Ni Jesus a makisarsarita iti bassit nga ubing

Septiembre 16–22

2 Taga Corinto 8–13

“Ti Dios Ayatenna ti Mangted a Siaayat”

Umayto dagiti kasayaatan a kapanunotan para iti panangisuro kadagiti ubbing iti klasem bayat ti sikakararag panagadalmo iti 2 Taga Corinto 8–13 a sipapanunot kadakuada. Masarakan iti daytoy a balabala dagiti mainayon a kapanunotan iti panangisuro.

Isuratmo Dagiti Impresionmo

icon iti panagbibinninglay

Yawis ti Panagbibinninglay

Maysa a nasayaat a wagas a pangawis iti panagbibinninglay kadagiti ubbing ket ti panangipalagip kadakuada iti maysa a banag nga inyawismo kadakuada nga aramidenda kabayatan ti napalabas nga adalen. Kiddawem kadakuada a mangibinglay kadagiti padasda.

icon iti panangisuro

Isuro ti Doktrina

Dagiti In-inaudi nga Ubbing

2 Taga Corinto 9:6–7

Makaitedak a siaayat kadagiti tao nga agkasapulan.

Kanayon a nasayaat ti agserbi kadagiti dadduma, ngem nasaysayaat pay no agserbi a siaayat. Ibilangmo no anianto ti mangparegta iti tunggal ubing a “mangted a siaayat.”

Dagiti Mabalin nga Aktibidad

• Awisem dagiti ubbing a mangulit iti ragup dagiti balikas “Ti Dios ayatenna ti mangted a siaayat” (2 Taga Corinto 9:7). Ania ti kayat a sawen ti “mangted a siaayat”? Mangipakita iti ladawan ti naragsak a rupa ken ti naliday a rupa, ken saludsodem kadagiti ubbing no asino ditoy ti mangted a siaayat.

• Aggigiddan a kansionenti kanta maipapan iti panagserbi iti sumagmamano a daras. Ti umuna a gundaway, kiddawen kadagiti ubbing nga agkanta a siaayat; kalpasanna kiddawen kadakuada nga agkansion iti kanta nga addaan iti nadumaduma a rikna wenno kababalin, kas iti naliday, nabannog, makagura, wenno mabuteng. Ipalagip kadagiti ubbing a kayat ti Nailangitan nga Ama a siaayat a tulongantayo dagiti dadduma.. Kalpasanna kansionen manen ti kanta a siraragsak..

• Ikkam dagiti ubbing kadagiti ladawan ti umis-isem a rupa. Ibagam kadagiti ubbing a saan a naragsak ti nakamisuot a rupa; ti maysa a wagas tapno agbalin a naragsak ken agserbi kadagiti dadduma ket umisem ken tulungandagiti dadduma nga umisem.

• Planuem ti maysa nga aktibidad ti klase nga agserbi iti maysa a tao, kas iti ubing a saan a dumar-ay iti Primary wenno maysa a miembro ti ward wenno kaarruba nga agkasapulan. Mabalin nga agplanoka a sumarungkar iti pagtaengan daytoy a tao, agsurat kadagiti surat a pangparegta wenno agdrowing kadagiti ladawan, wenno agaramid iti merienda nga ibinglay..

• Awisem ti tunggal ubing nga agplano iti maysa a naayat a serbisio iti maysa a miembro ti pamiliana. Kabayatan ti sumaruno nga adalen iti sumaruno a lawas, kiddawem kadakuada nga ibinglayda no ania ti inaramidda.

2 Taga Corinto 12:7–10

Sungbatan a kanayon ti Nailangitan nga Ama dagiti kararag, ngem saan a kanayon a mangted kaniak iti amin a banag a dawatek.

Ti padas ni Pablo iti panagkararagna tapno maikkat ti “siit iti lasag” ket mangisuro kadatatayo a no dadduma ipakita ti Dios ti ayatna para kadatayo babaen ti saan a panangted kadatayo no ania ti kayattayo.

Dagiti Mabalin nga Aktibidad

• Ipakita kadagiti ubbing ti mula nga addaan kadagiti siit (wenno maysa a ladawan ti maysa a mula). Tulongam ida a mangipapan no ania ti rikna ti napalokan iti siit iti kudilda iti inapaut a panawen. Gupgopem ti 2 Taga Corinto 12:7–10 para kadagiti ubbing, usarem dagiti balikas a maawatandanto. Ilawlawag a ti “siit iti lasag” ni Pablo ket maysa a pannubok, a kas iti maysa a pagkapsutan ti bagi. Nupay indawat ni Pablo iti Dios nga ikkatenna ti pannubok, ket saan nga inaramid ti Dios. Ngem ketdi, insuro ti Dios ken ni Pablo amakatulong dagiti karit kadatayo a makasursuro nga agbalin a napakumbaba ken agtalektayo Kenkuana. Kalpasanna mapagbalinnatayo ti Dios a napigsa.

• Paneknekam nga ammo ti Nailangitan nga Ama no ania ti kasayaatan para kadatayo, ken mangtedto kadatayo iti kasapulantayo, uray no maigiddiat daytoy iti ipagaruptayo a kasapulantayo. Mabalinmo met nga ibinglay ti maysa a padas idi nasungbatan dagiti kararagmmo iti maysa a wagas wenno iti maysa a panawen a maigiddiat iti no ania ti ninamnamam.

• Makipagkansion kadagiti ubbing ti kanta maipapan iti ayat ti Nailangitan nga Ama. Kiddawen kadagiti ubbing no ania ti masaoda iti maysa a tao nga a masdaaw no dumngeg ken sungbatan met laeng ti Nailangitan nga Amadagiti kararag. Kansionen manen ti kanta, ken ilawlawag dagiti binatog a mangiladawan no kasano ti marikna ti Nailangitan nga Ama maipapan kadatayo.

icon iti panangisuro

Isuro ti Doktrina

Dagiti In-inauna nga Ubbing

2 Taga Corinto 9:6–9

Makaitedak a siaayat kadagiti tao nga agkasapulan.

Kayat ni Pablo ti mangparegta kadagiti Santo a mangted iti paset ti kinabaknangda a pangtulong kadagiti nakurapay. Kasano nga usarem dagiti balikasna a mangparegta kadagiti ubbing nga agserbi kadagiti dadduma?

Dagiti Mabalin nga Aktibidad

• Isuratmo dagiti balikas ti 2 Taga Corinto 9:7 iti pisarra, a nakablangko dagiti kangrunaan a balikas. Awisem dagiti ubbing a mangpugto no ania dagiti awan a balikas. Kalpasanna ipabasam kadakuada dagiti bersikulo kadagiti nasantuan a kasuratan a mangpunno kadagiti blanko. Ania ti kayat a sawen ti mangted iti “dakes a nakem wenno mapilpilit”? Ania ti kayat a sawen ti “mangted a siaayat”?

• Awisem dagiti ubbing a tulongandaka a mangsapul kadagiti ladawan ti Mangisalakan nga agserserbi kadagiti dadduma ( sumagmamano ti adda iti Umaykayo, Sumurot Kaniak—Para kadagiti Indibidual ken Pamilia). Saludsodem kadakuada no ania ti makitada kadagitoy a ladawan a makatulong kadakuada a mangammo a siaayat a nagserbi ni Jesus kadagiti dadduma. Mangituding ti panggep a tun-oyen a kas maysa a klase a mangisao iti wen no agkiddaw kadatayo dagiti miembro ti pamilia iti umay a lawas, kas iti panangtulong iti lawlaw ti balay wenno panangaywan kadagiti dadduma.

• Tulongam dagiti ubbing a agdekorar kadagiti babassit a bato. Awisem ida a mangitugot kadagiti “ bato iti panagserbi” iti bolsada ita a lawas tapno makatulong kadakuada a manglagip ti siaayat a panagserbi kadagiti dadduma.

• Tulongam dagiti ubbing a mangtakuat kadagiti baro a bersikulo iti kanta a maipapan iti panagserbi, a mangisuro a naragsak ti agserbi kadagiti dadduma iti nadumaduma a wagas.

2 Taga Corinto 12:7–10

Sungbatan a kanayon ti Nailangitan nga Ama dagiti kararag, ngem saan a kanayon a mangted kaniak iti amin a banag a dawatek.

Indawat ni Pablo iti Dios nga ikkatenna dagiti pagkapsutanna, ngem ammo ti Dios a ti sagubanit ni Pablo ti mamagpakumbaba kenkuana ken mangpapigsa kenkuana.

Dagiti Mabalin nga Aktibidad

• Awisem dagiti ubbing a pagdiligenti 2 Taga Corinto 12:9–10 ken Ether 12:27. Ania dagiti balikas wenno ragup dagiti balikas ti naulit? Ania ti isursuro dagitoy a bersikulo? (Mabalin a kasapulam nga ilawlawag a indilg ni Pablo ti karitna iti siit iti kudilna.) Ania ti insuro ti Dios ken ni Pablo maipapan kadagiti pannubok?

• Awisem dagiti ubbing nga ilistada dagiti sumagmamano a pannubok nga adda iti biag ti tattao. Tulongam ida a mangibilang no kasano a masuruan ti maysa a tao manipud kadagiti pannubok ken mabendisionanda gapu kadagitoy.

• Kiddawen kadagiti ubbing a mangibinglay kadagiti padasda idi inkararaganda ti maysa a banag ket saanda a naawat iti daytoy. Kiddawem kadakuada nga ibinglayda no ania ti nasursuroda manipud kadagiti padasda. Mabalin nga addaanka kadagiti bukodmo a padas a maibinglay a kasta met. Ibinglaymo ti pammaneknekmo a ti Nailangitan nga Ama ket kanayonna a sungbatan dagiti kararagtayo iti wagas ken iti panawen a a mangbendisionto kadatayo iti kangrunaan.

icon iti panagsursuro

Yallukoy ti Panagsursuro iti Pagtaengan

Awisem dagiti ubbing a siaayat a mangted kadagiti pagtaenganda itoy a lawas ken umayda iti klase a nakasagana nga agipadamag maipapan iti no kasano a nagserbida iti maysa a tao nga agkasapulan.

Panangpadur-as iti Panangisurotayo

Risuten dagiti makasinga nga addaan iti ayat. “No dadduma agtignay ti maysa nga ubing iti wagas a pakasingaan iti panagadal dagiti dadduma iti klase. No mapasamak daytoy, agbalinka a naanus, managayat, ken mannakaawat maipapan kadagiti karit a mabalin a sangsanguen ti ubing. … No adda dagiti naisangsangayan a kasapulan ti ubing a makaigapu iti pannakasinga, kasaritam ti ward wenno stake disability specialist wenno bisitaen ti disabilities.lds.org tapno maammuan no kasano a nasaysayaat a maipaaymo dagita a kasapulan”(Panangisuro iti Wagas ti Mangisalakan, 26).

panid ti aktibidad: panangted kadagiti tao nga agkasapulan