“Oktubre 28–Nobyembre 3. 1 ug 2 Timoteo; Tito; Filemon: ‘Alang sa mga Magtutuo, Pagkinabuhi ingon nga Panig-ingnan’” Dali, Sunod Kanako—Alang sa Sunday School: Bag-ong Tugon 2019 (2019)
“Oktubre 28–Nobyembre 3. 1 ug 2 Timoteo; Tito; Filemon,” Dali, Sunod Kanako—Alang sa Sunday School: 2019
Oktubre 28–Nobyembre 3
1 ug 2 Timoteo; Tito; Filemon
“Alang sa mga Magtutuo, Pagkinabuhi ingon nga Panig-ingnan”
Basaha ang 1 ug 2 Timoteo; Tito; ug Filemon nga maghunahuna sa mga sakop sa imong klase. Ang mga hunahuna ug mga impresyon nga moabut makatabang kanimo sa paggiya sa mga sakop sa klase ngadto sa may kalabutan nga mga tudling sa kasulatan ug sa pagdala sa Espiritu ngadto sa inyong classroom.
Irekord ang Imong mga Impresyon
Dapita ang Pagpaambit
Mahimong makatabang sa mga sakop sa klase nga madungog ang usag usa nga maghisgot mahitungod sa ilang mga kalampusan ug mga hagit sa pagtuon sa mga kasulatan, sa indibidwal nga paagi ug isip mga pamilya. Ikonsiderar ang pagsugod sa klase pinaagi sa pagdapit sa mga sakop sa klase nga maghisgot kon unsay maayong nahitabo sa ilang pagtuon sa kasulatan.
Itudlo ang Doktrina
Ang pagsabut sa tinuod nga doktrina makatabang kanato nga malikayan ang pagkalingla.
-
Ang mga sakop sa imong klase nagpuyo sa panahon nga daghang sayop nga mga doktrina ang gitudlo. Sila si Timoteo ug Tito nagpuyo usab sa ingon nga panahon, mao nga tingali ang tambag ni Pablo ngadto kanila makabenepisyo sa mga sakop sa imong klase. Ang ubang mga tudling naglangkob sa tambag ni Pablo nga makita diha sa “Dugang nga mga Kapanguhaan.” Mahimo nimong i-assign ang matag sakop sa klase sa pagbasa sa usa niining mga tudling ug sa pagpaambit sa unsay iyang nakat-unan mahitungod sa kaimportante sa tinuod nga doktrina (tan-awa usab sa Alma 31:5).
Kon kita “[mga] ehemplo sa mga tumutuo,” magiyahan nato ang uban ngadto sa Manluluwas ug sa Iyang ebanghelyo.
-
Posible kini nga ang mga miyembro sa imong klase wala makaamgo sa gahum sa maayong ehemplo nga ilang gipakita. Ikonsiderar ang pagdapit kanila nga maghisgot kon sa unsang paagi nga ang mga tawo nga ilang nailhan, lakip na ang pipila ka isigka sakop sa klase, nahimong mga ehemplo nga mga disipulo ni Kristo. Mahimong makatabang ang panaghisgutan kon ilista nimo sa pisara ang mga pulong diha sa bersikulo 12 nga naghulagway kon sa unsang paagi kita angayang mahimong ehemplo—sinultihan, paggawi (nga mahimong nagpasabut usab og pamatasan o kinaiya), gugma, espiritu, pagtuo, ug kaputli. Ang mga sakop sa klase makahisgot kon sa unsang paagi kita mamahimong mga ehemplo sa matag usa niining mga paagi.
“Kay kita wala sa Dios hatagig espiritu sa katalaw; kondili sa espiritu sa gahum, ug sa gugma, ug sa pagpugong sa kaugalingon.”
-
Sa outline karong semanaha sa Dali, Sunod Kanako—Alang sa mga Indibidwal ug mga Pamilya, ang mga sakop sa imong klase gidapit nga tan-awon diha sa 2 Timoteo ang tambag nga gihatag ni Pablo kang Timoteo sa pagdasig kaniya diha sa iyang pangalagad. Hangyoa ang mga sakop sa klase nga ipaambit ang bisan unsang mga ideya nga ilang nakit-an, o mahimo nimo silang hatagan og pipila ka minuto aron makita ug mapaambit ang tambag ni Pablo (ang kapitulo 1 adunay maayong mga ehemplo). Mahimo usab silang mopaambit og kasinatian sa dihang gitabangan sila sa Dios nga mabuntog ang ilang mga kahadlok ug gihatagan sila og “espiritu sa … gahum, ug sa gugma, ug sa pagpugong sa kaugalingon” (2 Timoteo 1:7).
Ang pagtuon sa mga kasulatan makatabang kanato sa pagbuntog sa mga peligro sa katapusang mga adlaw.
-
Human pasidan-i si Timoteo mahitungod sa “mga panahon nga malisud” nga moabut, mipamatuod si Pablo bahin sa gahum ug sa kaimportante sa mga kasulatan (tan-awa sa 2 Timoteo 3:1, 14–17). Sa pagsugod og panaghisgutan mahitungod sa kaimportante sa mga kasulatan sa lisud nga mga panahon, mahimo nimong dapiton ang mga sakop sa klase sa pagribyu sa paghulagway ni Pablo bahin sa mga kakuyaw sa katapusang mga adlaw nga makita diha sa 2 Timoteo 3:1–7. Dayon mahimo silang mosiksik ug mopaambit og mga kasulatan nga nakatabang kanila sa pagbantay batok sa mga kakuyaw sama niini (ang ubang mga ehemplo nalista diha sa “Dugang nga mga Kapanguhaan”). Sa unsang paagi nga ang atong pagtuon sa mga kasulatan makapanalipod kanato gikan sa mga kagubot sa kalibutan karon?
-
Ang pagtuon sa tambag ni Pablo mahitungod sa gahum sa mga kasulatan mahimong usa ka oportunidad aron madasig ang usag usa sa mga sakop sa klase sa ilang mga paningkamot sa pagtuon sa pulong sa Dios. Tingali ang mga sakop sa klase mahimong mobasa sa 2 Timoteo 3:14–17 ug motino sa mga panalangin ug mga proteksyon nga moabut tungod sa pagtuon sa mga kasulatan. Mahimo dayon silang mopaambit og mga kasinatian sa dihang kining mga panalangin natuman sa ilang kinabuhi tungod sa ilang pagtuon sa kasulatan. Mahimo usab nimong hatagan og pipila ka gutlo ang mga sakop sa klase nga mamalandong kon unsay ilang mabuhat aron makabaton og dugang nga makahuluganong mga kasinatian sa mga kasulatan, sa indibidwal nga paagi ug isip mga pamilya.
Ang mga sumusunod ni Kristo mopasaylo sa usag usa.
-
Sa dili pa ka magsugod og panaghisgutan mahitungod sa Epistola [Sulat] ngadto kang Filemon, mahimo nimong hangyuon ang usa ka sakop sa klase nga ipaambit ang pipila ka impormasyon mahitungod ni Filemon ug sa iyang sulugoon nga si Onesimo (adunay mubong paghulagway sa outline karong semanaha diha sa Dali, Sunod Kanako—Alang sa mga Indibidwal ug mga Pamilya). Dayon mahimo nimong bahinon ang imong klase ngadto sa duha ka grupo ug hatagan ang matag grupo og usa sa mosunod nga mga pangutana: Unsa nga mga pagkasusama ang inyong nakita tali sa unsay andam nga buhaton ni Pablo alang kang Onesimo ug unsay andam nga gibuhat sa Manluluwas alang kanato? Samtang morag lisud alang kang Filemon nga mapasaylo ang iyang sulugoon nga milayas, sa unsang paagi nga ang ebanghelyo ni Jesukristo mihimo sa pagpasaylo nga mas sayon? Human mapaambit sa mga grupo ang unsay ilang nakat-unan, ikonsiderar ang pagdapit sa mga sakop sa klase nga ipaambit ang mga tudling sa kasulatan o mga kasinatian nga nakatabang kanila nga mas masabtan ang pagpasaylo. Ang mensahe ni Elder Kevin R. Duncan diha sa “Dugang nga mga Kapanguhaan” mahimong makatabang niini nga panaghisgutan.
Awhaga ang Pagkat-on diha sa Panimalay
Aron madasig ang mga sakop sa klase nga magbasa sa Sulat ngadto sa Mga Hebreohanon, pangutan-a sila kon nakaila ba sila og tawo nga mibati nga ang Dios anaa sa layo, dili personal, o dili maduol. Sultihi sila nga makakita sila og mga bersikulo diha sa Mga Hebreohanon 1–6 nga ilang mapaambit sa usa ka tawo aron ipakita nga ang Dios nga Amahan ug si Jesukristo maloloy-on nga mga Binuhat kinsa gustong motabang kanato kon mag-antus kita.
Dugang nga mga Kapanguhaan
Ang tambag ni Pablo mahitungod sa tinuod nga doktrina.
Mga kasulatan nga manalipod kanato batok sa mga kakuyaw sa katapusang mga adlaw nga gihulagway diha sa 2 Timoteo 3:2.
|
Mga Kakuyaw sa Katapusang mga Adlaw |
Mga Kasulatan Nga Manalipod Kanato |
|---|---|
Mga Kakuyaw sa Katapusang mga Adlaw Mahigugmaon sa ilang kaugalingon | Mga Kasulatan Nga Manalipod Kanato |
Mga Kakuyaw sa Katapusang mga Adlaw Pagkamaibugon | Mga Kasulatan Nga Manalipod Kanato |
Mga Kakuyaw sa Katapusang mga Adlaw Mga Hambogiro | Mga Kasulatan Nga Manalipod Kanato |
Mga Kakuyaw sa Katapusang mga Adlaw Mapagarbuhon | Mga Kasulatan Nga Manalipod Kanato |
Mga Kakuyaw sa Katapusang mga Adlaw Mga tigpanamastamas | Mga Kasulatan Nga Manalipod Kanato |
Mga Kakuyaw sa Katapusang mga Adlaw Masukihon sa mga ginikanan | Mga Kasulatan Nga Manalipod Kanato |
Mga Kakuyaw sa Katapusang mga Adlaw Dili mapasalamaton | Mga Kasulatan Nga Manalipod Kanato |
Mga Kakuyaw sa Katapusang mga Adlaw Dili balaan | Mga Kasulatan Nga Manalipod Kanato |
Ang makaayo nga haplas sa Pag-ula sa Manluluwas makatabang kanato nga mapasaylo ang uban.
Si Elder Kevin R. Duncan nagtudlo:
“Walay tawo nga nabuhi kinsa, sa usa o laing higayon, dili mahimong biktima sa dinanghag nga mga lihok, makapasakit nga pamatasan, o gani sa makasasala nga kinaiya sa laing tawo. Mao kana ang usa ka butang nga komon kanatong tanan.
“Maayo gani, ang Dios, sa Iyang gugma ug kalooy alang sa Iyang mga anak, miandam og paagi sa pagtabang kanato sa paglawig niining usahay gubot nga mga kasinatian sa kinabuhi. Siya mihatag og kaikyasan alang sa tanan nga nahimong biktima sa mga kasaypanan sa uban. Mitudlo Siya kanato nga makapasaylo kita! …
“Daghang katuigan ang milabay, samtang nag-ayo ko og koral, nasugsug ang akong tudlo. Misulay ko sa pagkuha sa sugsug ug nagtuo ko nga nakuha na kini, apan wala pa diay. Paglabay sa panahon, ang panit mitubo ibabaw sa sugsug, nga mihulma og burot sa akong tudlo. Makahasol kini ug usahay sakit.
“Paglabay sa katuigan nakahukom ko nga dunay buhaton niini. Ang akong gibuhat mao lang ang pagbutang og haplas sa burot ug pagtabon niini og bendahe. Gibalik-balik ko kini nga proseso sa makadaghan. Dili mo kahunahuna sa akong katingala sa dihang usa ka adlaw, sa akong pagtangtang sa bendahe, ang sugsug migula gikan sa akong tudlo.
“Ang haplas mipahumok sa panit ug mihimo og agianan sa mismong butang nga maoy hinungdan sa sakit sulod sa daghang katuigan. Sa dihang natangtang na ang sugsug, dali nga naayo ang tudlo, ug hangtud ning adlawa, walay nagpabiling ebidensya sa bisan unsa nga kadaut.
“Sa samang paagi, ang dili mapasayloon nga kasingkasing naghambin og wala kinahanglana nga hilabihang kasakit. Kon atong gamiton ang makaayo nga haplas sa Pag-ula sa Manluluwas, Siya mopahumok sa atong kasingkasing ug motabang kanato sa pag-usab. Siya maka-alim sa samaran nga kalag (tan-awa sa Jacob 2:8)” (“Ang Makaalim nga Haplas sa Pagpasaylo,” Liahona, Mayo 2016, 33).
Pagpalambo sa Atong Pagtudlo
Ang espiritwal nga paglambo mahitabo diha sa panimalay. Makauban nimo ang mga sakop sa imong klase sulod lamang sa mubo nga panahon matag Dominggo. Atol sa nahabiling mga adlaw sa semana, daghan kanila ang adunay makahuluganong espiritwal nga mga kasinatian. Ipangutana kanang makapadasig kanila sa pagpaambit sa unsay ilang nakat-unan sa gawas sa klase. (Tan-awa sa Pagtudlo sumala sa Pamaagi sa Manluluwas, 18.)