadduma pay nga ubbing ken dagiti nagannak. Maibagak a nagkaykaysada iti pammati ken puspusoda iti kararag dayta bassit nga ubing a lalaki.

“Sumagmamano a kabsat a babbai iti Relief Society itay kallabes ti sangsangkamaysa a nagkararag bayat ti panagsaganada a mangsarungkar iti ubing pay a balo a babai a ti asawana ket kellaat a natay. Tinarigagayanda a maammuan no ania ti aramidenda ken no kasano nga agtrabahoda a sangkamaysa tapno makatulong a mangisagana ti pagtaengan para iti pamilia ken gagayyem nga umay iti oras ti pumpon. … Immay ti sungbat iti kararagda. Idi nakadanonda iti balay, nagtignay ti tunggal kabsat a babai a mangileppas iti maysa nga aramid. Alisto unay a naisagana ti balay ta sumagmamano a kakabsat a babbai ti nagbabawi ta saanda naaramid ti ad-adu pay. Naisao dagiti balikas a pangliwliwa a naan-anay ti panagtitimpuyog a sangsangkamaysa. Impaayda ti serbisio ti Apo kas sangkamaysa, nagkaykaysa iti puso” (“Our Hearts Knit as One,” Ensign wenno Liahona, Nob. 2008, 68–69).

Dagiti bendision ti kinadalus iti seks.

Iti maysa a Worldwide Devotional para kadagiti Young Adult, kinuna ni Sister Wendy W. Nelson:

“Ti personal a kinadalus ket isu ti tulbek iti pudno nga ayat. No nadaldalus dagiti pampanunot ken riknayo, dagiti balikas ken tignayyo, dakdakkel met ti kabaelanyo a mangted ken umawat iti pudno nga ayat. …

“Kas napateg a paset ti panangipeksa iti ayatda, kayat ti Apo iti agassawa a makiranudda iti datdatlag ken rag-o ti intimasia iti panagasawa [marital intimacy]. …

“… Ania man a banag a mangawis iti Espiritu iti biagyo, ken ti biag ti asawayo ken iti panagasawayo, dumakkelto ti kabaelanyo a mangpadas iti intimasia iti panagasawa [marital intimacy]. … Iti sabali a bangir, ania man a banag a mangpasakit iti Espiritu ket mangpabassitto iti kabaelanyo a makipagkaykaysa iti asawayo. …

“Ti intimasia iti panagasawa nga insangbay ti Espiritu ket binendisionan ti Apo ken makapasagrado” (“Love and Marriage,” Worldwide Devotional for Young Adults, Ene. 8, 2017, broadcasts.lds.org).

Insuro ni Elder Jeffrey R. Holland:

“Palubosandak a mangyunay-unay a ti intimasia iti tao [human intimacy] ket nailatang iti nagkallaysa nga agassawa gapu ta daytoy ti kangrunaan a simbolo ti naan-anay a panagtipon, maysa a kinaan-anay ken maysa a panagtipon nga inordenan ken inikkan kaipapanan ti Dios. …

“Ngem ti kasta a naan-anay a panagtipon, ti kasta a di mapagkedkedan a panagkumit iti nagbaetan ti maysa a lalaki ken maysa a babai, ket sumangbay laeng babaen ti kinaasideg ken kinamanayon iti katulagan ti panagasawa, nga addaan kadagiti napasnek a kari ken panangikari ti amin a tagikuada— ti mismo a puspuso ken pampanunotda, ken ti amin a panawen ken arapaapda” (“Personal Purity,” Ensign, Nob. 1998, 76).

Inlawlawag ni Elder David A. Bednar: “Dagiti [seksual] a pannakinaig ket saan a basta kuriosidad a masukisok, saan a pagganasan tapno mapnek, wenno maysa a kita ti pagaliwaksayan wenno pagraragsakan tapno mapagballigian iti managimbubukod a wagas. Saan a maysa a pagsakup a nasken a magun-od wenno maysa laeng a tignay a nasken a maaramid. Ketdi, adda dagitoy iti mortalidad ti maysa kadagiti kangrunaan a panangipeksa iti nadiosan a kinatao ken potensialtayo ken maysa a wagas iti panangpapigsa kadagiti nainriknaan ken naespirituan a begkes iti nagbaetan dagiti agassawa. Datayo ti agtignay [agents] a naparaburan iti kinadalus iti dayaw ken nailatangtayo babaen ti nadiosan a tawid kas annak ti Dios—ken saan a babaen dagiti seksual a galad, agdama nga ugali, wenno sekular a pilosopia” (“We Believe in Being Chaste,” Ensign wenno Liahona, Mayo 2013, 42).

Kasano nga agtalinaed a nadalus iti seks.

• “Kinadalus iti Seks,” Para iti Pigsa dagiti Agtutubo, 35–37

Panangpadur-as iti Panangisurotayo

Paneknekam ti maipapan ken ni Jesucristo. Bayat ti panangisurom, laglagipem ti pagwadan ni Pablo: isu ket “saan nga immay a binuyog ti kinalaing ti pagsasao wenno ti sirib, nga inwaragawag … ti pannakapaneknek ti Dios” (1 Taga Corinto 2:1). Ti simple a pammaneknekmo maipapan iti Mangisalakan ket mabalin nga addaan iti nauneg nga impluensia.