“Nobyembre 18–24. Santiago: ‘Tumana Ninyo ang Pulong, ug Dili Kay Magpaminaw Ra Kamo Niini’” Dali, Sunod Kanako—Alang sa Sunday School: Bag-ong Tugon 2019 (2019)
“Nobyembre 18–24. Santiago,” Dali, Sunod Kanako—Alang sa Sunday School: 2019
Si Abraham didto sa Kapatagan sa Mamre, ni Grant Romney Clawson
Nobyembre 18–24
Santiago
“Tumana Ninyo ang Pulong, ug Dili Kay Magpaminaw Ra Kamo Niini”
Sa dili pa magbasa niining outline, basaha ang Epistola [Sulat] ni Santiago ug hatagi og pagtagad ang mga pag-aghat nga imong madawat. Unsa nga mga baruganan ang imong makita nga makapanalangin ug makapalig-on sa mga sakop sa imong klase? I-refer ngadto niining outline alang sa dugang nga mga ideya sa pagtudlo.
Irekord ang Imong mga Impresyon
Dapita ang Pagpaambit
Dapita ang mga sakop sa klase sa pagpaambit og mga bersikulo gikan ni Santiago nga nakapadasig kanila aron mahimong “[magtutuman sa] pulong” (Santiago 1:22). Kon dili kini personal ra kaayo, mahimo usab silang mopaambit sa unsay ilang gibati nga kinahanglan nilang buhaton, sa indibidwal nga paagi o isip mga pamilya.
Itudlo ang Doktrina
Kon kita mangayo pinaagi sa hugot nga pagtuo, ang Dios mohatag sa madagayaon gayud.
-
Ang mga baruganan nga gitudlo diha sa Santiago 1:5–6 midala kang Joseph Smith ngadto sa usa ka makapausab sa kinabuhi nga espiritwal nga kasinatian, ug makapanalangin kini sa matag usa kanato sa pipila ka paagi. Tingali mahimo nimong isulat ang mga pangutana sama sa mosunod diha sa pisara ug hangyoa ang mga sakop sa klase nga hilum nga mamalandong niini: Unsa man ang impluwensya sa Santiago 1:5–6 diha sa imong kinabuhi? Unsa may natudlo kaninyo sa kasinatian ni Joseph Smith kalabut niining mga bersikulo mahitungod sa pagtinguha og kaalam mahitungod sa inyong kaugalingong mga pangutana? (tan-awa sa Joseph Smith—Kasaysayan 1:10–17). Unsa nga mga kasinatian ang nagtudlo kaninyo nga “ang pagpamatuod ni Santiago tinuod”? (Joseph Smith—Kasaysayan 1:26). Dapita ang mga sakop sa klase nga ipagkigbahin ang ilang mga hunahuna human mamalandong niining mga pangutana.
-
Mahimo tingali nga mogamit ang mga sakop sa klase sa Santiago 1:5–6 ngadto sa ilang kaugalingong mga pulong. Sa unsang paagi nga makatabang kini kanila aron mas masabtan kining mga bersikulo?
-
Aron matabangan ang mga sakop sa klase nga mahinumduman nga ang Dios misaad nga mohatag sa Iyang mga anak sa madagayaon gayud kon modangup sila Kaniya diha sa pag-ampo, hangyoa ang mga sakop sa klase nga mopaambit og mga kasinatian diin ang saad sa Santiago 1:5–6 natuman diha sa ilang kinabuhi. Unsay ilang nakat-unan samtang nangayo sila sa Langitnong Amahan sa pagpanghimatuod sa ilang kaugalingong mga pangutana mahitungod sa mga kamatuoran sa ebanghelyo?
Ang mapailubong paglahutay sa katapusan moresulta ngadto sa pagkahingpit.
-
Sa pagsugod og panaghisgutan bahin sa mga pagtulun-an ni Santiago mahitungod sa pagpailub diha niining mga bersikulo, mahimo nimong dapiton ang mga sakop sa klase nga mopaambit og mga kasinatian sa dihang kinahanglan nilang magmapailubon ug unsay ilang nakat-unan gikan niana nga kasinatian. Dayon mahimo silang mosiksik sa Santiago 1:2–4; 5:7–11 alang sa mga baruganan nga ilang magamit ngadto sa ilang mga kasinatian. Mahimo usab silang makakita og magamit nga mga baruganan diha sa mensahe ni Presidente Dieter F. Uchtdorf nga “Ipadayon ang Pagpailub” (Liahona, Mayo 2010, 56–59). Nganong gikinahanglan man ang pagpailub samtang maningkamot kita paingon sa pagkahingpit? Unsay nakatabang sa mga sakop sa klase nga mapalambo ang pagpailub sa ilang kinabuhi?
Santiago 1:3–8, 21–25; 2:14–26
“Patay ang pagtuo nga mahimulag sa binuhatan.”
-
Usa ka paagi sa paghisgot sa mga pagtulun-an ni Santiago mahitungod sa hugot nga pagtuo ug mga buhat mahimong mao ang pagbahin sa imong klase ngadto sa duha ka grupo—ang usa mosusi nganong ang hugot nga pagtuo nagkinahanglan og aksyon ug ang lain nganong ang atong mga aksyon nagkinahanglan og hugot nga pagtuo. Sa pagbuhat niini, mahimo nilang basahon ang Mateo 7:21–23; Santiago 1:6–8, 21–25; 2:14–26; ug Joseph Smith—Kasaysayan 1:19. Dayon ang matag grupo mahimong mopaambit sa unsay ilang nakit-an ug hisgutan nganong ang hugot nga pagtuo ug mga buhat gikinahanglan.
-
Aron matabangan ang mga sakop sa klase nga mas makapamalandong sa halandumon nga mga pulong nga “Patay ang pagtuo nga mahimulag sa binuhatan” (Santiago 2:26), mahimo nimong isulat ang mosunod nga sentence diha sa pisara: Ang hugot nga pagtuo kon walay binuhatan susama ra sa nga walay . Dapita ang mga sakop sa klase sa paghunahuna og mamugnaong mga paagi sa pagkompleto sa sentence, ug ipasulat nila ang ilang mga ideya diha sa pisara. Mahimong makabenepisyo usab sila tungod sa paghimo niining kalihokan kon magpares o sa ginagmay nga mga grupo. Ang istorya nga gisaysay ni Presidente Dieter F. Uchtdorf diha sa “Dugang nga mga Kapanguhaan” mahimong makadugang sa ilang panabut niining baruganan. Unsay atong mahimo aron magpadayon nga molihok sa atong hugot nga pagtuo diha kang Jesukristo?
Isip mga disipulo ni Jesukristo, kinahanglan natong higugmaon ang tanang tawo, bisan unsa pa ang ilang mga kahimtang.
-
Aron matabangan nga madasig ang mga sakop sa klase sa pagpakita og Kristohanong gugma ngadto sa tanan bisan unsa pa ang sitwasyon o makita sa gawas nga hitsura sa uban, mahimo nimong hangyuon ang mga sakop sa klase nga magpuli-puli sa pagbasa sa mga bersikulo gikan sa Santiago 1:9–11; 2:1–10; 5:1–6. Hisguti ang mga pangutana sama sa mosunod: Unsa man ang buot ipasabut sa “magbaton og respeto sa mga tawo”? (Santiago 2:9). Nganong usahay atong trataron kadtong kinsa adunay kwarta, kainila, o gahum nga lahi kay sa niadtong wala? Unsaon nato paglikay ang pagtratar sa uban nga lahi base sa unsay ilang mga kahimtang? Sa unsang mga paagi nga ang matinud-anong mga sumusunod sa Manluluwas mao gayud ang labing adunahan sa tanan? (tan-awa sa Santiago 2:5).
Ang mga pulong nga atong gigamit adunay gahum sa pagpasakit o sa pagpanalangin sa uban.
-
Ang gamhanang mga imahe nga gigamit ni Santiago makahatag og makatabang nga mga pahinumdom ug pagdasig nga mogamit sa mga pulong—nga gipamulong ug gisulat—sa pagbayaw sa uban. Ikonsiderar ang pagdapit sa mga sakop sa klase sa pagbasa sa Santiago 3 nga mangita sa mga imahe nga naghulagway kon giunsa paggamit ang pinulongan sa pagpasakit o sa pagpanalangin sa uban; ang ubang mga sakop sa klase mahimong malingaw nga magdrowing og mga hulagway niining mga imahe. Sa unsang paagi nga kining mga imahe naghulagway sa mga instruksyon ni Santiago niining kapitulo? Pananglitan, sa unsang paagi nga ang atong mga pulong mahimong sama sa usa ka kalayo? Unsa nga mga imahe ang mahunahunaan sa mga sakop sa klase nga nagpakita sa positibong gahum nga mahimo sa pinulongan? Mahimo nimong dapiton ang mga sakop sa klase sa pagpamalandong kon unsaon nila paggamit ang tambag ni Santiago.
Awhaga ang Pagkat-on diha sa Panimalay
Aron madasig ang mga sakop sa klase nga magbasa sa 1 ug 2 Pedro, dapita sila sa pagpangita sa doktrinal nga mga pagtulun-an diha niining mga sulat nga mas masabtan tungod sa Pagpahiuli sa ebanghelyo. Sa unsang paagi nga kining mga pagtulun-an makapamatuod sa propetikanhong misyon ni Joseph Smith?
Dugang nga mga Kapanguhaan
Hugot nga pagtuo ug buhat.
Si Presidente Dieter F. Uchtdorf nagtudlo:
“Dunay usa ka karaan nga sugilanon sa mga Judeo mahitungod sa usa ka tigbuhat og sabon kinsa wala motuo og Dios. Usa ka adlaw samtang naglakaw siya kauban sa rabbi, miingon siya, “Dunay butang nga dili nako masabtan. Duna kitay relihiyon sulod na sa liboan nga katuigan. Apan bisan asa ka motan-aw naa ang dautan, korapsyon, pagkadili matinuoron, kadili makiangayon, kasakit, kagutom, ug kasamok. Makita nga ang relihiyon wala gayud mipalambo sa kalibutan. Mao nga mangutana ko nimo, unsa may nakaayo niini?’
“Ang rabbi wala dayon motubag apan padayon sa paglakaw kauban ang tigbuhat og sabon. Sa katapusan sa miabut sila sa usa ka dulaanan diin ang mga bata, napuno sa abug, nagdula sa yuta.
“‘Dunay butang nga wala nako masabti,’ miingon ang rabbi. ‘Tan-awa kanang mga bata. Duna kitay sabon sulod sa daghang katuigan, ug apan kanang mga bataa nabuling lang gihapon. Unsay kaayohan sa sabon?’
“Ang tigbuhat og sabon mitubag, ‘Apan rabbi, dili makiangayon nga basulon nato ang sabon niining bulingit nga mga bata. Ang sabon kinahanglang gamiton sa dili pa matuman ang katuyoan niini.’
“Ang rabbi mipahiyom ug miingon, ‘Eksakto gayud’ (“Ang mga Makiangayon Magpakabuhi pinaagi sa Hugot nga Pagtuo,” Liahona, Abr. 2017, 4).
Pagpalambo sa Atong Pagtudlo
Awhaga ang pag-establisar og matinahurong palibut. “Tabangi ang imong mga sakop sa klase nga makasabut nga ang matag usa kanila makaapekto kon unsay bation sa klase. Awhaga sila nga motabang kanimo sa pag-establisar og usa ka bukas, mahigugmaon, ug matinahurong palibut aron ang tanan mobati nga luwas sa pagpaambit sa ilang mga kasinatian, mga pangutana, ug mga pagpamatuod” (Pagtudlo sumala sa Pamaagi sa Manluluwas, 15).