Septiembre 30–Oktubre 13

Taga Efeso

“Maipaay iti Pannakapaan-anay dagiti Sasanto”

Dagiti pampanunot ken impresion maipapan iti no ania ken no kasano ti mangisuro ket umayto kenka bayat ti sikakararag a panagadalmo iti Taga Efeso, dagiti kallabes unay a mensahe ti sapasap a komperensia daytoy a balabala, ken Umaykayo, Sumurot Kaniak—Para kadagiti Indibidual ken Pamilia.

Isuratmo Dagiti Impresionmo

Yawis ti Panagbibinninglay

Ibilangmo ti panangawis kadagiti miembro ti klase a mangisurat iti maysa a binatog a pakagupgopan ti maysa a banag a nasursuroda iti panagadalda itoy a lawas ken kalpasanna ikabilda dagiti pakagupgopanda iti pisarra. Pumilika iti sumagmamano a pakagupgopan, ket awisem dagiti miembro ti klase a nangisurat kadagitoy tapno mangibinglay kadagiti kapanunotanda.

Isuro ti Doktrina

Efeso 2:19–22; 4:4–8, 11–16

Dagiti propeta ken apostol—ken amin kadatayo—ti mangpapigsa ken mamagkaykaysa iti Simbaan.

• Mabalinmo kadi ken ti klasem a mangbangon iti maysa a banag a mangiladawan no kasano a “nabangon iti pamuon dagiti apostol ken propeta” ti Simbaan ket no kasano a “kangrunaan a panuli a bato” ti Mangisalakan? (Taga Efeso 2:20). Nalabit a mabalin nga i-label dagiti miembro ti klase dagiti bloke wenno sinan-tasa a papel ket urnosenda nga agbalin a maysa a torre wenno piramid, a ni Jesucristo ken dagiti apostol ken propeta ti magbukel iti batayan. Kalpasanna mabalinmo nga ipakita no ania ti mapasamak no naikkat ni Cristo wenno dagiti apostol ken propeta. Apay a ti kangrunaan a panuli a bato ti nasayaat a metapora para ken ni Jesucristo ken ti akemna iti Simbaan? (Para iti pannakailawlawag ti maysa a kangrunaan a panuli a bato, kitaen iti “Dagiti Nainayon a Resources.”) Mabalin a sukisoken dagiti miembro ti klase ti Taga Efeso 2:19–22; 4:11–16 para kadagiti bendision a maawattayo gapu kadagiti apostol, propeta, ken dadduma pay a lider ti Simbaan. Ania ti maaramidtayo tapno mabangontayo ti biagtayo kadagiti pannursuroda?

  

  Ni Jesucristo ti panuli a bato ti Simbaan.

• Tapno ipakita no kasano a mabalin a saan a maawatan ti doktrina no awan ti agtultuloy a panangiturong manipud kadagiti propeta ken apostol, mabalinyo ti agay-ayam a pangisaritaam iti ababa nga estoria iti maysa a miembro ti klase a saanmo nga ipangpangngeg iti asino man. Kalpasanna awisem dayta a miembro ti klase a mangulit iti estoria iti sabali pay a miembro ti klase agingga a naipasa ti estoria iti sumagmamano nga indibidual. Kalpasanna saludsodem ti maudi a tao a nakangngeg iti estoria a mangibaga iti dadduma pay iti klase no ania ti nangngegna. Nagbalbaliw kadi ti ania man a detalye ti estoria? Ania koma ti napasamak no inatur ti mannursuro dagiti biddut idi madama a maar-aramid ti aktibidad? Ania ti isuro kadatayo daytoy nga aktibidad maipapan no apay a nasken a “mabangon iti pamuon dagiti apostol ken propeta” ti Simbaan ni Cristo?

• No dimngeg iti sapasap a komperensia dagiti miembro ti klasem manipud pay idi maudi a nagkikitakayo, awisem ida a mangisarita no kasano a nakatulong dagiti banag a naisuro kabayatan ti komperensia a mangipatungpal kadagiti panggep a nadakamat iti Taga Efeso 4:11–16.

• Nalabit a mabalinmo nga ikkan dagiti miembro ti klase iti kanito a mangilista kadagiti “aramiden” wenno pagrebbengan a nakaawaganda a mangipatungpal iti simbaan (kitaen iti Taga Efeso 4:1)—kas pagarian, maysa a home teacher wenno visiting teacher, maysa a naganak, maysa a disipulo ni Cristo, ken dadduma pay. Kalpasanna mabalinda ti makisinnukat iti listaan iti sabali pay a miembro ti klase, basaenda ti Taga Efeso 4:4–8, 11–16, ket ibinglayda no kasano a mangitandudo iti bagi ni Cristo dagiti takem ken naidutok nga aramidenda kadagiti listaanda. Kasano a makapagtrabahotayo a sangkamaysa tapno agbalin a nakaykaysa iti “maysa nga Apo, maysa a pammati, maysa a pammautisar”?

Taga Efeso 5:22–6:4

Ti panangsurot iti pagwadan ti Mangisalakan ket makapapigsa kadagiti relasion iti pamilia.

• Nupay nagnaed dagiti taga Efeso iti kultura a saan a natrato a maipada kadagiti assawada, daytoy a surat ti naglaon iti sumagmamano a napateg a balakad para kadagiti nagkallaysa a nagassawa iti agdama. Mabalin a kayatmo nga isurat dagiti saludsod iti pisarra kas iti sumaganad ket awisem dagiti miembro ti klase a paglilinnawaganda dagitoy bayat ti panangbasada iti Taga Efeso 5:22–33 a nagrupgrupo: Kasano nga impakita ni Cristo ti ayatna para iti Simbaan? Ania ti maaramidtayo a sumurot Iti pagwadanna iti kasano ti pannakilangentayo kadagiti assawatayo? Mabalinmo nga awisen dagiti miembro ti klase a mangibinglay kadagiti pagwadan a nakitadan kadagiti agassawa nga agtigtignay iti wagas a kas ken ni Cristo iti tunggal maysa. Kasano a mayaplikartayo dagitoy a pagwadan kadagiti dadduma pay a relasiontayo iti pamilia?

• Idinto a ti balakad ni Pablo a “dayawem ni inam ken ni amam” (Taga Efeso 6:2) ket maited kadagiti annak, mayaplikar daytoy iti tunggal maysa kadatayo, ania man ti edad wenno kasasaadtayo iti pamilia. Awisem dagiti miembro ti klase a mangpanunot maipapan no kasano a mayaplikarda ti balakad ni Pablo iti Taga Efeso 6:1–3 kadagiti bukodda a kasasaad. Kas pagarigan, kasano a dayawentayo dagiti nagannak kadatayo uray no saan a maitunos dagiti pilida kadagiti pannursuro ni Jesucristo? Mabalinmo nga ikkan dagiti miembro ti klase iti sumagmamano a minuto a mangisurat no ania ti maaramidda tapno nasaysayaat a madayawda dagiti nagannak kadakuada.

• No adda dagiti nagannak—wenno masakbayan a nagannak—dagiti ubbing iti klasem, mabalin a mairanudda manipud iti panangilawlawag iti Taga Efeso 6:4. Ania ti kayat a sawen ti mangpatanor kadagiti annak “iti alagaden ken pammagbaga ti Apo”? Nalabit a mabalin dagiti miembro ti klase nga addaan iti in-inauna nga annak a mangiburay no ania ti kaipapanan daytoy kadakuada ken no kasano ti panangikarigatanda a nangyaplikar daytoy a balakad kadagiti pamiliada.

Taga Efeso 6:10–18

Ti kabal ti Dios ket makatulongto a mangsaluad kadatayo manipud iti dakes.

• Ania ti makatulong a mangparegta kadagiti miembro ti klase a mangikagumaan a mangikawes iti sibubukel a kabal ti Dios iti tunggal aldaw? Mabalin a mangisaganaka iti maysa nga aktibidad a pangiparisan dagiti miembro ti klase kadagiti pedaso ti kabal kadagiti pagbatayan wenno saguday nga ibagida iti Taga Efeso 6:14–17. Kasano a makatulong ti tunggal pedaso ti kabal a mangsaluad kadatayo manipud iti kinadangkes? (Para iti sumagmamano a tulong, kitaen iti “Dagiti Nainayon a Resources.”) Kasano nga inkawes dagiti miembro ti klase daytoy a kabal? Kas paset daytoy a panaglilinnawag, mabalinmo nga isarita ti panangilawlawag ni President N. Eldon Tanner iti “Dagiti Nainayon a Resources.” Ania ti maaramidtayo a mangilasin ken mangpapigsa kadagiti ania man a pagkapsutan iti kabaltayo?

Yallukoy ti Panagsursuro iti Pagtaengan

Tapno maparegta dagiti miembro ti klase a mangbasa iti Taga Filipos ken Taga Colosas, mabalinmo nga isarita kadakuada a maysa kadagiti Pagannurotan ti Pammati ti maibatay iti maysa a bersikulo a masarakan iti maysa kadagitoy a surat. Masarakanda kadi daytoy kadagiti panagadalda itoy a lawas?

Dagiti Nainayon a Resources

Taga Efeso

Ania ti kangrunaan a panuli a bato?

Ti kangrunaan a panuli a bato ket ti umuna a bato a naikabil iti maysa a pundasion. Agserbi daytoy kas pangitudo a punto [reference point] para iti rukod ken pannakaikabil ti dadduma pay a bato, a nasken a maibatog iti kangrunaan a panuli a bato. Gapu ta daytoy ti mangbagkat iti dagsen ti dadduma pay a paset ti pasdek, nasken a solido, natibker, ken mapagpannurayan ti kangrunaan a panuli a bato (kitaen iti “The Cornerstone,” Ensign, Ene. 2016, 74–75).

Ti kabal ti Dios.

Sibabarikes iti kinapudno:Mayarig daytoy a pedaso ti kabal iti maysa a sinturon a naibarikes iti aglawlaw ti siket. Ti balikas a naibarikes mabalin a kaipapananna pay ti napabileg, napapigsa, wenno napatibker.

Kalasag:Ti kalasag ket magsaluad iti puso ken dadduma pay a napapateg a paset ti bagi.

Abbong ti dapan:Maitudo daytoy iti nasaluad a panangkalub iti saka ti soldado.

Saripda:Ti saripda ket mabalin a mangsaluad iti dumani ania man a paset ti bagi manipud iti nadumaduma a panagdarup.

Bistukol:Ti bistukol ket mangsaluad iti ulo.

Espada:Ti espada ket mangpalugod kadatayo nga agtignay a maibusor iti kabusor.

“Amirisem ti kabalmo.”

Ni President N. Eldon Tanner, a nagserbi a kas maysa a mammagbaga iti Umuna a Panguluen, ket inawisna dagiti miembro ti Simbaan a mangamiris iti pigsa ti bukod a kabalda babaen ti panangutob kadagiti panagkagumaanda nga agbiag iti ebanghelio. Kalpasanna inlawlawagna:

“No … nakapsut ti kabaltayo, adda saan a nasalakniban a lugar a masarakan, saan a natalged a lugar para iti pannakadarup, ket maipasangotayonto iti panangsugat wenno panagdadael ni Satanas, nga agsukisokto agingga a masarakanna dagiti pagkapsutantayo, no addaantayo kadagitoy.

“Amirisem ti kabalmo. Adda kadi maysa a napeggad wenno saan a nasaluad a lugar? Ikeddengmo itan ti mangnayon iti ania man a paset nga awan. Uray no kasano man ti kinadaan wenno awan ti dadduma a paset ti kabalmo, kanayon a laglagipem nga iti kaunggan ti bilegmo a makaaramidka kadagiti kasapulan a panagbalbaliw a mangkumpleto iti kabalmo.

“Babaen ti naindaklan a pagbatayan ti panagbabawi mabalinmo a balbaliwan ti biagmo ken rugiam itan nga ikawes iti bagim ti kabal ti Dios babaen ti panagadal, panagkararag, ken panangikeddeng nga agserbi iti Dios ken agtungpal kadagiti bilinna” (“Put on the Whole Armor of God,” Ensign, Mayo 1979, 46).

Panangpadur-as iti Panangisurotayo

Agkagumaan para iti ayat a kas ken ni Cristo. Dagiti pannakilangenmo kadagiti sursuruam ket nasken a maparegta iti ayat. Mabendisionankanto ken dagiti sursuruam no agkararagka tapno mapadur-as ti ayat a kas ken ni Cristo ket agkalikagumka a manggun-od kadagiti wagas a mangipakita iti daytoy (kitaen iti Panagisuro iti Wagas ti Mangisalakan, 6; Moroni 7:48).