“Septiembre 30–Oktubre 13. Taga Efeso: “Maipaay iti Pannakapaan-anay dagiti Sasanto,” Umaykayo, Sumurot Kaniak—Para iti Primary: Baro a Tulag 2019 (2019)
“Septiembre 30–Oktubre 13. Taga Efeso,” Umaykayo, Sumurot Kaniak—Para iti Primary: 2019
Septiembre 30–Oktubre 13
Taga-Efeso
“Maipaay iti Pannakapaan-anay dagiti Sasanto”
Bayat ti panangadalmo iti Surat kadagiti Taga Efeso, panunotem ti maipapan iti no ania dagiti pagbatayan a yunay-unaymoa mangbendision kadagiti ubbing a sursuruam. Isuratmo dagiti ania man a kapanunotan a mapanunotmo bayat ti panagbasam.
Isuratmo dagiti Impresionmo
Yawis ti Panagbibinninglay
Awisem dagiti ubbing nga agtakder iti maysa a linia. Kiddawem ti umuna nga ubing iti linia nga ibinglayna ti maysa a banag a nasursurona itay kallabes wenno kabayatan ti sangapamiliaan a panagadal iti nasantuan a kasuratan, Primary, wenno iti sadino man a lugar. Saludsodem ti sumaruno nga ubing iti linia nga ulitenna no ania ti imbinglay ti immun-una nga ubing ket kalpasanna inayonna ti maysa a banag a nasursurona. Uliten daytoy agingga a naaddan ti tunggal ubing iti gundaway a mangibinglay.
Isuro ti Doktrina
Dagiti In-inaudi nga Ubbing
Nasken nga aggagayyem dagiti miembro ti Simbaan ken “agkakailian.”
Ad-adda kadi a kasla “ganggannaet” wenno “kailian” dagiti ubbing iti klasem iti tunggal maysa ken iti dadduma a miembro ti ward? Tulongam ida a makaawat a nupay addaantayo kadagiti pagdudumaan, tultulongannatayo ti Mangisalakan ngaagkaykaysa ken aggiinnayat iti tunggal maysa.
Dagiti Mabalin nga Aktibidad
-
Ikabil ti maysa a ladawan ti Mangisalakan iti tengnga ti siled. Awisem dagiti ubbing nga agtakder iti nadumaduma a paset ti siled tapno mangibagi kadagiti “estranghero” wenno “ganggannaet.” Bayat ti panangbasam ti Taga Efeso 2:19, awisem ida nga aggaraw nga agturong iti ladawan ni Cristo agingga a naggiinnasidegda. Ibagam kadakuada a bayat ti yassidegtayo iti Mangisalakan, agbalintayo a nakaykaysa kadagiti dadduma kas aggagayyem ken “agkakailian.”
-
Mangsapul kadagiti ladawan dagiti ubbing manipud iti nadumaduma a paset ti lubong, ken ilemmeng dagitoy iti lawlaw ti siled. Ikabil ti maysa a ladawan ti Mangisalakan iti sango ti siled. Awisem ti klasem nga agparisda a kas misionario ket agsisinnublatda a mangsapul ti maysa a ladawan ti maysa a “ganggannaet” nga ikabilda iti asideg ti ladawan ti Mangisalakan. Tulongam ida a makaawat a no mabuniagan dagiti tao, agbalinda a paset ti pamilia ti Simbaan, wenno ti “sangakabbalayan ti Dios.” Kasano a matulongantayo ti maysa a tao a kabarbaro a makarikna a maaw-awat isuna a siraragsak?
Kayat ti Nailangitan nga Ama nga agtulnogak kadagiti nagannak kaniak.
Bayat ti panangbasam iti Taga Efeso 6:1–3, agpanunotka kadagiti wagas a makatulong kadagiti ubbing a makaawat no apay a napateg nga agtuldogda kadagiti nagannak kadakuada.
Dagiti Mabalin nga Aktibidad
-
Ibasam ti Taga Efeso 6:1 iti klase, wenno tulongam ti maysa kadagiti ubbing a mangbasa iti daytoy. Kiddawem kadakuada a mangyakem kadagiti panawen idi nagtulnogda kadagiti nagannak kadakuada. Ania ngata ti mabalin a napasamak no saanda a nagtulnog?
-
Aggigiddan nga agkansion iti kanta a maipapan iti panagtulnog. Agsardeng kalpasan ti umuna a linia, ken kiddawem iti maysa nga ubing a manginagan iti maysa a banag a kiniddaw ti maysa a naganak nga aramidenna; kalpasanna leppasen ti kanta. Ulitem ti sumagmamano a daras tapno maikkan dagiti dadduma pay nga ubbing iti batangna.
-
Ibinglaymo ti maysa a padas a nakapagtulnogam kadagiti nagannak kenka ket nabendisionanka.
Masalaknibannak ti kabal ti Dios.
Kasano a matulongam dagiti ubbing a makaawat a ti panagaramid ti nalinteg ket kas panangikawes iti kabal?
Dagiti Mabalin nga Aktibidad
-
Ipakitaka ti ladawan ti maysa a tao a nakakawes iti kabal, a kas ti maysa iti panid ti aktibidad iti daytoy a lawas wenno balabala itoy a lawas iti Umaykayo, Sumurot Kaniak—Para kadagiti Indibidual ken Pamilia. Bayat ti pananggupgopmo iti Taga Efeso 6:10–18, ipakitam kadagiti ubbing no kasano a salakniban dagiti nadumaduma a pedaso ti kabal dagiti nadumaduma a paset ti bagi.
-
Mangitugot iti sumagmamano a banag iti klase a mabalin a mangibagi iti pedaso ti kalasag a nadakamat iti Taga Efeso 6:14–17 (kas pagarigan, maysa a kallugong wenno bidang), wenno agaramid kadagiti simple a pedaso ti sinan-kabal manipud iti papel. Pagsisinnublatem dagiti ubbing a mangikawes iti “kabal.” Paglilinnawagan no ania ti kayat a sawen ti masalakniban manipud iti dakes ken no kasano a ti panagkawes iti tunggal pedaso ti kabal ket mangsalaknib kadakuada. Kasano nga ikawestayo ti kabal ti Dios? (kas pagarigan, babaen ti panagadal kadagiti nasantuan a kasuratan, panagserbi kadagiti dadduma, panagkararag, panagtungpal, ken ken dadduma pay).
Isuro ti Doktrina
Dagiti In-inauna nga Ubbing
Agkakaailiantayo iti sangakabbalayan ti Dios.
Mapabileg dagiti ubbing no addaanda kadagiti nasayaat a gagayyem iti ebanghelio. Kasano a matulongam ida a maggpatanor iti nasaysayaat a pannakigayyem iti tunggal maysa?
“Kailiannatayo” dagiti Santo ti Dios.
Dagiti Mabalin nga Aktibidad
-
Aggigiddan a mangbasa iti Taga Efeso 2:19 , ket paglilinnawagan no ania ti kaipapanan ti maysa a estranghero wenno ganggannaet. Ibinglaymo iti maysa a padas a nakariknaam a maysaka nga estranghero wenno ganggannaet ket tinulongannaka ti maysa a tao tapno nariknam a naragsakda a nangpasangbay ken immawat kenka. . Awisem dagiti ubbing a mangibinglay kadagiti kasta met laeng a padas.. Ania ti maaramidtayo tapno agbalintayo nga “agkakailian” imbes a ganggannaet? Adda kadi ubbing iti klasem a masansan a saan a dumar-ay, nalabit a gapu ta mariknada a kasla ganggannaetda? Tulongam dagiti ubbing nga mangaramid iti plano a tumulong kadagita a miembro a makarikna a siraragsak a mapasangbayda ken maawatda.
-
Tapno matulongan dagiti ubbing a sursuruam nga agsisinninged iti tunggal maysa, mangisurat kadagiti sumagmamano a saludsod iti pisarra a mangguyugoy kadakuada a mangibinglay iti maysa a banag maipapan iti bagbagida, kas iti Kaano idi a nasungbatan ti maysa a kararagmo? wenno Ania ti paggugustom a banag nga aramidem iti pamiliam? Bingayem dagiti ubbing iti kada paris, ket awisem ida nga agdamag iti saludsod iti tunggal maysa. Ania ti nasursuroda maipapan iti tunggal maysa?
Kayat ti Nailangitan nga Ama nga agtulnog ken agdayawak kadagiti nagannak kaniak.
Agpanunot maipapn kadagiti wagas a pakatulongam kadagiti ubbing a makaawat no apay a napateg nga agtulnog kadagiti nagannak kadakuada.
Dagiti Mabalin nga Aktibidad
-
Awisem dagiti ubbing a basaenda ti Taga Efeso 6:1–3 a saggaysa ket ilasinda dagiti ragup ti balikas a a kasla napateg kadakuada. Awisem ida a mangibinglay kadagitoy a ragup ti balikas ken no apay a mariknada a napateg dagitoy a ragup ti balikas.
-
Awisem dagiti ubbinga mangibinglay kadagiti pagwadan ti tattao kadagiti nasantuan a kasuratan a nagtulnog ken nagdayaw kadagiti nagannak kadakuada, a kas iti Mangisalakan (kitaen iti Lucas 2:42–52), ni Ruth (kitaen iti Ruth 1), wenno ni Nephi (kitaen iti 1 Nephi 3:1–8). Apay a napateg nga agtulnog ken agdayawtayo kadagiti nagannak kadatayo?
-
Mangted iti tunggal ubing iti maysa a i papel a nasuratan iti balikas nga agdayaw iti ngato. Paglilinnawagan no ania ti kaipapanan ti balikas. Awisem dagiti ubbing a mangisurat wenno mangidrowing kadagiti papelda tti maysa a banag a maaramidda a mangipakita a dayawenda dagiti nagannak kadakuada.
Masalaknibannak ti kalasag ti Dios manipud iti dakes.
Bayat ti panangbasam iti Taga Efeso 6:10–18, panunotem dagiti sumagmamano kadagiti naespirituan a pagpeggadan nga pakaipasanguan dagiti ubbing ken no kasano a matulongam a mapapigsa dagiti ubbing a maibusor kadagitoy.
Dagiti Mabalin nga Aktibidad
-
Bayat ti panangbasa ti maysa nga ubing iti Taga Efeso 6:10–18, kiddawem iti sabali pay nga ubing a mangilista wenno mangidrowing iti pisarra dagiti pedaso ti sinan-kabal a nadakamat. Apay a napateg ti kabal iti pagbabakalan? Kasano a maikawestayo ti naespirituan a kabal iti inaldaw?
-
Dutokam ti tunggal ubing a mangidrowing ken mangisurat iti maysa a pedaso ti sinan-kabal a nailadawan iti Taga Efeso 6:14–17. Kasano a mangsalaknibannatayo dagitoy a pedaso ti sinan-kabal manipud iti dakes? Ania ti inkari ti Apo kadagiti agkawes ti kabal ti Dios? (Kitaen iti Taga Efeso 6:13). Ania ti kayat a sawen ti “sumarikedked inton dakes nga aldaw”?
Yallukoy ti Panagsursuro iti Pagtaengan
Awisem dagiti ubbing nga agbalin a managsiput itoy a lawas para iti maysa a tao a mabalin a makarikna a kasla maysa a ganggannaet. Karitem ida a mangaramid iti maysa a banag a mangtulong iti dayta a tao.
Panangpadur-as iti Panangisurotayo
Tulongam dagiti babassit nga ubbing a makasursuro manipud kadagiti nasantuan a kasuratan. Tapno matulongan dagiti babassit nga ubbing a makasursuro manipud kadagiti nasantuan a kasuratan, agpokuska iti maysa a bersikulo iti nasantuan a kasuratan wenno uray maysa laeng a kangrunaan a ragup ti balikas. Mabalinmo nga awisen dagiti ubbing nga agtakder no mangngeganda ti maitudo a balikas wenno ragup dagiti balikas. (Kitaen iti Panangisuro iti Wagas ti Mangisalakan, 25–26.)