Oktubre 14–20

Mga Taga-Filipos; Mga Taga-Colosas

“Mahimo Ko ang Tanang Butang pinaagi kang Kristo Nga Nagapalig-on Kanako”

Sugdi pinaagi sa pagbasa sa Mga Taga-Filipos ug Mga Taga-Colosas, ug mainampuong mamalandong sa doktrina nga gusto sa Ginoo nga imong itudlo. Tuguti ang Espiritu nga mogiya kanimo samtang gikonsiderar nimo ang mga pangutana ug mga kapanguhaan nga imong magamit sa pagtudlo niining doktrina.

Irekord ang Imong mga Impresyon

Dapita ang Pagpaambit

Dapita ang mga sakop sa klase nga isulat diha sa pisara ang usa ka pulong o mga pulong nga nag-summarize kon unsay ilang nakat-unan gikan sa Mga Taga-Filipos ug Mga Taga-Colosas ug dayon ipasabut ang ilang gipili. Awhaga sila nga ipaambit ang mga bersikulo sa kasulatan isip kabahin sa ilang pagpasabut.

Itudlo ang Doktrina

Mga Taga-Filipos 2:1–5, 14–18; 4:1–9; Mga Taga-Colosas 3:1–17

Ang mga disipulo ni Jesukristo mahimong “bag-o” kon magsunod sila sa Iyang ebanghelyo.

• Mahimong gusto nimong tabangan ang mga sakop sa imong klase nga ma-visualize kon unsay gipasabut sa “nahukasan sa daan nga kinaiya” ug “gikasul-oban na sa bag-ong kinaiya” pinaagi ni Jesukristo (Mga Taga-Colosas 3:9–10). Sa pagbuhat niini, mahimo nimong i-display ang usa ka daan nga butang ug bag-o nga butang (sama sa nasobrahan kahinog ug presko nga mga prutas o usa ka daan ug bag-o nga sinina). Ang mga sakop sa klase mahimong maghisgot kon unsaon aron mahimong “bag-o” pinaagi sa atong hugot nga pagtuo diha kang Jesukristo ug sa atong kaandam nga mosunod sa Iyang ebanghelyo. Isip kabahin niining panaghisgutan, mahimo nimong hangyuon ang katunga sa klase nga tun-an ang Mga Taga-Filipos 2:1–5, 14–18; 4:1–9 ug ang laing katunga tun-an ang Mga Taga-Colosas 3:1–17, nga motino sa mga kinaiya sa “daan nga kinaiya” ug sa “bag-ong kinaiya.” Mahimo usab nimong dapiton ang pipila ka sakop sa klase sa pagpaambit kon sa unsang paagi nga ang pagbaton og hugot nga pagtuo diha kang Jesukristo ug ang pagsunod sa Iyang ebanghelyo nakatabang kanila nga mahimong bag-ong mga tawo. Ang ubang mga kasulatan nga mahimo ninyong dungan nga masiksik maglakip sa Mga Taga-Roma 6:3–7; Mosiah 3:19; ug Alma 5:14, 26.

Mga Taga-Filipos 4:1–13

Makakita kita og hingpit nga kalipay diha kang Kristo, bisan unsa pa ang atong mga kahimtang.

• Bisan kon ang atong mga kahimtang lahi sa kang Pablo, makakat-on kitang tanan gikan sa iyang kaandam nga mahimong kontento ug magmaya sa tanang kahimtang sa iyang kinabuhi. Sa pagsugod og panaghisgutan bahin niining hilisgutan, mahimo nimong maribyu ang pipila sa mga pagsulay nga nasinati ni Pablo (tan-awa, pananglitan, 2 Mga Taga-Corinto 11:23–28). Mahimo dayon nimong hangyuon ang mga sakop sa klase sa pagribyu sa Mga Taga-Filipos 4:1–13 aron makit-an ang tambag nga gihatag ni Pablo nga makatabang kanato aron magmaya, bisan pa sa mga panahon sa pagsulay.

  Kon gusto nimong masiksik og dugang kining hilisgutan, mahimo nimong hangyuon ang usa ka sakop sa klase nga mopaambit og pipila ka makapadasig nga mga istorya o mga pamahayag gikan sa pakigpulong ni Presidente Russell M. Nelson nga “Hingpit nga Kalipay ug Espirituhanon nga Pagsugakod” (Liahona, Nob. 2016, 81–84). Giunsa pagkakita og hingpit nga kalipay sa mga tawo diha sa pakigpulong ni Presidente Nelson, bisan pa man sa ilang lisud nga mga kahimtang?

• Tingali ang mga sakop sa klase makakita og tambag diha sa Mga Taga-Filipos 4 nga makatabang kanila kon makasinati sila og mga pagsulay. Mahimo nimong hatagan og note card ang matag usa ka sakop sa klase aron ilang masulat ang unsay ilang makit-an. Hangyoa sila sa pagbutang niini kon asa ila kining makit-an kon magkinahanglan sila niini.

• Usahay ang usa ka himno makapalambo sa atong panabut bahin sa mga kasulatan. Pananglitan, human mabasa ang Mga Taga-Filipos 4:7, 13, mahimo kamong manganta og dungan sa “Where Can I Turn for Peace?” o sa unang bersikulo sa “Lord, I Would Follow Thee [Ginoo Sundon Ko Ikaw]” (Hymns, mga nu. 129, 220). Unsa nga mga koneksyon ang makita sa mga sakop sa klase tali sa mga pulong niining mga himno ug sa Mga Taga-Filipos 4:7, 13? Tingali mahimo silang mopaambit og mga kasinatian sa dihang gibati nila “ang kalinaw sa Dios, nga lapaw sa tanang pagpanabut” o sa dihang gibati nila nga nalig-on “pinaagi kang Kristo” aron matuman ang butang nga dili unta nila mahimo sa laing paagi. Ang kasinatian ni Elder Jay E. Jensen, nga makita diha sa “Dugang nga mga Kapanguhaan,” mahimong makatabang sa pagdasig og panaghisgutan mahitungod niining mga bersikulo.

• Tungod kay nagkagrabe ang dautan sa kalibutan karon, ang mga sakop sa imong klase makabenepisyo gikan sa tambag ni Pablo nga “palandunga” ang mga butang nga putli, matahum, maayong pamation, pagkamahiyasnon, o pagkadalaygon (Mga Taga-Filipos 4:8). Tingali mahimo nimong i-assign ang matag sakop sa klase (o ginagmay nga mga grupo sa mga sakop sa klase) og usa sa mga kinaiya nga nalista sa Mga Taga-Filipos 4:8 o Mga Artikulo sa Hugot nga Pagtuo 1:13. Mahimo silang mangita og mga kasulatan mahitungod sa ilang na-assign nga kinaiya ug ipaambit sa klase ang unsay ilang makit-an. Mahimo usab silang mopaambit og mga ehemplo niana nga kinaiya diha sa kinabuhi sa mga tawo. Sa unsang paagi man nga kita “naninguha sa pagpangita niining mga butanga”?

Mga Taga-Colosas 1:12–23; 2:3–8

Kon ang atong hugot nga pagtuo “nakagamut” diha ni Jesukristo, mapalig-on kita batok sa kalibutanong mga impluwensya.

• Ang pagpamatuod ni Pablo bahin sa Manluluwas nga makita diha sa Mga Taga-Colosas 1:12–23; 2:3–8 naghatag og maayong oportunidad alang sa mga sakop sa klase nga mamalandong ug molig-on sa ilang kaugalingong pagtuo. Ang mga sakop sa klase mahimong mosiksik niining mga bersikulo aron makit-an ang mga butang nga makapalig-on sa ilang pagtuo diha kang Jesukristo. Unsa man ang buot ipasabut sa “pinagamut ug pinatubo diha [kang Jesukristo]”? (Mga Taga-Colosas 2:7). Ang hulagway sa usa ka kahoy diha sa outline karong semanaha sa Dali, Sunod Kanako—Alang sa mga Indibidwal ug mga Pamilya. (Tan-awa usab sa Neil L. Andersen, “Espirituhanong mga Alimpulos,” Liahona, Mayo 2014, 18–21.) Unsa may makapalig-on o makapahuyang sa mga gamut sa kahoy? Sa unsang paagi nga ang mahimong “pinagamut ug pinatubo diha [kang Jesukristo]” makapalig-on kanato batok sa kalibutanong mga impluwensya? (tan-awa sa Mga Taga-Colosas 2:7–8; tan-awa usab sa Helaman 5:12; Ether 12:4).

• Ang mga sakop sa imong klase mahimong nahibalo sa mga pilosopiya ug mga tradisyon sa mga tawo nga “magabihag” sa hugot nga pagtuo sa usa ka tawo kang Kristo tungod kay misukwahi kini sa mga kamatuoran sa ebanghelyo ug mihimo sa pagsunod sa ebanghelyo nga mas lisud (Mga Taga-Colosas 2:8). Tingali ang mga sakop sa klase mahimong molista sa pipila niini (ang mga ideya nga gisugyot ni Elder Dallin H. Oaks, nga makita diha sa “Dugang nga mga Kapanguhaan,” mahimong makatabang). Dayon mahimo nimong hisgutan kon sa unsang paagi nga ang makagamut diha sa mga pagtulun-an ni Jesukristo makatabang kanato nga masunod ang tambag ni Pablo: “Busa, maingon sa inyong pagdawat kaniadto kang Kristo Jesus nga Ginoo, padayon kamo sa pagkinabuhi diha kaniya:” (Mga Taga-Colosas 2:6). Unsaon nato sa pagsuporta sa usag usa diha sa atong mga paningkamot nga masunod ang Manluluwas ug dili ang sayop nga kalibutanong mga tradisyon?

Awhaga ang Pagkat-on diha sa Panimalay

Mibati ba sukad ang mga sakop sa imong klase nga gilutos tungod kay mituo sila sa ebanghelyo? Sultihi sila nga ang 1 ug 2 Mga Taga-Tesalonica naglangkob sa tambag nga gihatag ni Pablo ngadto sa mga Santos kinsa nagpakabuhi taliwala sa grabe nga pagpanglutos ug nagpabiling matinud-anon.

Dugang nga mga Kapanguhaan

Mga Taga-Filipos; Mga Taga-Colosas

Kalinaw nga lapaw pa sa tanang pagpanabut.

Samtang nag-alagad isip sakop sa Seventy, si Elder Jay E. Jensen mipaambit niining kasinatian:

“Ang among apong lalaki nga si Quinton gipanganak nga may daghang depekto sa pagkatawo ug nabuhi tulo ka semana sa wala pa mag-usa ka tuig, diin nianang panahona sulod-gawas siya sa ospital. Si Sister Jensen ug ako nagpuyo sa Argentina nianang higayuna. Gusto gayud namo nga moadto didto aron makauban ang among mga anak aron sa paghupay kanila ug mahupay usab tungod nila. Mao kadto ang among apo nga gihigugma namo ug gusto namo nga mapaduol kaniya. Pag-ampo ra ang among mahimo, ug matinguhaon kaming mihimo niini!

“Si Sister Jensen ug ako nag-mission tour sa dihang nadawat namo ang balita nga si Quinton namatay. Nagbarug kami sa hallway sa meetinghouse ug naggakos ug mihupay sa usag usa. Ako mosaksi nganha kaninyo nga ang mga kasigurohan miabut kanamo gikan sa Espiritu Santo, usa ka kalinaw nga lapaw pa sa tanang pagpanabut ug nagpadayon hangtud niining adlawa (tan-awa sa Mga Taga-Filipos 4:7). Nasaksihan usab namo ang dili matukib nga gasa sa Espiritu Santo diha sa kinabuhi sa among anak nga lalaki ug umagad nga babaye ug sa ilang mga anak kinsa hangtud niining adlawa makasulti mahitungod nianang panahona uban sa ingon nga hugot nga pagtuo, kalinaw, ug kahupayan” (“Ang Espiritu Santo ug ang Pagpadayag,” Liahona, Nob. 2010, 78).

Ang mga baruganan sa ebanghelyo ug ang mga tradisyon sa mga tawo.

Si Elder Dallin H. Oaks mitino sa pipila ka kalibutanong mga tradisyon nga misukwahi sa mga kamatuoran sa ebanghelyo (tan-awa sa “Paghinulsol ug Kausaban,” Liahona, Nob. 2003, 37–40):

• Pagbaliwala sa balaod sa kaputli

• Dili kanunay ug dili aktibo nga pagtambong sa simbahan

• Mga pagsupak sa Pulong sa Kaalam

• Pagkadili-matinuoron

• Nangandoy alang sa “mga promosyon” diha sa mga posisyon sa Simbahan

• Usa ka kultura nga magsalig imbis indibidwal nga responsibilidad

Pagpalambo sa Atong Pagtudlo

Paggamit og musika. Ang sagradong musika nagdapit sa impluwensya sa Espiritu Santo. Makamugna kini og kahimtang sa balaang pagtahud ug makadasig og pasalig [commitment] ug aksyon. Ikonsiderar kon sa unsang paagi nga ang “magatudloay ug magatinambagay sa usag usa sa tanang kaalam, ug magaawit og mga salmo ug alawiton” mahimong kabahin sa inyong klase (Mga Taga-Colosas 3:16; tan-awa usab sa Pagtudlo sumala sa Pamaagi sa Manluluwas, 22).