Oktubre 14–20

Taga Filipos; Taga Colosas

“Maaramidko ti Amin a Banag gapu ken Cristo a Mamapigsa Kaniak”

Rugian babaen ti panagbasa iti Taga Filipos ken Taga Colosas, ken nainkararagan nga utobem ti doktrina a kayat ti Apo nga isurom. Agpaiwanwanka iti Espiritu bayat ti panangibilangmo kadagiti saludsod ken resources a mabalinmo nga usaren a mangisuro iti daytoy a doktrina.

Isuratmo Dagiti Impresionmo

Yawis ti Panagbibinninglay

Awisem dagiti miembro ti klasem a mangisurat iti pisarra ti maysa a balikas wenno ragup ti balikas a manggupgop no ania ti nasursuroda manipud iti Taga Filipos ken Taga Colosas ket kalpasanna ilawlawagda no ania ti napilida. Allukoyen ida a mangiburay kadagiti bersikulo iti nasantuan a kasuratan kas paset ti panangilawlawagda.

Isuro ti Doktrina

Taga Filipos 2:1–5, 14–18; 4:1–9; Taga Colosas 3:1–17

Dagiti disipulo ni Jesucristo ket agbalin a “baro” no agbiagda iti ebangheliona.

• Mabalin a kayatmo a tulongan dagiti miembro ti klase a mangiladawan iti panunotda no ania ti kaipapanan ti “uksobenyo ti tao a lakay” ken “ikawesyo ti tao a baro” babaen ken ni Jesucristo (Taga Colosas 3:9–10). Tapno aramiden daytoy, mabalinmo nga i-display ti maysa a banag a daan ken maysa a banag a baro (kas iti naluom unay ken kappuros a prutas wenno daan ken baro a lupot). Mabalin a paglilinnawagan dagiti miembro ti klase no kasano nga agbalintayo a “baro” babaen ti pammati ken ni Jesucristo ken ti kinatallugodtayo nga agbiag iti ebangheliona. Kas paset daytoy a panaglilinawag, mabalinmo a paadal iti kagudua ti klase ti Taga Filipos 2:1–5, 14–18; 4:1–9 ket paadal iti sabali pay a kagudua ti klase ti Taga Colosas 3:1–17, a mangilaslasin kadagiti kababalin ti “daan a tao” ken ti “baro a tao.” Mabalinmo pay nga awisen ti sumagmamano a miembro ti klase a mangibinglay no kasano a ti kaadda ti pammati ken ni Jesucristo ken panagbiag iti ebangheliona ket nakatulong kadakuada nga agbalin a baro a tao. Dadduma pay a nasantuan a kasuratan a mabalinmo a sukisoken ket mangiraman iti Taga Roma 6:3–7; Mosiah 3:19; ken Alma 5:14, 26.

Taga Filipos 4:1–13

Makasaraktayo iti rag-o ken ni Cristo, ania man dagiti kasasaadtayo.

• Nupay dagiti kasasaadtayo ket maigiddiat iti kasasaad ni Pablo, makasursurotayo amin manipud iti kinaayatna nga agbalin a kontento ken agrag-o iti amin a kasasaad ti biagna. Tapno mairugi ti panaglilinnawag iti daytoy a topiko, mabalinmo nga irebyu ti sumagmamano a pannubok a napadasan ni Pablo (kitaen, kas pagarigan, iti 2 Taga Corinto 11:23–28). Kalpasanna mabalinmo nga idawat kadagiti miembro ti klase a mangrebyu iti Taga Filipos 4:1–13 tapno saraken ti balakad nga inted ni Pablo a makatulong kadatayo nga agrag-o, uray pay kadagiti panawen ti pannubok.

  No kayatmo a sukisoken daytoy a topiko iti ad-adu pay, mabalinmo nga idawat iti maysa a miembro ti klase a mangibinglay iti sumagmamano a makaparegta a pakaammuan wenno palawag manipud iti mensahe ni Presidente Russell M.Nelson “Joy and Spiritual Survival” (Ensign wenno Liahona, Nob. 2016, 81–84).

• Nalabit a mabalin dagiti miembro ti klase a mangsarak iti balakad iti Taga Filipos 4 a makatulong kadakuada no mapadasanda ti pannubok. Mabalinmo nga ikkan ti tunggal miembro ti klase iti maysa a note card a pangisuratanda no ania ti nasarakanda. Idawatmo kadakuada nga ikabilda daytoy iti lugar a makitadanto no kasapulanda daytoy.

• No dadduma mabalin ti maysa a himno a mangpadur-as iti pannakaawattayo kadagiti nasantuan a kasuratan. Kas pagarigan, kalpasan ti panangbasam iti Taga Filipos 4:7, 13, mabalinyo nga aggigiddan a kantaen ti “I Need Thee Every Hour?” wenno ti umuna a bersikulo ti “Lord, I Would Follow Thee” (Hymns, nos. 98, 220). Ania dagiti koneksion a makita dagiti miembro ti klase iti baet dagiti balikas dagitoy a himno ken ti Taga Filipos 4:7, 13? Nalabit a mabalinmo nga isalaysay dagiti padas idi nariknada “ti talna ti Dios, a daegenna ti amin a pannakaawat” wenno idi nariknada a napapigsada “gapu ken ni Cristo” tapno maipatungpal ti maysa a banag a saanda koma a naaramid. Mabalin a makatulong ti padas ni Elder Jay E. Jensen, a masarakan iti “Dagiti Nainayon a Resources,” a mabalin a mangparegta iti panaglilinnawag maipapan kadagitoy a bersikulo.

• Gapu ta umad-adun ti dakes iti lubong ita, mairanudto dagiti miembro ti klasem manipud iti balakad ni Pablo nga “agpanunot maipapan” kadagiti banag a nadalus, makaay-ayo, ken addaan iti naimbag a damag, kinasingpet, wenno kinadayaw (Taga Filipos 4:8). Nalabit a mabalinmo nga idutok iti tunggal miembro ti klase (wenno babassit a grupo dagiti miembro ti klase) ti maysa kadagiti kababalin a nakalista iti Taga Filipos 4:8 wenno Pagannurotan ti Pammati 1:13. Mabalin nga agsapulda kadagiti nasantuan a kasuratan maipapan iti naidutok kadakuada a kababalin ken ibinglayda iti klase no ania ti nasarakanda. Mabalinda pay nga ibinglay dagiti padas maipapan iti dayta a kababalin iti biag dagiti tao. Kasano a “tun-oyantayo dagitoy a banag”?

Taga Colosas 1:12–23; 2:3–8

No “agramut” ti pammatitayo ken ni Jesucristo, mapapigsatayo a maibusor kadagiti nailubongan nga impluensia.

• Ti pammaneknek ni Pablo iti Mangisalakan a masarakan iti Taga Colosas 1:12–23; 2:3–8 ket mangted iti napintas a gundaway para kadagiti miembro ti klase a mangutob ken mangpapigsa iti pammatida. Mabalin a sukisoken dagiti miembro ti klase a dagitoy a bersikulo tapno mangsarak kadagiti banag a mangpapigsa iti pammatida ken ni Jesucristo. Ania ti kayat a sawen ti “maparamutkayo ken mapadakkelkayo ken ni [Jesucristo]”? (Taga Colosas 2:7). Ti ladawan ti maysa a kayo iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia. Ania ti makapapigsa wenno makapakapsut kadagiti ramut ti maysa a kayo? Kasano a ti panagbalin a “maparamut ken mapadakkel ken ni [Jesucristo]” ket mangpapigsa kadatayo a maibusor kadagiti nailubongan nga impluensia? (kitaen iti Taga Colosas 2:7–8; kitaen met iti Helaman 5:12; Ether 12:4).

• Mabalin nga ammo dagiti miembro ti klasem maipapan kadagiti pilosopia ken kannawidan dagiti tao a mabalin a “mangdadael” iti pammati ti maysa a tao ken ni Cristo, gapu ta maisuppiat dagitoy kadagiti kinapudno ti ebanghelio ket mangaramid iti panagbiag iti ebanghelio a narigrigat (Taga Colosas 2:8). Nalabit a mabalin nga ilista dagiti miembro ti klase ti sumagmamano kadagitoy (mabalin a makatulong dagiti kapanunotan nga insingasing ni Elder Dallin H. Oaks, a masarakan iti “Dagiti Nainayon a Resources”). Kalpasanna mabalinmo nga ilawlawag no kasano ati pannakairamut kadagiti pannursuro ni Jesucristo ket makatulong kadatayo a mangsurot iti balakad ni Pablo: “Idinto ngarud nga inawatyo ni Cristo Jesus nga Apo, agbiagkayo kenkuana” (Taga Colosas 2:6). Kasano a makapagtitinnulongtayo iti tunggal maysa kadagiti panagkagumaantayo a sumurot iti Mangisalakan ket saan a sumurot kadagiti palso a nailubongan a kannawidan?

Yallukoy ti Panagsursuro iti Pagtaengan

Nakarikna kadin dagiti miembro ti klasem a naidadanesda gapu ta mamatida iti ebanghelio? Ibagam kadakuada a ti 1 ken 2 Taga Tesalonica ket naglaon iti balakad nga inted ni Pablo kadagiti Santo a nagbiag iti baet ti nakaro a pannakaidadanes ket nagtalinaedda a napudno.

Dagiti Nainayon a Resources

Taga Filipos; Taga Colosas

Ti talna daeganna ti amin a pannakaawat.

Bayat ti panagserbina a kas miembro ti Pitupulo, insarita ni Elder Jay E. Jensen daytoy a padas:

“Nayanak ti apokomi a ni Quinton nga aduan iti pagkuranganna iti bagi ket nagbiag laeng iti ababa a tallo a lawas, a kabayatan dayta a panawen kanayon a maitaray iti ospital. Agindegkami ken ni Sister Jensen iti Argentina iti dayta a panawen. Pudno a kayatmi a makaduami idiay dagiti annakmi tapno mangliwliwa kadakuada ken maliwliwadakami. Daytoy ti apokomi a dungdunguenmi unay ken kayatmi nga asidegkami. Makapagkararagkami laeng, ket inaramidmi daytoy a sipapasnek!

“Addakami ken Sister Jensen iti mission tour idi naawatmi ti damag a natayen ni Quinton. Nagtakderkami iti pasilio ti maysa a meetinghouse ket naginnarakupkami ken liniwliwami ti tunggal maysa. Paneknekak kadakayo nga immay dagita a pammatalged kadakami manipud iti Espiritu Santo, talna a mangdaeg iti amin a pannakaawat agingga itoy nga aldaw (kitaen iti Taga Filipos 4:7). Nasaksianmi pay ti saan a mayebkas a sagut ti Espiritu Santo iti biag ti anak ken manugangko a babai ken dagiti annakda, nga agingga iti daytoy nga aldaw isaritami maipanggep iti dayta a panawen nga addaan iti pammati, talna ken liwliwa” (“The Holy Ghost and Revelation,” Ensign wenno Liahona, Nob. 2010, 78).

Dagiti pagbatayan ti ebanghelio ken kannawidan dagiti tao.

• Dagiti Panaglabsing iti Word of Wisdom

• Kinaulbod

• Panagtarigagay kadagiti “pannakaingato” kadagiti posision iti Simbaan

• Kultura ti panagpannuray imbes a bukod a pagrebbengan

Panangpadur-as iti Panangisurotayo

Usarem ti musika. Ti sagrado a musika ket mangyawis iti impluensia ti Espiritu Santo. Makaparnuay daytoy iti naraem nga aglawlaw ken mangparegta iti panagkumit ken tignay. Ibilangmo no kasano nga agbalin a paset ti klasem ti “panagsisinnuro ken panagbibinnanalakad babaen kadagiti salmo ken himno” (Taga Colosas 3:16; kitaen met iti Panangisuro iti Wagas ti Mangisalakan, 22).