“Septiembre 30–Oktubre 13. Taga Efeso: ‘Iti Pannakaan-anay dagiti Sasanto’” Umaykayo, Sumurot Kaniak—Para kadagiti Indibidual ken Pamilia: Baro a Tulag 2019 (2019)
“Septiembre 30–Oktubre 13. Taga Efeso,” Umaykayo, Sumurot Kaniak—Para kadagiti Indibidual ken Pamilia: 2019
September 30–October 13
Taga Efeso
“Iti Pannakapaan-anay Dagiti Sasanto”
Makitam kadi dagiti koneksion iti nagbaetan dagiti mensahe iti sapasap a komperensia ken ti Surat ni Pablo kadagiti taga Efeso?
Isuratmo dagiti Impresionmo
Idi ti ebanghelio ket nangrugi a nagsaknap iti Efeso, nangigapu “ti riri a saan a bassit” (Dagiti Aramid 19:23) kadagiti taga Efeso. Imbilang dagiti lokal a trabahador nga agar-aramid kadagiti altar ti pagano a diosada a kalaban ti Kristianismo ti pagsapulanda, ket iti di mabayag “napnoda iti pungtot, … ket ti siudad ket napno iti riri” (kitaen iti Dagiti Aramid 19:27–29). Iladawam iti panunotmo a maysa a kabumbuniag iti ebanghelio iti kasta a sitwasyon. Aduda a taga Efeso ti immawat ket nagbiag iti ebanghelio iti baet daytoy nga “arimbangaw” (Dagiti Aramid 19:40), ket impatalged ni Pablo kadakuada a ni “Cristo … ti talnatayo” (Taga Efeso 2:13–14). Dagitoy a balikas, a kagiddan ti awisna nga “isu amin a pait, ken gura, ken unget, ken ariwawa, ken dakes a panagsao, maikkat koma kadakayo” (Taga Efeso 4:31) kasla naitiempo ket makaliwliwa ita a kas idi. Para kadagiti Taga Efeso, a kas para kadakayo, ti pigsa a mangsango kadagiti rigat ket umay “iti Apo, ket iti pigsa ti pannakabalinna” (Taga Efeso 6:10–13).
Dagiti Kapanunotan para iti Bukod a Panagadal iti Nasantuan a Kasuratan
“Napili” kadi ti Dios wenno “ intudingnan a nasaksakbay” dagiti sumagmamano nga annakna a maisalakan?
Nasao ni Pablo a dagiti Santo a kas maysa a “ intudingnan a nasaksakbay” babaen ti Dios ket “napili … sakbay ti pannakabukel ti lubong” tapno agbalin a tattaona . Kas nadakamat ni Presidente Henry B. Eyring, ti kinapudno nga adu a tao nga agbiag ket matay nga awanan iti gundaway nga umawat iti ebanghelio ti makaigapu iti sumagmamano a “mangeddeng a ti Dios immun-una nga ammonan no asino kadagiti annakna ti isalakanna ken inaramidna a sidadaan ti ebanghelio kadakuada, idinto a dagiti saan pay a nakangngeg iti ebanghelio ket saan a ‘napili.’ Ngem … ti Plano ti Dios ket ad-adda a managayat ken nalinteg ngem dayta. Ikalikagum la unay ti Nailangitan nga Amatayo a mamagkaykaysa ken mangbendision iti amin a pamiliana”(“Panagkaykaysa ti Pamilia ti Dios,” Ensign wenno Liahona, Mayo 2017, 20–21). Amin nga annak ti Dios ti makaawat iti ebanghelio ken dagiti ordinansana gapu iti aramid a maannong para kadagiti natay kadagiti nasantuan a templo.
Nupay awan ti intudingnan a nasaksakbay a maisalakan wenno saan a maisalakan, isuro ti moderno a paltiing a napili ti sumagmamano wenno “napili sakbay a nayanak” iti biag sakbay daytoy a lubong tapno mangipatungpal kadagiti masinunuo a pagrebbengan ditoy daga. Iraman daytoy ti pagrebbengan nga adda kadagiti amin a Santo iti Ud-udina nga Aldaw a mangibinglay iti ebanghelio ken mangtulong iti amin nga annak ti Dios iti agsumbangir a belo nga umay ken ni Cristo. (Kitaen met iti (Kitaen iti “Foreordination,” Dagiti Topiko ti Ebanghelio, topics.lds.org.)
Ti Dios ti “mamagkaykaysa kadagiti amin a bambanag ken Cristo.”
Napanunotmo kadin no ania ti “iti pannakaisagana ti pannakatungpal dagiti panawen” wenno no ania ti kaipapanan ti “mapagkaykaysa dagiti amin a bambanag ken Cristo”? Bayat ti panangutobmo kadagitoy a ragup dagiti balikas, basaem dagiti sumaganad a nasantuan a kasuratan: Taga Efeso 4:13; 2 Nephi 30:7–8; Doktrina ken Katulagan 110:11–16; 112:30–32; 128:18–21. Mabalin a mariknam a naparegta a mangisurat kadagiti bukodmo a pannakailawlawag dagitoy a ragup dagiti balikas.
Nabuangay ti Simbaan kadagiti apostol ken propeta, ken ni Jesucristo ket ti pangulo a panuli a bato.
Ti panagbasa kadagiti pannursuro ni Pablo maipapan kadagiti apostol ken propeta ket makatulong kenka nga agsagana a dumngeg kadagiti mensahe dagiti kabaruanan nga apostol ken propeta kabayatan ti sapasap a komperensia. Segun iti Taga Efeso 2:19–22; 4:11–16, apay nga addaantayo kadagiti propeta ken apostol? Kasano a nakatulong kenka a saan a “pailawlaw iti amin nga angin ti sursuro”?
Kitaen met iti 2 Daggiti Aramid 4:10–12.
Awagan ti Apo dagiti propeta ken apostol a mangidaulo Iti Simbaanna.
Mapapigsak dagiti relasionko iti pamiliak.
Bayat ti panangbasayo ti Taga Efeso 5:21–6:4, ania dagiti kapanunotan nga umay kenka maipapan iti no kasanoka a mangpapigsa kadagiti relasion ti pamiliam?
Napateg a kitaem a dagiti balikas ni Pablo iti Taga Efeso 5:22 ket naisurat iti konteksto ti kannawidan dagiti tattao iti panawenna. Isuro dagiti propeta ken apostol ita nga agdama a dagiti lallaki ket saanda a nangatngato ngem dagiti babbai ket nasken a dagiti agasawa ket “agpada nga agkadua” (kitaen iti “Ti Kaamaan: Maysa a Waragawag ti Lubong,” Ensign wenno Liahona, Mayo 2017, 145). Kasta met, a masarakam latta ti adda pakainaiganna a balakad iti Taga Efeso 5:23–33, nangnangruna no naasawaan wenno agsagsaganaka para iti kallaysa. Kas pagarigan, kasano nga ipakita ni Cristo ti ayatna para kadagiti Santo? Ania ti isingasing dagitoy a bersikulo maipapan iti no kasano a tratuen dagiti assawa a lallaki dagiti assawada? Ania dagiti mensahe a masarakam para iti bagim kadagitoy a binatog?
Panangikawes iti “amin a kabal ti Dios” ket makatulongto a mangsaluad kaniak manipud iti dakes.
Bayat ti panangbasam iti Taga Efeso 6:10–18, ibilangmo no apay a ninaganan ngata ni Pablo ti tunggal pedaso ti kabal iti wagas ti panangaramidna. Manipud iti ania ti pangsalakniban kadatayo ti “amin a kabal ti Dios”? Ania ti maaramidyo tapno ad-adda a naan-naay ti panangikawes ti tunggal pedaso ti kabal iti inaldaw?
Kitaen met iti 2 Nephi 1:23; Doctrina ken Katulagan 27:15–18.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasam kadagiti nasantuan a kasuratan iti pamiliam, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a singasing:
Babaen iti ud-udina a Pannakaisubli, pagmaymaysaen amin ti Dios dagiti bambanag, agraman amin dagiti prinsipio ken ordinansa ti ebanghelio. Tapno ipakita daytoy a kapanunotan,mabalinka a mangilemmeng kadagiti banag wenno agsurat kadagiti ragup ti balikas iti lawlaw ti pagtaengam a mangibagi kadagiti banag a naisubli iti aldawtayo (kas kadagiti tulbek ti priesthood, ordinansa ti templo, nasantuan a kasuratan, ken naespirituan a sagut). Mabalin a biroken dagiti miembro ti pamilia ket “pagkaykaysaen” ida. Apay a managyamantayo nga agbiag iti “pannakaisagana ti pannakatungpal dagiti panawen?
Awisem dagiti miembro ti pamilia a mangibinglay kadagiti padas a nakariknaanda iti ayat ken asi ti Dios ken ni Jesucristo a nailadawan kadagitoy a bersikulo.
Mabalin nga agragsak ti pamiliam nga agipasdek kadagiti pader ti pungpungan wenno dadduma pay a bambanag nga adda iti pagtaengan ket kalpasanna tulidem ida. Ania dagiti kita ti padpader ti mamaglalasin kadagiti tattao iti agdama? Kasano a ni Jesucristo “dinuprakna ti … pader a mamaglasin idi kadatayo” ken ti Dios?
Makaaramid ti pamiliam ti bukodda a “kabal ti Dios” a panangusar kadagiti aytem iti binalayan. Ti video a “Ti Kabal ti Dios” (LDS.org) ket makatulong kadagiti miembro ti pamilia nga manggiladawanta iti panunottayo daytoy a kabal, ken masarakanda dagiti simple a pannakailawlawag iti “The Whole Armor of God” (Friend, Hunio 2016, 24–25). Kasano a naespirituan a masalaknibannatayo ti tunggal pedaso ti kabal? Ania ti mabalin nga aramidentayo a makatulong iti tunggal maysa a “mangikawes ti amin a kabal a nadiosan”(Taga Efeso 6:11) iti inaldaw?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Bukod a Panagadal
Bay-an a tarabayennaka ti Espiritu iti panagsursurom. Managriknaka koma iti Espiritu bayat nga iturongnaka kadagiti banag a kasapulam a sursuruem iti tunggal aldaw, uray pay no iturongnaka daytoy nga adalen iti maysa a topiko a dimo immun-una a plinano.
Ti panangikawes ti kabal ti Dios ket naespirituan a masalaknibannatayo.