Agosto 26–Septiembre 1. 1 Taga Corinto 8–13: “Dakayo ti Bagi ni Cristo’” Umaykayo, Sumurot Kaniak—Para iti Sunday School: Baro a Tulag 2019 (2019)
“Agosto 26–Septiembre 1. 1 Taga Corinto 8–13,” Umaykayo, Sumurot Kaniak—Para iti Sunday School: 2019
Agosto 26–Septiembre 1
1 Taga Corinto 8–13
“Dakayo ti Bagi ni Cristo”
Insuro ni Elder Richard G. Scott a datayo ket “makapanawtayo iti kapatgan, personal a pannarabay ti Espiritu a di mangngegan” no mapaaytayo a mangisurat ken agresponde kadagiti “umuna a parikna nga umay [kadatayo]” (“To Acquire Spiritual Guidance,” Ensign wenno Liahona, Nob. 2009, 8).
Isuratmo Dagiti Impresionmo
Yawis ti Panagbibinninglay
Nagusar ni Pablo kadagiti analohia ken pangiladawan iti 1 Taga Corinto 8–13, kas iti maysa a tumataray iti maysa a linnumbaan, maysa a bagi ti tao, ken “piangpiang nga umaweng” (1 Taga Corinto 13:1). Ania dagiti nauneg a pannakaammo ken pannakaawat [insights] nga adda kadagiti miembro maipapan iti daytoy a panangiladawan? Kasano a nakatulong daytoy kadakuada tapno maawatanda ti maysa a kinapudno ti ebanghelio?
Isuro ti Doktrina
Maipasangotayo amin iti sulisog, ngem mangipaay ti Apo iti wagas tapno maliklikantayo daytoy.
-
Kasano a matulongam dagiti miembro ti klase a mangtakuat kadagiti nabileg a kinapudno iti 1 Taga Corinto 10:13? Ti maysa a kapanunotan ket panangbingay iti bersikulo iti ababa a ragragup ti balikas, ikkam iti maysa ti sabali a miembro ti klase, ket kiddawem kadagiti miembro ti klase nga ulitenda nga ibaga dagiti ragup ti balikas iti bukodda a balikas. Kas pagarigan, ania ti sabali pay a wagas a pangisao iti “napudno ti Dios” wenno “nasulisog iti nalablabes ngem iti kabaelam”? Kalpasanna mabalinmo nga isubli ti sumagmamano a palawag dagiti miembro ti klase ket sapulem dagiti ad-adu pay a pakausaran iti biagtayo. Mabalin a kabaelan dagiti miembro ti klase a mangibinglay iti padpadas a nakaammuanda a pudno dagiti kari iti daytoy a bersikulo. Ania dagiti nayon pay a nauneg a pannakaammo ken pannakaawat a magun-odtayo kadagitoy a bersikulo manipud iti Alma 13:27–28?
-
Imbes nga ipamaysam kadagiti maitudo a pannulisog ti asino man, mabalin a kayatmo nga ipokus ti panaglilinnawag iti 1 Taga Corinto 10:13 maipapan kadagiti pannulisog nga, iti balikas ni Pablo, “a di met simro kadagiti isu amin a tattao.” Mabalin nga irugi dagiti miembro ti klase babaen panangilasin kadagiti sulisog nga iballaag ni Pablo a maibusor iti bersikulo 1–12. Mabalinda pay nga isingasing dagiti kabaruanan a pagarigan dagiti gagangay a pannulisog, a kas kadagiti sulisog nga agbalin a naulbod, panagsaosao, wenno pananghusga kadagiti dadduma. Kasano a mabalin ti maysa a tao, iti tulong ti Dios, a “libasan” dagitoy a sulisog? Mabalin a kayatmo a yakem ti sumagmamano a situasion.
-
Mabalin a napateg nga ibilang ti 1 Taga Corinto 10:13 iti konteksto iti nasged a tarigagay ni Pablo para iti panagkaykaysa dagiti Santo. Ania ti maaramidtayo a makatulong ti tunggal maysa a “maliklikan” ken “mabaelan” dagiti pannulisog a mabalin a pakaipasanguantayo? Kasano a makatulong ti panagkaykaysa a mapagkedkedantayo ti sulisog?
1 Taga Corinto 10:16–17; 11:23–30
Ti sakramento ti mamagkaykaysa kadatayo kas miembro ti Simbaan ni Cristo.
-
Dagitoy a bersikulo ket makaparegta iti panaglilinnawag maipapan no kasano a mamagkaykaysa ti sakramento iti wardyo iti panagkagumaanyo nga agbalin nga ad-adda a kas iti Mangisalakan. Mabalinmo nga irugi babaen ti panangbasam iti 1 Taga Corinto10:16–17 ken panangsukisokmo no ania ti kaipapanan ti balikas a pannakairaman iti daytoy a konteksto (mabalin a sapulen ti maysa a tao iti diksionario dagiti posible a depinision). Kasano a makatulong kadatayo nga agbalin nga ad-adda a nakaykaysa ti pannakiranud iti sakramento? Ania ti maaramidtayo tapno mapatibker ti panagkaykaysa kabayatan ti miting ti sakramento? Kasano a mainaig iti daytoy a panggep tun-oyen ti balakad ni Pablo a “tunggal maysa sukimatenna ti bagina”? (1 Taga Corinto 11:28).
Nasken nga ikarigatantayo a gun-oden dagiti sagut ti Espiritu tapno mairanud ti amin nga annak ti Nailangitan nga Ama.
-
Kasano a matulongam dagiti miembro ti klasem a mangrebyu kadagiti naespirituan a sagut nga inladawan ni Pablo ket mangilasin iti adu a nadumaduma a naespirituan a sagut? Mabalinmo nga ikkan ida iti maysa a minuto a mangisurat iti listaan dagiti adu a sagut ti Espiritu a mabalinda a panunoten. No nalpasdan, awisem dagiti miembro a mangibinglay no ania ti insuratda agingga a nadakamat ti amin a sagut nga inlistada. Kalpasanna mabalin a saraken dagiti miembro ti klase ti dadduma pay a sagut a mangnayon kadagiti listaanda babaen ti panagsukisok iti 1 Taga Corinto 12 ken iti listaan ni Elder Marvin J. Ashton iti “Dagiti Nainayon a Resources.” Ania kadagitoy a sagut a nakitan dagiti miembro ti klase kadagiti tao nga am-ammoda? Kasano a ti panangpadur-as kadagitoy a sagut ket makatulong kadatayo nga agbalin a kas ken ni Jesucristo?
-
Tapno matulongan dagiti miembro ti klase a mangkita kadagiti pagarigan ti no kasano a makatulong ti panangpadur-as kadagiti naespirituan a sagut iti pannakaitandudo ti Simbaan, ibilangmo ti panangawis kadakuada a mangpanunot kadagiti naespirituan a sagut kadagiti tao iti nasantuan a kasuratan. Para kadagiti kapanunotan, mabalinmo a dutokan ida a mangsukisok iti maysa kadagiti reperensia ti nasantuan a kasuratan iti “Dagiti Nainayon a Resources ket ibinglayda dagiti naespirituan a sagut a mapanunotda nga adda iti dayta a tao. Kasano a nangparabur dagitoy a naespirituan a sagut dagiti tao iti bagbagida ken iti dadduma? Kasano a mausartayo ti naespirituan a sagut a mangbendision kadagiti dadduma ken mangitandudo iti bagi ni Cristo, wenno iti Simbaan? (kitaen iti 1 Taga Corinto 12:12–31; kitaen met iti 1 Taga Corinto 14:12).
-
Tapno matulongan dagiti miembro ti klase a maawatanda no kasano a mapadur-as dagiti naespirituan a sagut, awisem ida a mangbasa iti 1 Taga Corinto 12:27–31; Moroni 7:48; 10:23, 30; Doktrina ken Katulagan 46:8; ken ti adaw ni Presidente George . Cannon iti “Dagiti Nainayon a Resources.” Ania ti isuro kadatayo dagitoy a resources maipapan ti no kasano a mangun-odtayo dagiti naespirituan a sagut? Kasano nga aramidennatayo nga ad-adda pay a kas ken ni Cristo ti panangpadur-as kadagiti naespirituan a sagut? Mangawis kadagiti miembro ti klase a pumili iti maysa a sagut a kayatda a gun-oden ken agkiddaw iti tulong ti Apo iti pananggun-od iti dayta a sagut.
Ti panagayat iti pada a tao [charity] ti kaindaklanan a naespirituan a sagut.
-
Ipagarup ti sumagmamano a tao a ti charity [panagayat iti pada a tao] a kas donasion kadagiti napanglaw wenno panangngaasi iti dadduma. Idinto a pudno a makaipakita dagitoy a banag iti charity wenno panangayat iti pada a tao, nalawlawa pay ti panangiladawan ni Pablo. Tapno matulongan dagiti miembro ti klase a mangamiris iti daytoy, mabalinmo nga idawat kadakuada a siuulimek a mangutob iti 1 Taga Corinto 13 ket panunotenda ti maysa a tao a nga am-ammoda a maysa a nasayaat a pagwadan ti maysa wenno ad-adu nga aspekto ti panangayat iti pada a tao a dinakamat ni Pablo. Mabalin nga iladawan ti sumagmamano a miembro ti klase ti tao a napanunotda ken ti maysa a padas a nangtedan ti tao iti pagwadan maipapan iti panagayat iti pada a tao. Mabalinmo pay nga ilista iti pisarra dagiti paset ti panangiladawan ni Pablo ket awisem dagiti miembro ti klase a mangiburay kadagiti kapanunotan maipapan iti no ania ti kaipapanan ti “managitured” wenno “saan a nalaka nga agluksaw” (1 Taga Corinto 13:4–5). Kasano nga impagwadan ti Mangisalakan dagitoy a kababalin ti panagayat iti pada a tao? Kasano ti panangpadur-astayo iti panagayat iti pada a tao? (kitaen iti Moroni 7:46–48).
Yallukoy ti Panagsursuro iti Pagtaengan
Ammo kadi dagiti miembro ti klasem a naibasar iti Biblia dagiti doktrina ti panagbuniag para kadagiti natay ken ti tallo a tukad ti gloria? Ibagam kadakuada a masursurodanto maipapan kadagitoy a kinapudno bayat ti panagadalda iti 1 Taga Corinto 14–16 itoy a lawas.
Dagiti Nainayon a Resources
Dagiti naespirituan a sagut a mabalin a diyo pay napanunot.
Imbinglay ni Elder Marvin J. Ashton dagitoy a pagarigan ti inawaganna a “saan unay a madlaw a sagsagut” ti Espiritu: “Ti sagut ti panagsaludsod; ti sagut ti panangipangag; ti sagut ti panagdengngeg ken panangusar iti naalumamay, bassit a timek; ti sagut ti pannakabael nga agsangit; ti sagut ti panangliklik iti panagsusupanget; ti sagut ti pannakianamong; ti sagut ti panangliklik iti awan kaes-eskanna a panangdagdagullit; ti sagut ti panagkagumaan a manggun-od iti kinalinteg; ti sagut ti saan a panaghusga; ti sagut ti panangsapul iti Dios para iti tarabay; ti sagut iti panagbalin a maysa a disipulo; ti sagut ti panangaywan iti dadduma; ti sagut ti pannakabael nga agutob; ti sagut ti panangidaton iti kararag; ti sagut ti panangiburay iti nabileg a pammaneknek; ken ti sagut ti panangawat iti Espiritu Santo” (“There Are Many Gifts,” Ensign, Nob. 1987, 20).
Dagiti pagarigan dagiti naespirituan a sagut iti nasantuan a kasuratan.
Ikagumaanyo a gun-oden dagiti naespirituan a sagut.
Kinuna ni Presidente George Q. Cannon (1827–1901) ti Umuna a Panguluen a pagrebbengantayo “ti agkararag iti Dios tapno mangted [kadatayo] kadagiti sagut a mangaturto kadagiti pagkurangan[tayo]. … Naisangratda para iti daytoy a panggep. Awan ti tao a rumbeng nga agkuna iti, ‘O, diak kabaelan nga ikkaten daytoy; ugalikon daytoy.’ Saan a mapalinteg iti daytoy, gapu ta inkari ti Dios nga ikkanatayo iti pigsa a mangatur kadagitoy a banag, ken mangted iti sagsagut a magpukawto a naan-anay kadagitoy. Siasino man kadakayo ti agkurang iti kinasirib, pagrebbenganna ti agdawat iti Dios para iti sirib. Kasta met iti amin a banag” (Millennial Star, Abr. 23, 1894, 260).
Panangpadur-as iti Panangisurotayo
Agbiagka a mayannanurot kadagiti pagbatayan nga isursurom. Ti panagbiag a mayannurot kadagiti pagbatayan nga isursurom ket mangtulongto kenka a nabilbileg ti panangipaneknekmo maipapan kadagitoy. Insuro ni Pablo, “Kasta met imbilin ti Apo a dagiti mangikasaba iti ebanghelio agbiagda koma gapu iti ebanghelio” (1 Taga Corinto 9:14).