Septiembre 2–8

1 Taga Corinto 14–16

“Ti Dios Saan a Dios ti Riri, no Di ti Talna”

Sakbay ti panangrebyu iti daytoy a balabala, basaen ti 1 Taga Corinto 14–16. Isuratmo dagiti umuna nga impresionmo maipapan iti no ania dagiti kinapudno a mangtulongto kadagiti miembro ti klasem, ken agtultuloy nga agkalikagum a manggun-od iti nayon pay a pannarabay manipud iti Espiritu kabayatan ti lawas.

Isuratmo Dagiti Impresionmo

Yawis ti Panagbibinninglay

Mangted iti sumagmamano a minuto nga irebyu dagiti miembro ti klase ti 1 Taga Corinto 14–16 ket sarakenda ti maysa a bersikulo a mariknada a napateg unay. Awisem ida a mangsapul iti maysa a tao iti klase a mabalinda a pangibinglayan iti bersikuloda ket ilawlawagda no apay a pinilida daytoy.

Isuro ti Doktrina

1 Taga Corinto 14

No agguummong dagiti Santo a sangsangkamaysa, nasken nga itandudoda ti tunggal maysa.

• Ibilangmo ti panangusar kadagiti pannursuro ni Pablo iti 1 Taga Corinto 14 a mangipalagip kadagiti miembro ti klase a makaitandudotayo amin—wenno makatulong ken makaitag-ay—iti tunggal maysa iti simbaan. Maysa a simple a wagas a mangrebyu iti daytoy a kapitulo ket mangisurat iti maysa a saludsod iti pisarra, a kas iti Ania ti nasken a panggeptayo a tun-oyen no agguummongtayo a sangkamaysa? Awisem dagiti miembro ti klase nga agsukisok kadagiti mabalin a sungbat iti 1 Taga Corinto 14. Masarakan dagiti dadduma pay a kapanunotan iti Moroni 6:4–5 ken Doktrina ken Katulagan 50:17–23. Bayat ti panangibiglay dagiti miembro ti klase no ania ti nasarakanda, ibilang ti panangsaludsod kadakuada no kasano ti mariknada iti ar-aramiden ti klasem iti panangipatungpal kadagitoy a panggep a tun-oyen. Mabalinda pay nga ibinglay dagiti padas a nakariknaanda iti pannakaparegta iti maysa a banag nga imbinglay ti maysa a miembro ti klase.

• Tapno matulongan a maipaawat kadagiti miembro ti klase ti balakad ni Pablo a nasken nga agkalikagum dagiti miembro iti padto, idawat kadakuada a mangisingasing kadagiti panangilawlawag iti balikasa padto. Mabalin nga isurat iti pisarra dagiti miembro ti klase ti tunggal kaipapanan ket aggigiddan nga irebyu ti kaipapanan ti padto iti Pangiwanwan iti Nasantuan a Kasuratan ken ti balakad ni Pablo iti 1 Taga Corinto 14:3, 31, 39–40. Ania ti mainayontayo kadagiti kaipapanan nga intedtayo manipud kadagitoy a resources? (Kitaen met iti Apocalipsis 19:10.) Ania dagiti nakaparegtaantayo nga aramiden iti simbaan ken iti pagtaengan kas bunga dagiti pannursuro ni Pablo?

1 Taga Corinto 15

Gapu ta nagungar ni Jesucristo, agungartayonto amin.

• Kasano ti panangusarmo iti pammaneknek ni Pablo iti 1 Taga Corinto 15 tapno mapapigsa ti pammaneknek dagiti miembro ti klasem maipapan iti Panagungar? Maysa a wagas ket mabalin a bingayen ti klase iti dua a grupo ket pasarak iti maysa a grupo iti 1 Taga Corinto 15 dagiti bunga ti pakaipasanguantayo koma no saan a nagungar ni Jesucristo. Mabalin a saraken ti sabali pay a grupo dagiti bendision nga awatentayo gapu iti Panagungarna. Kalpasanna isurat ti tunggal grupo iti pisarra no ania ti nasursuroda. Ania dagiti mabalin pay a mainayon iti listaanda kalpasan ti panangbasada iti palawag ni Elder D. Todd Christofferson iti “Dagiti Nainayon a Resources”? Tapno matulongan dagiti miembro ti klase a makarikna iti Espiritu kabayatan daytoy a panangilawlawag, ibilang ti panangi-display iti maysa a ladawan ti nangungar a Mangisalakan (kitaen iti balabala itoy a lawas iti Umaykayo, Sumurot Kaniak—Para kadagiti Indibidual ken Pamilia).

• Gapu iti panangsungbat ni Pablo kadagiti tao a saan a mamati iti panagungar, mabalin a pagimbagan ti klasem manipud iti panangyakemda iti isu met la a situasion. Kas pagarigan, kasano a mapapigsada ti pammati ti maysa nga ipatpateg iti Panagungar? Ania ti nasarakan dagiti miembro ti klase iti 1 Taga Corinto 15 a makatulong kadakuada a mangilawlawag iti panagkasapulan ken pakakitaan ti Panagungar ni Jesucristo? Ania dagiti dadduma pay a nasantuan a kasuratan a mausarda? (Kitaen, kas pagarigan, iti Lucas 24:1–12, 36–46; Alma 11:42–45.)

• Imbasar ni Pablo iti tallo a tukad ti nagungar a dayag iti namin-adu a gundaway kadagiti suratna (kitaen iti 1 Taga Corinto 15:40–42 and 2 Taga Corinto 12:1–2). Tapno matulongan ti klasem a mangtakuat no kasano a nailawlawag ti kabaruanan a paltiing kadagiti pannursuro ni Pablo, mabalinmo a bingayen ti klase iti tallo a grupo ket ikkam ti tunggal grupo iti saggaysa a papel a nasukog iti sinan-init (DkK 76:50–70), sinan-bulan (DkK 76:71–80), wenno sinan-bituen (DkK 76:81–89). Awisem ida nga agbasa kadagiti mainaig a nasantuan a kasuratan Doktrina ken Katulagan 76 ket ibinglayda no ania ti nasken nga aramidentayo tapno umawat iti nadumaduma a dayag nga inladawan ni Pablo. Kitaen met iti Doktrina ken Katulagan 131:1–4; 137:7–10.

  

  “Maysa ti dayag ti init” (1 Taga Corinto 15:41).

• 1 Taga Corinto 15 ti maysa kadagiti sumagmamano a lugar iti nasantuan a kasuratan a nadakamat dagiti panagbuniag para kadagiti natay (kitaen iti bersikulo 29; kitaen met iti DkK 128:18). Nalabit a mabalin nga ibinglay dagiti miembro ti klase dagiti padasda iti panangannong kadagiti panagbuniag wenno dadduma pay nga ordinansa para kadagiti kapuonanda. Ibilangmo ti panangibinglay iti padas ni Wilford Woodruff iti “Dagiti Nainayon a Resources” kas paset ti panaglilinnawag. Apay a mabalin nga ibasar ni Pablo dagiti panagbuniag para kadagiti natay a kas pakakitaan ti Panagungar?

Yallukoy ti Panagsursuro iti Pagtaengan

Idawatmo kadagiti miembro ti klase a mangpanunot maipapan kadagiti pannubok a pakaipaspasanguan wenno pagkapsutanda. Ibagam kadakuada a bayat ti panangbasada iti 2 Taga Corinto, masursurodanto no ania ti nangtulong ken Pablo nga agibtur kadagiti pannubok ken no kasano ti panniriganna kadagiti pagkapsutanna.

Dagiti Nainayon a Resources

1 Taga Corinto 14–16

Kinapateg ti Panagungar.

Insuro ni Elder D. Todd Christofferson:

“Ibilangmo iti apagkanito ti kinapateg ti Panagungar iti panangrisut iti umuna ken kangrunaan ti amin iti pudno a kinatao ni Jesus iti Nazaret ken dagiti nakaro a panagsusupiat maipapan iti pilosopia ken dagiti panagduadua iti panagbiag. No pudno a nagungar ni Jesus, ngarud Isu ti nadiosan a nabiag. Awan ti gagangay a mortal nga addaan iti pannakabalin iti bagina nga agbiag manen kalpasan ti ipapatayna. Gapu ta nagungar Isuna, saan koma a nakapagbalin nga allawagi, mannursuro, rabbi, wenno propeta laeng ni Jesus. Gapu ta nagungar Isuna, nasken a nagbalin idi a Dios ni Jesus, uray ti Bugbugtong nga Anak ti Ama.

“Ngarud, pudno ti insurona; saan a makapagulbod ti Dios.

“Ngarud, Isu ti Namarsua ti daga, kas kinunana.

“Ngarud, pudno ti langit ken impierno, kas insurona.

“Ngarud, adda maysa a lubong dagiti espiritu, a sinarungkaranna kalpasan ti ipapatayna.

“Ngarud, umayto manen Isuna, kas kinuna dagiti anghel, ket ‘agturay mismo iti daga.’

“Ngarud, adda panagungar ken maudi a panangukom para iti amin” (“The Resurrection of Jesus Christ,” Ensign wenno Liahona, Mayo 2014, 113).

Dagiti ordinansa para kadagiti natay: “Maysa a silnag ti lawag manipud iti trono ti Dios.”

Kinuna ni Elder Wilford Woodruff nga idi naammuanna a mabalin dagiti sibibiag a miembro ti Simbaan ti umawat kadagiti pangisalakan nga ordinansa a maipaay kadagiti kapuonanda a pimmusayen, “Daytoy ti kas iti silnag ti lawag manipud iti trono ti Dios iti puspusotayo. Daytoy ti manglukat a nawada iti pannirigantayo kas kinaagnanayon iti pampanunottayo.” Insaona pay: “Daytoy kasla para kaniak a ti Dios a nangipalgak iti dayta a pagbatayan iti tao ket masirib, nalinteg ken pudno, addaan kadagiti agpada a kasayaatan a kababalin ken nasayaat a rikna ken pannakaammo. Nariknak a naipamaysana iti agpada nga ayat, panangngaasi, hustisia ken panangukom, ket nariknak ti ad-adda a panagayatko iti Apo ngem iti biagko. … Nariknak ngaisao ti alleluia idi dimteng ti paltiing, a mangipalpalgak kadatayo ti panangbuniag para kadagiti natay. …”

“Ti umuna a banag nga immay iti panunotko,” kinunana, nga adda maysa nga inak iti lubong ti espiritu. Pimmusay idi 14 a bulanak. …” Idi agangay, insaona maipanggep ti maysa a panawen idi naaddaan iti gundaway a nailantipna ti inana iti amana: “Addanto pasetna iti umuna a panagungar; ket daytoy laeng ti mangbayad kaniak iti amin a bannogda iti biagko” (Teachings of Presidents of the Church: Wilford Woodruff, [2011], 185–86).

Panangpadur-as iti Panangisurotayo

Kaam-ammom dagiti sursuruam. Awan dua a tao nga agpadpada ti langada; addaan ti tunggal tao a sursuruam iti naidumduma a nagtaudan, pannirigan, ken sumagmamano a talento. Agkararagka tapno maammuam no kasano a mausarmo dagitoy a makatulong iti pannakiraman dagiti sursuruam. Bayat ti nasaysayaat a pannakaawatmo kadagiti sursuruam, makaparnuayka iti napnuan kaipapanan ken nakallalagip a kanito iti panangisuro para kadakuada (kitaen iti Panangisuro iti Wagas ti Mangisalakan, 7).