Septiembre 2–8

1 Taga Corinto 14–16

“Ti Dios Saan a Dios ti Riri, no Di ti Talna”

Isuratmo dagiti impresionmo bayat ti panangbasam iti 1 Taga Corinto 14–16. Agkararagka maipapan iti no ania ti isuro ti Espiritu kadakayo, ket dawatem iti Nailangitan nga Ama no adda pay kayatna a sursuruenm.

Isuratmo Dagiti Impresionmo

Gapu ta ti Simbaan ken dagiti doktrinana ket medio baro iti Corinto, gagangay laeng a dagiti Santo iti Corinto ket naipasangoda iti pannakatikaw. Insuro idin ni Pablo kadakuada ti kangrunaan a kinapudno ti ebanghelio: “A ni Cristo natay gapu kadagiti basbasoltayo … ket naitanem, ket nagungar iti maikatlo nga aldaw” (1 Taga Corinto 15:3–4). Ngem sumagmamano kadagiti miembro iti saan a nabayag nangrugi a nangisuro nga “awan ti panagungar dagiti natay” (1 Taga-Corinto 15:12). Impakaasi ni Pablo kadakuada nga“laglagipenda” dagiti kinapudno a naisuro kadakuada (1 Taga Corinto 15:2). No maipasangotayo kadagiti aggigiddiat a kapanunotan maipapan kadagiti kinapudno ti ebanghelio, nasayaat a laglagipen a “ti Dios, saan a Dios ti riri, no di ti talna” (1 Taga Corinto 14:33). Ti panagdengdengngeg kadagiti natudingan a katulongan ti Apo ken panangtengtengngel kadagiti simple a kinapudno a dagdagullitenda nga isuro ket makatulong kadatayo a makasarak iti kappia ket “agtalinaed a sititibker iti pammati” (1 Taga Corinto 16:13).

Dagiti Kapanunotan para iti Bukod a Panagadal iti Nasantuan a Kasuratan

1 Taga Corinto 14

Makagun-odak iti sagut ti pammadto.

Nasdaawkayo kadin no ania ti sagut ti pammadto? Daytoy kadi ti kabaelan nga agipadto iti masakbayan? Mabalin kadi ti asino man ti mangawat iti daytoy a sagut? Wenno para laeng kadagiti propeta?

Ti Presidente ti Simbaan ket ti kakaisuna a tao nga agipadto ken umawat iti paltiing a maipaay iti sibubukel a Simbaan; nupay kasta, ti Pangiwanwan iti Nasantuan a Kasuratan ti kaipapanan ti pammadto ket dagiti “nadiosan a paregta a balikas wenno sinurat, nga awaten ti tao babaen ti paltiing manipud iti Espiritu Santo. … No agpadto ti maysa a tao, isao wenno isuratna ti kayat ti Dios a maammuanna, para iti bukodna a pagsayaatan wenno pagsayaatan dagiti dadduma” (Pangiwanwan iti Nasantuan a Kasuratan, “Pammadto,” scriptures.lds.org; kitaen met iti DkK 100:5–8). TiApocalipsis 19:10 ket kaipapananna ti espiritu ti pammadto a kas iti “pammaneknek ni Jesus.”

Ania ti masursurom maipapan iti daytoy a naespirituan a sagut manipud iti 1 Taga Corinto 14:3, 31, 39–40? Ania koma ti kayat a sawen ni Pablo idi inawisna dagiti Taga Corinto a “tarigagayanyo a nasged ti panagipadto”? (1 Taga Corinto 14:39). Kasano a maawatmo daytoy nga awis?

Kitaen met iti Dagiti Numero 11:24–29; Jacob 4:6–7; Alma 17:3; Doktrina ken Katulagan 11:23–28.

1 Taga Corinto 14:34–35

Apay nga imbaga ni Pablo nga agsilensio dagiti babbai iti simbaan?

Dagiti pannursuro ni Pablo iti 1 Taga Corinto 14:34–35 ket kasla makatikaw, ta manipud iti un-una daytoy met la a surat imbagana a nagkararag ket nagipadto dagiti babbai (kitaen iti 1 Taga Corinto 11:5). Binaliwan ti Patarus ti Joseph Smith ti balikas nga agsao iti bersikulo 34 ken 35 iti balikas a mangituray. Isingasing daytoy a panangilawlawag nga itudtudo ni Pablo dagiti babbai nga aggandat nga umagaw iti turay kadagiti miting ti Simbaan. (Kitaen met ti 1 Timoteo 2:11–12.)

Kitaen met iti “Women in the Church” Gospel Topics, topics.lds.org.

1 Taga Corinto 15:1–34, 53–58

Nagun-od ni Jesucristo ti balligi iti ipapatay.

Naipangpangruna ti Panagungar ni Jesucristo iti Kristianismo, tapno sawen ti asino man a no awan daytoy awan ti Kristianismo—no usaren dagiti balikas ni Pablo, “ngarud ti kaskasabami awan ti kapapay-anna, ket ti pammatiyo awan met kapapay-anna (1 Taga Corinto 15:14). Ngem sumagmamano latta kadagiti Santo ti Corinto ti agisursuro nga “awan ti panagungar dagiti natay” (1 Taga Corinto 15:12). Bayat ti panangbasam ti sungbat ni Pablo iti 1 Taga Corinto 15, utobem biit no kasano a maiduma ti biagmo no dika namati iti Panagungar. Kasano a nabendisionannaka iti daytoy? Ania dagiti bendision nga umay kenka gapu ta nagungar ni Jesucristo? (Kitaen iti; 2 Nephi 9:6–19; Alma 40:19–23; Doktrina ken Katulagan 93:33–34). Ania ti kayat a sawen kenka ti ragup ti balikas nga “ket no ni Cristo saan a napagungar, awan kapapay-an ti pammatiyo”? (bersikulo 17).

1 Taga Corinto 15:35–54

Ti nagungar a bagi ket maigiddiat manipud kadagiti mortal a bagi.

Nasdaawkayo kadin no ania ti langa ti nagungar a bagi? Maibatay iti 1 Taga Corinto 15:35, sumagmamano kadagiti Taga Corinto ti nagsiddaaw kadaytoy met laeng a banag. Basaen ti sungbat ni Pablo kadagiti bersikulo 36–54, ken isurat dagiti balikas ken ragup dagiti balikas a mangiladawan kadagiti paggiddiatan dagiti mortal a bagi ken dagiti nagungar a bagi. Kas pagarigan, isuro dagiti bersikulo 40–42 a dagiti nagungar a bagi ket sumilengda iti gloria a sabasabali ti tukadda, kas iti init, bulan, ken dagiti bituen nga aggigiddiat iti kinalawagda (kitaen met iti Patarus ni Joseph Smith , 1 Taga Corinto 15:40; DkK 76:50–112).

Kitaen met iti Alma 11:43–45; Lucas 24:39.

“Maysa ti dayag ti init” (1 Taga Corinto 15:41).

Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening

Bayat ti panagbasam kadagiti nasantuan a kasuratan iti pamiliam, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a singasing:

1 Taga Corinto 15:29

Masursurotayo manipud iti bersikulo 29 a dagiti nagkauna a Santo a nairaman kadagiti panangbuniag iti natay, a kas iti aramidentayo iti Simbaan ita nga agdama. Kasano ti ar-aramidentayo kas maysa a pamilia iti pannakaisagana ti nagnagan dagiti kapuonantayo para kadagiti ordinansa iti templo? Kitaen met ti “Baptisms for the Dead,” Gospel Topics, topics.lds.org.

1 Taga Corinto 15:35–54

Ania dagiti banag wenno ladawan ti mabalinmo nga ipakita a mangtulong iti pamiliam a makaawat kadagiti sumagmamano a termino nga usaren ni Pablo a pangiladawan no kasano a dagiti mortal a bagi ket maigiddiat kadagiti nagungar a bagi? Kas pagarigan, tapno ipakita ti pagdumaan iti nagbaetan ti madadael ken saan nga agrupsa (kitaen dagiti bersikulo 52–54) mabalinmo ti mangipakita iti metal a naglati (kas iti landok) ken metal a di aglati (kas stainless a landok). Wenno mabalin nga idasig ti maysa a nakapsut a banag iti maysa a nabileg a banag (kitaen iti bersikulo 43).

1 Taga Corinto 15:55–57

Mabalin a napatpateg ti panaglilinnawag kadagitoy a bersikulo no adda maysa a tao a pimmusay nga am-ammo ti pamiliam. Mabalin nga ibinglay dagiti miembro ti pamilia ti pammaneknekda no kasano nga inyadayo ni Jesucristo “ti pannilud ni patay” (bersikulo 56). Ti mensahe ni Elder Paul V. Johnson a “And There Shall Be No More Death”(Ensign wenno Liahona,Mayo 2016, 121–23) ti mabalin a nasayaat a nayon ti panaglilinnawagyo.

1 Taga Corinto 16:13

Tapno matulongan dagiti miembro ti pamilia a maawatanda daytoy a bersikulo, mabalinyo ti mangidrowing iti sirkulo iti daga ket iwanwan ti maysa a miembro ti pamilia nga “agtakder a natibker” iti uneg daytoy bayat a naka-apput dagiti matana ket ikkaten isuna dagiti dadduma manipud iti sirkulo. Ania ti dumana no ti miembro ti pamila iti sirkulo ket saan a naka-apput dagiti matana ket “mabuyana”? Ania ti maaramidtayo tapno “agtakder a natibker” iti biagtayo no masulisogtayo nga agaramid kadagiti dakes a pili?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Panangpadur-as iti Bukod a Panagadal

Kitaem dagiti pagtuladan. Masarakantayo kadagiti nasantuan a kasuratan dagiti pagtuladan a mangipakita no kasano nga aramiden ti Apo Ti aramidna. Ania dagiti pagtuladan a masarakam iti 1 Taga Corinto 14 a makatulong kadatayo a makaawat no kasano nga isuro ken itandudo ti tunggal maysa? Kitaen met iti DkK 50:13–23.

Woman, Why Weepest Thou? by Simon Dewey