Oktubre 21–27

1 ug 2 Mga Taga-Tesalonica

“Dili Unta kamo Makuyawan Pagdali, ni Makulbaan”

Si Alma nagtudlo, “Ayaw pagsalig ni bisan kinsa nga mahimo nga inyong magtutudlo ni inyong mag-alagad, gawas kon siya usa ka tawo sa Dios, naglakaw diha sa iyang mga pamaagi ug naghupot sa iyang mga sugo” (Mosiah 23:14). Unsa ang gisugyot niini nga kasulatan kon unsaon nimo pag-andam ang imong kaugalingon nga motudlo?

Irekord ang Imong mga Impresyon

Dapita ang Pagpaambit

Hatagi ang mga sakop sa klase og pipila ka minuto nga motan-aw sa daklit sa 1 ug 2 Mga Taga-Tesalonica ug mangita og bersikulo nga nakapadayeg kanila. Dapita sila nga ipaambit ang ilang mga bersikulo ngadto sa lain diha sa klase, ug dayon hangyoa ang pipila sa managpares nga ipaambit ang ilang nakat-unan gikan sa usag usa.

Itudlo ang Doktrina

1 Mga Taga-Tesalonica 1:5–8; 2:1–13

Ang mga tigpangalagad sa ebanghelyo mosangyaw uban sa kasinsero ug gugma.

• Gisugdan ni Pablo ang iyang Epistola ngadto sa Mga Taga-Tesalonica pinaagi sa pagpahinumdom sa mga Santos bahin sa paagi nga siya ug ang uban mipaambit sa ebanghelyo ngadto kanila. Mahimong usa kini ka maayong oportunidad alang sa mga sakop sa imong klase sa pagtimbang-timbang kon kumusta sila sa pagtudlo ug pagkat-on gikan sa usag usa. Mahimo nimong dapiton ang mga sakop sa klase nga mobasa sa 1 Mga Taga-Tesalonica 1:5–8; 2:1–13 ug motino sa mga baruganan nga may kalabutan sa pagsangyaw sa ebanghelyo sa epektibong paagi. Mahimo dayon nilang isulat ang mga pangutana base niining mga bersikulo nga makatabang kanila nga matimbang-timbang ang ilang mga paningkamot sa pagtudlo sa ebanghelyo ngadto sa uban. Sama pananglit, usa ka pangutana mahimong “Usa ba ko ka ehemplo sa mga butang nga akong nahibaloan?” (tan-awa sa 1 Mga Taga-Tesalonica 1:7). Sa unsang paagi nga ang pagsunod sa mga baruganan niining tudling makatabang kanato nga mas makapangalagad niadtong atong gitudloan?

• Ang pagbasa sa 1 Mga Taga-Tesalonica 1:5–8; 2:1–13 mahimong mopahinumdom sa mga sakop sa klase bahin sa Kristohanong mga magtutudlo kinsa nakaimpluwensya kanila sa positibong paagi “ingon sa amahan ngadto sa iyang mga anak” (1 Mga Taga-Tesalonica 2:11). Dapita ang mga sakop sa klase sa pagsiksik niining mga tudling aron makita ang kinaiya sa usa ka sinsero nga tigpangalagad ug ipahunahuna ang usa ka magtutudlo nga ilang nailhan kinsa mipakita niana nga kinaiya. Mahimo nimong hangyuon ang mga sakop sa klase nga maghimo og sulat o magmugna og usa ka award certificate alang sa magtutudlo nga ilang nahunahunaan. Awhaga sila nga ilakip diha sa sulat o sa award ang bersikulo gikan sa 1 Mga Taga-Tesalonica ug usa ka pagpasabut kon giunsa pagpakita sa magtutudlo kana nga bersikulo. Mahimo pa gani nga mobati sila nga madasig nga mohatag sa sulat o award ngadto sa tawo nga ilang gisulat.

1 Mga Taga-Tesalonica 3:9–13; 4:1–12

Samtang mosunod kita ni Jesukristo, mamahimo kitang balaan.

• Gitudloan ni Pablo ang mga Santos nga taga-Tesalonica nga “ang Dios wala magtawag kanato alang sa kahugawan, kondili sa kabalaanon” (1 Mga Taga-Tesalonica 4:7). Aron sa pagsugod sa diskusyon mahitungod sa pagkabalaan, ang imong tibuok klase o ang usa ka indibidwal mahimong mokanta sa “More Holiness Give Me [Dugang Kabalaan Hatagi Ako]” (Hymns,no. 131). Hangyoa ang mga sakop sa klase sa paghisgot sa mga hiyas sa pagkabalaan nga nahisgutan diha sa hymno nga importante alang kanila. Sa pagsugod og panaghisgutan mahitungod sa pagkabalaan, isulat sa pisara ang Dugang pagkabalaan ihatag kanako, dugang … , ug dapita ang mga sakop sa klase sa pagpangita og mga pulong gikan sa 1 Mga Taga-Tesalonica 3:9–13; 4:1–12 sa pagkompleto sa sentence. Unsaon man nato sa pagpalambo kini nga mga kinaiya?

• Alang sa uban, ang pagdapit nga mahimong balaan mahimong makahadlok. Mahimong makatabang kon ang mga sakop sa klase makasabut nga ang pagpalambo sa pagkabalaan usa ka hinay-hinay nga proseso nga nagkinahanglan kanato “sa paghimo niini sa labi pa gayud” paglabay sa panahon (1 Mga Taga-Tesalonica 4:10). Sa paghulagway niini nga proseso, mahimo nimong dapiton ang usa ka sakop sa klase sa paghisgot bahin sa talento o kalampusan nga nagkinahanglan og makanunayong paningkamot paglabay sa panahon, sama sa paghimo og quilt o pagtukar og instrumento sa musika. Sa unsang paagi nga susama kini sa proseso sa pagkahimong balaan? Dapita ang mga sakop sa klase sa pagribyu sa 1 Mga Taga-Tesalonica 3:9–13; 4:1–12 ug sa pagpaambit og mga ideya mahitungod sa paningkamot nga gikinahanglan aron mahimong balaan sa mga paagi nga gihulagway ni Pablo. Unsa ang nakatabang kanato nga mouswag ngadto sa pagkabalaan?

1 Mga Taga-Tesalonica 4:11–12; 2 Mga Taga-Tesalonica 3:7–13

Kinahanglan kitang motrabaho aron makasangkap sa atong kaugalingon ug niadtong nanginahanglan.

• Ang mga pangutana sama sa mosunod makapadasig og panaghisgutan mahitungod sa tambag ni Pablo kalabut sa pagtrabaho: Unsa man ang mga sangputanan sa pagkatapulan? Unsa kaha ang gipasabut ni Pablo sa mga pulong nga “mahilom” ug “kamalinawon”? (1 Mga Taga-Tesalonica 4:11; 2 Mga Taga-Tesalonica 3:12). Mahimo nimong isulat ang mga pangutana sama niini diha sa pisara nga pamalandungan sa mga sakop sa klase samtang magbasa sila sa 1 Mga Taga-Tesalonica 4:11–12 ug 2 Mga Taga-Tesalonica 3:7–13. Dapita sila sa paghisgot niining mga pangutana nga magpares, sa ginagmay nga grupo, o isip usa ka klase. Unsa ang ubang mga kasulatan nga makatabang kanato nga masabtan ang kaimportante sa pagtrabaho ug sa mga peligro sa pagkatapulan? (tan-awa ang mga gisugyot diha sa “Dugang nga mga Kapanguhaan”).

2 Mga Taga-Tesalonica 2

Ang apostasiya kinahanglang mag-una sa Ikaduhang Pag-anhi ni Jesukristo.

• Ang pagsabut sa Dakong Apostasiya makapalig-on sa mga pagpamatuod sa mga sakop sa imong klase bahin sa Pagpahiuli sa ebanghelyo ni Jesukristo. Ang outline karong semanaha sa Dali, Sunod Kanako—Alang sa mga Indibidwal ug mga Pamilya maglakip sa pipila ka kapanguhaan mahitungod sa Apostasiya. Mahimo usab nimong dapiton ang pipila ka sakop sa klase nga motungha nga andam nga mopaambit og mga hunahuna gikan sa ilang pagtuon niining mga kapanguhaan, o mahimo ninyo kining tun-an ug hisgutan nga dungan diha sa klase.

• Mahimong makatabang ang paghisgot sa pipila ka simbolo nga gigamit sa mga propeta sa paghulagway sa Apostasiya, sama sa pagsupil (tan-awa sa 2 Mga Taga-Tesalonica 2:3), kagutmanan (tan-awa sa Amos 8:11–12), mabangis nga mga lobo nga mosulod sa panon (tan-awa sa Mga Buhat 20:28–30), ug nanagkatol nga mga dalunggan (tan-awa sa 2 Timoteo 4:3–4). Ikonsiderar ang pagpares-pares sa mga sakop sa klase ug hangyoa sila sa pagbasa og usa o dugang pa niining mga kasulatan (o uban pa nga imong mapilian) ug ihulagway kon unsay gitudlo sa mga bersikulo mahitungod sa Dakong Apostasiya. Unsa man ang gitudlo sa mga propeta mahitungod sa Apostasiya ug sa mamahimong epekto niini?

• Aron matabangan ang mga sakop sa klase nga makakat-on og dugang mahitungod sa Dakong Apostasiya, dapita sila sa paghunahuna nga sila adunay higala nga wala makasabut sa panginahanglan alang sa pagpahiuli sa ebanghelyo. Paghimo og duha ka kolum nga tsart diha sa pisara nga dunay label nga Mga Hinungdan sa Apostasiya ug Mga Epekto sa Apostasiya. Dapita ang mga sakop sa klase sa pagsiksik sa seksyon nga giulohan og “Ang Dakong Apostasiya” diha sa Isangyaw ang Akong Ebanghelyo (pahina 41) nga magpares o sa ginagmay nga mga grupo, nga mangita sa mga hinungdan ug mga epekto sa Apostasiya nga isulat diha sa pisara. Unsa nga mga ideya gikan niining tsart ang ilang magamit aron matabangan ang ilang higala nga makasabut sa panginahanglan alang sa Pagpahiuli?

• Ang imong klase makabenepisyo ba tungod sa paghisgot kon unsaon pagpalayo sa atong kaugalingon gikan sa “pagsupil”? Mahimo nimo silang dapiton sa pagsiksik sa 2 Mga Taga-Tesalonica 2 ug mangita og tambag nga ilang mahatag sa usa ka higala nga makatabang kaniya aron malikayan ang personal nga apostasiya.

Awhaga ang Pagkat-on diha sa Panimalay

Aron madasig ang mga sakop sa klase nga magbasa sa 1 ug 2 Timoteo, Tito, ug Filemon karong semanaha, dapita sila sa paghunahuna nga nakadawat sila og personal nga sulat gikan sa usa ka Apostol nga naglangkob og tambag kon unsaon pagtuman sa ilang mga calling sa Simbahan. Isugyot nga hunahunaon nila ang ilang mga calling samtang magbasa niining personal nga mga sulat gikan ni Pablo ngadto sa nag-unang mga lider sa Simbahan.

Dugang nga mga Kapanguhaan

1 ug 2 Mga Taga-Tesalonica

Mga kasulatan mahitungod sa pagtrabaho ug pagkatapulan.

• Genesis 3:19

• Mateo 21:28–32

• Mosiah 2:10–16

• Doktrina ug mga Pakigsaad 42:42; 58:27; 60:13; 75:29

Mga video mahitungod sa Apostasiya sa LDS.org.

Pagpalambo sa Atong Pagtudlo

Paggamit og lahi-lahing mga pamaagi. Mahimong sayon ra nga makomportable sa usa ka partikular nga estilo sa pagtudlo, apan ang lain-laing mga pamaagi sa pagtudlo makaabut sa lain-laing mga sakop sa klase. Pangita og mga paagi nga malahi-lahi ang imong pamaagi sa pagtudlo, sama sa paggamit og mga video, artwork, o musika o paghatag og mga oportunidad sa mga sakop sa klase nga makatudlo (tan-awa sa Pagtudlo sumala sa Pamaagi sa Manluluwas, 22).