“Septiembre 23–29. Taga Galacia: Magnakayo iti Espiritu’” Umaykayo, Sumurot Kaniak—Para kadagiti Indibidual ken Pamilia: Baro a Tulag 2019 (2019)
“Septiembre 23–29. Taga Galacia,” Umaykayo, Sumurot Kaniak—Para kadagiti Indibidual ken Pamilia: 2019
Septiembre 23–29
Taga Galacia
“Magnakayo kas iti Espiritu”
Bayat ti panagbasam iti Taga Galacia, isuratmo dagiti naespirituan nga impresion a maawatmo. No aramidem ket makatulong kenka a manglagip ken mangutob dagitoy iti masakbayan
Isuratmo Dagiti Impresionmo
Mangted ti ebanghelio ni Jesucristo iti wayawaya manipud iti naespirituan a pannakabalud. Ngem no dadduma tallikudan dagiti tao a nakapadasen ti panagwaywaya iti ebanghelio ket “tarigagayanyo manen a pakaadipenan” (Taga Galacia 4:9). Daytoy ti ar-aramiden dagiti sumagmamano a Santo ti Galacia—agtal-tallikudda manipud iti panagwayawaya nga indaton ni Cristo kadakuada (kitaen iti Taga Galacia 1:6). Ti surat ni Pablo kadagiti Taga Galacia, ket naganat nga awag nga agsubli iti “panagwayawaya linuk-atannatayo ni Cristo” (Taga Galacia 5:1). Daytoy nga awag ti maysa pay a kasapulantayo a mangngeg ken mangtimud gapu ta bayat nga agbalbaliw dagiti kasasaad, ti panagkarigatan iti nagbaetan ti wayawaya ken pannakaadipen ket agtultuloy. Kas insuro ni Pablo, saan nga umdas a “naawagankayo iti panagwayawaya” (Taga Galacia 5:13); naskentayo met nga “agtalinaed” iti daytoy (Taga Galacia 5:1) babaen iti panagpannuray ken ni Cristo.
Dagiti Kapanunotan para iti Bukod a Panagadal iti Nasantuan a Kasuratan
Winayawayaannak ti linteg ni Cristo.
Nagsurat ni Pablo kadagiti Santo ti Galacia idi naammuanna a naiturongda iti pannakaiyaw-awan babaen kadagiti palso a pannursuro. Maysa kadagitoy a pannursuro ket tapno maisalakan, masapul a makugit dagiti Gentil nga immawat iti ebanghelio ken agtungpal kadagiti dadduma a kannawidan iti linteg ni Moises. Inawagan ni Pablo dagitoy a kannawidan iti “sangol ti pannakaadipen” (Taga Galacia 5:1) gapu ta pawilan dagitoy dagiti Santo manipud iti naan-anay a panangibiag ti linteg ni Cristo, nga isu ti mangyeg iti pudno a panagwayawaya. Ania ti makitam iti balakad ni Pablo kadagiti Taga Galacia a makatulong kenka tapno maawatam ti no ania ti pudno a panagwayawaya? Mabalinmo met nga utoben no ania ti sangol ti pannakaadipen ti mabalin nga adda iti biagmo. Adda kadi ania man a mangpawil kenka manipud iti panangpadpadas ti panagwayawaya nga idiaya ti ebanghelio? Kasano a “nangwayawaya [kenka]” ni Cristo ken ti ebangheliona? (Taga Galacia 5:1).
Kitaen met iti 2 Nephi 2:27; 9:10–12.
Siak ti agtawid kadagiti bendision nga naikari ken ni Abraham.
Naseknan dagiti sumagmamano kadagiti Santo iti Galacia gapu ta saanda a nagtaud a mismo (“bin-i”) ken ni Abraham, saanda nga umawat kadagiti bendision a naikari ken ni Abraham, agraman dagitoy iti pannakaitan-ok. Maibatay iti Taga Galacia 3:7–9, 13–14, 27–29, ania ti mamagbalin iti maysa a tao nga agbalin a “bin-i ni Abraham”? Ti panagsursuro maipapan kadagiti bendision nga naikari ken ni Abraham ken dagiti bendision a mabalintayo a tawiden kas bin-i, kitaen iti Pangiwanwan ti Nasantuan a Kasuratan, “Abraham, katulagan ni,” ken “Katulagan ni Abraham,” Gospel Topics, topics.lds.org.
Adda kadi ken ni Abraham ti ebanghelio ni Jesucristo?
Inlawlawag ni Propeta Joseph Smith: “Ditay mabalin a patien, a dagiti nagkakauna iti amin a tawtawen ket kuneng iti sistema ti langit a kas ipapan ti adu, agsipud ta amin a naisalakan, naisalakan babaen ti bileg iti daytoy naindaklan a plano ti pannakasubbot, a sakbay ti yaay ti Cristo naikasaba idin. … Nagidaton ni Abraham iti sakripisio, ket laksid daytoy, naikasaba ti Ebanghelio kenkuana”(“Dagiti Elder ti Simbaan iti Kirtland kadagiti Kakabsatda iti Sabali a Nasion,” Ti Rabii ken ti Baggak, Mar. 1834, 143, josephsmithpapers.org). Ipakita dagiti sumaganad a nasantuan a kasuratan a naikasaba ti ebanghelio ni Jesucristo sakbay ti mortal a panagministro ti Mangisalakan: Helaman 8:13–20; Moises 6:50–66.
Taga Galacia Corinto 5:13–26; 6:7–10
No innak “magna iti Espiritu,” awatekto ti “bunga ti Espiritu.”
Ti panangadal kadagitoy a bersikulo ket makatulong kenka a mangamiris no kasano a naan-anay ti inka pannagna iti Espiritu. Mapadpadasam kadi ti bunga ti Espiritu a nasao dagiti bersikulo 22–23? Ania a sabali a bunga, wenno resresulta, ti naespirituan a panagbiag ti nadlawyo? Utoben ti kasapulam nga aramiden tapno naan-anay a maparnuay daytoy a bunga. Kasano a mabalin a parnuayen daytoy bunga tapno pasayaaten dagititi napateg a relasion iti biagmo?
Kasapulak a biruken ti “bunga ti Espiritu” iti biagko.
Nalabit nga ikarkarigatam ti magna iti Espiritu, ngem dagiti panagkagumaanam ket kasla saan nga agbunga iti naikari a bunga. Basaen ti Taga Galacia 6:7–10 (masansan a maitudo iti linteg ti panagani). Ania ti mensahe a mariknam nga ited ti Apo kenka kadagitoy a bersikulo? Kasano a mausarmo dagitoy a bersikulo a mangpatured iti maysa nga agrigrigat nga agbiag iti ebanghelio?
Kitaen met iti Alma 32:28, 41–43; Doktrina ken Katulagan 64:32–34.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasam kadagiti nasantuan a kasuratan iti pamiliam, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a singasing:
Ania ti kayat a sawen ti “agbiagto gapu iti pammati”? Ania ti araramiden ti pamiliam tapno ipakita kenka nga “agbiagto gapu iti pammati?
Mabalinmo a yam-ammo ti Taga Galacia 4 babaen ti panangilawlawag kadagiti paggidiatan ti nagbaetan dagiti katulongan ti ari ken dagiti annakna. Ania dagiti gundaway wenno potensial nga adda iti ubing ti ari nga awan iti katulongan? Panunotem ti maipapan iti daytoy bayat ti panaggigiddanyo nga agbasa iti bersikulo1–7. Ania ti isuro dagitoy a bersikulo maipapan iti relasiontayo iti Nailangitan nga Ama?
Tapno manayonan ti ragsak ti panaglilinnawagyo iti Taga Galacia 5:22–23, mabalin a markaan ti pamiliam dagiti aggigiddiat a bunga kadagiti balikas nga inaramat ni Pablo a mangiladawan iti “bunga ti Espiritu.” Kalpasanna pumili ti tunggal miembro ti pamilia iti maysa, ilawlawag ti kaipapanan daytoy, ket isarita maipapan iti maysa a tao a mangpagwadan dayta a bunga. Daytoy a mangiturong iti panaglilinnawag maipapan kadagiti wagas ti pamiliam a maawis ti Espiritu iti pagtaenganyo ken mangpadur-as daytoy a bunga. Kalpasan ti paglilinnawaganyo, mabalin magustuanyo ti aggigiddan a mangan iti salad a prutas.
Adda dagiti panawen idi maysa a tao iti pamiliam ti “kinamakam ti basol.” Ania a balakad a masarakam iti Taga Galacia 6:1 maipapan iti no ania ti aramiden iti kasta a sitwasyon?
No naggigiddan ti pamiliam a nagmula iti maysa a banag, mabalinmo nga usaren dayta a padas a mangiladawan iti prinsipio nga “ta ti aniaman nga imulanto ti maysa a tao, apitennanto met” (bersikulo 7). Wenno mabalinmo a saludsoden kadagiti miembro ti pamilia maipapan iti paboritoda a prutas wenno natnateng ket isaritam no ania ti kasapulan nga agpadakkel iti mula nga agpartuat iti taraon. (Mabalinmo nga usaren ti ladawan a naipasurot iti daytoy a balabala kas visual aid.) Mabalin a maaddaanka iti pannakisarsarita maipapan kadagiti bendision a namnamaen ti pamiliam nga maawat ken no kasano nga “apiten” dagidiay a bendision.
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Panangisurotayo
Tulongam ti pamiliam nga aramaten dagiti nasantuan a kasuratan iti bagbagida. Kinuna ni Nephi, “Inaramatko amin a nasantuan a kasuratan kadatayo, tapno agbalinda koma a pakairanudan ken pagadalantayo” (1 Nephi 19:23). Tapno tulongam ti pamiliam nga utobenda daytoy, mabalinmo nga awisen ida a mangutob kadagidi panawen a napadasanda ti bunga ti Espiritu a nailadawan iti Taga Galacia 5:22–23. (Kitaem ti Panangisuro iti Wagas ti Mangisalakan, 21.)
Insuro ni Pablo a no magnatayo iti Espiritu, mapadasantayto ti bunga ti Espiritu iti biagtayo.