Balsamo sa Galaad, ni Anne Henrie

Nobyembre 4–10

Mga Hebreohanon 1–6

Si Jesukristo, “ang Tuburan sa Dayong Kaluwasan”

Ikonsiderar ang pagpaambit ngadto sa imong mga sakop sa klase sa pipila ka impresyon nga imong nadawat gikan sa Espiritu Santo mahitungod sa Mga Hebreohanon 1–6. Ang pagbuhat sa ingon mahimong makapadasig kanila nga magtinguha sa kaugalingon nilang mga impresyon samtang magtuon sila sa mga kasulatan.

Irekord ang Imong mga Impresyon

Dapita ang Pagpaambit

Ang ubang mga sakop sa klase nga dili kanunayng mopaambit diha sa klase mahimong magkinahanglan lang og piho nga imbitasyon ug gamayng panahon nga mangandam. Mahimo nimong kontakon og sayo ang pipila kanila usa ka adlaw o duha ba ug hangyuon sila nga mangandam nga mopaambit og usa ka bersikulo gikan sa Mga Hebreohanon 1–6 nga makahuluganon ngadto kanila.

Itudlo ang Doktrina

Mga Hebreohanon 1–5

Si Jesukristo mao “ang tuburan sa dayong kaluwasan.”

• Unsaon nimo pag-awhag ang mga sakop sa klase sa pagpaambit og makahuluganong mga kasulatan mahitungod ni Jesukristo nga ilang nakit-an diha sa ilang personal ug pamilya nga pagtuon karong semanaha? Ikonsiderar ang paghimo og lima ka kolum diha sa pisara nga magrepresentar sa unang lima ka kapitulo sa Mga Hebreohanon. Dapita ang mga sakop sa klase nga mosulat diha sa tukma nga kolum sa mga pulong gikan niining mga kapitulo nga nagtudlo kanila mahitungod ni Jesukristo ug sa numero sa bersikulo kon asa kini makit-an. Sa unsang paagi nga ang pagkahibalo niining mga butanga mahitungod sa Manluluwas makaapekto sa atong pagtuo diha Kaniya ug sa kaandam nga mosunod Kaniya?

• Ang Mga Hebreohanon 1–5 naggamit og nagkadaiyang mga imahe sa paghulagway sa Manluluwas. Mahimo nimong gamiton kining mga imahe aron matabangan ang mga sakop sa klase nga mas molambo pa ang ilang pagsabut bahin sa Iyang misyon. Pananglitan, mahimo nimong kontakon ang ubang sakop sa klase pipila ka adlaw sa sayo pa ug hangyuon sila nga magdala sa klase og butang nga nagrepresentar sa usa niining mga paghulagway bahin ni Jesukristo o sa Iyang misyon gikan sa Mga Hebreohanon 1–5 (tan-awa ilabi na ang Mga Hebreohanon 1:3; 2:10; 3:1, 6; 5:9). Mahimo nilang ipasabut ngadto sa klase kon unsay gitudlo sa mga butang mahitungod ni Jesukristo ug basahon ang tukma nga bersikulo gikan sa Mga Hebreohanon. Sa unsang paagi nga ang pagkahibalo niining mga kamatuoran mahitungod sa Manluluwas makaimpluwensya sa atong kinabuhi?

Mga Hebreohanon 2:9–18; 4:12–16; 5:7–8

Giantus ni Jesukristo ang tanang butang aron masabtan Niya ug matabangan kadtong nag-antus.

• Mahimong dunay mga sakop sa imong klase nga nag-antus og mga pagsulay ug usahay mobati nga gisalikway ug wala nay paglaum. Tingali ang usa ka panaghisgutan bahin sa Mga Hebreohanon 2:9–18; 4:12–16; 5:7–8 makaugmad sa ilang pagtuo nga mahimo silang modangup ngadto sa Langitnong Amahan ug sa Manluluwas alang sa tabang. Usa ka paagi sa pagsugod sa maong panaghisgutan mao ang pagdapit sa mga sakop sa klase sa paghunahuna og tawo nga ilang nailhan nga nag-antus ug mahimong nawad-an na og paglaum. Unsa nga mga kamatuoran ang ilang makit-an niining mga bersikulo nga ilang mapaambit nianang tawhana? Ang mga sakop sa klase mahimo usab nga mopaambit kon giunsa sila paghupay ug pagsuporta sa Manluluwas. Ikonsiderar ang pagpaambit sa kinutlo ni Presidente John Taylor diha sa “Dugang nga mga Kapanguhaan” isip kabahin sa panaghisgutan.

• Ang Mga Hebreohanon 2:9–18; 4:12–16 makatabang usab sa mga tawo nga nakaobserbar sa pag-antus diha sa kalibutan ug naghunahuna kon nakabantay o nagpakabana ba kaha ang Dios. Tingali ang mga sakop sa klase mahimo nga mosiksik niining mga bersikulo aron makit-an ang mga kamatuoran nga makatabang sa maong mga pangutana. Unsay gitudlo niini mahitungod sa unsay reaksyon sa Manluluwas sa pag-antus sa katawhan? Mahimong makatabang usab ang pagdapit og mga sakop sa klase sa pagpaambit og mga ehemplo gikan sa mga kasulatan diin ang mga tawo gisuportahan ni Jesukristo diha sa ilang mga pag-antus (tan-awa sa “Dugang nga mga Kapanguhaan”). Hisguti og dungan kon unsay atong makat-unan kon sa unsang paagi makatabang ang Manluluwas kanato kon mag-atubang kita og lisud nga mga hagit.

Mga Hebreohanon 3:7–4:2

Ang mga panalangin sa Dios maanaa niadtong kinsa “wala mopatig-a sa [ilang] kasingkasing.”

• Ang Mga Hebreohanon 3 ug 4 naglangkob og usa ka pangamuyo ngadto sa mga Santos nga dili mopatig-a sa ilang kasingkasing ug sa ingon mosalikway sa mga panalangin nga gustong ihatag sa Dios ngadto kanila. Samtang ikaw ug ang imong klase magbasa sa Mga Hebreohanon 3:7–4:2, hisguti ang mga paagi nga ang mga kasinatian sa karaang mga Israelite magamit nato karon, ingon nga kini nagamit sa mga Hebreohanon sa nag-unang Simbahan (ikonsiderar ang pag-refer ngadto sa materyal sa pagtuon mahitungod niining mga bersikulo diha sa outline karong semanaha sa Dali, Sunod Kanako—Alang sa mga Indibidwal ug mga Pamilya). Unsay hinungdan nga ang mga tawo mopatig-a man sa ilang kasingkasing sa atong panahon? Unsa may atong mabuhat aron mapabilin nga humok ang atong kasingkasing ug monunot ngadto sa kabubut-on sa Ginoo? (tan-awa sa Ether 4:15; Alma 5:14–15).

Mga Hebreohanon 5:1–5

Kadtong moserbisyo diha sa gingharian sa Dios kinahanglang gitawag gayud sa Dios.

• Dili tanang sakop sa imong klase ang naghupot og priesthood, apan ang mensahe gikan sa Mga Hebreohanon 5 mahitungod sa mga naghupot sa priesthood nga gitawag sa Dios magamit sa tanan nga modawat og mga calling sa Simbahan. Aron matabangan ang imong klase nga makakat-on kon unsay kahulugan nga “sa Dios tinawag siya alang niini maingon kang Aaron,” ikonsiderar ang pagdapit kanila sa pagribyu sa istorya bahin ni Aaron nga midawat sa iyang tawag diha sa Exodo 4:10–16, 27–31; 28:1. Unsa nga mga ideya gikan niining istorya nga makatabang kanato aron masabtan ang Mga Hebreohanon 5:1–5? Kanus-a man nga ang mga sakop sa klase, lakip na ang mga lider sa ward, nakadawat og panghimatuod nga ang usa ka tawo gitawag sa Dios sa pagtuman og usa ka piho nga calling? Sa unsang paagi nga kanang panghimatuod nakatabang kanila nga mas makapaluyo sa usa ka tawo sa ilang calling? (Mahimo nimong hangyuon ang mga sakop sa klase nga dili isulti ang sensitibo nga mga detalye.) Mahimo usab nga dunay mga sakop sa klase nga makapamatuod nga gidasig sila sa Dios samtang ilang gituman ang kaugalingon nilang mga calling.

Awhaga ang Pagkat-on diha sa Panimalay

Nakasulay ba ang imong mga sakop sa klase nga mibati nga sila “mga dumuloong ug mga langyaw lamang dinhi sa yuta” (Mga Hebreohanon 11:13) tungod kay ang ilang mga gituohan lahi niadtong naglibut kanila? Sultihi sila nga samtang magbasa sila sa Mga Hebreohanon 7–13, makakita sila og mga ehemplo sa mga indibidwal kinsa matinud-anong midawat ug mihangup sa mga saad sa Dios bisan kon daghan sa mga naglibut kanila walay pagtuo.

Dugang nga mga Kapanguhaan

Mga Hebreohanon 1–6

Si Jesukristo nasayud kon unsay bation kon makasinati og pag-antus.

Si Presidente John Taylor nagtudlo: “Gikinahanglan nga sa dihang ang Manluluwas dinhi sa ibabaw sa yuta, nga siya ‘hinonoa nga usa siya nga sa tanang paagi gitintal ingon kanato,’ ug ‘mobati og kalooy sa atong kaluyahon,’ [tan-awa sa Mga Hebreohanon 4:15] nga makasabut sa mga kahuyang ug kalig-on; sa mga kahingpitan ug mga pagkadili hingpit sa ubos nga pagkapukan sa tawhanong kinaiya; ug ingon nga nakatuman sa butang nga siya mianhi dinhi sa kalibutan aron sa pagbuhat, nga nakigbisog sa kamaut, kadautan, kahuyang, ug kabuang sa tawo—nga nakasugat sa tintasyon ug sa pagsulay sa iyang tanang nagkalain-laing mga matang, ug nakabuntog, siya nahimong ‘Usa ka matinud-anong kasaligang labawng sacerdote’ [tan-awa sa Mga Hebreohanon 2:17] sa pagpangamuyo alang kanato sa walay katapusang gingharian sa iyang Amahan. Siya nasayud unsaon sa pagbana-bana, ug pagbutang og tukma nga bili diha sa tawhanong kinaiya, kay siya, ingon nga nabutang sa sama nga kahimtang sama kanato, nasayud unsaon sa pagdala sa atong mga kahuyang ug mga balatian, ug sa hingpit makasabut sa giladmon, sa gahum, ug kalig-on sa mga kasakit ug sa mga pagsulay nga sagubangon sa mga tawo niining kalibutana, ug sa ingon makasabut ug pinaagi sa kasinatian, siya makaantus kanila isip usa ka amahan ug usa ka magulang nga igsoon” (Mga Pagtulun-an sa mga Presidente sa Simbahan: John Taylor [2001], 251–52).

Mga ehemplo sa kasulatan bahin sa mga tawo nga gihupay ni Jesukristo.

• Juan 8:1–11: Gihupay sa Ginoo ang babaye nga nakasala sa pagpanapaw.

• Juan 11:1–46: Gihupay sa Ginoo sila si Maria ug Marta human sa kamatayon sa ilang igsoon, nga si Lazaro.

• Enos 1:4–6: Gipasaylo sa Ginoo ang mga sala ni Enos ug gitangtang ang kahasol sa iyang tanlag.

• Mosiah 21:5–15: Gipahumok sa Ginoo ang kasingkasing sa mga Lamanite aron mapagaan nila ang mga palas-anon sa katawhan ni Limhi.

• Mosiah 24:14–15: Gipagaan sa Ginoo ang mga palas-anon sa katawhan ni Alma.

• Ether 12:23–29: Ang mga pulong sa Ginoo mihupay ni Moroni.

• 3 Nephi 17:6–7: Giayo sa Manluluwas ang mga Nephite sa ilang mga sakit.

• Doktrina ug mga Pakigsaad 121:7–10: Gihupay sa Ginoo si Joseph Smith (tan-awa usab sa DP 123:17).

Pagpalambo sa Atong Pagtudlo

Pagmugna og espiritwal nga kahimtang. Kon moawhag ka og malinawon, mahigugmaon nga kahimtang sa imong classroom, ang Espiritu mas daling makatandog sa kasingkasing niadtong imong gitudloan. Unsa ang imong mahimo aron sa pagdapit sa impluwensya sa Espiritu Santo diha sa imong classroom? Mahimo ba nimong usbon og han-ay ang mga lingkuranan o mogamit og mga hulagway o musika aron madapit ang Espiritu? (Tan-awa sa Pagtudlo sumala sa Pamaagi sa Manluluwas, 15