Ko ha Faiako Koe ʻi he Siasi ʻo Sīsū Kalaisí

Kuo ui koe ʻe he ʻOtuá ke akoʻi ʻEne fānaú ʻi he founga ʻa e Fakamoʻuí. Naʻe vaheʻi koe ki he uiuiʻi ko ʻení ʻe he mafai ʻo Hono lakanga fakataulaʻeiki toputapú. Neongo kapau ʻoku ʻikai ko ha faiako taukei koe, ʻe foaki atu ʻe he Tamai Hēvaní ʻa e ivi tākiekina mo e mālohi ʻo e Laumālie Māʻoniʻoní ʻi hoʻo moʻui tāú, lotu maʻu peé, mo hoʻo ako e folofolá (vakai, 2 Nīfai 33:1).

Ko kinautolu ʻoku fakafalala atu ke ke tokangaʻí ko ha fānau ia ʻa e ʻOtuá, pea ʻokú Ne ʻafioʻi e meʻa ʻoku nau fie maʻú mo e founga ke tokoniʻi ai kinautolu ki he lelei tahá. ʻE fakahinohinoʻi koe ʻo fakafou ʻi he Laumālié, lolotonga hoʻo teuteú mo hoʻo faiakó. Te Ne fakahā atu e meʻa ke ke lea ʻakí mo e meʻa ke ke faí.

Ko e taumuʻa mahuʻinga ʻo e ako ki he ongoongoleleí ke liliu ha ngaahi moʻuí. Ko hoʻo taumuʻa ko e faiakó ke tokoni kiate kinautolu ʻokú ke akoʻí, ke nau fai e meʻa kotoa pē te nau lava ke ului ai ki he ongoongolelei ʻo Sīsū Kalaisí–ko ha taumuʻa ʻoku ope atu ʻo fuoloa ange ʻi he taimi kalasí. Fakaafeʻi ʻa kinautolu ʻokú ke akoʻí ke longomoʻui ʻenau ako ki he ngaahi tefitoʻi moʻoni mo e tokāteline ʻo Sīsū Kalaisí mo ngāueʻi e ngaahi meʻa ne nau akó. Poupouʻi kinautolu ke fokotuʻu ʻenau ako fakataautaha mo fakafāmili ʻi tuʻa ʻi he kalasí ko e tefitoʻi meʻa mahuʻinga ʻo ʻenau ako ki he ongoongoleleí. ʻI heʻenau ngāue ʻi he tui ʻaki ʻenau ako fakafoʻituitui mo fakafāmilí, te nau fakaafeʻi ai e Laumālié ki heʻenau moʻuí pea mo tāpuekina kinautolu ʻo laka ange ʻi ha toe meʻa ʻe fai ʻe ha faiako.

Akoʻi pē ʻa e tokāteline ʻo e ongoongolelei ʻo Sīsū Kalaisi kuo toe fakafoki maí ʻo hangē ko ia ʻoku ʻi he folofolá pea mo e ngaahi lea ʻa e kau palōfita ʻi he ngaahi ʻaho kimui ní. ʻOku fakaafeʻi ʻe he tokāteline haohaoá—taʻengata, moʻoni taʻefeliliuaki naʻe akoʻi ʻe he ʻOtuá mo ʻEne kau tamaioʻeikí—e laumālié, mo maʻu e mālohi ke liliu e ngaahi moʻuí.

Ko e uiuiʻi ke faiakó ko ha falala toputapu ia, pea ʻoku angamaheni pē ke te ongoʻi lōmekina ʻi ha ngaahi taimi. Kae manatuʻi naʻe ui koe ʻe he ʻOtuá, pea he ʻikai te Ne teitei siʻaki koe. Ko e ngāue ʻeni ʻa e ʻEikí, pea ʻi hoʻomou ngāue ʻaki “homou lotó, iví, ʻatamaí mo e mālohí kotoa” (T&F 4:2), te Ne fakalahi homou iví, ngaahi meʻafoakí, mo e ngaahi talēnití, pea ʻe tāpuekina ʻe hoʻo fua fatongiá e moʻui ʻa kinautolu ʻokú ke akoʻí.