“Septiembre 16–22. 2 Taga Corinto 8–13: ‘Ti Dios Ayatenna ti Mangted a Siaayat ’” Umaykayo, Sumurot Kaniak—Para kadagiti Indibidual ken Pamilia: Baro a Tulag 2019 (2019)
“Septiembre 16–22. 2 Taga Corinto 8–13,” Umaykayo Sumurot Kaniak,—Para kadagiti Indibidual ken Pamilia: 2019
Septiembre 16–22
2 Taga Corinto 8–13
“Ti Dios Ayatenna ti Mangted a Siaayat”
Ti panangisurat kadagitoy naespirituan nga impresion ket tulongannakanto a lagipem no ania dagiti nasursurom kabayatan ti panagadalmo iti nasantuan a kasuratan. Mabalinmo nga agsurat iti dyurnal a pagadalan, agaramid iti notes kadagiti margin ti bukodmo a nasantuan a kasuratan, ken dagiti notes iti Gospel Library app, wenno agaramid iti audio recording kadagiti kapanunotam.
Isuratmo Dagiti Impresionmo
Ania koma ti aramidem no nangngegam a marigatan ti kongregasion dagiti santo iti sabali a lugar gapu iti kinakurapay? Daytoy daydi situasion nga inladawan ni Pablo kadagiti Santo iti Corinto iti 2 Taga Corinto 8–9. Ninamnamana nga allukoyen dagiti Santo iti Corinto a mangidonar iti sumagmamano a baknangda kadagiti Santo nga agkasapulan. Ngem iti labes ti panagdawat iti donasion,naglaon dagiti balikas ni Pablo kadagiti nauneg a kinapudno maipapan iti panagited: “Tunggal maysa itdenna koma ti pinanggepna iti pusona; saan nga iti dakes a nakem wenno mapilpilit; ta ti Dios ayatenna ti mangted a siaayat” (2 Taga Corinto 9:7). Iti panawentayo, adda pay la dagiti Santo iti intero a lubong nga agkasapulan ti tulong. No dadduma ti kangrunaan a maaramidtayo para kadakuada ket agayuno ken mangted iti daton iti panagayuno . Iti sabali pay a kaso, mabalin a ti panagit-itedtayo ket ad-adda a direkta ken personal. Ania man dagiti panggep dagiti sakripisiotayo, napateg ti intay panangamiris kadagiti gandat tayo a mangted. Dagiti kadi sakripisiotayo ket panangipeksa iti ayat? Kalpasan ti amin, ti ayat ti mamagbalin iti mangted a siaayat.
Dagiti Kapanunotan para iti Bukod a Panagadal iti Nasantuan a Kasuratan
Mabalinko ti siaayat a mangibinglay ti ania nga adda kaniak kadagiti nakurapay ken agkasapulan
Adu dagiti tattao iti intero a lubong ti agkasapulan Kasano a mabalintayo nga agaramid iti pakaidumaan? Inted ni Elder Jeffrey R. Holland daytoy a balakad: “Nabaknang wenno napanglaw, intay ‘ aramiden ti kabaelantayo’ no agkasapulan dagiti dadduma [kitaen iti Marcos 14:6, 8]. … Tulungan ken tarabayennaka ti [Dios] kadagiti naasi nga aramid ti kinadisipulo no sigaganetgetka nga agtarigagay ken agkarkararag ket sapulem dagiti wagas a tungpalen ti maysa a bilin nga intedna kadatayo manen ket manen”(“Are We All Not Beggars?” Ensign wenno Liahona,Nob. 2014, 41).
Basaem ti 2 Taga Corinto 8:1–15; 9:6–15, agisurat kadagiti pagbatayan nga insuro ni Pablo maipapan iti panangaywan iti nakurapay ken agkasapulan. Ania ti makaparegta kenka maipapan kadagiti pammagbaga ni Pablo? Mabalin nga agkararagka para iti pannarabay maipapan iti no ania ti maaramidmo a mangparabur iti maysa a tao nga agkasapulan. Penkem nga isuratmo dagiti ania man nga impresion a maawatmo ken agtignay kadagitoy.
Kitaen met iti Mosiah 4:16–27; Alma 34: 27–29; Henry B. Eyring, ““Is Not This the Fast That I Have Chosen?” Ensign wenno Liahona, Mayo 2015, 22–25; Linda K. Burton, “I Was a Stranger,” Ensign wenno Liahona,Mayo 2016, 13–15.
Mangallilaw dagiti palso a propeta.
Mabalin a makatulong kenka tapno maawatam daytoy a kapitulo ti mangammo a rimsua dagiti “sinan apostol” kadagiti Santo iti Corinto (2 Taga Corinto 11:13). Ania ti masursurom manipud kadagiti bersikulo 13–15 maipapan kadagitoy agisursuro kadagiti ulbod a doktrina? Ania ti masursurom maipapan kadagiti pudno a propeta bayat ti panangbasam maipapan iti padas ni Pablo kas ministro ni Cristo? (kitaen dagiti bersikulo 23–33).
Masapul nga “amirisek’ ti kinamanamatik iti ebanghelio ni Jesucristo.
Gapu ta iti agdama adda adu nga agbirbiruk tapno iturongnatayo a mayadayo “manipud iti kinalawag nga adda ken ni Cristo” (2 Taga Corinto 11:3), mabalintayo nga awaten ti awis ni Pablo a “mangamiris iti [bagim], no addaka met la iti pammati” (2 Taga Corinto 13:5). Kas pagarigan, mabalin nga utobem no ania ti ikkatem manipud iti biagmo a mangtulong kenka nga agpokus ken ni Cristo, wenno mabalin a leppasen ti “Attribute Activity” iti Preach My Gospel, panid 126.
Ania ti “ti maikatlo a langit,” ken asino ti tao a “naipangato” sadiay?
Kadagitoy a bersikulo,agsasao ni Pablo maipapan iti bagina, awan ti direkta a panangdakamatna iti bagina—nalabit tapno liklikanna ti agpalangguad maipapan iti nakallalagip a parmatana. Ti ragup dagiti balikas a “maikatlo a langit” itudtudona ti pagarian a celestial (kitaen tiDkK 76:96–98).
Umdas a mangtulong kaniak a mangbirok iti pigsa iti pagkapsutak ti parabur ti Mangisalakan.
Dimi ammo no ania ti adda ken ni Pablo a “siit iti lasag”, ngem nalaka nga ipatarus ti kalikagumna a maikkat daytoy. Addaantayo amin kadagiti karit ken parikut a saan a makita ti Apo a rumbeng nga ikkaten manipud kadagiti biagtayo. Isuratmo dagiti bukodmo a karit bayat ti panangbasam ti 2 Taga Corinto 12:5–10. Ania ti insuro ni Pablo maipapan iti pagkapsutan? Ania ti kaipapananna kenka a ti parabur ti Dios ket umdas para kenka? Napadasam kadin ti bileg ti Dios a panangpapigsa?
Kitaen met iti Mosiah 23:21–24; 24:10–15; Ether 12:27; Moroni 10:32–33.
Ania ti kayat a sawen ni Pablo idi insaona ti maipapan kadagiti “dua wenno tallo a saksi”?
Idi pampanawen ti Daan a Tulag, kasapulan ti dua wenno tallo a saksi a mangyeg iti pammabalaw iti maysa a tao (kitaen iti Deuteronomio 19:15). Nadakamat ni Pablo daytoy nga aramid idi imbagana ti maikatlo nga isasarungkarna iti Corinto. Dagiti kabaruanan a pagarigan iti daytoy a pagbatayan ti adu a saksi ket iramanna ti Dagiti Tallo a Saksi iti Libro ni Mormon, dagiti pammaneknek ni Jesucristo nga impaay ti Biblia ken ti Libro ni Mormon, ken ti aramid dagiti misionario, home teacher, ken visiting teacher nga agkukuyog nga agipampaneknek.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasam kadagiti nasantuan a kasuratan iti pamiliam, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a singasing:
Ania ti masarakam kadagitoy a kapitulo a mangparegta ti pamiliam a tumulong kadagiti nakurapay ken agkasapulan? Mabalin a nasayaat daytoy nga oras a mangplano iti aramid a serbisio a kas pamilia para iti maysa nga agkasapulan .
Adda kadi maysa nga am-ammo ti pamiliam a mabalin a mailadawan kas “mangted a siaayat”? Kasano a makapagbalin ti serbisiotayo iti dadduma a siaayat?
Kasano a masursuruam ti pamiliam maipapan iti intay “pannakigubat” kontra kinadangkes? Masagrap ngata ti pamiliam ti agipasdek iti pader wenno depensa nga addaan kadagiti tugaw ken ul-ules? Makaiturong daytoy iti panaglilinnawag maipapan iti no kasano a mapapanaw dagiti banag a mangyadayo kadatayo iti Dios ket “[kayawanda] iti amin a panunot iti panagtulok ken Cristo.” Ania dagiti naespirituan nga “armas” nga usarentayo a mangtiped kadagiti panunottayo? (kitaen iti Taga Efeso 6:11–18).
Ania ti mabalin nga aramiden ti pamiliam nga ad-adda a maipokus iti “nadalus a singgalut a maipaay ken Cristo”?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Bukod a Panagadal
Isuratmo dagiti impresion. Imbaga ni Elder Richard G. Scott: “Ti naannad a pannakaisurat ti pannakaammo ket pannakaammo a nasindadaan a mausar iti oras a panagkasapulan. … [Ti panangisurat iti naespirituan a pangiturong] ket mangpasayaat ti gundaway a makaawat pay iti silaw” (“Pananggun-od iti Naespirituan a Pannakaammo,” Ensign,Nob. 1993, 88; kitaen met iti Panangisuro iti Wagas ti Mangisalakan iti, 12, 30).
“Tunggal maysa itdenna koma ti pinanggepna iti pusona; saan nga iti dakes a nakem wenno mapilpilit; ta ti Dios ayatenna ti mangted a siaayat” (2 Taga Corinto 9:7).