“Setiembre 2–8. 1 Taga Corinto 14–16: ‘Ti Dios Saan a Dios ti Riri, no Di ti Talna’” Umaykayo, Sumurot Kaniak—Para iti Primary: Baro a Tulag 2019 (2019)
“Setiembre 2–8. 1 Taga Corinto 14–16,” Umaykayo, Sumurot Kaniak—Para iti Primary: 2019
Setiembre 2–8
1 Taga Corinto 14–16
“Ti Dios saan a Dios ti Riri, no Di ti Talna”
Bayat ti panangbasam iti 1 Taga Corinto 14–16, tulongannakanto ti Espiritu Santo a mangammo no ania ti isurom kadagiti ubbing iti klasem. Irebyum daytoy a balabala para kadagiti nayon paya kapanunotan.
Isuratmo Dagiti Impresionmo
Yawis ti Panagbibinninglay
Mabalinmo nga irugi ti adalen iti daytoy a lawas babaen ti panangbasa iti 1 Taga Corinto 14:26 iti napigsa. Ilawlawagmo a no aggigiddantayo a mapan iti simbaan, mabalintayo ti mangipakita iti pagwadan (wenno mangpadur-as ken mangtulong) kadagiti dadduma no mangibinglaytayo. Ania ti mabalin nga ibinglay dagiti ubbing tapno mangipakita iti pagwadan iti maysa a tao iti klase ita nga aldaw?
Isuro ti Doktrina
Dagiti In-inaudi nga Ubbing
Makapagnaedak iti sidong ti Nailangitan nga Ama kalpasan ti ipapatayko gapu ta nagungar ni Jesucristo.
Kasano a maisurom kadagiti ubbing iti klasem a gapu ta nagungar ni Jesucristo mabalin nga agbiagtayo manen?
Dagiti Mabalin nga Aktibidad
-
Ulitem iti sumagmamano a daras kadagiti ubbing ti ragup ti balikas a: “Mabiagdanto amin ken Cristo” (1 Taga Corinto 15:22). Ipakita ti ladawan ti nagungar a Mangisalakan (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia. Ilawlawag a mataytayonto amin iti maysa nga aldaw, ngem gapu ta nagungar ni Jesus, agbiagtayonto manen kalpasan ti ipapataytayo.
-
Mangusar iti adalen a banag a kas daytoy maysa a mangisuro maipapan iti Panagungar: Ipakita ti maysa a diaket, a mangibagi kadagiti pisikal a bagitayo. No sibibiagtayo, adda kadagiti bagitayo dagiti espiritutayo, ken makagaraw dagiti bagitayo (ikawes ti diaket). No mataytayo, pumanaw dagiti espiritutayo kadagiti pisikal a bagitayo, ket saanen a makagaraw dagiti bagitayo (ikkaten ti diaket ken iparabaw daytoy iti lamisaan wenno tugaw tapno mangibagi iti bagi nga awanan iti espiritu). No nagungartayo, agsubli dagiti espiritutayo iti bagitayo (ikawes manen ti diaket), ket saanda nga agsina manen iti kaano man. Pagsisinublatem dagiti ubbing a mangikawes ti diaket ken mangikkat iti daytoy kabayatan ti idinto nga ilawlawag ti sabali pay nga ubbing no ania ti mapasamak no agungartayo.
Mabalinko ti mabuniagan para kadagiti tao a natayen.
Makapagsagana dagiti ubbing a susuruam a mapan ti templo ita ket mabuniagan para kadagiti natayen no agbalin a 12 ti tawenda. Dakamaten ni Pablo daytoy a napateg a doktrina iti suratna kadagiti Taga Corinto.
Dagiti Mabalin nga Aktibidad
-
Tulongam dagiti ubbing nga agpanunot kadagiti bambanag a saanda a maaramid para iti bagbagida (kas iti panangbagkat iti maysa a nadagsen a banag wenno pananggaw-at iti maysa a banag nga adda iti nangato nga estante). Siasino ti tumulong kadakuada a mangaramid kadagitoy a banag? Ipakita ti maysa a ladawan ti maysa kadagiti kapuonam a natay a saan a nabuniagan. Ibagam kadagiti ubbing maipapan itoy a tao, ken ilawlawag a saan a mabalin a mabuniagan daytoy a tao no awan ti tulong manipud iti maysa a tao iti daga.
-
Saludsodem kadagiti ubbing no addaanda iti asino man a miembro ti pamilia a nakapanen iti templo a nangannong kadagiti panagbuniag para kadagiti natay. Ipakita dagiti ladawan ti puente a pagbuniagan iti templo. Ammo kadi dagiti ubbing no ania ti mapaspasamak ditoy? Ilawlawag nga iti templo mabalintayo ti mabuniagan para kadagiti tao a natayen a saan a pay a nabuniagan. Kalpasanna mabalin a pilien dagita a tao nga no awatenda ti panagbuniag.
Kayat ti Nailangitan nga Ama a makipagnaedak Kenkuana iti celestial a pagarian.
Kasano a maisurom kadagiti ubbing maipapan kadagiti pagarian a celestial, terrestrial, ken telestial? Makatulong dagitoy nga aktibidad.
Dagiti Mabalin nga Aktibidad
-
Isurat iti pisarra ti celestial, terrestrial, ken telestial. Tulongam dagiti ubbing nga agsursuro a mangisao kadagitoy a balikas.
-
Ipakitam dagiti ladawan ti init, bulan, ken dagiti bituen. Ania kadagitoy ti karaniagan? Ibasam ti 1 Taga Corinto 15:40–41 kadagiti ubbing (kitaen met iti Patarus ni Joseph Smith, 1 Taga Corinto 15:40, footnote a). Ilawlawag a ti init, bulan ken dagiti bituen ket mangibagi kadagiti pagarian a mabalin pagnaedantayo kalpasan iti panagungartayo. Iti pagarian a celestial, makapagnaedtayo iti sidong ti Nailangitan nga Ama.
-
Idrowing ti init iti pisarra ken mangikabil kadagiti babassit a pedaso ti papel, wenno dagiti tukad, iti daga nga agturong ti init. Ti tunggal papel ket mabalin a mangibagi iti maysa a banag a kasapulantayo a sumrek iti pagarian a celestial (kitaen iti DkK 76:50–53). Paibinglay kadagiti ubbingdagiti kapanunotan ken agaddangda a dumanon iti pagarian a celestial.
Indilig ni Pablo ti dayag ti celestial iti init.
Isuro ti Doktrina
Dagiti In-inauna nga Ubbing
Gapu ken ni Jesucristo ken ti Panagungarna, agungarakto.
Maawatan kadi dagiti ubbing a sursuruam ti kinapateg ti Panagungar ni Jesucristo? Makatulong dagitoy a kapanunotan.
Dagiti Mabalin nga Aktibidad
-
Awisem dagiti ubbing nga agsisinublat a mangbasa kadagiti bersikulo iti 1 Taga Corinto 15:12–22, a mangsarsarak kadagiti sungbat dagiti saludsod “Ania ti mapasamak no awan ti panagungar?”
-
Awisem dagiti ubbing a mangyakem no kasano nga ilawlawag ti panagungar iti maysa a tao. Ibinglaymo ti pammaneknekmo maipapan iti Panagungar ni Cristo.
1 Taga Corinto 15:12–13, 20–22, 29
makapagsaganaak a mapan ti templo tapno agpabuniag para kadagiti natay.
No madanon dagiti ubbing ti tawen a 12, makaawatda iti rekomendasion iti templo ken makapagpabuniagda para kadagiti natay iti templo. Kasano a matulongam ida nga agsagana?
Dagiti Mabalin nga Aktibidad
-
Basaem ti 1 Taga Corinto 15:29. Ania dagiti inaramid dagiti Santo iti panawen ni Pablo a mabalintayo met nga aramiden iti agdama?
-
Saludsodem kadagiti ubbing no apay a mabuniagantayo para kadagiti natay. No kasapulan, ilawlawag nga adu kadagiti kapuonantayo ti saan a naikkan iti gundaway a mabuniagan ken makumpirmaan kabayatan daytoy a biag. Iti templo, mabalintayo ti mabuniagan ken makumpirmaan para kadakuada.
-
Iti sumagmamano a lawas sakbay iti klase, kiddawem iti maysa a naganak ti maysa kadagiti ubbing nga umay a nakasagana a mangibinglay iti family tree-na, wenno mangisarita iti estoria maipapan ti maysa a kapuonanna. Mabalin met nga ibinglaymo ti maipapan iti bukodmo a kapuonan.
-
Awisem ti maysa a miembro ti bishopric a mangibinglay kadagiti banag a mabalin nga aramiden dagiti ubbing tapno agbalinda a maikari a sumrek ti templo. Saludsodem kadagiti ubbing no ania ti maaramidda tapno malagipda nga aramiden dagitoy a banag. Isuratmo dagiti kapanunotanda iti pisarra. Awisem ida a mangaramid iti panggep a tun-oyen [goal] a mapan iti templo iti maysa nga aldaw.
Kalpasan a nagungarak, makapagnaedak iti celestial a pagarian.
Tapno maisuro dagiti Taga Corinto maipapan kadagiti bagi nga awatentayonto iti Panagungar, nadakamat ni Pablo dagiti tallo a tukad ti gloria: celestial, terrestrial, ken telestial.
Dagiti Mabalin nga Aktibidad
-
Basaem ti 1 Taga Corinto 15:40–41 ken awisem ti maysa nga ubing a mangidrowing iti init, bulan, ken bituen iti pisarra. Kiddawen kadagiti ubbing a mangilasin no ania a kita ti nagungar a bagi ti mangibagi iti tunggal drowing.
-
Aggigiddan nga agkansion iti maysa a kanta maipapan kadagiti templo. Ania ti isuro daytoy a kanta kadatayo maipapan iti panagsagana nga agnaed iti celestial a gloria?
-
Ilawlawag a naaddaan ti sirmata ni Joseph Smith a nakakitaanna kadagitoy a tallo a pagarian a maipada kadagiti kita dagiti bagi nga inladawan ni Pablo. Tulongam dagiti ubbing mangsarak kadagiti ragup ti balikas manipud iti Doktrina ken Katulagan 76:50–53, 70; 76:71–79; 76:81–82 a mangiladawan kadagiti tallo a pagarian.
Yallukoy ti Panagsursuro iti Pagtaengan
Awisem dagiti ubbing a mangidawat kadagiti nagannak kadakuada nga isaritada kadakuada ti estoria maipapan kadagiti kapuonanda. Mabalinda nga ibinglay ti estoria iti klase inton sumaruno a lawas.
Panangpadur-as iti Panangisurotayo
Allukoyen dagiti ubbing nga agdamag kadagiti saludsod “Ikarigatam nga ibilang agundaway dagiti saludsod [dagiti ubbing], saan a pannakasinga wenno lapped iti lessonmo. … Dagiti kasta a saludsod ti mangted kenka kadagiti napapateg a nauneg a pannakaawat ken pannakaammo maipapan iti pampanunoten dagiti ubbing, no ania dagiti pakaseknanda, ken no kasano ti panangrespondeda kadagiti banag a sursuruenda. Tulongam ida a mangkita a dagiti sungbat kadagiti saludsodda ket masarakan kadagiti nasantuan a kasuratan ken balikas dagiti sibibiag a propeta” (Teaching in the Savior’s Way, 25–26).