Septiembre 16–22

2 Taga Corinto 8–13

“Ti Dios Ayatenna ti Mangted a Siaayat”

Bayat ti panangbasam iti 2 Taga Corinto 8–13, panunotem maipapan kadagiti tao a sursuruam ken planuem dagiti aktibidad a makatulong kadakuada a mangtakuat kadagiti pagbatayan kadagitoy a kapitulo. Kalpasanna irebyu daytoy a balabala para kadagiti mainayon a kapanunotan.

Isuratmo Dagiti Impresionmo

Yawis ti Panagbibinninglay

Daytoy ti maysa a wagas a mangawis kadagiti miembro ti klase nga ibinglayda no ania ti nasursuroda manipud iti 2 Taga Corinto 8–13. Paisurat iti sumagmamano kadakuada iti pisarra ti maysa a paggugusto a ragup ti balikas [phrase] manipud iti panagbasada, ket kalpasanna pasapul daytoy iti dadduma pay a miembro ti klase kadagiti nasantuan a kasuratan. Awisem dagiti miembro ti pamilia a mangiburay no apay napnuan kaipapanan kadakuada dagitoy a ragup ti balikas.

Isuro ti Doktrina

2 Taga Corinto 8:1–15; 9:6–15

Siraragsak nga ibinglay dagiti Santo no ania ti adda kadkuada a mangbendision kadagiti napanglaw ken agkasapulan.

• Binilin ti Dios dagiti Santo a mangtulong a mangaywan kadagiti agkasapulan, ken mabalin a mangparegta dagiti binatog iti 2 Taga Corinto 8–9 kadagiti miembro ti klasem iti panagkagumaanda. Tapno makatulong kadakuada a mangsapul kadagitoy a binatog, mabalinmo nga isurat iti pisarra dagiti saludsod kas Apay a mangtedtayo? ken Kasano ti rumbeng a panangtedtayo? Mabalin a sukisoken ti kagudua ti klase dagiti sungbat iti 2 Taga Corinto 8:1–15, ket ti sabali a kagudua ket agsukisok iti 2 Taga Corinto 9:6–15. (Mabalinmo nga ilawlawag nga iti kapitulo 8, bersikulo 1–5, nagsao ni Pablo maipapan kadagiti Santo iti Macedonia kas pagwadan ti nawadwad a panagparabur.) Kasano a makatulong kadatayo dagiti pagbatayan nga insuro ni Pablo tapno nasaysayaat a mangaywan kadagiti napanglaw ken agkasapulan?

• Tapno makatulong kadagiti miembro ti klase a maawatanda a nasaysayaat ti wagas ti Apo ti panangted iti temporal a kasapulan dagiti Santona, adudagiti resources a nakalista iti “Dagiti Nainayon a Resources.” Nalabit a mabalinmo a dutokan ti sumagmamano kadagiti miembro ti klase a mangrebyu iti maysa wenno ad-adu pay kadagitoy a resources ket ibinglayda no ania ti makaawis iti riknada. Makasarak kadi dagiti miembro ti klase kadagiti kapanunotan iti 2 Taga Corinto 8:1–15; 9:6–15 a mangipakita a dagiti Santo iti panawen ni Pablo ket nagaywanda kadagiti nakurapay iti isu met la a wagwagas nga aramidentayo iti agdama?

2 Taga Corinto 11:13–33

Kalikaguman dagiti palso a propeta ti mangallilaw.

• Gapu ta datayo, kas kadagiti Santo iti Corinto, ket nalaka a mamati kadagiti palso a pannursuro, mairanudtayo no marebyu dagiti baallaag ni Pablo kadagiti Taga Corinto maipapan kadagiti “palso nga apostol.” Mabalin a makasarak dagiti miembro ti klase kadagiti pagarigan dagiti palso a pannursuro a mangimpluensia kadatayo iti agdama iti mensahe ni Elder Quentin L. Cook “Valiant in the Testimony of Jesus” (Ensign wenno Liahona, Nob. 2016, 40–43). Nalabit a mabalinmo a dutokan ti maysa a tao nga isakbay a basaenna daytoy a mensahe ket ibinglay iti klase no ania ti isursuro daytoy maipapan iti no kasano a maliklikantayo dagiti “tubeng” a mangyadayo kadatayo iti ebanghelio. Ania dagiti dadduma pay a pannursuro a gagangay iti lubong iti agdama a mangyadayo kadatayo kadagiti kinapudno ti ebanghelio? Mabalinmo nga idawat kadagiti miembro ti klase a mangrebyu iti 2 Taga Corinto 11:21–33 ket ibinglayda no ania ti nasursuroda manipud kadagitoy a bersikulo maipapan kadagiti pudno a “ministro ni Cristo.”

2 Taga Corinto 11:3; 13:5–8

Nasken a “sukimatentayo” ti kinapudnotayo iti ebanghelio ni Jesucristo.

• No dadduma marikna dagiti miembro ti Simbaan ti pannakatalipupos kadagiti kasapulan ti biag—agraman ti no ania a mabalin a makitada kadagiti kasapulan ti agbalin a maysa a Santo iti Ud-udina nga Aldaw. Ti balakad ni Pablo a “sukimatenyo dagiti bagbagiyo met laeng, no addakayo iti pammati” makatulong kenka ken dagiti miembro ti klasem a mangipokus iti “singgalut a maipaay ken ni Cristo” (2 Taga Corinto 13:5; 11:3). Nalabit a mabalin a basaenyo nga aggigiddan ti 2 Taga Corinto 11:3 ket ilawlawag no ania ti kayat a sawen ti ragup ti balikas a “singgalut a maipaay ken ni Cristo.” Mabalin pay nga idawatmo kadagiti miembro ti klase a mangipapan a naawisda a mangisurat iti panangiladawan iti ebanghelio ni Jesucristo para iti maysa a pagiwarnak, nga addaan laeng iti 100 a balikas. Mangted kadakuada iti oras a mangisurat kadagiti panangiladawanda, ket paibinglay iti tunggal maysa no ania ti insuratda. No kasapulanda ti tulong, mabalinda nga ibasar iti Juan 3:16–17; 3 Nephi 27:13–21; ken Napudno iti Pammati, 76. Awisem dagiti miembro ti klase nga agutob no agtalinaedda met laeng a napudno kadagiti kangrunaan a pagbatayan ti ebanghelio.

• Tapno matulongan dagiti miembro ti klase a “mangsukimat” no kasano nga isinggalutda ti biagda tapno agbalin a nasaysayaat a disipulo, mabalinmo nga ibinglay kadakuada ti palawag ni President Dieter F. Uchtdorf’s iti “Dagiti Nainayon a Resources.” Mabalin nga ilawlawag dagiti miembro ti klase no kasano a mayaplikarda ti awis ni Presidente Uchtdorf a “mangipokus kadagiti kangrunaan a doktrina, pagbatayan, ken pannakaaramat ti ebanghelio.” Ania dagiti dadduma pay a kapanunotan dagiti miembro ti klase maipapan no kasano a masukimattayo ti bagbagitayo tapno mapennek nga agtalinaedtayo a napudno iti pammati?

2 Taga Corinto 12:5–10

Umdas ti parabur ti Mangisalakan a mangtulong kadatayo a mangsapul iti pigsa iti pagkapsutantayo.

• Ania koma ti masaom iti maysa a gayyem a nagkararag para iti tulong iti pagkuranganna iti bagi ngem mariknana a saan a nasungbatan daytoy a kararag? Ibilangmo ti panangawis kadagiti miembro ti klase a mangutob iti daytoy a saludsod bayat ti naulimek a panangbasada iti 2 Taga Corinto 12:5–10. Kalpasanna mabalinda nga ibinglay dagiti nauneg a pannakaammo ken pannakaawat [insights] manipud kadagitoy a bersikulo a mabalin a makatulong iti daytoy a situasion. Mabainda pay nga ibinglay dagiti padas idi, babaen ti parabur ni Jesuscristo, nasarakanda ti pigsa iti pagkapsutan. Kasano a nangimpluensia iti biagda dayta a padas?

Yallukoy ti Panagsursuro iti Pagtaengan

Tapno maallukoy dagiti miembro ti klase a mangbasa iti Taga Galacia, mabalin a saludsodem kadakuada no adda asino man nga am-ammoda a kimmayakay manipud iti ebanghelio. No kasta, kayatdanto a basaen no kasano nga inawis ni Pablo dagiti Taga Galacia a kimmayakay iti ebanghelio tapno agsublida.

Dagiti Nainayon a Resources

2 Taga Corinto 8–13

Ti wagas ti Apo iti panangipaay kadagiti napanglaw ken agkasapulan.

• Mosiah 4:16–27; Alma 34:27–29; Doktina ken Katulagan 104:14–18.

• Handbook 2: Administering the Church (2010), 6.1.

• “Dagiti Apagkapullo ken Daton Para iti Pigsa dagiti Agtutubo (2011), 38–39.

Mapasimpletayo ti wagas ti panagbiagtayo iti ebanghelio.

Insuro ni Presidente Dieter F. Uchtdorf:

“Kakabsat, saan a kasapulan a narikut ti panagbiag iti ebanghelio.

“Pudno a nalawag daytoy. Mabalin nga iladawan a kas iti daytoy:

• “Ti idedengngeg iti balikas ti Dios nga addaan iti napasnek a panggep ket mangiturong kadatayo a mamati iti Dios ken agtalek kadagiti karina.

• “Ti ad-adda a panagtalektayo iti Dios, ad-adda met a mapno ti puspusotayo ti ayat para Kenkuana ken iti tunggal maysa.

• “Gapu iti ayattayo iti Dios, tarigagayantayo a sumurot Kenkuana ket agtignaytayo a mayannurot iti balikasna.

• “Gapu ta ay-ayatentayo ti Dios, kayattayo ti agserbi Kenkuana; kayattayo ti mangbendision iti biag dagiti dadduma ken tumulong kadagiti nakurapay ken agkasapulan.

• “Ti ad-adda a pannagnatayo iti daytoy a dalan ti kinadisipulo, ad-adda met a tarigagayantayo ti agsursuro iti balikas ti Dios.

“Daytoy ti masurot a proseso, tunggal addang a mangiturong iti sumaruno ken panangpunno kadatayo iti agtultuloy a panangpapigsa iti pammati, namnama, ken ayat iti pada a tao [charity].

“Simple ti kinapintas daytoy, ket nangayed ti pannakaipaay daytoy.

“Kakabsat, no panunotenyo a saan unay a maipatpatungpal ti ebanghelio iti biagyo, awisenkayo a maaddaan iti oras a mangamiris iti biagyo manipud iti nalawlawa a pannirigan, ket aramidenyo a simple no kasano ti panagbiagyo iti kinadisipulo. Ipokusyo dagiti pangrugian a doktrina, pagbatayan, ken pannakaaramat ti ebanghelio. Ikarik a tarabayen ken bendisionannakayto ti Dios iti dalanyo iti naipatungpal a biag, ken nasaysayaat a maitrabahonto ti ebanghelio para kadakayo” (“It Works Wonderfully,” Ensign wenno Liahona, Nob. 2015, 22).

Panangpadur-as iti Panangisurotayo

Makitinnulongka kadagiti miembro ti pamilia. “Dagiti tao nga addaan iti kabilgan nga impluensia iti maysa a tao—para iti pagsayaatan wenno pagdaksan—ket gagangay a dagiti tao a kaduana iti pagtaenganna. Gapu ta ti pagtaengan ti sentro ti panagbiag ken pagsursuruan iti ebanghelio, dagiti panagkagumaanam a mangpatibker iti maysa a miembro ti klase ket agbalinto a kasamayan no makitinnulongka … kadagiti miembro ti pamilia” (Panangisuro iti Wagas ti Mangisalakan, 8).